អាជ្ញាធរកម្ពុជាបានចាប់បញ្ជូនជនជាតិចិនម្នាក់ឈ្មោះ ខឺ ស៊ាវវ៉េ (Ke Xiaowei) ត្រឡប់ទៅប្រទេសចិនវិញហើយ នៅរសៀលថ្ងៃទី១៦ ខែកក្កដា បន្ទាប់ពីអាជ្ញាធរបានចាប់ខ្លួនលោកថ្មីៗនេះ ដោយសារការចេញតវ៉ាទាមទារលុយរបស់ខ្លួន ដែលជាប់គាំងនៅក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ។ នេះបើយោងតាមការបញ្ជាក់របស់ជនរងគ្រោះ ហួយវ័ន ផេ ជាជនជាតចិនដូចគ្នាប្រាប់មកទូរទស្សន៍អាស៊ីសេរី។
ជនរងគ្រោះដដែលនេះបានសរសេរសារជាសំណេរប្រាប់ទូរទស្សន៍អាស៊ីសេរីតាមបណ្ដាញសង្គមថា លោក ខឺ ស៊ាវវ៉េ (Ke Xiaowei) និងប្រពន្ធរបស់គាត់បានបង្ខំចិត្តចាកចេញពីកម្ពុជាទាំងមិនទាន់ទទួលបានយុត្តិធម៌ និងលុយកម្លាំងញើសឈាមរបស់ខ្លួនត្រឡប់មកវិញ។ ជនរងគ្រោះដដែលសង្ស័យថា ការត្រឡប់ទៅប្រទេសកំណើតវិញនេះ អាជ្ញាធរកម្ពុជាអាចដាក់បម្រាម លោក ខឺ ស៊ាវវ៉េ មិនឱ្យវិលត្រឡប់ចូលកម្ពុជាវិញទេ។
ទោះជាយ៉ាងណា ជនរងគ្រោះហួយវ័ន ផេ រូបនេះបញ្ជាក់ថា កូនប្រុសរបស់លោក ខឺ ស៊ាវវ៉េ កំពុងមានវត្តមាននៅកម្ពុជានៅឡើយ ហើយគាត់នៅតែមានស្មារតីរឹងមាំ មិនខ្លាចការសម្លុតគំរាមកំហែងក្នុងការចូលរួមតវ៉ាជាមួយជនរងគ្រោះជនជាតិចិន និងខ្មែរផ្សេងទៀត ដើម្បីការពារសិទ្ធិ និងទាមទារលុយកម្លាំងញើសឈាមរបស់ខ្លួនត្រឡប់មកវិញឡើយ។
លោក ខឺ ស៊ាវវ៉េ (Ke Xiaowei) ធ្លាប់អះអាងប្រាប់ប្រព័ន្ធផ្សព្វផ្សាយថា ក្រុមហ៊ុន ហួយវ័ន ផេ របស់លោក ហ៊ុន តូ បានបង្កកយកលុយរបស់លោកប្រមាណ ៣០ម៉ឺនដុល្លារ។ លោកអះអាងទៀតថា លុយទាំងនេះគឺជាដើមទុន និងបានមកពីការប្រកបរបររកស៊ីបើកភោជនីយដ្ឋាននៅកម្ពុជា។
លោក ខឺ ស៊ាវវ៉េ (Ke Xiaowei) ត្រូវបានកម្លាំងសមត្ថកិច្ចក្រុងភ្នំពេញស្ទាក់ចាប់ខ្លួននៅត្រង់ចំណុចបណ្ដោយផ្លូវហាណូយក្នុងរាជធានីភ្នំពេញ បន្ទាប់ពីចូលរូមធ្វើបាតុកម្មតវ៉ាទាមទារលុយនៅខាងមុខធនាគារជាតិកាលពីថ្ងៃទី១៣ ខែកក្កដា។ ក្រុមជនរងគ្រោះបញ្ជាក់ថា អ្នកបញ្ជាឱ្យចាប់ខ្លួននេះ គឺជាក្មួយបង្កើតប្រធានព្រឹទ្ធសភាលោក ហ៊ុន សែន គឺលោក ហ៊ុន តូ។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យអគ្គនាយកដ្ឋានអន្តោប្រវេសន៍ លោក សុខ សុមនា ដើម្បីសាកសួរជុំវិញរឿងនេះបានទេនៅថ្ងៃទី១៦ ខែកក្កដា។
ក្រុមហ៊ុន ហួយវ័ន ផេ ជាផ្នែកមួយនៃក្រុមហ៊ុន ហួយវ័ន គ្រុប (Huione Group) មានកម្មវិធីទូទាត់លុយតាមអនឡាញដែលក្មួយបង្កើតលោក ហ៊ុន សែន គឺលោក ហ៊ុន តូ ជាសហប្រធានមួយរូប។
ក្រុមហ៊ុននេះបានប្រកាសបង្កកលុយអតិថិជនដែលមានក្នុងគណនីកាលពីចុងឆ្នាំ២០២៥ ពោលបន្ទាប់ពី សហរដ្ឋអាមេរិក និងចក្រភពអង់គ្លេសបានដាក់ទណ្ឌកម្មលើក្រុមហ៊ុននេះ។ សហរដ្ឋអាមេរិក និងចក្រភពអង់គ្លេសរកឃើញថា ក្រុមហ៊ុន ហួយវ័ន គ្រុប បានលាងលុយកខ្វក់ឱ្យក្រុមចោរព័ត៌មានវិទ្យាកូរ៉េខាងជើង និងក្រុមឧក្រិដ្ឋជនឆបោកតាមអនឡាញក្នុងទំហំទឹកប្រាក់ប្រមាណ ៤ពាន់លានដុល្លារអាមេរិក។
ជនរងគ្រោះភាគច្រើនជាជនជាតិចិន និងខ្មែរ លើកឡើងថា លុយរបស់ពួកគាត់ដែលត្រូវបានក្រុមហ៊ុនបង្កកមិនមែនជាលុយកខ្វក់ ឬបានមកពីអំពើឧក្រិដ្ឋកម្មឡើយ។ ក្រុមជនរងគ្រោះប្ដេជ្ញាចិត្តថា ពួកគាត់នឹងមិនបោះបង់ការប្រមូលផ្ដុំគ្នាតវ៉ាឡើយ ដរាបណាស្ថាប័នពាក់ព័ន្ធមិនចេញមុខដោះស្រាយ និងជំរុញឱ្យក្រុមហ៊ុន លោក ហ៊ុន តូ សងលុយកម្លាំងញើសឈាមពួកគាត់វិញ៕
