លោកនាយករដ្ឋមន្ត្រី ហ៊ុន ម៉ាណែត ជំរុញឱ្យអភិបាលខេត្តស្ទឹងត្រែង និងអាជ្ញាធរមានសមត្ថកិច្ច ព្រមទាំងអភិបាលខេត្តតំបន់ភាគឦសានផ្សេងទៀតបង្កើនការអនុវត្តច្បាប់ ដើម្បីទប់ស្កាត់ឧក្រិដ្ឋកម្មឆ្លងដែន។ ទន្ទឹមគ្នានេះ លោកអះអាងថា ទោះបីកម្ពុជារងការចោទប្រកាន់ថា ជាមូលដ្ឋានសម្រាប់ឧក្រិដ្ឋកម្មឆបោកតាមអនឡាញក៏ដោយ ក៏រដ្ឋាភិបាលនៅតែមានយុទ្ធសាស្ត្រអូសទាញអ្នកវិនិយោគិនឱ្យមករកស៊ីនៅកម្ពុជា។ ទោះជាយ៉ាងណា អ្នកឃ្លាំមើលរិះគន់ថា ការលើកឡើងនេះគ្រាន់តែជាសារនយោបាយប្រជាភិថុតិ ដើម្បីបិទបាំងភាពបរាជ័យរបស់រដ្ឋាភិបាលក្នុងការលុបបំបាត់អំពើឧក្រិដ្ឋកម្មឆ្លងដែន និងវិធានការផ្លូវច្បាប់លើមេខ្លោងសំខាន់ៗដែលពាក់ព័ន្ធអំពើឧក្រិដ្ឋកម្មឆបោក។
លោកនាយករដ្ឋមន្ត្រី ហ៊ុន ម៉ាណែត ព្រមានថា ខេត្តស្ទឹងត្រែងមានទីតាំងភូមិសាស្ត្រអំណោយផលសម្រាប់បណ្ដាញឧក្រិដ្ឋកម្មឆ្លងដែន ដូចជាករណីដឹកជញ្ជូនគ្រឿងញៀនទ្រង់ទ្រាយធំកន្លងមកតាមច្រកព្រំដែនជាប់ប្រទេសឡាវ។ លោកជំរុញឱ្យអភិបាលខេត្តនេះ និងអាជ្ញាធរមានសមត្ថកិច្ចខេត្តភាគឦសានផ្សេងទៀតរួមគ្នាបង្កើនការអនុវត្តច្បាប់ឱ្យបានម៉ឺងម៉ាត់ ដើម្បីទប់ស្កាត់បទល្មើសឆ្លងដែន រួមទាំងអាជីវកម្មខុសច្បាប់ផ្សេងទៀត ដែលអាចប៉ះពាល់ដល់សន្តិសុខ សុវត្ថិភាព និងការប្រកបអាជីវកម្មស្របច្បាប់របស់ប្រជាពលរដ្ឋក្នុងតំបន់។
លោក ហ៊ុន ម៉ាណែត ថ្លែងបែបនេះក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលនានានៅខេត្តស្ទឹងត្រែងនៅថ្ងៃទី១២ ខែសីហា។
លោក ហ៊ុន ម៉ាណែត៖ «អ៊ីចឹងគឺទៅធ្វើម៉េចទប់ទល់ក្រុមបណ្ដាញឧក្រិដ្ឋកម្មមិនថា នៅក្នុងខេត្ត ឬមួយក៏ឆ្លងខេត្ត ឆ្លងប្រទេស ត្រូវតែរួមគ្នាដើម្បីទប់ស្កាត់ឱ្យបាន អនុវត្តច្បាប់ឱ្យបានម៉ឺងម៉ាត់។ ព្រោះបើសិនជាខេត្តមានឈ្មោះប្រឡាក់ប្រឡូកហើយ គឺពិបាកលាងណាស់។ នេះដែលថាទីមួយសង្គ្រាម ឥឡូវបើយើងអត់សង្គ្រាមហើយ រឿងសន្តិសុខ ស្ថិរភាព និងបញ្ហាសុវត្ថិភាពជូនប្រជាពលរដ្ឋ បើអសន្តិសុខ កន្លែងអសុវត្ថិភាព មានឈ្មោះមានបញ្ហា គឺអត់មានពីណាមកទេ កុំថា ហៅទេសចរមកលេង ឬមួយក៏វិនិយោគ សូម្បីតែអ្នកនៅក្នុងខេត្តក៏ពិបាករស់នៅដែរ»។
លោក ហ៊ុន ម៉ាណែត ក៏ទទួលស្គាល់ថា វត្តមានបណ្ដាញឧស្សាហកម្មឆបោកតាមអនឡាញនៅកម្ពុជា បានបង្កផលប៉ះពាល់ដល់សេដ្ឋកិច្ចជាតិ និងធ្វើឱ្យកេរ្តិ៍ឈ្មោះរបស់កម្ពុជារងការប៉ះពាល់។ លោកថា បញ្ហានេះក៏បានធ្វើឱ្យរដ្ឋាភិបាលរបស់លោកប្រឈមការលំបាកក្នុងការស្ដារកេរ្តិ៍ឈ្មោះកម្ពុជា និងកសាងទំនុកចិត្តអ្នកវិនិយោគ និងសហគមន៍អន្តរជាតិឡើងវិញផងដែរ។
កន្លងមកបណ្ដាញឧក្រិដ្ឋជនបានប្រើប្រាស់ទឹកដីនៃភូមិសាស្ត្រខេត្តស្ទឹងត្រែងគឺជាមធ្យោបាយដ៏សំខាន់ក្នុងការដឹកនាំជញ្ជូនគ្រឿងញៀន រួមទាំងសារធាតុគីមីផ្សំរាប់សិបតោនដោយយកមកផលិតជាគ្រឿងញៀននៅក្នុងរោងចក្រក្នុងប្រទេសកម្ពុជា។ ជាមួយគ្នានេះ ករណីពាក់ព័ន្ធនឹងមន្ត្រីអាជ្ញាធរមួយចំនួនតាមព្រំដែនអន្តរជាតិត្រពាំងក្រៀលជាប់ប្រទេសឡាវ ក៏ធ្លាប់រងការចោទប្រកាន់ពីការទទួលសំណូកជាថ្នូរនឹងការបើកដៃឱ្យបណ្ដាញឧក្រិដ្ឋជនភាគច្រើនជាជនជាតិចិននាំមនុស្សយកមកជួញដូរនៅកម្ពុជា។ ដោយឡែក ខេត្តតំបន់ភាគឦសានផ្សេងទៀតដូចជា រតនគិរី និងមណ្ឌលគិរីជាដើម ក៏ត្រូវបានរាយការណ៍ថា បណ្ដាញឧក្រិដ្ឋជនបង្កើត និងជួលអគារពាណិជ្ជកម្ម រួមទាំងសណ្ឋាគារមួយចំនួន ដើម្បីបម្លែងជាមជ្ឈមណ្ឌលសម្រាប់បង្ខាំងមនុស្សធ្វើទារុណកម្ម ដើម្បីបង្ខំឱ្យឆបោកតាមអនឡាញ។ សមត្ថកិច្ចនៃបណ្ដាខេត្តទាំងនេះធ្លាប់ចុះបង្ក្រាបទីតាំងនៅតាមអគារដោយរកឃើញមនុស្សពាក់ព័ន្ធរាប់រយនាក់ និងកំពុងបន្តយុទ្ធនាការបង្ក្រាបប្រតិបត្តិករដែលលួចសម្ងំធ្វើការងារឆបោកនៅតាមផ្ទះ។
ជុំវិញរឿងនេះ អ្នកឃ្លាំមើលបញ្ហាសង្គមលើកឡើងថា ការថ្លែងសារដដែលៗរបស់លោក ហ៊ុន ម៉ាណែត គ្រាន់តែជាសារនយោបាយស្អំចិត្តពលរដ្ឋ និងដើម្បីបិទបាំងពីភាពបរាជ័យនៃដឹកនាំរបស់ខ្លួនដែលអសមត្ថភាពក្នុងការលុបបំបាត់អំពើឧក្រិដ្ឋកម្មឆ្លងដែន និងវិធានការផ្លូវច្បាប់លើមេខ្លោងសំខាន់ៗដែលពាក់ព័ន្ធនឹងឧក្រិដ្ឋកម្មឆ្លងដែន។
ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា រិះគន់ថា ចំណាត់ការរបស់រដ្ឋាភិបាលលោក ហ៊ុន ម៉ាណែត បង្ក្រាបអំពើឆបោកតាមអនឡាញមិនទាន់មានប្រសិទ្ធភាព និងមិនអាចកសាងទំនុកចិត្តពីសហគមន៍អន្តរជាតិបានឡើយ។ លោកថា បញ្ហាឧក្រិដ្ឋកម្មឆ្លងដែនបានបង្កការខាតបង់ដល់សេដ្ឋកិច្ចជាតិ និងធ្វើឱ្យកេរ្តិ៍ឈ្មោះប្រជាជាតិខ្មែរទាំងមូលរងភាពអាម៉ាស់ដូចសព្វថ្ងៃ គឺដោយសាររដ្ឋាភិបាលខ្វះឆន្ទៈនយោបាយ ក្នុងការបង្ក្រាបឱ្យដល់ឫសគល់ ជាពិសេសចាត់វិធានការលើមេខ្លោង និងបណ្ដាញអ្នកមានអំណាចដែលនៅឈរកាងពីក្រោយឧក្រិដ្ឋកម្មទាំងនេះ។
លោក ស៊ឹង សែនករុណា៖ «ការចាត់វិធានការឱ្យចំគោលដៅ ទីមួយ គឺការលាងជម្រះ និងការជួយទៅដល់ពលរដ្ឋកម្ពុជា និងជួយទៅដល់ប្រទេសកម្ពុជាខ្លួនឯងទៅវិញទេ ដើម្បីលាងសម្អាតខ្លួនពីការចោទប្រកាន់ផ្សេងៗ ហើយធ្វើឱ្យពិភពលោកគេមានការភ័យខ្លាចជាមួយនឹងប្រទេសកម្ពុជា។ ពលរដ្ឋប្រទេសផ្សេងៗដែលគេសួរ គេស្គាល់ថា យើងកម្ពុជា គឺគេស្គាល់យើងជាទីតាំងដែលឆបោកអនឡាញនេះឯង វាជារឿងអាម៉ាស់មួយសម្រាប់ពលរដ្ឋ ជារឿងអាម៉ាស់មួយសម្រាប់ប្រទេសកម្ពុជាយើង។ យើងអត់ចង់ឃើញរូបភាពអាម៉ាស់ហ្នឹងបន្តទៅទៀតទេ ក្នុងនាមយើងជាពលរដ្ឋខ្មែរទាំងអស់គ្នា គឺយើងចង់ឱ្យរដ្ឋាភិបាលចាត់វិធានការឱ្យចំអ្នកនៅពីក្រោយខ្នង រកឃើញទោះបីមានឋានៈប៉ុណ្ណាក៏ដោយ ត្រូវតែហ៊ានអាកាត់ ត្រូវតែចាត់វិធានការ»។
ស្របពេលរដ្ឋាភិបាលនៃក្រុមគ្រួសារត្រកូល ហ៊ុន រងការចោទប្រកាន់ថា កាងការពារពីក្រោយមេខ្លោងសំខាន់ៗដែលពាក់ព័ន្ធនឹងអំពើឆបោកអនឡាញនៅកម្ពុជា សហរដ្ឋអាមេរិក ចក្រភពអង់គ្លេស ព្រមទាំងសហភាពអឺរ៉ុបឯណោះវិញ បានបង្ហាញការយកចិត្តទុកដាក់ប្រឆាំងនឹងឧក្រិដ្ឋកម្មនេះ និងបានចាត់វិធានការដាក់ទណ្ឌកម្មលើក្រុមហ៊ុន និងមនុស្សជំនិតៗរបស់ក្រុមគ្រួសារត្រកូល ហ៊ុន ជាបន្តបន្ទាប់។
ទន្ទឹមគ្នានេះ ក្រុមហ៊ុនរបស់សាច់ញាតិក្រុមគ្រួសារត្រកូល ហ៊ុន គឺលោក ហ៊ុន តូ រួមទាំងសមាជិកព្រឹទ្ធសភាគណបក្សប្រជាជនកម្ពុជាពីររូបទៀត គឺលោក លី យ៉ុងផាត់ និងលោក កុក អាន ក៏កំពុងត្រូវបានសហគមន៍អន្តរជាតិបន្តតាមដានលើសកម្មភាពរបស់ពួកគាត់ ដែលពាក់ព័ន្ធនឹងអង្គការឧក្រិដ្ឋកម្មទ្រង់ទ្រាយធំនៅកម្ពុជា ដែលពាក់ព័ន្ធនឹងអំពើឆបោកតាមអនឡាញ ការជួញដូរមនុស្ស និងការលាងលុយកខ្វក់ជាដើម៕
