នាយកការិយាល័យស៊ើបអង្កេតសហព័ន្ធ (FBI) សហរដ្ឋអាមេរិកលោក កាស ប៉ាទែល (Kash Patel) បានលាតត្រដាងថា តំបន់ព្រំដែននៅកម្ពុជា មីយ៉ាន់ម៉ា និងថៃ បានក្លាយជាមូលដ្ឋានសំខាន់របស់បណ្ដាញឧក្រិដ្ឋកម្មឆ្លងដែន ដែលប្រតិបត្តិការឆបោកលុយតាមអនឡាញក្នុងទំហំរាប់សិបពាន់លានដុល្លារ។ នាយក FBI បញ្ជាក់ថា បណ្ដាញឧក្រិដ្ឋជនមិនត្រឹមតែបង្កើតជាមជ្ឈមណ្ឌលសម្រាប់ការឆបោកប៉ុណ្ណោះទេ ប៉ុន្តែក៏មានជាប់ពាក់ព័ន្ធនឹងការជួញដូរមនុស្ស និងពលកម្មដោយបង្ខំផងដែរ។
នាយកការិយាល័យស៊ើបអង្កេតសហព័ន្ធ (FBI) សហរដ្ឋអាមេរិក លោក កាស ប៉ាទែល លើកឡើងថា មជ្ឈមណ្ឌលឆបោកតាមអនឡាញនៅតំបន់ព្រំដែនកម្ពុជា មីយ៉ាន់ម៉ា និងថៃ មានលក្ខណៈ ជាបណ្ដុំដែលត្រូវបានបង្កើតឡើងសម្រាប់ប្រើប្រាស់ពលកម្មដោយបង្ខំ។ លោកបញ្ជាក់ថា មនុស្សជាច្រើនត្រូវបានជួញដូរ បង្ខាំង និងដកហូតសេរីភាព ដោយគេមិនអនុញ្ញាតឱ្យចាកចេញពីទីនោះ និងត្រូវស្នាក់នៅក្នុងទីតាំងទាំងនោះ ២៤ម៉ោងក្នុងមួយថ្ងៃ និង ៧ ថ្ងៃក្នុងមួយសប្ដាហ៍។
លោក កាស ប៉ាទែល បញ្ជាក់ថា FBI បានប្រើវិធីសាស្ត្រពីរផ្នែកសំខាន់ ដើម្បីប្រយុទ្ធប្រឆាំងនឹងការឆបោកតាមអនឡាញ គឺប្រតិបត្តិការឈ្មោះ (Operation Level Up) ដែលផ្ដោតលើការរំដោះជនរងគ្រោះពីទីតាំងឆបោក និងប្រតិបត្តិការ (Operation Blackout) ដែលផ្ដោតលើការស៊ើបអង្កេតបង្ក្រាបបណ្ដាញឆបោកនៅតំបន់ទាំងនេះ។
លោកឱ្យដឹងថា FBI កំពុងសហការជាមួយមេដឹកនាំ និងអាជ្ញាធរអនុវត្តច្បាប់នៅក្នុងប្រទេសពាក់ព័ន្ធ ដើម្បីស៊ើបអង្កេតទ្រង់ទ្រាយធំ កំណត់ទីតាំង និងបង្ក្រាបមជ្ឈមណ្ឌលឆបោក ព្រមទាំងរំដោះមនុស្សដែលត្រូវបានជួញដូរ និងបង្ខំឱ្យធ្វើការនៅទីនោះ។ នាយក FBI លោក កាស ប៉ាទែល អះអាងថា ប្រតិបត្តិការបណ្ដាញឆបោកទាំងនេះមិនត្រឹមតែបង្កការខាតបង់លុយរបស់ប្រជាពលរដ្ឋអាមេរិកឡើយ ប៉ុន្តែថែមទាំងប៉ះពាល់ដល់ប្រជាពលរដ្ឋនៅក្នុងប្រទេសដែលជាទីតាំងមជ្ឈមណ្ឌលឆបោកផងដែរ ហើយទំហំការខាតបង់សរុបអាចមានដល់រាប់រយពាន់លានដុល្លារ។
ថ្លែងក្នុងបទសម្ភាសជាមួយសារព័ត៌មាន ដឹ អេប៉ក ថាមស៍ (The Epoch Times) កាលពីថ្ងៃទី ១០ សីហា លោក កាស ប៉ាទែល បន្តថា ក្នុងរយៈពេលប្រមាណ ១៤ខែចុងក្រោយនេះ FBI បានពង្រឹងទំនាក់ទំនងជាមួយអាជ្ញាធរអនុវត្តច្បាប់ និងមេដឹកនាំនៅតំបន់ ដើម្បីបើកប្រតិបត្តិការរួមប្រឆាំងនឹងបណ្ដាញឆបោកទាំងនេះ។ លោកអះអាងថា FBI និងដៃគូបានធ្វើប្រតិបត្តិការចំនួន៤ ក្នុងនោះ ៣នៅអាស៊ីអាគ្នេយ៍ និងមួយទៀតនៅទីក្រុងឌូបៃ ដែលបានរំដោះជនរងគ្រោះពីការជួញដូររាប់ពាន់នាក់។
អំឡុងពេលមកបំពេញទស្សនកិច្ចនៅតំបន់អាស៊ីអាគ្នេយ៍កាលពីចុងខែកក្កដា កន្លងទៅ ដើម្បីជួបពិភាក្សាជាមួយមេដឹកនាំប្រទេសមួយចំនួន រួមទាំងថ្នាក់ដឹកនាំកម្ពុជា ស្ដីពីការពង្រឹងកិច្ចសហប្រតិបត្តិការសន្តិសុខ នាយកការិយាល័យស៊ើបអង្កេតសហព័ន្ធ (FBI) សហរដ្ឋអាមេរិក លោក កាស ប៉ាទែល បានសង្កត់ធ្ងន់ជារួមដោយចង់ឱ្យមេដឹកនាំកម្ពុជា និងប្រទេសក្នុងតំបន់ផ្សេងទៀតមានការទទួលខុសត្រូវខ្ពស់ជាងមុនដោយពន្លឿនការបង្ក្រាប ព្រមទាំងចាប់ខ្លួនមេខ្លោងសំខាន់ៗដែលពាក់ព័ន្ធនឹងបណ្ដាញឆបោកតាមអនឡាញ។
ទាក់ទងនឹងរឿងនេះ ទូរទស្សន៍អាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ប៉ែន បូណា ដើម្បីសាកសួរបន្ថែមជុំវិញរឿងនេះបានទេនៅថ្ងៃទី១១ ខែសីហា។
ជុំវិញរឿងនេះ អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ យល់ថា ការលើកឡើងរបស់មេ FBI អាមេរិកគឺសារព្រមាន និងជាការរម្លឹកជាថ្មីដល់មេដឹកនាំកម្ពុជា និងបណ្ដាប្រទេសក្នុងតំបន់ផ្សេងទៀតត្រូវចាត់វិធានការឱ្យចំគោលដៅមេខ្លោងកាងការពារមជ្ឈមណ្ឌលនៅតាមព្រំដែន ដោយមិនមែនបង្ក្រាបជនល្មើសតូចតាចឡើយ។ លោកថា ការលូកដៃរបស់ FBI ស៊ើបអង្កេតប្រឆាំងនឹងឧក្រិដ្ឋកម្មឆ្លងដែនទ្រង់ទ្រាយធំនាពេលនេះ ដោយសារតែអាមេរិកដឹងថា មេខ្លោងសំខាន់ៗគឺសុទ្ធតែពាក់ព័ន្ធ និងទទួលបានការកាងការពារពីក្រុមមេដឹកនាំនៃប្រទេសមួយចំនួនក្នុងតំបន់។
លោក គឹម សុខ៖ «បណ្ដាញឆបោកអនឡាញនៅក្នុងប្រទេសកម្ពុជាក្តី នៅក្នុងតំបន់អាស៊ីអាគ្នេយ៍ក្តី ប្រាកដជាមិនអាចមានដំណើរការល្អណែនពេញដៃដូចពីមុនទៀតទេ គឺមានន័យថា សហរដ្ឋអាមេរិកនឹងប្រើគ្រប់វិធានការរបស់ពួកគេ ដើម្បីកម្ចាត់មេបណ្ដាញធំៗទាំងនៅកម្ពុជា និងនៅក្នុងតំបន់អាស៊ីអាគ្នេយ៍ ក៏ដូចជាពិភពលោក។ ហេតុដូច្នេះ យុទ្ធនាការរបស់លោក ហ៊ុន ម៉ាណែត ខ្ញុំមើលឃើញថា ត្រូវប្រឈមនឹងភាពល្វីងជូរចត់នឹងចំណាត់របស់សហរដ្ឋអាមេរិកហើយ ពីព្រោះអាមេរិកកាំងមកដល់ពេលនេះ បង្ហាញជំហរច្បាស់ក្នុងប្រតិបត្តិការរបស់មេ FBI ដែលជាមេបច្ចេកទេសតែម្តង គឺទាមទារឱ្យចាត់ការមេបណ្ដាញនៅប្រទេសកម្ពុជាឱ្យបានជាដាច់ខាត»។
ទន្ទឹមនឹង FBI សហរដ្ឋអាមេរិកប្រកាសប្រឆាំងនឹងបណ្ដាញឧក្រិដ្ឋកម្មឆបោកតាមអនឡាញទ្រង់ទ្រាយធំក្នុងតំបន់ សមាជិកព្រឹទ្ធសភាគណបក្សប្រជាជនកម្ពុជា ២រូប គឺលោក លី យ៉ុងផាត់ និងលោក កុក អាន ដែលរងទណ្ឌកម្មពីសហរដ្ឋអាមេរិក នៅមិនទាន់ការស៊ើបអង្កេត ឬចំណាត់ការផ្លូវច្បាប់ណាមួយពីអាជ្ញាធរកម្ពុជានៅឡើយ។
នាយក FBI លោក កាស ប៉ាទែល បញ្ជាក់ថា ការប្រយុទ្ធប្រឆាំងនឹងបណ្ដាញឆបោកទាំងនេះ ត្រូវការកិច្ចសហការអន្តរជាតិ ព្រោះបណ្ដាញឧក្រិដ្ឋកម្មអាចមានទីតាំងនៅប្រទេសមួយ ដែលប្រើប្រាស់ជនរងគ្រោះជាច្រើនពីប្រទេសមួយផ្សេងទៀត និងផ្ដោតលើការឆបោកប្រជាពលរដ្ឋនៅជុំវិញពិភពលោកក្នុងពេលតែមួយ។ លោកថា FBI នឹងបន្តស៊ើបអង្កេតឱ្យដល់ប្រភពដើមនៃបណ្ដាញឧក្រិដ្ឋកម្មទាំងនេះ ដោយសារមជ្ឈមណ្ឌលឆបោកភាគច្រើនប្រតិបត្តិការនៅក្រៅទឹកដីសហរដ្ឋអាមេរិក។ នាយក FBI លោក កាស ប៉ាទែល សង្កត់ធ្ងន់ថា កិច្ចសហការរបស់ FBI ជាមួយអាជ្ញាធរប្រទេសពាក់ព័ន្ធគឺជាចំណុចសំខាន់ ដើម្បីអាចឈានទៅដល់ការកំណត់មុខសញ្ញាមេខ្លោងនៃបណ្ដាញហិរញ្ញវត្ថុ និងអ្នកដែលកាងការពារពីក្រោយនៃទីតាំងមជ្ឈមណ្ឌលឆបោកតាមអនឡាញ៕
