អ្នកឃ្លាំមើលបារម្ភថា ការអនុវត្តច្បាប់កាតព្វកិច្ចយោធារបស់រដ្ឋាភិបាល លោក ហ៊ុន ម៉ាណែត នឹងគ្មានតម្លាភាពនោះទេ រវាងកូនអ្នកមានលុយមានអំណាច និងកូនមកពីគ្រួសារក្រីក្រ ប្រសិនបើគ្មានការរៀបចំប្រព័ន្ធគ្រប់គ្រង និងការហ្វឹកហ្វឺន ប្រកបដោយវិជ្ជាជីវៈត្រឹមត្រូវ។ ការលើកឡើងនេះ គឺក្រោយពីរដ្ឋាភិបាលបានអនុម័តសេចក្ដីព្រាងច្បាប់ស្ដីពី កាតព្វកិច្ចយោធា កាលពីថ្ងៃទី២៣ ខែមេសា។
ក្រោយពីរដ្ឋាភិបាល បានប្រកាសពីការកែប្រែច្បាប់អនុវត្តកាតព្វកិច្ចយោធាអស់រយៈពេលជិត១ឆ្នាំមក នៅថ្ងៃទី២៣ ខែមេសា សេចក្ដីព្រាងច្បាប់ស្ដីពី កាតព្វកិច្ចយោធាថ្មី ក៏ត្រូវបានទីស្តីការគណៈរដ្ឋមន្ត្រីអនុម័តជាស្ថាពរ។ ទន្ទឹមគ្នានោះ ពលរដ្ឋខ្លះសាទរ និងខ្លះទៀតបារម្ភខ្លាចការអនុវត្ត ពុំមានប្រសិទ្ធភាព ដោយសារតែ ខ្វះនូវតម្លាភាព និងគ្មានវិជ្ជាជីវៈត្រឹមត្រូវ ដែលធ្វើឱ្យការចាយវាយថវិកាជាតិពុំចំគោលដៅពិតប្រាកដ។
អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរីនៅថ្ងៃទី២៤ ខែមេសាថា ការអនុម័តសេចក្ដីព្រាងច្បាប់ថ្មីស្ដីពី កាតព្វកិច្ចយោធាជារឿងល្អ ហើយរដ្ឋាភិបាលត្រូវយកចិត្តទុកដាក់ខ្ពស់ លើការរៀបចំឱ្យបានត្រឹមត្រូវ និងផ្ដោតសំខាន់លើគុណភាព និងប្រសិទ្ធភាព ជាចម្បងក្នុងការហ្វឹកហ្វឺនយុវជន ឱ្យក្លាយជាយោធាដែលមាននូវវិជ្ជាជីវៈខ្ពស់។
លោកថា រឿងដែលគួរឱ្យព្រួយបារម្ភ គឺកង្វះប្រព័ន្ធគ្រប់គ្រង់ផ្នែករដ្ឋាភិបាលឱ្យបានត្រឹមត្រូវ និងច្បាស់លាស់ ដែលអាចធ្វើឱ្យអំពើ ពុករលួយ កើតឡើងដូចជា ករណី ពលរដ្ឋក្រីក្រត្រូវបានអនុវត្តនូវកាតព្វកិច្ចយោធា យ៉ាងតឹងរ៉ឹង រីឯកូនអ្នកមានលុយមានអំណាច បែរជារួចផុតពីកាតព្វកិច្ចយោធា ដែលករណីនេះ អាចធ្វើឱ្យពលរដ្ឋមួយចំនួន មិនសប្បាយចិត្ត ហើយនឹងចោទថា ការហ្វឹកហ្វឺនយោធារដ្ឋាភិបាល គ្មានប្រសិទ្ធភាព និងតម្លាភាពត្រឹមត្រូវ។
សេចក្ដីប្រកាសព័ត៌មានរបស់គណៈរដ្ឋមន្ត្រី ឱ្យដឹងថា សេចក្ដីព្រាងច្បាប់នេះ មាន ៨ជំពូក និង ២០មាត្រា ដែលបានរៀបចំឡើង ក្នុងគោលបំណង កំណត់ពីវិធាននៃការអនុវត្តកាតព្វកិច្ចយោធា ដើម្បីរួមចំណែក កសាងប្រទេសជាតិ និងការពារមាតុភូមិជាចាំបាច់។
សេចក្ដីព្រាងច្បាប់នេះដែរ នឹងមានវិសាលភាព ចំពោះ ពលរដ្ឋខ្មែរគ្រប់រូប ដែលមានអាយុចាប់ពី១៨ឆ្នាំ ដល់ ២៥ឆ្នាំ។ ចំណែក ស្ត្រី ក៏នឹងត្រូវអនុវត្តកាតព្វកិច្ចនេះដែរ ប៉ុន្តែធ្វើឡើង តាមរយៈគោលការណ៍ស្ម័គ្រចិត្ត។ ទោះជាយ៉ាងណា គេនៅមិនទាន់ដឹងថា តើច្បាប់នេះនឹងអនុម័តឱ្យប្រើប្រាស់ជាផ្លូវការ នៅពេលណា ហើយមិនទាន់ដឹងថា តើនឹងធ្វើដោយរបៀបណាខ្លះនោះដែរ។
ទូរទស្សន៍អាស៊ីសេរីពុំអាចទាក់ទងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតិ ដើម្បីឆ្លើយតបជុំវិញរឿងនេះបានទេនៅថ្ងៃទី២៤ ខែមេសា ដោយហៅទូរស័ព្ទចូលតែគ្មានអ្នកទទួល។
ចាប់តាំងពីកម្ពុជារងការឈ្លានពានទឹកដីពីសំណាក់យោធា ថៃចំនួន២លើកមក អ្នកវិភាគ ពលរដ្ឋ និងមន្ត្រីបក្សប្រឆាំងតែងតែ រិះគន់យ៉ាងខ្លាំងមកលើរដ្ឋាភិបាលត្រកូល«ហ៊ុន» ដែលធ្វើឱ្យវិស័យយោធាបន្តធ្លាក់ដុនដាប់ គ្មានសម្ភារៈយោធាទំនើបៗ ក្នុងការទប់ទល់ជាមួយនឹងសត្រូវឈ្លានពាន។ ទន្ទឹមគ្នានោះគេតែងឃើញ កងទ័ពជួរមុខ ខ្វះខាត ស្បៀង និងសម្ភារៈយោធា។ ករណីនេះ ពលរដ្ឋ ជំរុញឱ្យរដ្ឋាភិបាលត្រូវធ្វើទំនើបកម្មយោធាឡើងវិញ និងលុបបំបាត់អំពើពុករលួយ ក្នុងវិស័យ យោធាឱ្យមានប្រសិទ្ធភាពខ្ពស់។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា ការអនុវត្តកាតព្វកិច្ចយោធា គឺ មិនមែន ឱ្យពលរដ្ឋ ឬ យុវជនទៅធ្វើយោធាជាអចិន្ត្រៃយ៍នោះទេ គឺគ្រាន់តែដើម្បីហ្វឹកហ្វឺនផ្នែកយោធាក្នុងរយៈពេលខ្លី ដើម្បីបណ្ដុះឱ្យពលរដ្ឋមានសមត្ថភាពផ្នែកយោធា សម្រាប់ត្រៀមខ្លួន ក្នុងករណីប្រទេស ជាតិមានគ្រោះអាសន្នភ្លាមៗ ដែលបង្កឡើងពីការឈ្លានពានពីសត្រូវ។
ប៉ុន្តែយ៉ាងណា លោកថាការរៀបចំកម្មវិធីហ្វឹកហ្វឺននេះគឺ រដ្ឋាភិបាលត្រូវតែយកចិត្តទុកដាក់ខ្ពស់ ហើយ ផ្ដល់តម្លៃលើពលរដ្ឋ និងយុវជន ដែលបំពេញកាតព្វកិច្ចទាំងនោះ ឱ្យបានត្រឹមត្រូវ ដើម្បីធ្វើយ៉ាងណា ឱ្យពួកគេក្លាយជា ធនធានដ៏រឹងមាំ និង ប្រកបដោយកិត្តិយស នៅពេលបំពេញកាតព្វកិច្ចរួច។ ការធ្វើបែបនេះ ដើម្បីឱ្យយុវជនយល់ដឹងពីតម្លៃនៃការការពារជាតិ។ លោកថា ការអនុវត្តកាតព្វកិច្ចយោធា គឺជាផ្នែកមួយនៃការ ធ្វើទំនើបកម្មយោធា ប៉ុន្តែ អ្វីដែលសំខាន់ គឺរដ្ឋាភិបាល ត្រូវលុបបំបាត់អំពើពុករលួយ និង ត្រូវផ្ដល់គុណតម្លៃពិតប្រាកដក្នុងការហ្វឹកហ្វឺន។
ទាក់ទិនរឿងនេះដែរ ពលរដ្ឋ អ្នកនយោបាយ និងមន្ត្រីសង្គមស៊ីវិល ភាគច្រើន បានសាទរទៅលើសេចក្ដីព្រាងច្បាប់ ស្ដីពីកាតព្វកិច្ចយោធា ព្រោះពួកគាត់រំពឹងថា ទន្ទឹមនឹងការអនុវត្តច្បាប់កាតព្វកិច្ច រដ្ឋាភិបាលលោក ហ៊ុន ម៉ាណែត នឹងធ្វើទំនើបកម្មយោធាឡើងវិញ ដើម្បីពង្រឹងវិស័យយោធាឱ្យខ្លាំង ព្រោះថា ចាប់តាំងពីកម្ពុជា ត្រូវបានយោធាថៃឈ្លានពានមក បញ្ហាជាច្រើនបានផុសឡើងដូចជា បញ្ហាកង្វះស្បៀង សម្ភារៈយោធា និង អាវុធទំនើបៗ ដែលប្រើដោយបច្ចេកវិទ្យា ក្នុងការបាញ់តបត សត្រូវទើបធ្វើឱ្យ យោធាថៃ បានចិត្តវាយចូលដែនអធិបតេយ្យកម្ពុជា និងកាន់កាប់ទឹកដីខ្មែរ អស់ជាង៥០ទីតាំងមកដល់សព្វថ្ងៃ៕
