ប្រមុខការទូតថៃបានប្រកាសនៅមុនពេលចូលរួមកិច្ចចរចាដែនសមុទ្រតាមយន្តការរបស់ UNCLOS ដោយបបួលកម្ពុជាឱ្យចរចាទ្វេភាគីជាមួយថៃ ដើម្បីបញ្ចប់ជម្លោះដែនសមុទ្រដែលភាគីទាំងពីរបានអះអាងថា «ត្រួតស៊ីគ្នា»។ ភាគីថៃអះអាងថា យន្តការផ្សះផ្សាដោយបង្ខំ ដែលកម្ពុជាបានស្នើឡើង និងកំពុងតែបើកការចរចានេះគឺគ្មានឥទ្ធិពលផ្នែកច្បាប់មកលើប្រទេសថៃនោះឡើយ។ ក្រៅពីដាក់សម្ពាធកម្ពុជាលើការចរចាដែនសមុទ្រហើយនោះ នៅឯព្រំដែនគោកវិញ យោធាថៃបានបន្តធ្វើសកម្មភាពឈ្លានពានកម្ពុជា ជាច្រើនទីតាំង ដែលធ្វើឱ្យស្ថានការណ៍កាន់តែមានភាពតានតឹង។
រដ្ឋមន្ត្រីក្រសួងការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) បានប្រកាសឱ្យកម្ពុជាត្រៀមខ្លួន ដើម្បីចូលតុចរចាទ្វេភាគីជាមួយថៃ ដោយលោកបានអះអាងថា គ្មានមេដឹកនាំរបស់ប្រទេសភាគីទីបីណាមួយ ចង់ចូលខ្លួនធ្វើជាអាជ្ញាកណ្ដាល ដើម្បីជួយសម្របសម្រួលជម្លោះព្រំដែនគោក និងព្រំដែនសមុទ្ររវាងប្រទេសថៃ និងកម្ពុជាទៀតនោះឡើយ។
ថ្លែងបន្ទាប់ពីបញ្ចប់កិច្ចប្រជុំកំពូលប្រទេស BRICS នៅប្រទេសឥណ្ឌា (India) មុនពេលឡើងយន្តហោះធ្វើដំណើរទៅកាន់ប្រទេសសិង្ហបុរី (Singapore) ជាទីដែលភាគីកម្ពុជា និងថៃចូលរួមក្នុងកិច្ចចរចាដោះស្រាយជម្លោះដែនសមុទ្រ តាមយន្តការផ្សះផ្សាដោយបង្ខំ (Compulsory Conciliation) នៅថ្ងៃនេះ លោក ស៊ីហាសាក់ បានលើកឡើងថា ជម្លោះព្រំដែនរវាងកម្ពុជា និងថៃគឺជាបញ្ហាដែលប្រទេសទាំងពីរត្រូវដោះស្រាយតាមរយៈការសន្ទនាទល់មុខគ្នា។ លោកបន្តថា ទោះបីជាភាគីកម្ពុជា នាំយកជម្លោះនេះឡើងទៅកាន់ឆាកអន្តរជាតិកម្រិតណាក៏ដោយ ក៏គ្មានប្រយោជន៍ដើម្បីដាក់សម្ពាធឱ្យភាគីថៃទទួលយកការសម្រេចណាមួយនោះឡើយ។ ក្នុងនោះ លោក ស៊ីហាសាក់ បានប្រកាសដាក់កុងត្រូលមិនឱ្យកម្ពុជានាំយករឿងកោះគជ់ មកជជែកគ្នាទៀតនោះឡើយ។
ការថ្លែងរបស់ប្រមុខការទូតថៃរូបនេះ ធ្វើឡើងក្នុងអំឡុងពេលដែលភាគីកម្ពុជា និងថៃកំពុងចូលរួមកិច្ចចរចាជម្លោះដែនសមុទ្រ តាមយន្តការផ្សះផ្សាដោយបង្ខំជាលើកទី១ នៅប្រទេសសិង្ហបុរី ពីថ្ងៃទី១៤ ដល់១៦ ខែកញ្ញា នេះ។ ក្រោយពេលមកដល់សិង្ហបុរី ភាគីទាំងពីរបានចូលរួមក្នុងកិច្ចប្រជុំបិទទ្វារលើកដំបូង ក្រោមការសម្របសម្រួលដោយប្រធានគណៈកម្មការផ្សះផ្សា គឺអ្នកស្រី ខាទ្រីណា ឃូបភើរ (Katrina Cooper)។ ទោះជាយ៉ាងណា ភាគីកម្ពុជា និងថៃមិនបានបង្ហាញពីលទ្ធផលនៃកិច្ចប្រជុំចង្អៀតនេះនោះឡើយ គិតត្រឹមម៉ោងផ្សាយនេះ។
ទូរទស្សន៍អាស៊ីសេរី មិនអាចទាក់ទងរដ្ឋមន្ត្រីទទួលបន្ទុក រដ្ឋលេខាធិការដ្ឋានកិច្ចការព្រំដែន លោក ឡាំ ជា និងរដ្ឋលេខាធិការក្រសួងការបរទេស អ្នកស្រី អ៊ាត សោភា ដើម្បីសុំការបកស្រាយជុំវិញកិច្ចប្រជុំនៅប្រទេសសិង្ហបុរី នេះបានទេ នៅថ្ងៃទី១៤ ខែកញ្ញា។
នៅក្នុងកិច្ចប្រជុំក្រោមយន្តការ UNCLOS នេះ តំណាងភាគីទាំងពីរនឹងត្រូវឡើងថ្លែងការណ៍ នៅថ្ងៃទី១៥ ខែកញ្ញា វេលាម៉ោង ៩ព្រឹក ម៉ោងនៅសិង្ហបុរី ដែលត្រូវនឹងម៉ោង៨ព្រឹកនៅកម្ពុជា ហើយក៏នឹងមានការផ្សាយផ្ទាល់ជាបីភាសាគឺខ្មែរ អង់គ្លេស និងថៃ។
ជុំវិញរឿងនេះ ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន យល់ឃើញថា ការចូលរួមក្នុងកិច្ចចរចា Unclos របស់ភាគីថៃគឺធ្វើឡើងដើម្បីបង្គ្រប់កិច្ចប៉ុណ្ណោះ ខណៈភាគីថៃហាក់បានកំណត់ពីលទ្ធផលសម្រាប់ខ្លួនឯងរួចទៅហើយ។ លោកបន្តថា កម្ពុជាមិនត្រូវកំដរថៃលេងអាប៉ោងបើកគម្របបែបនេះឡើយ។ លោកថា ប្រសិនបើគណៈកម្មការផ្សះផ្សាសម្រេចឱ្យកម្ពុជាបានឈ្នះថៃ ប៉ុន្តែថៃមិនទទួលយកអនុសាសន៍នេះនោះទេ កម្ពុជាត្រូវលើកយកករណីនេះ ប្ដឹងថៃតាមរយៈយន្តការច្បាប់អន្តរជាតិ។
លោក អ៊ុំ សំអាន៖ «ថៃអាចនឹងលើកយកកិច្ចព្រមព្រៀងស្ដីពីតំបន់ទឹកប្រវត្តិសាស្ត្រឆ្នាំ១៩៨២ ដែលជាសន្ធិសញ្ញាព្រំដែនទឹកខុសច្បាប់សម័យវៀតណាមត្រួតត្រាកម្ពុជាដើម្បីដាក់សម្ពាធមកលើកម្ពុជានៅក្នុងយន្តការផ្សព្វផ្សាយដោយបង្ខំ ព្រោះថាកិច្ចព្រមព្រៀងឆ្នាំ៨២ហ្នឹងវាធ្វើឱ្យថៃអាចគ្រប់គ្រងដែនសមុទ្រខ្មែរយើង ចង់យកទាំងតំបន់សមុទ្រទំហំ ២៦ ០០០ គីឡូម៉ែត្រការ៉េ»។
ពាក់ព័ន្ធនឹងជម្លោះព្រំដែនរវាងកម្ពុជា និងថៃនេះដែរ ទាហានខ្មែរដែលកំពុងឈរជើងនៅតំបន់ព្រំដែនខេត្តឧត្ដរមានជ័យ បានអះអាងប្រាប់ទូរទស្សន៍អាស៊ីសេរីថា យោធាថៃបានបន្តសកម្មភាពឈូសឆាយសាងសង់ផ្លូវ និងលេណដ្ឋានដោយរំលោភចូលក្នុងទីតាំងយោធារបស់កម្ពុជាជាច្រើនទីតាំង នៅតំបន់ភ្នំបេង រហូតដល់តំបន់ច្រកជាំ ដែលស្ថិតនៅភូមិសាស្ត្រស្រុកអន្លង់វែង។ ទាហានខ្មែរបញ្ជាក់ថា ប្រឈមនឹងស្ថានការណ៍ដ៏តានតឹងនេះ ភាគីកម្ពុជាបានជីកប្រឡាយ និងរាយបន្លាលួសដើម្បីទប់ស្កាត់សកម្មភាពឈ្លានពានរបស់យោធាថៃ។
ក្រៅពីខេត្តឧត្តរមានជ័យ យោធាថៃបានសាងសង់ផ្លូវយុទ្ធសាស្ត្រនៅព្រំដែនកម្ពុជាជាច្រើនទីតាំងទៀត ស្ថិតនៅខេត្តព្រះវិហារ បន្ទាយមានជ័យ បាត់ដំបង ប៉ៃលិន និងពោធិ៍សាត់។ នេះបើតាមវីដេអូដែលយោធាថៃបានចែកចាយនៅលើបណ្ដាញសង្គម។ តាមការបញ្ជាក់របស់យោធាថៃ ការសម្រុកសាងសង់ផ្លូវយុទ្ធសាស្ត្រតាមព្រំដែនកម្ពុជានេះ គឺដើម្បីបង្កើនភាពងាយស្រួលក្នុងការចល័តទ័ពជើងគោក ដោយយោធាថៃអះអាងថា ក្នុងអំឡុងផ្ទុះសង្គ្រាមតាមព្រំដែនជាមួយកម្ពុជា កងទ័ពជើងគោកថៃ មានការពិបាកក្នុងការវាយប្រហារ ដោយសារពិបាកចល័តកងកម្លាំង និងសព្វាវុធ ហើយត្រូវពឹងផ្អែកលើកងទ័ពអាកាសដើម្បីវាយបើកផ្លូវ៕
