កម្មកររោងចក្រ ឈី ហេង ស៊ីន (QI HENG XIN) ជិត១០០នាក់តវ៉ានៅមុខរោងចក្រ ទាមទារឲ្យក្រុមហ៊ុនទទួលយកពួកគេចូលធ្វើការវិញ។ កម្មករអះអាងថា ក្រុមហ៊ុនលើកហេតុផលមិនសមរម្យមកបញ្ឈប់ពួកគេ បន្ទាប់ពីកម្មករទាំងនោះចូលរួមបង្កើតសហជីពឯករាជ្យ ដើម្បីទាមទារសិទ្ធិជូនកម្មករ។ មន្ត្រីសិទ្ធិកម្មករទទូចឲ្យក្រសួងការងារតាមដាន និងចុះដោះស្រាយករណីនេះ ជាបន្ទាន់ ដើម្បីធានាថា កម្មករអាចប្រើប្រាស់សិទ្ធិរបស់ខ្លួនបានដោយគ្មានការរើសអើង។
នៅព្រឹកថ្ងៃទី១១ ខែកញ្ញា កម្មកររោងចក្រ ឈី ហេង ស៊ីន ជិត១០០នាក់ ប្រមូលគ្នាតវ៉ានៅមុខរោងចក្រស្ថិតនៅសង្កាត់រកាខ្ពស់ ក្រុងតាខ្មៅ ខេត្តកណ្ដាល ដើម្បីទាមទារឲ្យក្រុមហ៊ុនមួយនេះ ទទួលយកកម្មករចូលធ្វើការឡើងវិញ និងបើកសិទ្ធិឲ្យកម្មករបង្កើតសហជីពដោយសេរី មិនត្រូវរើសអើង និងបញ្ឈប់កម្មករបែបនេះនោះទេ ។ កម្មករអះអាងថា ក្រុមហ៊ុនបញ្ឈប់កម្មករមិនមានហេតុផលសមរម្យនោះឡើយ ពីព្រោះការបញ្ឈប់នេះគឺក្រោយកម្មករបង្កើតសហជីពឯករាជ្យនៅក្នុងរោងចក្រ។
តំណាងសហជីព លោកស្រី ឃុន សុផាត អះអាងប្រាប់ទូរទស្សន៍អាស៊ីសេរី នៅថ្ងៃទី១១ ខែកញ្ញាថា ក្រុមហ៊ុនបញ្ឈប់កម្មករ ក្រោមហេតុផលមិនមានការងារធ្វើ ប៉ុន្តែហេតុផលមួយនេះមិនត្រឹមត្រូវនោះឡើយ ពីព្រោះការបញ្ឈប់នេះ គឺកើតឡើងក្រោយកម្មករប្រមូលគ្នាបង្កើតសហជីពឯករាជ្យមួយនៅក្នុងក្រុមហ៊ុន ដើម្បីការពារសិទ្ធិកម្មករ កុំឲ្យមានការជិះជាន់ពីសំណាកនិយោជក។ លោកស្រីថា កម្មករទាមទារឲ្យរោងចក្រទទួលយកពួកគាត់ចូលធ្វើការវិញ និងមិនត្រូវរើសអើងពួកគាត់បង្កើតសហជីពឡើយ។
លោកស្រី ឃុន សុផាត៖ «ខ្ញុំគិតថាការបញ្ឈប់កម្មករនេះ ជាការរើសអើង ហើយវាអយុត្តិធម៌សម្រាប់ពួកខ្ញុំណាស់ អយុត្តិធម៌ខ្លាំងណាស់ ពីព្រោះរោងចក្រនេះ គាត់ធ្វើការគាប់សង្កត់កម្មករ ហើយមិនគោរពលក្ខខណ្ឌការងារនោះទេ ខ្ញុំបង្កើតទៅ ចេះតែប្រាប់កម្មករថា យើងធ្វើការនេះ យើងត្រូវទទួលបានអ្វីខ្លះ កម្មករទទួលបាន ដូចជា ការទូទាត់ប្រាក់បំណាច់ឆ្នាំ ឈប់សម្រាកលុយបាយថ្ងៃត្រង់ ថែមម៉ោងត្រូវទទួលបានប៉ុន្មាន ពេលគាត់ដឹងឮអញ្ចឹងទៅគាត់ក៏បញ្ឈប់ពួកខ្ញុំ អញ្ចឹងវាអយុត្តិធម៌សម្រាប់ពួកខ្ញុំ ហើយអយុត្តិធម៌សម្រាប់កម្មករកំពុងធ្វើការទៀត ពីព្រោះអស់អ្នកជួយគាត់ហើយ»។
កម្មកររោងចក្រ ឈី ហេង ស៊ីន លោក ប៊ុន ណាវីត បានរៀបរាប់ថា កម្មករដែលក្រុមហ៊ុនបញ្ឈប់ពួកគាត់សុទ្ធតែធ្វើការក្នុងរោងចក្រនេះយូរឆ្នាំមកហើយខណៈបញ្ឈប់ ការងារពួកគាត់កម្មករក្នុងរោងចក្រធ្វើការថែមម៉ោងរាល់ថ្ងៃ។
លោក ប៊ុន ណាវីត៖ «គ្នាខ្ញុំដែលស្និតស្នាលជាមួយសហជីព យកពួកគាត់ធ្វើការវិញទាំងអស់ ពីព្រោះពួកគាត់ធ្វើការយូរឆ្នាំ ហើយគាត់ចាស់ៗអស់ហើយ គាត់មិនដឹងទៅរកការងារធ្វើទៀតនោះទេ ពួកខ្ញុំទាមទារអត្ថប្រយោជន៍ឲ្យកម្មករ ទាមទារលុយទឹកដោះគោកូន លុយបាយដល់ពេលបញ្ឈប់ពួកខ្ញុំអញ្ចឹងវាយ៉ាងម៉េចវិញ សូមពរក្រុមហ៊ុនយកពួកខ្ញុំធ្វើការវិញ»។
ទូរទស្សន៍អាស៊ីសេរីពុំអាចទាក់ទងអ្នកនាំពាក្យក្រសួងការងារ និងបណ្ដុះបណ្ដាល វិជ្ជាជីវៈ លោក ស៊ុន មេសា និង តំណាងក្រុមហ៊ុន ឈី ហេង ស៊ីន ហ្វេកធើរី ដើម្បីឆ្លើយតបជុំវិញរឿងនេះបានទេ នៅថ្ងៃទី១១ ខែកញ្ញា។
អ្នកគ្រប់គ្រង កម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ លើកឡើងថា ចាប់តាំងពី២០២៥រហូតមកដល់បច្ចុប្បន្ន ក្រុមហ៊ុនរើសអើង និងធ្វើទុក្ខបុកម្នេញ ទៅលើកម្មករ និងសហជីពឯករាជ្យជាបន្តបន្ទាប់ ដែលបញ្ហាទាំងអស់នេះ បង្ហាញពីការបំបិទសិទ្ធិសេរីភាពរបស់កម្មករ មិនឲ្យពួកគាត់បានប្រើប្រាស់សិទ្ធិក្នុងបង្កើតសហជីពជួយពួកគាត់ស្របតាមច្បាប់។ លោកទទូចឲ្យក្រសួងការងារតាមដាន និងចុះដោះស្រាយករណីនេះជាបន្ទាន់ ដើម្បីធានាថា កម្មករអាចប្រើប្រាស់សិទ្ធិរបស់ខ្លួនបានដោយគ្មានការរើសអើង។
លោក ឃុន ថារ៉ូ៖ «ការធ្វើទុក្ខបុកម្នេញទៅលើសហជីពសកម្មជននេះ វាគឺជារឿងមួយដែរ ជាឧបសគ្គរារាំងសម្រាប់កម្មករការប្រើប្រាស់សិទ្ធិជាមូលដ្ឋានរបស់ពួកគាត់ អញ្ចឹងយើងជំរុញឲ្យក្រុមហ៊ុនអ្នកបញ្ជាទិញ ដូចជាចក្រភពអង់គ្លេស ដូចជាសហរដ្ឋអាមេរិក ពិនិត្យតាមនូវករណីនេះ ហើយយើងស្នើឲ្យភាគីពាក់ព័ន្ធ ជាពិសេសក្រសួងការងារត្រូវតែតាមដាន ដោះស្រាយបញ្ហានេះជាបន្ទាប់ ដើម្បីធានាថា កម្មករនិយោជិកគាត់អាចអនុវត្តសិទ្ធិសេរីភាពមូលដ្ឋានរបស់ពួកគាត់បាន»។
កម្មករអះអាងថា ពួកគាត់បានប្រមូលផ្ដុំគ្នាបង្កើតសហជីពកាលខែមីនាប៉ុន្តែនៅពីថ្ងៃទី៣១ ខែសីហា ខាងភាគីរោងចក្របានជូនដំណឹងអំពីបញ្ឈប់ពួកគាត់នៅថ្ងៃទី១០ ខែកញ្ញា ចំណែកឈ្មោះដែលក្រុមហ៊ុនបញ្ឈប់កម្មករ គឺសុទ្ធសឹងតែកម្មករធ្វើការយូរឆ្នាំ និងមានអាយុច្រើន។ ពួកគាត់ថា ប្រសិនបើរោងចក្រ មិនយកកម្មករធ្វើការវិញទេនោះ ពួកគាត់នឹងបន្តការតវ៉ានេះរហូតដល់ទទួលបានដំណោះស្រាយដោយយុត្តិធម៌៕
