ក្នុងពេលដែលសង្គមខ្មែរកំពុងជជែកគ្នាអំពីការផ្សះផ្សាជាតិ បន្ទាប់ពីមានការលើកលែងទោស ការដោះលែង និងការផ្តល់តួនាទីក្នុងរដ្ឋាភិបាលដល់បុគ្គលមួយចំនួន សហគមន៍ខ្មែរនៅប្រទេសកាណាដាបានជួបជុំគ្នា ដើម្បីពិភាក្សាថា តើការផ្សះផ្សាជាតិពិតប្រាកដសម្រាប់កម្ពុជាគួរមានលក្ខណៈបែបណា។ អ្នកចូលរួមយល់ឃើញថា ការផ្សះផ្សាជាតិមិនគួរផ្តោតតែលើបុគ្គលមួយចំនួន ឬការចរចាដើម្បីចែករំលែកតួនាទីនោះទេ ខណៈអ្នកទោសនយោបាយនៅតែជាប់ឃុំ សិទ្ធិនយោបាយ និងសេរីភាពសារព័ត៌មាននៅតែត្រូវបានរឹតត្បិត ហើយបញ្ហាយុត្តិធម៌សង្គម ជម្លោះព្រំដែន និងឧក្រិដ្ឋកម្មឆបោកតាមអនឡាញនៅមិនទាន់ត្រូវបានដោះស្រាយដល់ឫសគល់។
ដោយសារក្តីបារម្ភទាំងនេះ ចលនាខ្មែរដើម្បីប្រជាធិបតេយ្យ (KMD) បានរៀបចំវេទិកាសាធារណៈជាបន្តបន្ទាប់ជាមួយសហគមន៍ខ្មែរនៅកាណាដា ដើម្បីប្រមូលមតិ និងសំណើសម្រាប់ដំណោះស្រាយជាតិដោយសន្តិវិធី។ លទ្ធផលនៃការពិភាក្សាទាំងនេះ បានក្លាយជា «សេចក្តីប្រកាសតូរ៉ុនតូ» ដែលត្រូវបានអនុម័តនៅថ្ងៃទី២៩ ខែសីហា ឆ្នាំ២០២៦។ សេចក្តីប្រកាសទាំង១០ចំណុចនេះ អំពាវនាវឱ្យមានការផ្សះផ្សាជាតិពិតប្រាកដ ការដោះលែងអ្នកទោសនយោបាយ ការធានាសិទ្ធិវិលត្រឡប់ដោយសុវត្ថិភាព ការបោះឆ្នោតដោយសេរី សិទ្ធិបោះឆ្នោតរបស់ពលរដ្ឋខ្មែរនៅក្រៅប្រទេស សេរីភាពសារព័ត៌មាន សមភាពចំពោះមុខច្បាប់ យុត្តិធម៌សង្គម និងការដោះស្រាយបញ្ហាជាតិដោយតម្លាភាព។
