ក្រសួងមហាផ្ទៃបង្ហាញលទ្ធផលនៃការបង្ក្រាបបទល្មើសឆបោកតាមប្រព័ន្ធ បច្ចេកវិទ្យាដោយគិតត្រឹមរយៈពេលជាងពីរខែដើមឆ្នាំ២០២៦នេះ គឺមានចំនួន៩៨កន្លែងដោយឃាត់ខ្លួនមនុស្សជិត ៦ពាន់ (៥.៧៧១)នាក់។ អ្នកឃ្លាំមើលជំរុញឲ្យរដ្ឋាភិបាលបង្ក្រាបទៅលើប្រព័ន្ធដែលផ្តល់លទ្ធភាពឲ្យឧស្សាហកម្មឆបោកនេះ កើតឡើង ពោលគឺមិនត្រឹមតែបង្ក្រាបលើអាគារដែលបម្រើសកម្មភាពបោកប្រាស់នោះទេ។
អ្នកនាំពាក្យក្រសួងមហាផ្ទៃលោក ទូច សុឃៈ នៅថ្ងៃទី១៧ ខែមីនា បានប្រកាសពីលទ្ធផលនៃការបង្ក្រាបបទល្មើសឆបោកតាមប្រព័ន្ធបច្ចេកវិទ្យាថា គិតចាប់ពីថ្ងៃទី១ ខែមករា ដល់ថ្ងៃទី១៤ ខែមីនា ដើមឆ្នាំ២០២៦នេះ សមត្ថកិច្ចនៃក្រសួងមហាផ្ទៃ បានបង្ក្រាបទៅលើទីតាំងឆបោកចំនួន៩៨កន្លែង។ លោកបញ្ជាក់ថា ក្នុងភូមិសាស្ត្ររាជធានីភ្នំពេញ មានចំនួន៦៦កន្លែង ខេត្តកំពតចំនួន៨កន្លែង ស្វាយរៀង ៧កន្លែង បាត់ដំបង៤កន្លែង ខណៈខេត្តត្បូងឃ្មុំ ខេត្តសៀមរាប បន្ទាយមានជ័យ និងព្រះសីហនុ មានចំនួន២កន្លែងដូចគ្នា។ រីឯខេត្តដទៃទៀត ដូចជាខេត្តមណ្ឌលគិរី ព្រៃវែង កណ្តាល កោះកុង និងខេត្តកំពង់ស្ពឺ សមត្ថកិច្ចបង្ក្រាបបានទីតាំងឆបោកតាមអនឡាញមួយកន្លែងដូចគ្នា។ ទោះជាយ៉ាងណា កន្លងមក អភិបាលខេត្តកំពង់ស្ពឺ លោក ជាម ច័ន្ទសោភ័ណ ប្រកាសក្នុងសន្និបាតបូកសរុបលទ្ធផលការងារឆ្នាំ២០២៥របស់រដ្ឋបាលខេត្ត កាលពីថ្ងៃទី១៤ ខែមករាថា ខេត្តកំពង់ស្ពឺគ្មានទីតាំងឆបោកអនឡាញឡើយ។
បន្ថែមពីនេះ លោក ទូច សុឃៈ អះអាងថា ក្នុងប្រតិបត្តិការបង្ក្រាបនេះ សមត្ថកិច្ចបានឃាត់ខ្លួនមនុស្សជិត៦ពាន់នាក់ (៥.៧៧១)នាក់ ស្មើនឹង២៣សញ្ជាតិ ក្នុងនោះមានជនជាតិចិនជាង ៣ពាន់៤រយ(៣.៤៣៨)នាក់ វៀតណាមជាង ១ពាន់(១.១៦៦នាក់) ខ្មែរជាង ៤រយនាក់ ជនជាតិភូមា ឬមីយ៉ាន់ម៉ា ជិត២រយ (១៩៦)នាក់ រួមទាំងជនជាតិថៃ ម៉ាឡេស៊ី ឥណ្ឌូណេស៊ី កូរ៉េខាងត្បូង បង់ក្លាដេស នេប៉ាល់ និងស្រីលង្កា ជាដើម។
អ្នកនាំពាក្យក្រសួងមហាផ្ទៃរូបនេះ ឲ្យដឹងទៀតថា ក្នុងចំណោមអ្នកដែលត្រូវបានឃាត់ខ្លួននោះ គឺមានជាង៤ពាន់(៤.៤០៧)នាក់ បានបញ្ជូនទៅអគ្គនាយកដ្ឋានអន្តោប្រវេសន៍ ខណៈមនុស្ស១២៧នាក់ទៀតបញ្ចូនទៅតុលាការ។ ក្រៅពីនេះ សមត្ថកិច្ចបានធ្វើការអប់រំ និងអនុញ្ញាតឲ្យត្រឡប់ទៅផ្ទះវិញ។
លោក ទូច សុឃៈ បន្ថែមថា លទ្ធផលនៃការបង្ក្រាបនៅដើមឆ្នាំ២០២៦នេះ បង្ហាញថា សកម្មភាពនៃបទល្មើសឆបោកតាមប្រព័ន្ធបច្ចេកវិទ្យា គឺបានថយចុះគួរឲ្យកត់សម្គាល់។ ទោះជាយ៉ាងណា លោកមិនបានបង្ហាញអំពីមេខ្លោងសំខាន់ៗដូចជា ជាអ្នកមានលុយនិងមានអំណាចកំពូលដែលពាក់ព័ន្ធនឹងឧក្រិដ្ឋកម្មនេះ ត្រូវបានឃាត់ខ្លួន និងបញ្ជូនទៅកាត់ទោសតាមផ្លូវច្បាប់នោះទេ។
ជុំវិញរឿងនេះ ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា មើលឃើញថា ការបង្ក្រាបរបស់រដ្ឋាភិបាលបច្ចុប្បន្ននេះ ហាក់ធ្វើឲ្យតែល្អមើលប៉ុណ្ណោះ ដោយសារមានសម្ពាធខ្លាំងពីអន្តរជាតិ។ លោក បន្តថា ដើម្បីឲ្យសហគមន៍ជាតិនិងអន្តរជាតិ មានទំនុកចិត្តទៅលើការបង្ក្រាបរបស់រដ្ឋាភិបាល លុះត្រាតែមេខ្លោងឧក្រិដ្ឋជនឆបោក និងបណ្ដាញពាក់ព័ន្ធនានាដែលសម្របសម្រួលឲ្យមានអំពើឆបោកតាមអនឡាញនេះ ត្រូវបានចាប់យកទៅកាត់ទោសតាមច្បាប់។ លោកយល់ថា ប្រសិនបើការបង្ក្រាបដែលផ្ដោតតែទៅលើទីតាំងអាគារឆបោក ប៉ុន្តែមេខ្លោងឧក្រិដ្ឋជនឆបោកឬខ្សែបណ្ដាញជនល្មើស នៅតែមានសេរីភាពដដែលនេះ នឹងអាចធ្វើឲ្យឧស្សាហកម្មឆបោកនេះ រីកដុះដាលវិញយ៉ាងឆាប់រហ័ស។
រដ្ឋាភិបាលកម្ពុជាប្រកាសថា នឹងលុបបំបាត់ឧក្រិដ្ឋកម្មឆបោកតាមអនឡាញនេះ ឲ្យអស់ត្រឹមខែមេសាខាងមុខនេះ។ កាលពីថ្ងៃទី១១ ខែមីនា ប្រធានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាលោក ឆៃ ស៊ីណារិទ្ធ បានថ្លែងប្រាប់សារព័ត៌មានអន្តរជាតិថា មកដល់ពេលនេះ សមត្ថកិច្ចបានបង្ក្រាបមជ្ឈមណ្ឌលឆបោកតាមអនឡាញប្រហែល ៨០ ភាគរយហើយ ឬស្មើជាង២រយទីតាំងនៅទូទាំងប្រទេស។
ប៉ុន្តែអ្នកជំនាញផ្នែកឧក្រិដ្ឋកម្មឆ្លងដែន លោក ចាកុប ស៊ីមស៍ (Jacob Sims) បានលើកឡើងថា យុទ្ធនាការបង្ក្រាបឧក្រិដ្ឋកម្មឆបោកតាមអនឡាញរបស់រដ្ឋាភិបាលកម្ពុជានេះ គ្មានលទ្ធផលជាដុំកំភួននោះទេ ព្រោះការបង្ក្រាបមិនបានផ្ដោតទៅលើបណ្ដាញធំៗដែលគាំទ្រក្នុងការបើកឧស្សាហកម្មឆបោកតាមអនឡាញនេះ។
លោក ចាកុប ស៊ីមស៍ ពិនិត្យឃើញថា មកដល់ពេលនេះគ្មានសញ្ញាច្បាស់លាស់ថា ជនល្មើសពាក់ព័ន្ធនឹងឧក្រិដ្ឋកម្មឆបោកដែលស្ថិតនៅក្នុងជួរឥស្សរជនបក្សកាន់អំណាច ត្រូវបានចាប់ខ្លួន ឬអនុវត្តច្បាប់ឡើយ។អ្នកជំនាញផ្នែកឧក្រិដ្ឋកម្មឆ្លងដែន រូបនេះ យល់ថា ការបន្តរឹតបន្តឹងលើសារព័ត៌មានឯករាជ្យ និងអង្គការសង្គមស៊ីវិល បានក្លាយជាឧបសគ្គក្នុងការផ្ទៀងផ្ទាត់ចំពោះការអះអាងរបស់មន្ត្រីរដ្ឋាភិបាលអំពីប្រសិទ្ធភាពនៃយុទ្ធនាការបង្ក្រាបនេះ៕
