អាជ្ញាធរ និងក្រុមសន្តិសុខនៃរដ្ឋាភិបាលត្រកូល ហ៊ុន បានបង្ក្រាបដោយហិង្សាលើជនរងគ្រោះក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ ក្នុងពេលដែលពួកគាត់ប្រមូលផ្ដុំគ្នាតវ៉ាដោយសន្តិវិធី ដើម្បីទាមទារលុយដែលក្រុមហ៊ុនបានបង្កក។ មន្ត្រីសិទ្ធិមនុស្សចាត់ទុកចំណាត់ការបង្ក្រាបរបស់អាជ្ញាធរថា ជាអំពើខុសច្បាប់ និងធ្វើឱ្យសាធារណជនកាន់តែអស់ជំនឿលើប្រព័ន្ធហិរញ្ញវត្ថុនៅកម្ពុជា។
យ៉ាងហោចមានអ្នកតវ៉ាជាជនជាតិចិន ២នាក់បានរងរបួសធ្ងន់នៅត្រង់ក្បាលដោយបែកឈាមហូរស្រោចពេញផ្ទៃមុខ ខណៈអ្នកខ្លះទៀតបានដួលសន្លប់ និងរងរបួសស្រាល ក្នុងហេតុការណ៍បង្ក្រាបដោយហិង្សារបស់កម្លាំងអាជ្ញាធរក្រុងភ្នំពេញលើក្រុមអ្នកតវ៉ាដែលរងគ្រោះពីក្រុមហ៊ុន ហួយវ័ន ផេ (Huione Pay) របស់ លោក ហ៊ុន តូ។ ទន្ទឹមគ្នានេះ សមត្ថកិច្ចក៏បានឃាត់ខ្លួនអ្នកតវ៉ាជាពលរដ្ឋខ្មែរ ២នាក់បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីសាកសួរ។
កម្លាំងសមត្ថកិច្ចរបស់រដ្ឋាភិបាលត្រកូល ហ៊ុន បានចាត់វិធានការបង្ក្រាបដោយប្រើហិង្សា និងទាំងកម្រោលលើជនរងគ្រោះដែលមានទាំងអាជីវករខ្មែរ ចិន និងជនជាតិវៀតណាម រាប់រយនាក់ដែលប្រមូលផ្ដុំគ្នានៅខាងមុខធនាគារជាតិស្ថិតនៅតាមបណ្ដោយផ្លូវហាណូយ រាជធានីភ្នំពេញ កាលពីព្រឹកថ្ងៃទី២៧ ខែមេសា បន្ទាប់ពីធនាគារជាតិកម្ពុជាបានប្រកាសលែងទទួលខុសត្រូវរឿងក្រុមហ៊ុនលោក ហ៊ុន តូ បង្កកលុយអតិថិជន។
ក្រុមបាតុករខ្មែរ ចិន និងវៀតណាម បានលើកបដា និងស្រែកតវ៉ាដោយទាមទារឱ្យក្រុមហ៊ុន ហួយ វ័ន ផេ របស់លោក ហ៊ុន តូ ប្រគល់លុយជូនពួកគាត់វិញ និងរិះគន់ធនាគារជាតិកម្ពុជាថា ជាស្ថាប័នដែលអសមត្ថភាពបំផុត និងបានឃុបឃិតជាមួយក្រុមហ៊ុនក្នុងការបិទបាំងព័ត៌មានក្រោយដកអាជ្ញាប័ណ្ណតាំងពីឆ្នាំ២០២៤។
ជនរងគ្រោះក្រុមហ៊ុន ហួយ វ័ន ផេ ម្នាក់គឺលោកស្រី ជា ស្រីមុំ ថ្លែងថា លុយរបស់លោកស្រីដែលមានក្នុងគណនី ហួយវ័ន ផេ ជាង ១ម៉ឺនដុល្លារត្រូវបានក្រុមហ៊ុនបង្កកដកលែងបានហើយមកដល់ពេលនេះ រីឯធនាគារជាតិក៏គ្មានការអន្តរាគមន៍សម្រាប់លោកស្រី និងជនរងគ្រោះដទៃទៀតឡើយ។ អតិថិជនរូបនេះក៏មិនបានដឹងថា ក្រុមហ៊ុន ហួយ វ័ន ផេ ជាប់ពាក់ព័ន្ធនឹងឧក្រិដ្ឋកម្មលាងលុយកខ្វក់នោះទេ និងបញ្ជាក់ថា លុយដែលត្រូវបានក្រុមហ៊ុនបង្កកនោះគឺបានមកពីការខិតខំប្រឹងប្រែងរកស៊ីដោយកម្លាំងញើសឈាម។
ជនរងគ្រោះរូបនេះបានត្អូញត្អែរចំពោះការប្រឈមបញ្ហាជីវភាពខ្វះខាតប្រចាំថ្ងៃ និងស្នើឱ្យរដ្ឋាភិបាលលោក ហ៊ុន ម៉ាណែត និងប្រធានព្រឹទ្ធសភាលោក ហ៊ុន សែន ចេញមុខជួយអន្តរាគមន៍ ដើម្បីឱ្យក្រុមហ៊ុន ហួយវ័ន ផេ ប្រគល់ប្រាក់ដែលបង្កកឱ្យលោកស្រីវិញ។
លោកស្រី ជា ស្រីមុំ៖ «ធនាគារជាតិថា ដកអាជ្ញាប័ណ្ណតាំងពី ២០២៤ ប៉ុន្តែពួកខ្ញុំអត់មានបានទទួលដំណឹងសូម្បីតែមួយនៅតាមវេបសាយ (Website) ធនាគារជាតិ ហ្វេសប៊ុក (Facebook) អត់មានបានទទួលដំណឹងសូម្បីតែបន្តិចថា ដកអាជ្ញាប័ណ្ណ។ ហេតុអ្វីដកអាជ្ញាប័ណ្ណហើយ ធនាគារបើកធម្មតា? ប្រើនៅស្រុកខ្មែរ ប្រើដល់ខែធ្នូ ២០២៥។ ខ្ញុំអត់យល់ថា ស្រុកខ្មែរច្បាប់នៅណា ខ្ញុំអត់យល់! ខ្ញុំចង់បានតែលុយរបស់ខ្ញុំមកវិញទេ ខ្ញុំអត់ចង់បានអីទេ។ ធនាគារជាតិអត់មានដំណោះស្រាយ បានពួកខ្ញុំមកដល់ហ្នឹង»។
រីឯ ជនរងគ្រោះម្នាក់ទៀតបានលើកឡើងថា អតិថិជនដែលចេញតវ៉ាប្រឈមនឹងការវាយដំ និងបង្ក្រាបដោយហិង្សានេះ គឺពួកគាត់មិនមានសល់អ្វីទៀតនោះទេ ហើយពួកគាត់ក៏មិនខ្លាចនឹងការស្លាប់ទៀតឡើយ ព្រោះលុយដែលបានមកពីកម្លាំងញើសឈាមត្រូវបានក្រុមហ៊ុនបោកប្រាស់ និងបង្កកដោយគ្មានស្ថាប័នណាជួយផ្ដល់ដំណោះស្រាយ។
៖«ពួកខ្ញុំចង់ឱ្យខាងថ្នាក់ដឹកនាំគាត់ដឹងលើរឿងការលំបាករបស់ខ្ញុំ គឺជនជាតិខ្មែរតែម្ដង។ មិនថាខ្មែរ មិនថាចិន វៀតណាមទេ ពួកខ្ញុំសុទ្ធតែអ្នករកស៊ីដោយសុចរិត។ ដូចខ្ញុំខាងសំណង់ ហើយខ្ញុំអត់មានលុយបើកឱ្យបុគ្គលិក ខ្ញុំយកប្លង់ផ្ទះប្លង់ដីទៅបញ្ចាំអស់ហើយ។ ដល់តែពេលឥឡូវគាត់បែរជាអត់មានដំណោះស្រាយឱ្យខាងពួកខ្ញុំ។ ពួកខ្ញុំអត់ដឹងទៅពឹងនរណាទេ ដល់អ៊ីចឹងចង់ទៅមុខធនាគារជាតិ មិនមែនទៅបាតុកម្មអីធំដុំអីណាទៅធ្វើអីទៀតទេ ដោយសារតែសុំតែលើករូបឈរតែមួយចំហៀងទេ អត់មានចង់ទៅបាតុកម្មមករករឿងមកសន្សំរឿងទេ»។
ធនាគារជាតិនៃកម្ពុជាកាលពីថ្ងៃទី២៥ ខែមេសា បានប្រកាសថា ក្រុមហ៊ុន ហួយវ័ន ផេ របស់លោក ហ៊ុន តូ លែងស្ថិតក្នុងសមត្ថកិច្ចរបស់ខ្លួនទៀត និងបានចាត់ឱ្យក្រុមហ៊ុនឯកជនជម្រះបញ្ជីទូទាត់លុយសងអតិថិជនតាំងពីចុងឆ្នាំ២០២៥។
ទូរទស្សន៍អាស៊ីសេរីមិនអាចទាក់ទងអគ្គទេសាភិបាលធនាគារជាតិកម្ពុជា អ្នកស្រី ជា សិរី ដើម្បីសាកសួរបន្ថែមជុំវិញរឿងនេះបានទេនៅថ្ងៃទី២៧ ខែមេសា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការបង្ក្រាបដោយហិង្សាលើជនរងគ្រោះក្រុមហ៊ុន ហួយវ័ន ផេ គឺជាអំពើខុសច្បាប់ និងជាការរំលោភសិទ្ធិមនុស្សធ្ងន់ធ្ងរ។ លោកថា ចំណាត់ការបង្ក្រាបរបស់អាជ្ញាធរមិនមែនជាដំណោះស្រាយសម្រាប់ជនរងគ្រោះឡើយ ផ្ទុយទៅវិញរដ្ឋាភិបាលនឹងរងការរិះគន់ និងសម្ពាធពីអន្តរជាតិបន្ថែមទៀត។
លោក អំ សំអាត៖ «យើងជាអង្គការសិទ្ធិមនុស្ស យើងមិនចង់ឃើញនូវអំពើហិង្សាណាមួយកើតឡើងទេ ទោះបីជាកើតចេញពីភាគីណាក៏ដោយ ពីព្រោះអំពើហិង្សាវាជារឿងរំលោភសិទ្ធិមនុស្ស វាជារឿងខុសច្បាប់។ ការទាមទាររបស់អតិថិជនរបស់ក្រុមហ៊ុន ហួយវ័ន ផេ (Huione Pay) នេះ គួរណាស់តែអាជ្ញាធរដែលពាក់ព័ន្ធ ស្ថាប័នដែលពាក់ព័ន្ធ ឬក៏ភាគីដែលពាក់ព័ន្ធហ្នឹង រួមគ្នាក្នុងការដោះស្រាយដោយសន្តិវិធី ដើម្បីរកដំណោះស្រាយមួយដ៏សមស្រប និងសន្តិវិធី ដើម្បីបញ្ចៀសនូវអំពើហិង្សា ឬក៏បាតុភាពផ្សេងៗដែលកើតឡើង។ អំពើហិង្សាមិនអាចយកទៅដោះស្រាយបញ្ហាបានទេ»។
ក្រុមហ៊ុន ហួយវ័ន ផេ របស់ក្មួយបង្កើតលោក ហ៊ុន សែន និងត្រូវជាបងជីដូនមួយលោក ហ៊ុន ម៉ាណែត គឺលោក ហ៊ុន តូ ត្រូវបានធនាគារជាតិដកអាជ្ញាប័ណ្ណតាំងពីឆ្នាំ២០២៤ ដោយសារតែអនុវត្តខុសពីបទបញ្ញត្តិរបស់ធនាគារជាតិ។ ក្រុមហ៊ុនខុសច្បាប់របស់លោក ហ៊ុន តូ ក៏ចាប់ផ្ដើមប្រកាសបង្កកលុយរបស់អតិថិជននៅចុងឆ្នាំ២០២៥ ក្រោយអាមេរិក និងចក្រភពអង់គ្លេសចាត់វិធានការរួមគ្នាដាក់ទណ្ឌកម្មដោយសារតែរកឃើញថា ជាក្រុមហ៊ុនពាក់ព័ន្ធនឹងអំពើលាងលុយកខ្វក់លក្ខណៈអន្តរជាតិ។
ទោះជាយ៉ាងណា ក្រុមហ៊ុននេះមិនបានបញ្ឈប់ដំណើរការរបស់ខ្លួនឡើយ និងបានប្ដូរឈ្មោះ ហួយវ័ន ផេ ទៅជាក្រុមហ៊ុន អេច-ផេ (H-Pay) ដើម្បីបន្តដំណើរការជួយលាងលុយឱ្យឧក្រិដ្ឋជន។ កាលពីចុងខែមីនា សមត្ថកិច្ចកម្ពុជាបានចាប់ខ្លួនប្រធានក្រុមហ៊ុន ហួយវ័ន គ្រុប (Huione Group) ឈ្មោះ លី សុង (LI XIONG) តាមសំណើរបស់អាជ្ញាធរចិន និងបញ្ជូនទៅប្រទេសចិន ដោយសារតែពាក់ព័ន្ធនឹងអំពើលាងលុយកខ្វក់ និងអំពើឆបោកតាមអនឡាញ។ រីឯ លោក ហ៊ុន តូ ដែលសហប្រធានមួយរូបនៃក្រុមហ៊ុននេះអាជ្ញាធររបបត្រកូល ហ៊ុន មិនហ៊ានប៉ះ ឬចាត់វិធានការណាមួយឡើយមកដល់ពេលនេះ៕
