អតីតអភិបាលរងក្រុងអរិយក្សត្រ ខេត្តកណ្ដាល អ្នកស្រី ធី សុវណ្ណថា និងប្ដី គឺលោក ផែ សុវណ្ណារិទ្ធិ ត្រូវបានសាលាដំបូងរាជធានីភ្នំពេញផ្ដន្ទាទោស ឱ្យជាប់ពន្ធនាគារម្នាក់ៗបីឆ្នាំ ពីបទ «ធ្វើឱ្យខូចទឹកចិត្តកងទ័ព»។ គូស្វាមីភរិយានេះ ត្រូវជាប់ពន្ធនាគារ បន្ទាប់ពីបោះបង់គណបក្សសង្គ្រោះជាតិ ទៅចុះចូល គណបក្សប្រជាជនកម្ពុជា បានជិត ១០ឆ្នាំ។ អ្នកឃ្លាំមើលលើកឡើងថា អ្នកស្រី ធី សុវណ្ណថា ត្រូវលោក ហ៊ុន សែន ទាត់ចោល បន្ទាប់ពីលែងមានប្រយោជន៍។
ទ្រឹស្ដីសង្គម ដែលពលរដ្ឋទូទៅ តែងតែនិយាយថា «ស្លឹកចេក នឹងត្រូវបោះចោល បន្ទាប់ពីប្រើរួច» បានឆ្លុះបញ្ចាំង អំពីស្ថានភាពអ្នកស្រី ធី សុវណ្ណថា និងប្ដី នៅពេលនេះ បន្ទាប់ពីពួកគេ បានបោះបង់គណបក្សប្រឆាំងទៅចូលរួមជីវភាព នយោបាយជាមួយគណបក្សប្រជាជនកម្ពុជា អស់ពេលជិត ១០ឆ្នាំ។
ភាពហ៊ឺហាពីដំបូងៗ ដោយសារលុយកាក់ លាភសក្ការៈ និងតំណែងដែលបាន ពី លោក ហ៊ុន សែន ពេលនេះប្ដូរជាការដេកក្នុងពន្ធនាគារ ដែលកាត់ទោសដោយតុលាការ នៅក្រោមអំណាចលោក ហ៊ុន សែន។ អតីតសកម្មជនគណបក្សសង្គ្រោះជាតិដ៏ល្បីល្បាញ អ្នកស្រី ធី សុវណ្ណថា ដែលបានឡើងតំណែងជាអភិបាលរងក្រុងអរិយក្សត្រ ក្រោយចុះចូលគណបក្សប្រជាជនកម្ពុជា ត្រូវបានសាលាដំបូង រាជធានីភ្នំពេញ ផ្ដន្ទាទោសដាក់ពន្ធនាគាររយៈពេលបីឆ្នាំ ក្រោយការបង្ហោះសារលើបណ្ដាញសង្គមជុំវិញការរិះគន់ពាក់ព័ន្ធនឹងកងទ័ព។
ប្ដីរបស់អ្នកស្រី គឺលោក ផែ សុវណ្ណារិទ្ធិ ក៏មានទោសដូចគ្នាដែរ។ អង្គការលីកាដូរាយការណ៍ថា សាលាដំបូងរាជធានីភ្នំពេញ បានប្រកាសសាលក្រមកាត់ទោសអ្នកទាំងពីរ កាលពីថ្ងៃទី១៣ ខែកក្កដា។
អ្នកឃ្លាំមើលលើកឡើងថា ការបង្ហោះសារលើបណ្ដាញសង្គមរបស់អ្នកស្រី ធី សុវណ្ណថា និងប្ដី រិះគន់អំពីរឿងកងទ័ពនោះ គឺជាសេរីភាពបញ្ចេញមតិ តាមស្មារតី រដ្ឋធម្មនុញ្ញប៉ុណ្ណោះ និងមិនមែនជាកំហុសផ្លូវច្បាប់ ដែលត្រូវផ្ដន្ទាទោសឡើយ ប៉ុន្តែការកាត់ទោសអ្នកទាំងពីរ នៅពេលនេះ អាចជាប់ពាក់ព័ន្ធនឹងការសងសឹក នយោបាយ ដែលលោក ហ៊ុន សែន នៅចងគំនុំ រឿងអ្នកស្រី ធី សុវណ្ណថា ធ្លាប់ បានរិះគន់លោក ហ៊ុន សែន ធ្ងន់ៗ កាលពេលអ្នកស្រី ជាសកម្មជនគណបក្សសង្គ្រោះជាតិ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់ទូរទស្សន៍អាស៊ីសេរី នៅថ្ងៃទី១៤ ខែកក្កដាថា ករណីអ្នកស្រី ធី សុវណ្ណថា គឺជាមេរៀននយោបាយកខ្វក់មួយ ក្នុងចំណោមសាច់រឿងជាច្រើនទៀត ដែលឆ្លុះបញ្ចាំងពីឧក្រិដ្ឋកម្មនយោបាយ របស់លោក ហ៊ុន សែន។ លោកថា បើនិយាយដល់សេរីភាពបញ្ចេញមតិ អ្នកស្រី ធី សុវណ្ណថា គ្មានទោសទេ ប៉ុន្តែលោកថា លោក ហ៊ុន សែន ប្រើលុយ និងតំណែងដើម្បីអូសទាញអ្នកស្រី ធី សុវណ្ណថា ឲ្យចូលគណបក្សប្រជាជនកម្ពុជា ហើយក៏ប្រើតុលាការកម្ចាត់ចោលវិញ បន្ទាប់ពីលោក ហ៊ុន សែន អស់ការពេញចិត្តសម្រាប់ប្រើ ជាឧបករណ៍នយោបាយទៀត។
លោក ម៉ែន ណាត ថា ការដាក់ទោសអ្នកស្រី ធី សុវណ្ណថា ក៏ជាល្បិចដែលលោក ហ៊ុន សែន ចង់បោះសារគំរាមដល់អ្នកចុះចូលគណបក្សប្រជាជនដទៃទៀត កុំឲ្យដើរហួសពីបន្ទាត់នយោបាយអំណាចរបស់គ្រួសារត្រកូលហ៊ុន។
លោក ម៉ែន ណាត៖ «ជាមេរៀនមួយទៅដល់អ្នកគ្រប់គ្នានៅក្នុងប្រទេសកម្ពុជាហ្នឹង មិនថា អ្នកនឹងគាំទ្របក្សប្រឆាំង ឬក៏គាំទ្របក្សកាន់អំណាច ឬក៏អ្នកហ្នឹង ចុះចូលគណបក្សកាន់អំណាចហើយបានសុខស្រួលទេ អត់ទេណាស់ គឺចុះចូលគណបក្សកាន់អំណាច អាចបានទទួលប្រយោជន៍គឺ ជាប្រយោជន៍ដោះដូរ ដោះដូរទិញទឹកចិត្ត ហើយត្រូវបម្រើការឱ្យលោក ហ៊ុន សែន។ នៅពេលដែលលោក ហ៊ុន សែន និងលោក ហ៊ុន ម៉ាណែត ប្រើអស់សាច់ហើយ យើងប្រើពាក្យអ៊ីចឹងចុះ ចង់កម្ចាត់ចោលពេលណាស្រេចតែគេ អាហ្នឹងវាអ៊ីចឹងរបបហ្នឹង គឺជារបបគ្មានច្បាប់ គ្មានទម្លាប់ទេ គឺដឹកនាំតាមតែមាត់មេដឹកនាំ មេដឹកថាម៉េច គឺអ៊ីចឹង។ តុលាការក៏គ្មានសិទ្ធិ»។
ចំណែកឯនាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលោក អំ សំអាត ប្រាប់ទូរទស្សន៍អាស៊ីសេរី នៅថ្ងៃទី១៤ ខែកក្កដាថា ការផ្ដន្ទាទោសអ្នកស្រី ធី សុវណ្ណថា និង លោក ផែ សុវណ្ណរិទ្ធិ អាចរងការរិះគន់ពីសហគមន៍ជាតិនិង អន្តរជាតិ អំពីការធ្លាក់ចុះសេរីភាពបញ្ចេញមតិនៅប្រទេសកម្ពុជា។
លោកកត់សម្គាល់ថា ពលរដ្ឋជាច្រើននាក់ ដែលជាប់ពន្ធនាគារ ទាក់ទងនឹងការរិះគន់រឿងតំបន់ត្រីកោណអភិវឌ្ឍន៍ កម្ពុជា-វៀតណាម-ឡាវ ក៏មិនទាន់ត្រូវបាន ដោះលែងឱ្យមានសេរីភាព ទោះបីជារដ្ឋាភិបាលបានដកខ្លួនចេញពីកិច្ចព្រមព្រៀង នេះហើយក៏ដោយ។ លោកបន្ថែមថា សេរីភាពនៃការបញ្ចេញមតិ កាន់តែមាន ការរឹតត្បិត ក្រោយមានជម្លោះព្រំដែន ហើយពលរដ្ឋជាច្រើន ត្រូវបានចាប់ខ្លួន និងចោទប្រកាន់ពីបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម បទញុះញង់ ឱ្យមានការរើសអើង និងបទជេរប្រមាថជាដើម។
លោក អំ សំអាត៖ «ការចោទប្រកាន់ ការផ្ដន្ទាទោសទៅលើអ្នកស្រី ធី សុវណ្ណថា និងលោក ផែ សុវណ្ណរិទ្ធិ ក៏ដូចជា សកម្មជនផ្សេងៗទៀតហ្នឹង គឺយើងស្ថិតនៅក្នុងការមានការរិះគន់ច្រើនដែរ ពីសហគមន៍ជាតិ និងអន្តរជាតិ ទាក់ទងនឹងសេរីភាព ក្នុងការបញ្ចេញមតិ។ អ៊ីចឹងហើយអ្វីដែលសំខាន់ហ្នឹង គឺការពិនិត្យបានច្បាស់លាស់របស់អាជ្ញាធរ និងតុលាការមុននឹងសម្រេច ធ្វើការឃាត់ខ្លួន ចាប់ខ្លួន ចោទប្រកាន់ ឃុំខ្លួន និងការផ្ដន្ទាទោស»។
អ្នកស្រី ធី សុវណ្ណថា ធ្លាប់ល្បីល្បាញខ្លាំង កាលអំឡុងការបោះឆ្នោតឆ្នាំ២០១៣ ក្នុងនាមជាសកម្មជនគណបក្សសង្គ្រោះជាតិ ដោយសារអ្នកស្រី ហ៊ានកាន់ផ្លែមេក្រូ រិះគន់លោក ហ៊ុន សែន ឥតសំចៃមាត់ ជាសាធារណៈ។ ក្រោយចុះចូល ជាមួយបក្សកាន់អំណាចអ្នកស្រីត្រូវបានលោក ហ៊ុន សែន ផ្តល់លាភសក្ការៈជាច្រើន។ ក្នុងសារសំឡេង បែកធ្លាយលើបណ្ដាញសង្គម អ្នកស្រី ធី សុវណ្ណថា បានទទួលនូវឡានទំនើបផ្ទះប្រណិត ប្រាក់យ៉ាងតិចមួយលានដុល្លារ និងបន្ទាប់មកបាន ក្លាយជាអភិបាលរងក្រុងអរិយក្សត្រ បន្ទាប់ពីការចុះចូលគណបក្សប្រជាជនកម្ពុជា នៅចុងខែឧសភា ឆ្នាំ២០១៧។
ដោយឡែកប្រធានអង្គការប្រជាធិបតេយ្យខ្មែរ នៅប្រទេសអូស្ត្រាលីលោក ស៊ឹង សែនករុណា លើកឡើងថា ការសម្ដែងមតិរបស់អ្នកស្រី ធី សុវណ្ណថា កន្លងមក គ្រាន់តែចង់ឱ្យអ្នកកាន់អំណាច និងប្រជាពលរដ្ឋចាប់អារម្មណ៍ លើអ្នកស្រីប៉ុណ្ណោះ។ លោកថា បើនិយាយទៅដល់នយោបាយវិញ ករណីនេះ អាចជា រឿងប្រឌិតរបស់លោក ហ៊ុន សែន ធ្វើជាដាក់ទោសអ្នកស្រី ធី សុវណ្ណថា ដើម្បីបង្កើតព្រឹត្តិការណ៍មួយ យកទៅលុបលើព្រឹត្តិការណ៍ជាតិដទៃទៀត។
លោក ស៊ឹង សែនករុណា៖ «មិនមានទំនុកចិត្ត ថាវាជារឿងពិតជាក់ស្ដែងប៉ុន្មាននោះទេ ដោយសារតែអ្នកទាំងអស់នោះ សុទ្ធសឹងតែជាអ្នកធ្លាប់តែបម្រើដល់គណបក្សប្រឆាំង ហើយត្រូវបានគណបក្សកាន់អំណាច ផ្ដល់ផលប្រយោជន៍អីអ៊ីចឹងទៅ ក៏ទៅបម្រើគណបក្សកាន់អំណាចអ៊ីចឹងទៅ។ យើងស្ទើរតែមិនជឿថា សុខៗ នៅពេលដែលខ្លួនទទួលបាននូវផលប្រយោជន៍ មានតំណែងតួនាទី ស្រាប់ តែលេចចេញនូវការបញ្ចេញមតិមួយ ហើយបង្កើតជារឿងរ៉ាវនឹងអ៊ីចឹងមក។ អ៊ីចឹងយើង ក៏មិនមានទំនុកចិត្តថា តើរឿងហ្នឹង វាពិតឬក៏យ៉ាងណាដែរ»។
អ្នកស្រី ធី សុវណ្ណថា និងប្ដី ត្រូវបានចាប់ខ្លួននៅក្នុងខែធ្នូ ឆ្នាំ២០២៥ និងត្រូវបានចោទប្រកាន់ពីបទ«ធ្វើឱ្យខូចទឹកចិត្តកងទ័ព» តាមមាត្រា៤៧២ នៃក្រមព្រហ្មទណ្ឌ ដែលត្រូវប្រឈមនឹងការជាប់ពន្ធនាគារពី២ ទៅ ៥ឆ្នាំ។ បច្ចុប្បន្នអ្នកស្រី សុវណ្ណថា កំពុងជាប់ឃុំក្នុងពន្ធនាគារខេត្តកំពង់ស្ពឺ រីឯលោក សុវណ្ណរិទ្ធិ ជាប្ដីជាប់ឃុំនៅក្នុងពន្ធនាគារខេត្តកណ្តាល៕
