ពលរដ្ឋសកម្មកិច្ចការសង្គម កញ្ញា ខែម ស្រីមុំ ស្នើទៅចៅក្រមសាលាដំបូងរាជ ធានីភ្នំពេញ ឱ្យទម្លាក់បទប្រកាន់ និងដោះលែងកញ្ញា ឱ្យមានសេរីភាពវិញ ដោយ កញ្ញា និង មេធាវីការពារក្ដី អះអាងថា ការបញ្ចេញយោបល់របស់កញ្ញានៅលើបណ្ដាញសង្គម គឺជាសេរីភាពបញ្ចេញមតិ និង ពុំមែនជាការញុះញង់ទេ។ អ្នកឃ្លាំមើលថា ការបន្តឃុំខ្លួន កញ្ញា ខែម ស្រីមុំ គឺជាការរំលោភរដ្ឋធម្មនុញ្ញ និង គោលការណ៍សិទ្ធិមនុស្សអន្តរជាតិ។
តុលាការដំបូងរាជធានីភ្នំពេញ នឹងប្រកាសសាលក្រមសំណុំរឿងពលរដ្ឋសកម្ម កញ្ញា ហ៊ីម មុំ ហៅ ខែម ស្រីមុំ នៅថ្ងៃទី២៥ ខែកញ្ញា ឆ្នាំ២០២៦។ តុលាការបានកំណត់ពេលប្រកាសសាលក្រមនេះ បន្ទាប់ពីសវនាការ កាលពីថ្ងៃទី២១ ខែកញ្ញា។
នៅក្នុងសវនាការ ទាំងកញ្ញា ខែម ស្រីមុំ និងទាំងមេធាវីការពារក្ដីឱ្យកញ្ញា បានស្នើឱ្យតុលាការលើកលែងការចោទប្រកាន់ និងដោះលែងកញ្ញា ឱ្យមានសេរីភាពឡើងវិញ ព្រោះកញ្ញាពុំមានកំហុសទេ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់ទូរទស្សន៍អាស៊ីសេរីថា កញ្ញា ខែម ស្រីមុំ បានបំភ្លឺចៅក្រមថា ការ ចែករំលែកព័ត៌មាន និង ការបញ្ចេញយោបល់របស់កញ្ញា នៅលើបណ្ដាញសង្គមគ្មានចេតនាបង្កការញុះញង់ឱ្យមានអសន្ដិសុខសង្គម ឬបទល្មើសណាមួយឡើយ។ រីឯ មេធាវីរបស់កញ្ញាវិញ បានអះអាងថា មតិយោបល់របស់កញ្ញា ខែម ស្រីមុំ គឺជាសេរីភាពនៃការបញ្ចេញមតិស្របច្បាប់ ដែលពុំមែនជាបទល្មើសទេ។
លោក អំ សំអាត៖ «មេធាវីគាត់បានលើកឡើងថា អ្វីដែល ហ៊ីម មុំ គាត់បានខមិនហ្នឹង វាគ្រាន់តែជាសេរីភាពនៅក្នុងបញ្ចេញមតិ ដែលធានាដោយរដ្ឋធម្មនុញ្ញ មាត្រា ៤៥ និងបទដ្ឋានអន្តរជាតិ កតិកាសញ្ញាអន្តរជាតិស្ដីពីសិទ្ធិពលរដ្ឋ សិទ្ធិនយោបាយ។ អ៊ីចឹងអ្វីដែលកញ្ញា ហ៊ីម មុំ បានខមិនហ្នឹង វាជាគ្រាន់តែជាសេរីភាព នៅក្នុងការបញ្ចេញមតិតែប៉ុណ្ណោះ»។
កញ្ញា ខែម ស្រីមុំ គឺជាពលរដ្ឋសកម្ម ដែលតែងតែចូលរួមតវ៉ារកដំណោះស្រាយ វិវាទដីធ្លី សិទ្ធិការងារ បញ្ហាធនធានធម្មជាតិ បរិស្ថាន និងការទាមទារឲ្យដោះលែងអ្នកទោសមនសិការជាដើម។
សមត្ថកិច្ចរាជធានីភ្នំពេញ កាលពីខែឧសភា បានចាប់ខ្លួនកញ្ញា ខែម ស្រីមុំ នៅ បន្ទប់ជួលមួយកន្លែង ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ក្រោយពី កញ្ញាបានចែករំលែកព័ត៌មានពាក់ព័ន្ធនឹងរឿងព្រំដែន និង អំពើអយុត្តិធម៌សង្គម នៅលើហ្វេសប៊ុករបស់កញ្ញា។ សមត្ថកិច្ចបានបញ្ជូនកញ្ញា ស្រីមុំ ទៅឃុំខ្លួន នៅមណ្ឌលអប់រំកែប្រែទី២ ព្រៃស រាជធានីភ្នំពេញ។
កញ្ញា ស្រីមុំ ត្រូវតុលាការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម» និងបទ«ប្រមាថ»តាមមាត្រា ៤៩៤ ៤៩៥ និងមាត្រា ៥០២ នៃ ក្រមព្រហ្មទណ្ឌ។ កញ្ញាអាចប្រឈមនឹងការជាប់ពន្ធនាគាររហូតដល់ ២ ឆ្នាំ ប្រសិន បើតុលាការរកឃើញថា កញ្ញាមានទោស ដូចការចោទប្រកាន់។
មន្ត្រីគោលនយោបាយ និងតស៊ូមតិនៃអង្គការភាពជាដៃគូ ដើម្បីបរិស្ថាន និងការអភិវឌ្ឍ ហៅកាត់ថា PED កញ្ញា ហេង គឹមសួរ លើកឡើងថា ពលរដ្ឋទូទៅ ចង់ឃើញតុលាការកម្ពុជា មានឯករាជ្យពេញលក្ខណៈ ដែលមិនស្ថិតនៅក្រោមអំណាច នយោបាយ ហើយអាចផ្ដល់យុត្តិធម៌ត្រឹមត្រូវ ឱ្យពលរដ្ឋរងគ្រោះ ដោយមិនប្រកាន់ និន្នាការបក្ខពួក។
កញ្ញា ហេង គឹមសួរ ប្រាប់ទូរទស្សន៍អាស៊ីសេរីនៅថ្ងៃទី២២ ខែកញ្ញា ថា ការបន្តបិទសិទ្ធិសេរីភាពប្រជាពលរដ្ឋ ដោយអាជ្ញាធរបន្ដចាប់ខ្លួន ហើយតុលាការចាត់ការដាក់ពន្ធនាគារដូចសព្វថ្ងៃ គឺជារឿងអយុត្តិធម៌ ដែលត្រូវតែបំបាត់ចោល ពីព្រោះសិទ្ធិសេរីភាពរបស់ប្រជាពលរដ្ឋ ដែលគិតគូរពីសង្គមជាតិ ត្រូវបានធានាការពារដោយរដ្ឋធម្មនុញ្ញ។ កញ្ញាថា ការបន្តរឹតត្បិតសេរីភាពរបស់ប្រជាពលរដ្ឋ គឺជាការ រំលោភរដ្ឋធម្មនុញ្ញ ដែលករណីនេះ មិនចំណេញអ្វីដល់សង្គមជាតិនោះទេ។
កញ្ញា ហេង គឹមសួរ៖ «ការដែលនៅតែបន្តចាប់អ្នកស្អាតស្អំ ឬអ្នកដែលគ្រាន់តែរិះគន់ ដើម្បីស្ថាបនាហ្នឹង គឺជាការបំបិទសំឡេងរបស់ពលរដ្ឋ ដែលគាត់បាន មានគំនិតចង់ស្ដារប្រជាធិបតេយ្យ ឬក៏ចង់ឱ្យសង្គមខ្លួនឯងមានយុត្តិធម៌ត្រឹមត្រូវទៅវិញ»។
កាលពីខែមេសា ព្រះសង្ឃ ព្រះនាម ជា វុទ្ធី ដែលជាអ្នកសារព័ត៌មានពលរដ្ឋ ក៏ត្រូវបានសមត្ថកិច្ចចាប់ខ្លួន និងត្រូវតុលាការចោទប្រកាន់ពីបទ «ញុះញង់បង្កឱ្យ មានភាពវឹកវរធ្ងន់ធ្ងរដល់សន្តិសុខសង្គម» ដូចគ្នានឹងកញ្ញា ខែម ស្រីមុំ ដែរ បន្ទាប់ពីព្រះអង្គបានរិះគន់រឿងបញ្ហាព្រំដែនកម្ពុជា-ថៃ និង បញ្ហាជនភៀសសឹក នៅលើបណ្តាញសង្គមហ្វេសប៊ុករបស់ព្រះអង្គ។
អំឡុងពេលបំពេញបេសកកម្មលើកទីមួយ នៅប្រទេសកម្ពុជា ក្នុងនាមជាអ្នករាយការណ៍ពិសេសរបស់អង្គការសហប្រជាជាតិ កាលពីចុងខែកក្កដា លោក ថម អេនឌ្រូ (Tom Andrews) បានមានប្រសាសន៍ថា ការអនុវត្តសិទ្ធិសេរីភាពជាមូលដ្ឋានរបស់ប្រជាពលរដ្ឋ មិនមែនជាកម្មវត្ថុនៃបទល្មើស ការចោទប្រកាន់ ការឃុំខ្លួន ឬការផ្តន្ទាទោសនោះទេ។ លោក ថម អេនឌ្រូ ថែមទាំងបានទទូចឱ្យលោក ហ៊ុន ម៉ាណែត ដោះលែងអ្នកទោសមនសិការជាង ១០០នាក់ ដែលកំពុង ជាប់ពន្ធនាគារ ឱ្យមានសេរីភាពឡើងវិញ៕
