មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) រកឃើញថា សេរីភាពសារព័ត៌មាននៅកម្ពុជា បានបន្តធ្លាក់ចុះក្នុងឆ្នាំ២០២៥ ដោយអ្នកសារព័ត៌មានជាច្រើននៅតែបារម្ភអំពីការប្រឈមមុខនឹងចំណាត់ការផ្លូវច្បាប់ និងការជាប់ពន្ធនាគារ។ នេះបើយោងតាមរបាយការណ៍ប្រចាំឆ្នាំរបស់CCIM ដែលចេញផ្សាយនៅចុងខែឧសភា។
របាយការណ៍ស្ដីពីបញ្ហាប្រឈមរបស់ប្រព័ន្ធផ្សព្វផ្សាយឯករាជ្យ បានរកឃើញថា ៦៩% នៃអ្នកសារព័ត៌មានចំនួន ១០៩ នាក់ដែលត្រូវបានស្ទង់មតិ បានបង្ហាញការព្រួយបារម្ភអំពីហានិភ័យផ្លូវច្បាប់ រួមទាំងការចាប់ខ្លួន និងការជាប់ពន្ធនាគារ។ ចំណែក ៣៩% បាននិយាយថា ពួកគេព្រួយបារម្ភពីសុវត្ថិភាពផ្ទាល់ខ្លួនពេលបំពេញការងារ។
CCIM បានគូសបញ្ជាក់ថា អ្នកសារព័ត៌មានឯករាជ្យនៅកម្ពុជា នៅតែធ្វើការក្នុងបរិយាកាសដែលពោរពេញដោយសម្ពាធ និងការគំរាមកំហែង ជាពិសេសនៅពេលរាយការណ៍លើប្រធានបទរសើប ដូចជាអំពើពុករលួយ ការកាប់បំផ្លាញព្រៃឈើ និងការគ្រប់គ្រងធនធានធម្មជាតិ។
របាយការណ៍ដដែលក៏បានលើកឡើងពីផលប៉ះពាល់ដល់សុខភាពផ្លូវចិត្តរបស់អ្នកសារព័ត៌មានផងដែរ។ ប្រមាណ ៣០% នៃអ្នកចូលរួមស្ទង់មតិ បានអះអាងថា ពួកគេត្រូវប្រើថ្នាំ ឬស្វែងរកសេវាប្រឹក្សាផ្លូវចិត្តជាប្រចាំ ដើម្បីដោះស្រាយបញ្ហាសំពាធផ្លូវចិត្ត ឬស្ត្រេសដែលកើតឡើងពីការងារ។
បន្ថែមពីនេះ អ្នកសារព័ត៌មានមួយចំនួនបានរាយការណ៍ថា ពួកគេធ្លាប់ជួបប្រទះការបៀតបៀនផ្លូវភេទ ខណៈស្ថាប័នសារព័ត៌មានមួយចំនួននៅមិនទាន់មានយន្តការគាំទ្រ ឬដោះស្រាយបញ្ហាទាំងនេះបានគ្រប់គ្រាន់នៅឡើយ។
CCIM បានរកឃើញថា វិស័យសារព័ត៌មានកម្ពុជានៅតែប្រឈមនឹងបញ្ហាសមភាពយេនឌ័រ កង្វះយន្តការគាំទ្រវិជ្ជាជីវៈ និងការសម្របខ្លួនទៅនឹងបច្ចេកវិទ្យាថ្មីៗ រួមទាំងបញ្ញាសិប្បនិម្មិត ដែលកំពុងផ្លាស់ប្ដូររបៀបផលិត និងផ្សព្វផ្សាយព័ត៌មាន។
ជុំវិញបញ្ហានេះ នាយិកាប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) អ្នកស្រី ឆន សុគន្ធា បានលើកឡើងថា របាយការណ៍ស្ដីពីការប្រឈមរបស់អ្នកសារព័ត៌មានឯករាជ្យគឺ ចេញជារៀងរាល់ឆ្នាំ ហើយនៅក្នុងរបាយការណ៍ចុងក្រោយនេះ រកឃើញថា ស្ថានភាពសេរីភាពសារព័ត៌មាន នៅតែមានបញ្ហាស្មុគស្មាញ។
អ្នកស្រី ឆន សុគន្ធា បានឲ្យដឹងទៀតថា បញ្ហាធំ របស់អ្នកសារព័ត៌មានឯករាជ្យ គឺពាក់ព័ន្ធនឹងរឿងសុវត្ថិភាពនៅពេលដែលរាយការណ៍ពីព័ត៌មាន រសើបៗ គឺតែងតែរងនូវការគំរាមកំហែង ឬក៏អាចចាប់ដាក់ពន្ធនាគារ។
អ្នកស្រី ឆន សុគន្ធា៖ «អីចឹងខ្ញុំសង្ឃឹមថា រាជរដ្ឋាភិបាលកម្ពុជានឹងពិនិត្យ ហើយនឹងបើកឱកាសដល់អ្នកសារព័ត៌មានទាំងអស់ រួមទាំងសារព័ត៌មាន ពលរដ្ឋ ដើម្បីឲ្យគាត់មានឱកាសនៅក្នុងការរាយការណ៍បញ្ហាជាពិសេសគឺបញ្ហាការបោះឆ្នោតនៅពេលខាងមុខហ្នឹងដោយសារពួកគាត់ដើរតួនាទីយ៉ាងសំខាន់នៅក្នុងការជួយ រួមទាំងគណបក្សនយោបាយ ក៏ដូចជាជួយទៅដល់ពលរដ្ឋ ក៏ដូចជារដ្ឋាភិបាលផងដែរ ដើម្បីឲ្យគ្រប់ភាគីពាក់ព័ន្ធមានឱកាស ចូលរួមនៅក្នុងការបោះឆ្នោតដោយសេរីនិងយុត្តិធម៌»។
ការរកឃើញនេះស្របគ្នានឹងការវាយតម្លៃរបស់អង្គការអ្នកកាសែតគ្មានព្រំដែន (Reporters Without Borders) ដែលបានលើកឡើងថា អ្នកសារព័ត៌មានឯករាជ្យនៅកម្ពុជានៅតែជួបបញ្ហាប្រឈមធ្ងន់ធ្ងរ ជាពិសេសអ្នកដែលរាយការណ៍អំពីបញ្ហាបរិស្ថាន និងធនធានធម្មជាតិ។
ផ្ទុយពីការរកឃើញរបស់អង្គការក្នុងស្រុក និងអន្តរជាតិដែលធ្វើការលើការការពារអ្នកកាសែតនេះ កាលពីថ្ងៃទី២៩ ខែឧសភា ក្រសួងព័ត៌មាន បានចេញផ្សាយរបាយការណ៍មួយដែលអះអាងថា ស្ថានភាពសេរីភាពសារព័ត៌មាននៅកម្ពុជាសម្រាប់ឆ្នាំ២០២៦ នៅតែមានភាពល្អប្រសើរ។
រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានមានប្រសាសន៍ថា ទោះបីនៅមានបញ្ហាប្រឈមមួយចំនួនក៏ដោយ ប៉ុន្តែស្ថានភាពសេរីភាពសារព័ត៌មាននៅកម្ពុជាបានបង្ហាញសញ្ញាវិជ្ជមានជាច្រើន។
ទោះជាយ៉ាងណា សម្ព័ន្ធអ្នកសារព័ត៌មានកម្ពុជា (CamboJA) បានកត់ត្រាករណីរំលោភសិទ្ធិ និងការយាយីលើអ្នកសារព័ត៌មានចំនួន ៦១ ករណី ក្នុងឆ្នាំ២០២៥ ដែលប៉ះពាល់ដល់អ្នកសារព័ត៌មាន ៥៧ នាក់។
របាយការណ៍របស់ CamboJA បង្ហាញថា ៤៥ ករណី ឬស្មើនឹង ៧៤% នៃករណីសរុប គឺពាក់ព័ន្ធនឹងចំណាត់ការផ្លូវច្បាប់។ តួលេខនេះបានកើនឡើង ៦១% បើប្រៀបធៀបនឹងឆ្នាំ២០២៤ ដែលមានត្រឹម ២៨ ករណីប៉ុណ្ណោះ។
ទិន្នន័យទាំងនេះបង្ហាញថា បើទោះបីមានការអះអាងពីភាពប្រសើរឡើងនៃសេរីភាពសារព័ត៌មានក៏ដោយ ក្តីបារម្ភអំពីសុវត្ថិភាព និងហានិភ័យផ្លូវច្បាប់នៅតែជាបញ្ហាចម្បងសម្រាប់អ្នកសារព័ត៌មានឯករាជ្យនៅកម្ពុជា៕
