អ្នកឃ្លាំមើលជំរុញឲ្យដាក់ទោសទណ្ឌមន្ត្រីនគរបាលជាន់ខ្ពស់ខេត្តបន្ទាយមានជ័យម្នាក់ឲ្យបានធ្ងន់ធ្ងរពាក់ព័ន្ធការឃុបឃិតគ្នា ជួយ និងកាងឲ្យក្រុមឧក្រិដ្ឋកម្មឆបោកអនឡាញដ៏ធំមួយនៅក្រុងប៉ោយប៉ែត។ ការលើកឡើងនេះ គឺក្រោយពីសមត្ថកិច្ចខេត្តបន្ទាយមានជ័យ បានឃាត់ខ្លួនស្នងការរងនគរបាលខេត្តម្នាក់ក្រោយសង្ស័យថា បានផ្តល់ទីតាំងឱ្យក្រុមឧក្រិដ្ឋជនប្រព្រឹត្តអំពើឆបោកតាមប្រព័ន្ធបច្ចេកវិទ្យា។
អ្នកឃ្លាំមើលសាទរចំពោះការឃាត់ខ្លួនមេក្លោងដែលឃុបឃិតគ្នាជួយកាង និងផ្តល់ជម្រកឲ្យក្រុមឧក្រិដ្ឋជនឆបោកអនឡាញដ៏ធំមួយនៅក្រុងប៉ោយប៉ែត ប៉ុន្តែពួកគាត់ទាមទារឲ្យវែកមុខមេក្លោងធំៗបន្ថែមទៀតក្នុងរឿងនេះ ដោយពួកគាត់ជឿជាក់ថា ករណីនេះ មិនអាចមានតែមន្ត្រីជាន់ខ្ពស់ម្នាក់ដែលចូលរួមជួយក្រុមឧក្រិដ្ឋជនទាំងនោះបានទេ។
ការលើកឡើងនេះ គឺក្រោយពេលដែលកម្លាំងក្រុមការងារចម្រុះខេត្តបន្ទាយមានជ័យ ឃាត់ខ្លួនស្នងការរងខេត្តបន្ទាយមានជ័យ ទទួលបន្ទុកផែនការការងារព្រំដែនគោកលោក អ៊ុំ សុផល ក្រោយសង្ស័យថា បានលួចផ្តល់អគារចំនួន ២កន្លែង ស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ដើម្បីជួយឧក្រិដ្ឋជនឆបោកតាមប្រព័ន្ធបច្ចេកវិទ្យា កាលពីថ្ងៃទី២១ ខែកញ្ញា ឆ្នាំ២០២៦។ នេះបើយោងតាមសារព័ត៌មានកក្នុងស្រុក។
ប្រភពដដែលបង្ហាញថា ការឈានដល់ការឃាត់ខ្លួននេះ គឺបន្ទាប់ពីសមត្ថកិច្ចជំនាញចុះបង្ក្រាបទីតាំងពីរកន្លែងក្នុងនោះអគារទី១ កម្ពស់ ៥ជាន់ មាន ១៧២បន្ទប់ និងសាលធំ១ និងអគារទី២ កម្ពស់ ២ជាន់ មាន ៥៩បន្ទប់ មានសាលធំ៤ ព្រមទាំងរកឃើញមានមនុស្សសរុប២២៣នាក់ មកពី៨សញ្ជាតិ ក្នុងនោះមានជនបរទេស២០០នាក់ និងជនជាតិខ្មែរ២៣នាក់។ ប្រភពបញ្ជាក់ថា លោក អ៊ុំ សុផល គឺជាម្ចាស់អគារចំនួន ២កន្លែងនោះ។
ប្រភពដដែលឲ្យដឹងថា ជនបរទេសទាំងនោះ ត្រូវបានបញ្ជូនទៅមណ្ឌលកងវ៉ាខេត្ត នៃស្នងការដ្ឋាននគរបាលខេត្ត និងនៅអធិការដ្ឋាននគរបាលក្រុងប៉ោយប៉ែត។ មិនតែប៉ុណ្ណោះ សមត្ថកិច្ចបានរឹបអូស និងដកហូតសម្ភារមួយចំនួនបញ្ជូនទៅស្នងការដ្ឋាននគរបាលខេត្ត ដើម្បីបន្តនីតិវិធី។
បច្ចុប្បន្ននេះ សមត្ថកិច្ចបានសម្រេចបិទទីតាំងអគារទាំងពីរជាបណ្ដោះអាសន្ន។
អ្នកតាមដានភូមិសាស្ត្រនយោបាយ លោក សេង វណ្ណលី ថ្លែងថា មន្ត្រីដែលមានតួនាទីការពារប្រជាពលរដ្ឋ បែរជាជួយការពារក្រុមឧក្រិដ្ឋជន គឺកំពុងក្បត់ទំនុកចិត្តរបស់ពលរដ្ឋ និងបំផ្លាញកេរ្តិ៍ឈ្មោះប្រទេស។ ការកាងឱ្យក្រុមឧក្រិដ្ឋជនឆបោកអនឡាញទាំងនេះ គឺជារឿងធ្ងន់ធ្ងរ ដែលមិនអាចលើកលែងឲ្យបាន។ លោកថា អាជ្ញាធរត្រូវស៊ើបអង្កេតបន្ត មិនគួរបញ្ចប់ត្រឹមមន្ត្រីម្នាក់នេះទេ ហើយត្រូវរកឱ្យឃើញអ្នកឃុបឃិតក្នុងរឿងនេះទាំងអស់មកផ្ដន្ទាទោសតាមច្បាប់ ទោះអ្នកទាំងនោះមានឋានៈធំប៉ុនណាក៏ដោយ។ បើចាប់បានតែម្នាក់ ហើយទុកអ្នកពាក់ព័ន្ធផ្សេងទៀតឱ្យបន្តរកស៊ី ក្រុមឆបោកអាចរើទីតាំង ហើយធ្វើសកម្មភាពឡើងវិញ។
លោក សេង វណ្ណលី៖ «ខ្ញុំគិតថាប្រជាពលរដ្ឋចង់ឃើញអាជ្ញាធរបង្ហាញព័ត៌មានដែលអាចផ្សព្វផ្សាយអឺបានឱ្យច្បាស់លាស់ ថាចាប់ខ្លួនដោយសារអ្វី កំពុងស៊ើបអង្កេតបទល្មើសអ្វី ហើយសំណុំរឿងទៅដល់ណាហើយ ដែលរក្សាការសម្ងាត់ដែលចាំបាច់សម្រាប់ការស៊ើបអង្កេត និងការពារសាក្សី។ បើតុលាការរកឃើញថា មានទោសប្រាកដមែន ត្រូវទទួលខុសត្រូវតាមច្បាប់ អឺនិងទណ្ឌកម្មវិន័យសមនឹងកំហុស អឺគ្រាន់តែដកតំណែង ឬក៏ផ្ទេរទៅកន្លែងផ្សេង ខ្ញុំគិតថាវាមិនគ្រប់គ្រាន់ទេ។ ថ្នាក់ខ្ពស់ក៏ត្រូវទទួលខុសត្រូវខ្ពស់ដែរ មិនមែនទទួលបានការយោគយល់ពិសេសដូចកន្លងមកទេ បាទ»។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យក្រសួងមហាផ្ទៃលោក ទូច សុឃៈ ដើម្បីឆ្លើយបំភ្លឺជុំវិញរឿងនេះ បានទេនៅថ្ងៃទី២២ កញ្ញានេះ ដោយទូរស័ព្ទមិនចូល។ ចំណែក ប្រធានមន្ទីរស្រាវជ្រាវបទល្មើសនៃកងរាជអាវុធហត្ថខេត្តបន្ទាយមានជ័យ លោក ព្រំ ថេង ថា ដាក់ច្បាប់ព្យាបាលជំងឺ ពុំបានដឹងរឿងនេះឡើយ រួចចុចបិទទូរស័ព្ទ។
ករណីស្រដៀងគ្នានេះដែរកាលពីថ្ងៃទី ២១ ខែកញ្ញា អង្គភាពប្រឆាំងអំពើពុករលួយ (ACU) បានចេញប្រកាសព័ត៌មានពីចំណាត់ការលើមេឃុំព្រែកខ្សាច់ ស្រុកគិរីសាគរ ខេត្តកោះកុង លោក រៀម រុំ និងបក្ខពួក ដែលបានត្រងយកក្រុមឆបោកអនឡាញដែលបានបែកខ្ញែកតូចៗឲ្យបន្តដំណើរការ ក្រោយមជ្ឈមណ្ឌលស្គេមធំៗត្រូវបានបង្ក្រាប និងបិទចោល។
មេឃុំព្រែកខ្សាច់លោក រៀម រុំ ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី១៥ កញ្ញា និងបានបញ្ជូនទៅសាលាដំបូងរាជធានីភ្នំពេញ ដើម្បីចាត់វិធានការបន្តតាមនីតិវិធី។ សាលាដំបូងរាជធានីភ្នំពេញបានចោទប្រកាន់មេឃុំរូបនេះ ពីបទស៊ីសំណូក សមគំនិតក្នុងអំពើរៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា និងសម្អាតប្រាក់ តាមមាត្រា ៣២ នៃច្បាប់ស្តីពីការប្រឆាំងអំពើពុករលួយ មាត្រា ២៩ និងមាត្រា ៥៩៤ នៃក្រមព្រហ្មទណ្ឌ មាត្រា ៦ និងមាត្រា ៩ នៃច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា និងមាត្រា ៣៨ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
មេឃុំរួបនេះ និងបក្ខពួក បានយកដីរបស់ខ្លួន៥ហិកតារ ធ្វើជារោងដាក់ឲ្យក្រុមឆបោកអនឡាញប្រព្រឹត្តបទល្មើសបន្តទៀត ក្រោយមានការចុះបង្ក្រាបពីអាជ្ញាធរ ដោយ១ក្រុមមាន៤២នាក់ ហើយក្រុមអនឡាញស្កេមនេះមានឈ្មោះថា ក្រុម OD ដែលមានជនជាតិចិនម្នាក់ជាមេក្រុម មានឈ្មោះថា ឆៃ យ៉ូវយៀន ដែលបច្ចុប្បន្នបានរត់គេចខ្លួន។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត មានប្រសាសន៍ថា តុលាការ និងសមត្ថកិច្ចពាក់ព័ន្ធទាំងអស់ត្រូវដាក់ទោសទណ្ឌមន្ត្រី ដែលប្រព្រឹត្តផ្ទុយវិជ្ជាជីវៈ ជាពិសេសមន្ត្រីជាន់ខ្ពស់រូបនេះឲ្យបានធ្ងន់ធ្ងរ និងមិនត្រូវលើកលែង ឬដោះលែងឲ្យរួចខ្លួនមកវិញក្រោយស្ងប់ស្ងាត់បានមួយរយៈនោះទេ។ លោកបន្តថា លោកចង់ឃើញរដ្ឋាភិបាលបង្ក្រាបមេក្លោងឆបោកដែលធំជាងនេះ ដូចជា លោក ហ៊ុន តូ និងមន្ត្រីគ្រាក់ៗដែលមាននៅក្នុងបញ្ជីខ្មៅរបស់សហរដ្ឋអាមេរិក ដែលប្រទេសមហាអំណាចទាំងនោះកំពុងចាំមើលចំណាត់ការរបស់រដ្ឋាភិបាលកម្ពុជា ទើបមានប្រសិទ្ធភាពជាង។ លោកបង្ហាញការសង្ស័យថា ករណីចាប់ស្នងការរងនេះ អាជ្ញាធរមិនបានផ្សព្វផ្សាយឲ្យប្រជាពលរដ្ឋបានដឹងលឺទូលំទូលាយនៅឡើយ ដែលហាក់បីដូចជាការឃុបឃិត ជួយក្នុងការកសាងសំណុំរឿង ដើម្បីបន្ធូរបន្ថយទោសធ្ងន់ ឲ្យមកជាស្រាលក្នុងករណីឆបោកនេះ។ លោកទទូចឲ្យសមត្ថកិច្ច តុលាការ និងរដ្ឋាភិបាលគួរដាក់ទោសលើករណីមន្ត្រី ប្រព្រឹត្តកំហុសនេះ ឲ្យបានធ្ងន់ធ្ងរដើម្បីពង្រឹងច្បាប់ឲ្យមានប្រសិទ្ធភាព និងត្រូវដោះស្រាយរឿងនេះប្រកបដោយតម្លាភាពជូនប្រជាពលរដ្ឋ។
លោក ម៉ែន ណាត៖ «ជួនកាលអាចចាប់មន្ត្រីហ្នឹងដាក់គុកមួយរយៈពេលអ៊ីចឹងទៅ ហើយមន្ត្រីហ្នឹងមានខ្សែមានខ្នងក្រាស់នៅក្នុងរដ្ឋាភិបាលជាន់ខ្ពស់ អញ្ចឹងមួយរយៈពេលក្រោយមកគេដោះលែងអ៊ីចឹងទៅ គេប្រើវិធីដោះលែងអ៊ីចឹងទៅ។ ដូចជាឧទាហរណ៍ ឧកញ៉ា គិត ធាង ដែលពាក់ព័ន្ធនឹងគ្រឿងញៀន គេដាក់ទោសមួយរយៈពេលហើយ ក្រោយមកគេក៏សរសេរលិខិតទៅព្រះមហាក្សត្រ ឱ្យព្រះមហាក្សត្រលើកលែងទោសអឺគិត គិត ធាង ហ្នឹងទៅ។ វាៗផ្ទុយអំពីក្រុមសកម្មជន ក្រុមអ្នកនយោបាយប្រឆាំងដែលគ្រាន់តែនិយាយស្តី បញ្ចេញមតិធម្មតា ត្រូវបានគេចាប់ដាក់គុក កាត់ទោសឱ្យជាប់គុក រាប់សិបឆ្នាំ ៥-៦ ឆ្នាំ ទៅ ១០ ឆ្នាំ ម្នាក់ៗ»។
ចាប់តាំងពីថ្ងៃទី១០-២០ ខែកញ្ញា ឆ្នាំ២០២៦ អាជ្ញាធរកម្ពុជា បានឃាត់ខ្លួន និងបណ្តេញចេញ ជនបរទេសចំនួន ៦៨១នាក់ ពាក់ព័ន្ធនឹងបទល្មើសឆបោកតាមអនឡាញ រស់នៅខុសច្បាប់ និងចាប់ជំរិត ហើយបញ្ជូនទៅតុលាការ ដើម្បីកសាងសំណុំរឿងមានចំនួន ៤៤៦ករណី ត្រូវ ពាក់ព័ន្ធនឹងជនត្រូវចោទសរុបជិត ៤ពាន់នាក់ (៣,៩២៧) ដែលមាន ២៩សញ្ជាតិ។ ទោះបីជាមានការបង្ក្រាបជាហូរហែរមកក្តី រហូតមកដល់ពេលនេះ មេក្លោងធំៗ អាជ្ញាធរមិនទាន់បានវែកមុខមកផ្ដន្ទាទោសនៅឡើយ។ អ្នកឃ្លាំមើល ទទូចឲ្យអាជ្ញាធរ អនុវត្តច្បាប់ និងចុះបង្ក្រាបករណីឆបោកទាំងនេះ ដោយតម្លាភាព រកឲ្យឃើញមេក្លោងដែលនៅពីក្រោយឧក្រិដ្ឋកម្មទាំងនេះមកដាក់ទោសទណ្ឌឲ្យបានឆាប់ ដើម្បីឲ្យប្រជាពលរដ្ឋស្ងប់ចិត្ត៕
