ក្រុមអតិថិជនរងគ្រោះនៃក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ ប្រមាណ ១រយនាក់នៅតែបន្តប្រមូលផ្តុំគ្នាតវ៉ានៅមុខស្ថានទូតចិន ទោះបីប្រឈមនឹងការគំរាមកំហែង និងមានអ្នកតវ៉ាជនជាតិចិនម្នាក់ទៀតត្រូវបានអាជ្ញាធរចាប់ខ្លួនក៏ដោយ។ ក្រុមជនរងគ្រោះអះអាងថា អ្នកបញ្ជាឱ្យសមត្ថកិច្ចចាប់ខ្លួនអ្នកតវ៉ាជាបន្តបន្ទាប់គឺលោក ហ៊ុន តូ ដែលត្រូវជាក្មួយប្រុសបង្កើតរបស់ប្រធានព្រឹទ្ធសភា លោក ហ៊ុន សែន។ ចំណែក អ្នកជំនាញសិទ្ធិមនុស្ស ចាត់ទុកការចាប់ខ្លួនអ្នកតវ៉ាទាមទារលុយរបស់ខ្លួនមកវិញនេះថា ជាទង្វើបំពានច្បាប់ និងជាការគំរាមកំហែង ដើម្បីបំបាក់ស្មារតីជនរងគ្រោះផ្សេងទៀតមិនឱ្យបន្តទាមទារយុត្តិធម៌។
ក្រុមជនរងគ្រោះនៃក្រុមហ៊ុន ហួយវ័ន ផេ ហាក់កាន់តែផុសផុលក្នុងការបន្តចេញតវ៉ាបន្ទាប់ពីអាជ្ញាធរក្រុងភ្នំពេញបានចាប់ខ្លួនជនរងគ្រោះជនជាតិចិនម្នាក់ទៀតក្រោយចូលរួមតវ៉ាទាមទារឱ្យក្រុមហ៊ុនរបស់លោក ហ៊ុន តូ សងលុយដែលត្រូវបានបង្កកអស់រយៈពេលជាច្រើនខែ។ ក្រុមអ្នកតវ៉ាលើកឡើងថា ពួកគាត់គឺជាជនរងគ្រោះ មិនមែនជាជនល្មើសឡើយ ហើយការណ៍ដែលអាជ្ញាធរបន្តចាប់ខ្លួនអ្នកចេញតវ៉ានេះនឹងធ្វើឱ្យអ្នកដែលបានបាត់បង់លុយកាន់តែរងភាពអយុត្តិធម៌ផ្ទួនៗបន្ថែមទៀត។
ជនរងគ្រោះប្រមាណ ១រយនាក់នៅថ្ងៃទី១៤ ខែកក្កដា បានបន្តប្រមូលផ្ដុំគ្នាស្រែកតវ៉ាទាមទារឱ្យស្ថានទូតចិនជួយអន្តរាគមន៍ដោះលែងជនរងគ្រោះដោយឥតលក្ខខណ្ឌ និងបន្តស្នើដល់ស្ថាប័នពាក់ព័ន្ធចេញមុខដោះស្រាយរឿងលុយកាក់របស់ពួកគាត់ដែលជាប់គាំងក្នុងក្រុមហ៊ុន ហួយវ័នផេ។ ក្រុមបាតុករបានព្យាយាមលើកស្លាកបដា និងរូបថតនៃសមាជិកក្រុមគ្រួសារត្រកូល ហ៊ុន ដូចសព្វមួយដង ប៉ុន្តែត្រូវបានកងកម្លាំងអាជ្ញាធរស្រែកគំរាមសម្លុតចាប់ទាញគ្រវែងចោល។
ជនរងគ្រោះជនជាតិចិនម្នាក់ថ្លែងតាមរយៈអ្នកបកប្រែថា លោកស្រី និងអ្នកផ្សេងទៀតដែលបន្តចេញតវ៉ាទាមទារលុយរបស់ខ្លួនឯងនេះគឺទាំងអារម្មណ៍ភ័យខ្លាច និងការចាប់ចងពីសំណាក់អាជ្ញាធរ។ ទោះជាបែបនេះក្ដីលោកស្រីថា ពួកគាត់គ្មានជម្រើសផ្សេងក្រៅពីបន្តទាមទាររកយុត្តិធម៌នោះទេ ព្រោះលុយដែលត្រូវបានក្រុមហ៊ុនបង្កក គឺជាទ្រព្យសម្បត្តិដែលរកបានដោយការខិតខំប្រឹងប្រែង និងកម្លាំងញើសឈាម។ ជនរងគ្រោះរូបនេះយល់ថា ការបន្តចាប់ខ្លួនអ្នកតវ៉ាគឺជារូបភាពគំរាមកំហែងដល់ជនរងគ្រោះផ្សេងទៀត ដើម្បីឱ្យបញ្ឈប់ការចេញប្រមូលផ្ដុំតវ៉ាទាមទារលុយរបស់ខ្លួនដែលបានបាត់បង់។
ដូចគ្នានេះដែរ អ្នកតវ៉ាម្នាក់ទៀតថ្លែងសុំមិនបញ្ចេញឈ្មោះព្រោះបារម្ភពីបញ្ហាសុវត្ថិភាពឱ្យទូរទស្សន៍អាស៊ីសេរីដឹងថា លោកស្រីចេញតវ៉ារាល់ថ្ងៃនេះទាំងអារម្មណ៍ភ័យខ្លាចអាជ្ញាធរចាប់ដាក់គុក ប៉ុន្តែបើមិនចេញទាមទារលោកស្រីថា លុយរបស់ខ្លួននឹងមិនទទួលបានមកវិញឡើយ។ អ្នកលក់ដូរគ្រឿងសំណង់រូបនេះឱ្យដឹងថា ក្រុមហ៊ុន ហួយវ័ន ផេ បានបង្កកលុយលោកស្រីប្រមាណ ២០ម៉ឺនដុល្លារ។ លោកស្រីបន្ថែមថា ការបាត់បង់ប្រាក់ទាំងនោះបានធ្វើឱ្យគ្រួសាររបស់លោកស្រីធ្លាក់ក្នុងវិបត្តិសេដ្ឋកិច្ច ជំពាក់បំណុលគេ និងធ្វើឱ្យមុខរបរអាជីវកម្មប្រឈមការជាប់គាំង។
អ្នកចូលរួមតវ៉ាជនជាតិចិនដែលត្រូវបានសមត្ថកិច្ចក្រុងភ្នំពេញស្ទាក់ចាប់កាលពីថ្ងៃទី១៣ ខែកក្កដាមានឈ្មោះ ខឺ ស៊ាវវ៉េ (Ke Xiaowei) មានវ័យជាង ៦០ឆ្នាំ។ ជនរងគ្រោះជនជាតិចិនរូបនេះធ្លាប់អះអាងថា បានជាប់គាំងលុយប្រមាណ ៣០ម៉ឺនដុល្លារ ក្នុងគណនីហួយវ័ន និងត្រូវបានអាជ្ញាធរចាប់ខ្លួនបន្ទាប់ពីចូលរូមតវ៉ានៅខាងមុខធនាគារជាតិកម្ពុជា។ បច្ចុប្បន្នសមត្ថកិច្ចក្រុងភ្នំពេញបានបញ្ជូនរូបលោកទៅកាន់អគ្គនាយកដ្ឋានអន្តោប្រវេសន៍ ដើម្បីបន្តនីតិវិធី។
ក្រុមអ្នកតវ៉ាឱ្យដឹងថា ភ្លាមៗក្រោយពេលសមត្ថកិច្ចស្ទាក់ចាប់ខ្លួនលោក ខឺ ស៊ាវវ៉េ នៅត្រង់ចំណុចបណ្ដោយផ្លូវហាណយក្នុងរាជធានីភ្នំពេញ ក្រុមកម្លាំងសមត្ថកិច្ចបានស្រែកសម្លុតប្រាប់ថា ការចាប់ខ្លួននេះគឺធ្វើឡើងតាមបញ្ជារបស់លោក ហ៊ុន តូ។ «»
មកដល់ពេលនេះ មានជនរងគ្រោះចំនួន ៣នាក់ហើយដែលត្រូវបានអាជ្ញាធរនៃរដ្ឋាភិបាលត្រកូល ហ៊ុន បានចាប់ដាក់ពន្ធនាគារដោយសារតែភាពសកម្មរបស់ពួកគាត់ក្នុងការចេញតវ៉ាដោយសន្តិវិធីរឿងទាមទារលុយរបស់ខ្លួនដែលត្រូវបានក្រុមហ៊ុន លោក ហ៊ុន តូ បង្កកយកតាំងពីចុងឆ្នាំ២០២៥។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា ដើម្បីសាកសួរបន្ថែមជុំវិញរឿងនេះបានទេនៅថ្ងៃទី១៤ ខែកក្កដា។
ចំណាត់ការរបស់អាជ្ញាធរក្រុងភ្នំពេញដែលបន្តបង្ក្រាប និងចាប់ខ្លួនក្រុមអតិថិជនរងគ្រោះជាបន្តបន្ទាប់នេះ កើតឡើងក្រោយលោក ហ៊ុន តូ ដែលជាសហប្រធានក្រុមហ៊ុន ហួយវ័ន ផេ ធ្លាប់បានប្រកាសបដិសេធថា លោកមិនជាប់ពាក់ព័ន្ធ និងមិនទទួលខុសត្រូវចំពោះលុយដែលអតិថិជនអះអាងថា បានបាត់បង់នៅក្នុងក្រុមហ៊ុននោះឡើយ។
ជុំវិញរឿងនេះ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ប្រាប់ទូរទស្សន៍អាស៊ីសេរីថា ការចេញតវ៉ាដោយសន្តិវិធីរបស់ក្រុមជនរងគ្រោះ ទាំងជនជាតិខ្មែរ និងជនជាតិចិន គឺជាសិទ្ធិស្របច្បាប់ដែលត្រូវបានធានាដោយរដ្ឋធម្មនុញ្ញ។ លោកថា ការបន្តចាប់ចងជនរងគ្រោះមិនត្រឹមតែជាទង្វើបំពានច្បាប់នោះទេ តែជាទង្វើដែលមេដឹកនាំផ្ដាច់ការចូលចិត្តប្រើប្រាស់ ដើម្បីសម្លុតគំរាមកំហែង បំបាក់ស្មារតី ដល់ជនរងគ្រោះដទៃទៀតកុំឱ្យបន្តងើបទាមទារយុត្តិធម៌។ «»
ចំណែក នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត នៅតែជំរុញឱ្យអាជ្ញាធរពាក់ព័ន្ធពិនិត្យលទ្ធភាពដោះស្រាយជូនអតិថិជនដោយសន្តិវិធី ជាជាងការបន្តបង្ក្រាប និងចាប់ចងអ្នកដែលរងគ្រោះ។ លោកបន្តថា ការណ៍ដែលស្ថាប័នជំនាញជំរុញឱ្យជនរងគ្រោះដោះស្រាយតាមប្រព័ន្ធតុលាការនឹងកាន់តែបង្កលក្ខណៈស្មុគស្មាញ និងធ្វើឱ្យជនរងគ្រោះរង់ចាំពេលវេលាយូរក្នុងការទទួលបានយុត្តិធម៌។ «»
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា វាយតម្លៃថា ពន្លឺយុត្តិធម៌សម្រាប់ជនរងគ្រោះក្នុងសំណុំរឿងក្រុមហ៊ុន ហួយវ័ន ផេ (Huione Pay) ហាក់នៅឆ្ងាយដូចជើងមេឃ។ អាជ្ញាធរ និងតុលាការដែលស្ថិតក្នុងការបញ្ជារបស់អ្នកមានអំណាចនឹងមិនហ៊ានចាត់វិធានការដោះស្រាយរឿងនេះឡើយដោយសារតែលោក ហ៊ុន តូ ដែលជាមេដឹកនាំក្រុមហ៊ុននេះមានទាំងលុយ អំណាច និងត្រូវជាក្មួយបង្កើតលោក ហ៊ុន សែន ហើយក៏ត្រូវជាបងជីដូនមួយលោក ហ៊ុន ម៉ាណែត។ ទោះជាយ៉ាងណា លោក ស៊ឹង សែនករុណា យល់ថា ជនរងគ្រោះនៅតែមានក្តីសង្ឃឹមអាចទទួលបានលុយញើសឈាមរបស់ខ្លួនត្រឡប់មកវិញ ប្រសិនបើជនរងគ្រោះទាំងអស់បន្តប្រើប្រាស់សិទ្ធិស្របច្បាប់ រួបរួមគ្នាតវ៉ាឱ្យខ្លាំងក្លា ដើម្បីដាក់សម្ពាធឱ្យរដ្ឋាភិបាលត្រកូល ហ៊ុន ចេញមុខដោះស្រាយ៕
