សង្គមស៊ីវិលរិះគន់រដ្ឋាភិបាលថា មិនសូវអើពើពីជីវភាពពលរដ្ឋឱ្យបានត្រឹមត្រូវ ទើបពួកគាត់បង្ខំចិត្ត ទៅរកការងារធ្វើនៅប្រទេសថៃ ទាំងប្រថុយប្រថានដោយខុសច្បាប់ ខណៈអ្នកខ្លះត្រូវបានប៉ូលិសថៃចាប់ខ្លួន និងពិន័យជាប្រាក់អស់រាប់ម៉ឺនបាត។ ការលើកឡើងនេះ ក្រោយពីពលករខ្មែរជាច្រើននាក់បាននាំគ្នាសម្រុកទៅរកការងារធ្វើនៅប្រទេសថៃបន្ទាប់ពីបុណ្យុចូលឆ្នាំ ព្រោះតែ ជីវភាពខ្វះខាត និងពិបាករកការងារធ្វើនៅក្នុងស្រុក។
បើទោះបីជាអាជ្ញាធរថៃ បានប្រកាសដាច់អហង្ការរួចមកហើយថា មិនទទួលយកពលករខ្មែរថ្មី ឱ្យមកធ្វើការ នៅប្រទេសថៃ ហើយ ប្រសិនបើថៅកែជនជាតិថៃណាហ៊ានទទួលយក នឹងត្រូវរងការពិន័យជាប្រាក់ជាច្រើនក្ដី ពលរដ្ឋខ្មែរមួយចំនួន នៅតែបន្ត ក្រាញននៀលឡើងទៅរកការងារធ្វើនៅប្រទេសថៃទាំងប្រថុយប្រថាន ខណៈអ្នកខ្លះឡើងមកដោយជោគជ័យ ហើយខ្លះទៀត ត្រូវបានប៉ូលិសថៃចាប់ខ្លួនរួចយកទៅឃុំឃាំង បណ្ដោះអាសន្ន និងពិន័យជាប្រាក់អស់រាប់ម៉ឺនបាត់។
ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសក៍ នៃមជ្ឈមណ្ឌលសម្ព័ន្ធការងារ និងសិទ្ធិមនុស្ស ហៅកាត់ថា «សង់ត្រាល់» (CENTRAL) លោក ឌី ថេហូយ៉ា ប្រាប់ទូរទស្សន៍អាស៊ីសេរីនៅថ្ងៃទី២៨ ខែ មេសា ថា បញ្ហាចម្បងដែលពលរដ្ឋខ្មែរនៅតែបន្តប្រថុយប្រថានទៅរកការងារធ្វើនៅប្រទេសថៃ គឺដោយសារតែជីវភាពខ្វះខាត និងពិបាក រកការងារធ្វើនៅក្នុងស្រុក។ លោកថា ថ្វីត្បិតតែ កន្លងមកនេះក្រសួងការងារព្យាយាមអំពាវនាវដល់ពលរដ្ឋខ្មែរ ឱ្យទៅធ្វើការតាមរោងចក្រក្ដី លោកថាការងារទាំងនោះ ពុំឆ្លើយតបនឹងតម្រូវការជាក់ស្ដែងរបស់ពលរដ្ឋនោះទេ ព្រោះថ្លៃឈ្នួលថោក សម្បូរករណីរំលោភសិទ្ធិកម្មករ និងបញ្ហាគ្មានស្ថិរភាពការងារជាដើម។
តាមការបង្ហោះលើបណ្ដាញសង្គមហ្វេសប៊ុករបស់អាជ្ញាធរថៃ រយៈពេល៣ថ្ងៃ ចាប់ពីថ្ងៃទី២៦ ដល់២៨ ខែមេសា មានពលករខ្មែរជិត១០០នាក់ ត្រូវបានប៉ូលិសថៃចាប់ខ្លួន អំឡុងពេលពួកគាត់ កំពុងតែធ្វើដំណើរ ដោយថ្មើរជើង និងតាមឡានតាក់ស៊ីចូល ក្នុងទឹកដីប្រទេសថៃ ដោយខុសច្បាប់ តាមច្រកព្រំដែន ខេត្តចាន់បុរី និងខេត្តស្រះកែវ។ ក្នុងនោះអាជ្ញាធរថៃ បានចាប់បញ្ជូនពលករខ្មែរ ខ្លះទៅ ឃុំឃាំងបណ្ដោះអាសន្ន ដើម្បីបន្តនីតិវិធីនិង អ្នកខ្លះទៀត បានបញ្ជូនត្រឡប់មកខ្មែរវិញ ក្រោយពីធ្វើកិច្ចសន្យាមួយចំនួន។
រីឯ ពលករខ្មែរដែលកំពុងតែរស់នៅប្រទេសថៃស្រាប់ ក៏ពួកគាត់កំពុងតែប្រឈមនឹងការធ្វើទុក្ខបុកម្នេញ ពីសំណាក់ប៉ូលិសថៃ ជាហូរហែ តាមរយៈការចុះឆែកឆេរ ដល់បន្ទប់ជួលដែលមានពលករខ្មែររស់នៅ ដើម្បីពិនិត្យមើល ឯកសារ និងទិដ្ឋាការ ការងារជាដើម។ ចំណែកឯនៅតាមដងផ្លូវ ដែល ពលករខ្មែរ តែងតែ ជិះឡាន តាក់ស៊ីទៅធ្វើការ ជាញឹកញាប់ តែងតែ ឃើញមាន ប៉ូលិសថៃ ចាំស្ទាក់ចាប់ និងពិន័យជាប្រាក់ចន្លោះពី ២ទៅ៣ម៉ឺនបាត ឬស្មើ ២ពាន់ ទៅ៣ពាន់ដុល្លារ បើរកឃើញថា ពលករខ្មែរទាំងនោះ រស់នៅ ដោយខុសច្បាប់។
ពលករខ្មែរធ្វើនៅប្រទេសថៃ លោកស្រី យ៉ាន់ ឈឿន ប្រាប់ទូរទស្សន៍អាស៊ីសេរី នៅថ្ងៃទី២៨ ខែ មេសាថា ពួកគាត់រស់នៅប្រទេសថៃ ដោយក្ដីភ័យខ្លាច ពុំហ៊ានដើរហើរដោយសេរីនោះទេ ព្រោះប៉ូលិសថៃ តែងតែតាមដាន និងចាំចាប់ជំរិតទារប្រាក់។ លោកស្រីថា ចាប់តាំងពី បុណ្យចូលឆ្នាំថ្មីរួចមក ឃើញមានពលករខ្មែរ ឡើងមកថៃ ជាហូរហែ ខណៈអ្នកខ្លះត្រូវ បានប៉ូលិសថៃ ចាប់ និងខ្លះទៀត បានមកដល់ថៃដោយសុវត្ថិភាព។ លោកស្រីថា ការដែលពលរដ្ឋនាំគ្នាមករកការងារធ្វើនៅប្រទេសថៃដោយខុសច្បាប់នេះ ព្រោះតែជីវភាពខ្វះខាត និងជំពាក់បំណុលច្រើន ហើយរកការងារធ្វើនៅក្នុងស្រុក ក៏ពុំសូវ បានប្រាក់ចំណូលទៀងទាត់។
ទូរទស្សន៍អាស៊ីសេរីពុំអាចទាក់ទង អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា ដើម្បីឆ្លើយតបជុំវិញរឿងនេះបានទេនៅថ្ងៃទី២៨ ខែមេសា ដោយហៅទូរស័ព្ទចូល តែគ្មានអ្នកទទួល។ ទោះជាយ៉ាងណា កន្លងទៅ លោក ស៊ុន មេសា តែងតែអះអាងថា ឱកាសការងារ នៅក្នុងស្រុក គឺមានជាច្រើនកន្លែងនៅតាម ខេត្ត-រាជធានី។ ក្នុងនោះលោកថា គិតមកទល់ពេលនេះ មានអតីតពលករខ្មែរមកពីប្រទេសថៃចំនួន៦៥ម៉ឺននាក់ហើយ មានការងារធ្វើ ក្នុងនោះមានជាង៣៣ម៉ឺននាក់កំពុងធ្វើការនៅតាមសហគ្រាស ក្រុមហ៊ុន រោងចក្រ និងកសិដ្ឋានធំៗមួយចំនួន។
បើទោះបីជាមានការអះអាងបែបនេះក្ដី លោក ឌី ថេហូយ៉ា យល់ថា ការបង្ហាញពីចំនួនអ្នកមានការងារធ្វើច្រើន គឺជារឿងមួយ ប៉ុន្តែ បញ្ហាគ្មាន ស្ថិរភាពការងារ និងប្រាក់ចំណូលសមរម្យគឺជាកត្តាដែលពលរដ្ឋខ្មែរ តែងតែត្អូញត្អែរ និង ពុំសូវសប្បាយចិត្តក្នុងការបំពេញការងារនោះឡើយ។ លោកថា បញ្ហានេះជាហេតុ ដែលជំរុញឱ្យ ពលករខ្មែរ ហ៊ានប្រថុយប្រថាន ទៅរកការងារធ្វើ នៅប្រទេសថៃ។ លោកស្នើឱ្យរដ្ឋាភិបាល គួរតែពិនិត្យឡើងវិញ ចំពោះ បរិយាកាសការងារនៅក្នុងស្រុក និងត្រូវលុបបំបាត់ការរំលោភសិទ្ធិកម្មករ នៅតាមរោងចក្រ និងការដ្ឋានសំណង។
កាលពីថ្ងៃទី២១ខែមីនា អង្គការសង់ត្រាល់ បានរកឃើញថា ពលរដ្ឋខ្មែរដែលត្រឡប់ពីប្រទេសថៃវិញ ជាង៩០ម៉ឺននាក់ គឺ ភាគច្រើន មានប្រាក់ចំណូលប្រចាំខែជាមធ្យម ៦៤ដុល្លារ ខណៈការចំណាយ ប្រចាំខែជា មធ្យមជិត២០០ (១៧៣)ដុល្លារ។ ក្នុងនោះការស្វែងរកការងារ ក្នុងស្រុក ជាញឹកញាប់ ពួកគាត់តែងតែ ជួបប្រទះ ការកេងប្រវ័ញ្ចប្រាក់ឈ្នួល លក្ខខណ្ឌការងារមិនសមរម្យ និងការផ្ដល់ការងារ បង្កប់នូវការបោកប្រាស់។ អង្គការសង់ត្រាល់ថា បញ្ហាទាំងនេះ បង្ខំឱ្យពលរដ្ឋ ៥៣% ដែលត្រូវបានសម្ភាស អះអាងថា ពួកគាត់គ្រោងនឹងទៅធ្វើការនៅប្រទេសថៃម្ដងទៀត បើទោះបីជាប្រទេសទាំងពីរ កំពុងមានជម្លោះព្រំដែនក្ដី៕
