គ្រួសារសាច់ញាតិ និងក្រុមជនរងគ្រោះក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ ទាមទារឱ្យអាជ្ញាធរដោះលែងលោក សួន សុវណ្ណថៃ និងលោក វ៉ាត់ មករា ឱ្យមានសេរីភាពឡើងវិញ បន្ទាប់ពីពួកគាត់ត្រូវបានចាប់ខ្លួនពាក់ព័ន្ធនឹងការចេញតវ៉ាទាមទារលុយរបស់ខ្លួនដែលត្រូវបានក្រុមហ៊ុនបង្កក។ សាច់ញាតិ និងមន្ត្រីសិទ្ធិមនុស្សចាត់ទុកថា ការចាប់ខ្លួននេះគឺជារឿងអយុត្តិធម៌បំផុតព្រោះពួកគាត់ជាជនរងគ្រោះនៅក្នុងការកិបកេងទ្រព្យសម្បត្តិដោយអ្នកមានអំណាចមិនមែនជាមេខ្លោងបង្កចលាចលក្នុងសង្គមដូចការចោទប្រកាន់ឡើយ។
ក្រុមជនរងគ្រោះដែលចាញ់បោកក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ មកដល់ពេលនេះ មិនត្រឹមតែមិនទទួលបានដំណោះស្រាយ ឬទទួលបានលុយដែលពួកគាត់ខំប្រឹងរកបានដោយកម្លាំងញើសឈាមនោះទេ ពួកគាត់ថែមទាំងរងការបង្ក្រាបដោយហិង្សា និងចាប់ខ្លួនទៀតផង។
ជនរងគ្រោះលោក សួន សុវណ្ណថៃ និងលោក វ៉ាត់ មករា ត្រូវបានអាជ្ញាធររបបក្រុងភ្នំពេញចាប់ខ្លួនកាលពីថ្ងៃទី២៧ ខែមករា បន្ទាប់ពីចូលរួមតវ៉ាជាមួយជនរងគ្រោះខ្មែរ ចិន និងជនជាតិវៀតណាមរាប់រាយនាក់នៅខាងមុខធនាគារជាតិនៃកម្ពុជា ដើម្បីតវ៉ាទាមទារលុយរបស់ខ្លួនដែលត្រូវបានក្រមហ៊ុន ហួយវ័ន ផេ របស់លោក ហ៊ុន តូ បង្កកអស់រយៈពេលជាច្រើនខែ។
ប្រពន្ធលោក សួន សុវណ្ណថៃ គឺលោកស្រី ជា ស្រី រៀបរាប់ប្រាប់ទូរទស្សន៍អាស៊ីសេរីថា ប្ដីរបស់លោកស្រីជាមនុស្សមានចិត្តសប្បុរស និងចូលរួមជួយសង្គម និងមានមុខរបរជាអ្នកម៉ៅការសំណង់ដោយមានកម្មកររាប់ពាន់នាក់នៅក្រោមការគ្រប់គ្រង។ លោកស្រីអះអាងថា ប្ដីរបស់លោកស្រីពិតជាជនរងគ្រោះពីក្រុមហ៊ុន ហួយវ័ន ផេ ព្រោះលុយដែលត្រូវប្រើសម្រាប់បើកឱ្យកម្មករត្រូវបានក្រុមហ៊ុនបង្កក មិនអាចដកបានឡើយ។ លោកស្រីបន្តថា កម្មករជាច្រើននាក់ក្រោមការគ្រប់គ្រងរបស់ប្ដីក៏ប្រឈមនឹងបញ្ហាជីវភាពប្រចាំថ្ងៃ ទើបប្ដីរបស់លោកស្រីបង្ខំចិត្តនាំកម្មករចេញតវ៉ាទាមទារលុយដែលក្រុមហ៊ុនបង្កក ដើម្បីយកមកបើកឱ្យកម្មករ។
លោកស្រី ជា ស្រី បញ្ជាក់ថា ប្ដីរបស់ខ្លួនមិនមែនជាមេខ្លោង ឬជាអ្នករកស៊ីឈ្នួលធ្វើបាតុកម្មដូចការចោទប្រកាន់ឡើយ និងទាមទារឱ្យអាជ្ញាធរដោះលែងប្ដីឱ្យមានសេរីភាពវិញ។
លោកស្រី ជា ស្រី៖ «គាត់មិនមានបំណងអីផ្សេង បះបោរ ឬប្រឆាំងអីគឺអត់មានទេ អត់មានអីទាំងអស់ គាត់ប្រជាជនធម្មតា ស្លូតត្រង់ គាត់ត្រូវការតែលុយមកវិញ ដោះស្រាយកម្មករ ពាក្យថា អត់ ពេលវាពិបាកអ៊ីចឹងគាត់នាំកម្មករទៅ។ ពាក្យថា ទ័លហើយ ពិបាកហើយ គាត់អីក៏ហ៊ានដែរ ខ្ញុំប្រាប់ដែរ ខ្ញុំជាប្រពន្ធ ខ្ញុំអង្វរ «បង កុំទៅអី យើងនៅជីវិតយើងរកទៀតទៅ» ប៉ុន្តែ កូនចៅមកទាររាល់ថ្ងៃ រឹតកគាត់រាល់ថ្ងៃ គាត់ទ័លដែរ ហើយថាគាត់ធ្វើអ៊ីចឹង វាមានបញ្ហា ប៉ុន្តែអត់ទៅក៏មានបញ្ហា គឺដូចគ្នា អ៊ីចឹងពិបាកទាំងពីរដោយសារពាក្យថាអត់»។
សមត្ថកិច្ចរាជធានីភ្នំពេញបានចាប់ខ្លួន លោក សួន សុវណ្ណថៃ និងលោក វ៉ាត់ មករា ដោយចោទថា ជាមេខ្លោងប្រមូលកៀរគរជនជាតិខ្មែរ និងបរទេសប្រមាណជាង ១រយនាក់ ធ្វើបាតុកម្ម និងបង្កឱ្យមានអំពើហិង្សា ក្នុងការទាមទារតវ៉ាឱ្យក្រុមហ៊ុន ហួយវ័ន ផេ ប្រគល់លុយឱ្យពួកគាត់វិញកាលពីថ្ងៃទី២៧ ខែមេសា។ ក្រៅពីការចាប់ខ្លួននេះ សមត្ថកិច្ចរបបត្រកូល ហ៊ុន ក៏បានបង្ក្រាបដោយប្រើហិង្សាវាយដំលើជនរងគ្រោះក្រុមហ៊ុន ហួយវ័ន ផេ ដែលចេញទាមទារតវ៉ារហូតបណ្ដាលឱ្យជនជាតិចិន ២នាក់រងបួសធ្ងន់ត្រង់ក្បាលដួលសន្លប់។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា ប្រាប់ទូរទស្សន៍អាស៊ីសេរីថា លោក សួន សុវណ្ណថៃ និងលោក វ៉ាត់ មករា បច្ចុប្បន្នកំពុងឃុំខ្លួននៅស្នងការដ្ឋាននគរបាលរាជធានីភ្នំពេញ ហើយសមត្ថកិច្ចក៏កំពុងកសាងសំណុំរឿងបញ្ជូនទៅតុលាការ។
ទោះជាយ៉ាងណា ក្រុមជនរងគ្រោះ និងកម្មកររបស់លោក សួន សុវណ្ណថៃ ច្រាលចោលការចោទប្រកាន់នេះ និងអះអាងថា សកម្មភាពតវ៉ារបស់លោក សួន សុវណ្ណថៃ គឺគ្រាន់តែចង់ទាមទារលុយដែលក្រុមហ៊ុន ហួយវ័ន ផេ បង្កក ដើម្បីយកមកបើកឱ្យកម្មករសំណង់តែប៉ុណ្ណោះ។ ពួកគាត់អំពាវនាវឱ្យសមត្ថកិច្ចដោះលែង លោក សួន សុវណ្ណថៃ និងលោក វ៉ាត់ មករា និងស្នើឱ្យអាជ្ញាធរចេញមុខដោះស្រាយដោយយុត្តិធម៌ ដើម្បីឱ្យពលរដ្ឋទទួលបានលុយដោះស្រាយជីវភាព និងបំណុលធនាគារ។
កម្មករ៖ «ក្នុងនាមជាមេជាង និងជាកម្មករនៅក្រោមឱវាទរបស់មេ សួន សុវណ្ណថៃ សមត្ថកិច្ចឃាត់ខ្លួនគាត់ថា គាត់នាំគ្នាធ្វើបាតុកម្ម បិទផ្លូវបិទអីនេះ ដើម្បីបង្កចលាចល គឺមិនមែនទេ គឺគាត់ទៅធ្វើដើម្បីដកលុយរបស់គាត់ ឱ្យខាងធនាគារ ខាងក្រុមហ៊ុន ហួយវ័ន ជួយដោះស្រាយលុយឱ្យពួកគាត់ ដើម្បីឱ្យគាត់បានមកដោះស្រាយសម្រាប់ពួកខ្ញុំទាំងអស់គ្នាហ្នឹង ដែលជាលុយនេះជាកម្លាំងញើសឈាមពួកខ្ញុំ។ អ៊ីចឹងទៅ គាត់ក៏បានទៅធ្វើការតវ៉ា ដើម្បីបានលុយឱ្យពួកខ្ញុំបានដោះស្រាយដែរហ្នឹង។ ពួកខ្ញុំទាំងអស់គ្នា សូមលើកដៃសំពះ សំណូមពរដល់សម្តេចពុក ហ៊ុន សែន និងសម្តេចបវរធិបតី ហ៊ុន ម៉ាណែត ព្រះអង្គទាំងទ្វេ ជួយដោះស្រាយករណីនេះផង»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ដើមហេតុនៃបញ្ហានេះគឺបណ្ដាលមកពីក្រុមហ៊ុន ហួយវ័ន ផេ បង្កកលុយអតិថិជនទើបជនរងគ្រោះនាំគ្នាចេញតវ៉ា ដើម្បីស្វែងរកដំណោះស្រាយ។ លោកថា អាជ្ញាធរ និងស្ថាប័នពាក់ព័ន្ធគប្បីយកចិត្តទុកដាក់ដោះស្រាយបញ្ហាឱ្យពលរដ្ឋដែលរងគ្រោះជាជាងប្រើចំណាត់ការបង្ក្រាបដោយហិង្សា និងចាប់ខ្លួនអ្នកជនរងគ្រោះដែលធ្វើឱ្យពួកគាត់កាន់តែរងសម្ពាធ និងរងភាពអយុត្តិធម៌បន្ថែមទៀត។
លោក អំ សំអាត៖ «ប្រសិនជាគាត់រងផលប៉ះពាល់ដោយសារតែការចាញ់បោកប្រាក់ពីក្រុមហ៊ុន មិនអាចដកយកវិញបានត្រូវរកដំណោះស្រាយធ្វើម៉េច ដោះស្រាយជូនពួកគាត់បានកម្រិតណា នេះគឺជារឿងមួយចាំចាត់ត្រូវធ្វើ។ បើពួកគាត់ទាមទារស្វែងរកដំណោះស្រាយហ្នឹងហើយ បែរជារងនូវអំពើហិង្សា ឬការចាប់ខ្លួនបន្ថែមទៀតអាហ្នឹងជាបន្ទុកមួយទៀត។ ដំណោះស្រាយត្រូវដោះស្រាយរឿងរ៉ាវពិតប្រាកដកើតឡើងទើបស្វែងរកទីបញ្ចប់ ឬដំណោះស្រាយល្អឃើញ»។
រីឯ ប្រធានចលនាខ្មែរ ដើម្បីប្រជាធិបតេយ្យ (KMD) អ្នកស្រី មូរ សុខហួរ លើកឡើងថា អាជ្ញាធរគួរចាប់ខ្លួនមេខ្លោងគឺលោក ហ៊ុន តូ ដែលបោកប្រាស់ និងបង្កកលុយពលរដ្ឋដោយមិនមែនចាប់ខ្លួនជនរងគ្រោះឡើយ។ អ្នកស្រីបន្តថា ការតវ៉ារបស់ជនរងគ្រោះគឺស្របតាមច្បាប់ក្នុងការសម្ដែងមតិ ប៉ុន្តែរបបត្រកូល ហ៊ុន បានរៀបចំជាប្រព័ន្ធក្នុងការបង្ក្រាបដោយហិង្សាលើជនរងគ្រោះ ដើម្បីការពារក្រុមហ៊ុន លោក ហ៊ុន តូ ឱ្យប្លន់លុយពលរដ្ឋ និងបន្តសកម្មភាពឧក្រិដ្ឋកម្ម។
អ្នកស្រី មូរ សុខហួរ៖ «ដូច្នេះប្រព័ន្ធហិង្សានេះគឺជាប្រព័ន្ធរបស់រដ្ឋ។ រដ្ឋជាអ្នកប្រើអំពើហិង្សា ហើយរដ្ឋប្រើអំពើហិង្សាលើជនរងគ្រោះហួយវ័ន ដោយសារតែការពារក្មួយរបស់លោក ហ៊ុន សែន។ សិទ្ធិក្នុងការតវ៉ាដោយអហិង្សាគឺជាសិទ្ធិរបស់ពលរដ្ឋ។ ពលរដ្ឋដែលមានបញ្ហាប្រសិនជារដ្ឋមិនទទួលដោះស្រាយបញ្ហាឱ្យពលរដ្ឋធ្វើម៉េច? ដូច្នេះស្ថានការណ៍សិទ្ធិមនុស្សនៅប្រទេសកម្ពុជានឹងបន្តធ្លាក់ដុនដាបទៀតហើយ»។
មន្ត្រីសិទ្ធិមនុស្ស និងអ្នកឃ្លាំមើលអំពាវនាវឱ្យអាជ្ញាធរដោះលែងលោក សួន សុវណ្ណថៃ និងលោក វ៉ាត់ មករា ឱ្យមានសេរីភាពឡើងវិញ និងងាកមកដោះស្រាយតាមរយៈដោយការជំរុញ និងដាក់សម្ពាធឱ្យក្រុមហ៊ុន ហួយវ័ន ផេ របស់លោក ហ៊ុន តូ ប្រគល់លុយឱ្យជនរងគ្រោះវិញ។ ពួកគាត់បារម្ភថា បើរដ្ឋាភិបាលនៅតែមិនអើពើដោះស្រាយ និងបន្តចំណាត់ការបង្ក្រាបពេលអតិថិជនចេញតវ៉ាអាចនឹងមានជនរងគ្រោះរងការបង្ក្រាប និងត្រូវបានចាប់ខ្លួនបន្ថែមទៀត ដែលធ្វើឱ្យរដ្ឋាភិបាលខ្លួនឯងកាន់តែរងការរិះគន់ និងភាពអាម៉ាស់ពាក់ព័ន្ធនឹងបញ្ហារំលោភសិទ្ធិមនុស្ស ខណៈម្ចាស់ក្រុមហ៊ុនដែលកិបកេងទ្រព្យសម្បត្តិរបស់ពលរដ្ឋបែរជារួចខ្លួនគ្មានចំណាត់ការតាមផ្លូវច្បាប់៕
