ទាហានខ្មែរដែលកំពុងឈរជើងនៅតំបន់ព្រំដែនថៃ បានអះអាងថា មានករណីទាហានខ្មែរនៅតំបន់មុំបី បានបោកគ្រាប់បែកដៃបណ្ដាលឱ្យមានទាហានស្លាប់ និងរងរបួសជាច្រើននាក់ កាលពីចុងខែសីហា។ ប្រភពបញ្ជាក់ថា ករណីកើតឡើងដោយសារទាហានខ្មែរមានវិបល្លាស ឬវិបត្តិផ្លូវចិត្តធ្ងន់ធ្ងរ ដែលបណ្ដាលមកពីអាកាសធាតុ កង្វះអាហារ បញ្ហាសុខភាព ភាពឯកោ និងខ្វះការយកចិត្តទុកដាក់ពីមេបញ្ជាការជាដើម។ ទោះជាយ៉ាងណា ទាហានបានអះអាងថា ករណីនេះត្រូវបានថ្នាក់លើលាក់បាំង ឬបំភ្លៃអង្គហេតុ ដើម្បីគេចវេះពីការទទួលខុសត្រូវ។
ទោះបីជាសំឡេងផ្ទុះអាវុធក្នុងសមរភូមិសង្គ្រាមនៅតាមព្រំដែនកម្ពុជា-ថៃ បានស្ងប់ស្ងាត់ជិតមួយឆ្នាំហើយក្ដី ក៏ព័ត៌មាននៃការពលីរបស់ទាហានខ្មែរដែលកំពុងឈរជើងនៅតាមព្រំដែន បានបែកធ្លាយជាញឹកញាប់។ ក្នុងនោះមានការផ្សព្វផ្សាយអំពីករណីផ្ទុះគ្រាប់បែកដៃដ៏រន្ធត់មួយ ដែលបានកើតឡើងនៅតំបន់មុំបី ខេត្តព្រះវិហារ ដែលបណ្ដាលឱ្យទាហានខ្មែរមួយក្រុមបានស្លាប់ និងរងរបួស។ ក៏ប៉ុន្តែអស់រយៈពេលជាច្រើនថ្ងៃមកហើយ ករណីនេះមិនត្រូវបានស្ថាប័នពាក់ព័ន្ធចេញមកបកស្រាយពីមូលហេតុពិតនោះឡើយ។
ទាហានខ្មែរម្នាក់ដែលកំពុងឈរជើងនៅតំបន់ព្រំដែន បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញឈ្មោះថា ហេតុការណ៍ផ្ទុះគ្រាប់បែកដៃនេះ បានកើតឡើងនៅតំបន់ទំនប់កង្កែប ក្នុងភូមិសាស្ត្រមុំបី កាលពីថ្ងៃទី២៩ ខែសីហា។ លោកបន្តថា ករណីនេះបង្កឡើងដោយទាហានម្នាក់ ដែលលោកអះអាងថា មានវិបត្តិផ្លូវចិត្ត និងស្ថិតក្នុងស្ថានភាពស្រវឹង បានបង្កជម្លោះជាមួយទាហានផ្សេងទៀត និងបានបោកគ្រាប់បែកដៃមួយគ្រាប់ បណ្ដាលឱ្យទាហានចំនួន ៣នាក់បានស្លាប់ និង២នាក់ទៀតរង របួស។
ទាហានខ្មែរ៖ «ខ្ញុំនិយាយបញ្ជាក់ រឿងហ្នឹងគឺមានជម្លោះផ្ទៃក្នុងអញ្ចឹងណា។ ពេលផឹកស៊ីទៅ ទាស់ពាក្យសម្ដីគ្នាទៅ ក៏វាយតប់គ្នាទៅ។ អញ្ចឹងណា រឿងវាអញ្ចឹង»។
ទូរទស្សន៍អាស៊ីសេរីបានកំណត់អត្តសញ្ញាណទាហានដែលបានស្លាប់ក្នុងករណីផ្ទុះគ្រាប់បែកដៃនេះរួមមាន លោកអនុសេនីយ៍ឯក អ៊ឹម វាសនា ជាយោធាប្រចាំកងពលតូចអន្តរាគមន៍លេខ១២៨ ក្នុងយោធភូមិភាគទី១ និងលោកនាយទោ តុន រកា ជាជនជាតិដើម គ្រឹង ដែលមានតួនាទីជាបុគ្គលិកបញ្ជូនសារ ប្រចាំកងអនុសេនាតូច នៃកងពលលេខ១២៨។ ចំណែកទាហានដែលបានស្លាប់ម្នាក់ទៀត រួមទាំងអ្នករងរបួសចំនួន២នាក់នោះ ទូរទស្សន៍អាស៊ីសេរី មិនអាចកំណត់អត្តសញ្ញាណបាននៅឡើយ។ យ៉ាងណាក៏ដោយ ទាហានទាំងបីរូបដែលបានស្លាប់នេះ គឺជាកងកម្លាំងដែលបានឆ្លងកាត់សមរភូមិសង្គ្រាមតាមព្រំដែនចំនួន២លើក។
ទូរទស្សន៍អាស៊ីសេរី មិនអាចទាក់ទងមេបញ្ជាការកងពលតូចអន្តរាគមន៍លេខ១២៨ លោក មៀច សាមុត និងអ្នកនាំពាក្យក្រសួងការពារជាតិអ្នកស្រី ម៉ាលី សុជាតា ដើម្បីផ្ទៀងផ្ទាត់ព័ត៌មាន និងការបញ្ជាក់ជុំវិញរឿងនេះបានទេ នៅថ្ងៃទី៤ ខែកញ្ញា។
ជុំវិញករណីផ្ទុះគ្រាប់បែកដៃនៅតំបន់មុំបី នេះ ត្រូវបានមន្ត្រីមូលដ្ឋាន និងមេបញ្ជាការយោធាប្រចាំអង្គភាព ប្រកាសនៅក្នុងពិធីបុណ្យសពទាហានដែលបានស្លាប់នោះថា គឺបង្កឡើងដោយគ្រោះថ្នាក់ក្នុងពេលបំពេញបេសកកម្ម។
ទោះជាយ៉ាងណា ទាហានផ្នែកកោសលវិច័យម្នាក់ បានបង្ហើបប្រាប់ទូរទស្សន៍អាស៊ីសេរី ជាសំណេរតាមបណ្ដាញ តេឡេក្រាម ក្នុងលក្ខខណ្ឌមិនបញ្ចេញឈ្មោះថា សពទាហានទាំងបីរូប បានត្រូវរបួសដោយសារអំបែងគ្រាប់ស្ទើរសុសសាច់ និងមិនមានស្នាមវាយប្រហារដោយសារគ្រាប់កាំភ្លើងនោះឡើយ។
សេនាធិការយោធាម្នាក់ ដែលប្រចាំការនៅទិសតំបន់មុំបី បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញអត្តសញ្ញាថា ដោយទទួលស្គាល់ថា ទាហានខ្មែរមួយចំនួនដែលឈរជើងនៅខ្សែត្រៀមជួរមុខ បានកើតវិបល្លាសផ្លូវចិត្ត រហូតពួកគាត់បានផឹកស្រា និងជក់បារីកាន់តែច្រើនឡើង ដើម្បីកាត់បន្ថយភាពតានតឹង។ លោកបន្តថា កត្តាដែលនាំឱ្យទាហានខ្មែរកើតវិបត្តិផ្លូវចិត្តនេះ គឺបណ្ដាលមកពីការដាក់បញ្ជាពីថ្នាក់លើឱ្យឈរជើងរយៈពេលយូរ បណ្ដាលឱ្យពួកគេនឹករលឹកដល់គ្រួសារ កត្តាអាកាសធាតុត្រជាក់ បញ្ហាភាពឯកោ ជំងឺប្រចាំកាយ វិបត្តិគ្រួសារ បញ្ហាបំណុល និងសម្ពាធការងារជាដើម។ លោកអះអាងទៀតថា បញ្ហានេះបានបណ្ដាលឱ្យទាហានមួយចំនួន ធ្លាក់ខ្លួនឈឺ ខណៈខ្លះទៀតមានអារម្មណ៍តប់ប្រមល់ជាដើម។
ជុំវិញរឿងនេះ ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុឌ្ឍី មានប្រសាសន៍ថា យោធិនដែលមានបញ្ហាសតិអារម្មណ៍ និងវិបត្តិផ្លូវចិត្ត គួរតែត្រូវបានទទួលការព្យាបាលជាមុនសិន មុននឹងបញ្ជូនឱ្យទៅបំពេញបេសកកម្ម។ លោកស្នើឱ្យស្ថាប័នពាក់ព័ន្ធគួរតែយកចិត្តទុកដាក់ និងបំពាក់បំប៉នស្មារតី និងសុខភាពរបស់កងទ័ពនៅជួរមុខ និងដាក់ចេញនូវវិធានការដើម្បីឱ្យពួកគេកាត់បន្ថយការទទួលទានគ្រឿងស្រវឹង និងបារី ដែលជាកត្តានាំឱ្យប៉ះពាល់សុខភាព។
លោក អ៊ូច វុឌ្ឍី៖ «អញ្ចឹងទេ យើងអាចធ្វើសន្សឹមៗ ហើយត្រូវមានខាងអ្នកជំនាញ ដែលមានវិជ្ជាជីវៈត្រូវពន្យល់ប្រាប់គាត់ក្នុងការដែលគាត់សេពគ្រឿងស្រវឹង ផឹកគ្រឿងស្រវឹង និងជក់បារី។ អាហ្នឹងយើងមិនអាចកាត់ផ្ដាច់គាត់ដាច់ផឹងបានទេ យើងអាចឱ្យគាត់កំដរអារម្មណ៍ កំដរការកម្សាន្តជួបមិត្តភ័ក្ដិគាត់ ដើម្បីការសាមគ្គីភាពនៅក្នុងអង្គភាពរបស់គាត់នៅសមរភូមិហ្នឹង»។
ចំណែក ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ជំរុញឱ្យក្រសួងការពារជាតិ ស៊ើបអង្កេតករណីបំផ្ទុះគ្រាប់បែកដៃនៅតំបន់មុំបី និងករណីស្លាប់របស់ទាហានខ្មែរ ដែលឈរជើងនៅតាមព្រំដែនផ្សេងទៀតឱ្យមានតម្លាភាព ព្រោះបញ្ហានេះពាក់ព័ន្ធដល់ការកែទម្រង់វិស័យយោធារបស់កម្ពុជា។
លោក ម៉ែន ណាត៖ «វាមិនគួរណាដែលរដ្ឋាភិបាល មន្ត្រីធំៗនៅទីក្រុងភ្នំពេញហ្នឹងនាំគ្នាប្រព្រឹត្តតែអំពើពុករលួយកេងប្រវ័ញ្ចទៅលើខ្នងទាហានជួរមុខដែលខំព្យាយាមពលីជីវិតដោយសាររឿងអស់លោកហ្នឹងទេ ហើយដើម្បីការពារប្រយោជន៍ជាតិ និងទឹកដី វាត្រូវតែរដ្ឋាភិបាលកម្ពុជាយកចិត្តទុកដាក់ទៅលើវិស័យយោធាហ្នឹង ជាពិសេសទាហានដែលកំពុងមានវត្តមាននៅទីតាំងជាមួយនឹងសៀមឈ្លានពាន»។
នេះមិនមែនជាករណីទី១នោះទេ ដែលទាហានខ្មែរបានស្លាប់ ចាប់តាំងពីមានបទឈប់បាញ់ និងផ្អាកប្រយុទ្ធគ្នាជាមួយកងទ័ពថៃជិតមួយឆ្នាំមកនេះ។ ករណីស្លាប់ទាំងនោះ មានមួយចំនួនត្រូវបានគេអះអាងថា បណ្ដាលមកពីគ្រោះថ្នាក់ចរាចរ ជំងឺប្រចាំកាយ ការធ្វើអត្តឃាត និងឧបទ្ទវហេតុរាលកៃកាំភ្លើងជាដើម។
សព្វថ្ងៃនេះ ទាហានខ្មែរភាគច្រើនដែលឈរជើងនៅតាមតំបន់ព្រំដែន ជាញឹកញាប់បាននាំគ្នាត្អូញត្អែរនៅតាមបណ្ដាញសង្គមថា «ទាហានព្រៃភ្នំ ពិតជាលំបាកណាស់ដេកមិនគ្រប់ ហូបមិនគ្រាន់» និងខ្លះទៀតបានបង្ហាញពីវិបត្តិគ្រួសារ និងបញ្ហាជីវភាពជាដើម ខណៈក្រុមបញ្ជាការ និងមន្ត្រីយោធាគ្រាក់ៗ កំពុងរស់នៅក្នុងជីវភាពហ៊ឺហា សម្ញែងទ្រព្យសម្បត្តិ ឡានទំនើប វីឡាស្កឹមស្កៃ និងអាជីវកម្មខ្ទង់លានដុល្លារជាដើម៕
