អ្នកឃ្លាំមើល លើកឡើងថា អាជ្ញាធរជំនាញ និងតុលាការ គួរតែបើកការស៊ើបអង្កេតលើប្រភពទ្រព្យសម្បត្តិរបស់ម្ចាស់ក្រុមហ៊ុន ហ្គាឡាក់ស៊ី ណាវ៉ាត្រា (Galaxy Navatra Group Co., Ltd) លោក ឡេង ណាវ៉ាត្រា ក្រោយពីលោកប្រកាសផ្ដល់សិទ្ធិឱ្យរដ្ឋាភិបាលចាត់ចែងទ្រព្យសម្បត្តិរបស់លោក និងព្រមទទួលទោសតាមច្បាប់ ក្រោយពីគម្រោង ៦ A របស់លោកបានបរាជ័យ ដោយក្រុមហ៊ុនមិនអាចសាងសង់ផ្ទះឱ្យប្រជាពលរដ្ឋដែលជាអតិថិជនទៅតាមកិច្ចសន្យាទិញ-លក់។ ការលើកឡើងបែបនេះ គឺបន្ទាប់ពីពួកគាត់សង្កេតឃើញថា មកទល់ពេលនេះ អាជ្ញាធរ និងតុលាការ ហាក់មិនទាន់បានស៊ើបអង្កេតករណីនេះឲ្យបានស៊ីជម្រៅនោះឡើយ ខណៈជនរងគ្រោះរាប់ពាន់ម៉ឺននាក់កំពុងរង់ចាំយុត្តិធម៌។
អ្នកឃ្លាំមើលលើកឡើងថា ប្រសិនបើប្រទេសកម្ពុជា មានការអនុវត្តច្បាប់ត្រឹមត្រូវនោះ ឧកញ៉ា ឡេង ណាវ៉ាត្រា ដែលជាប់ពាក់ព័ន្ធនឹងការចោទថា បានបោកប្រាស់លុយប្រជាពលរដ្ឋរាប់ម៉ឺននាក់តាមរយៈគម្រោងលក់អចលនទ្រព្យនោះ មិនអាចមានសេរីភាពបង្ហោះសារបកស្រាយលើបណ្ដាញសង្គមជាបន្តបន្ទាប់នោះឡើយ។
អ្នកតាមដានភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរីថា រឿងរបស់ឧកញ្ញា ឡេង ណាវ៉ាត់ត្រា ហាក់គួរឱ្យសង្ស័យខ្លាំងចំពោះចំណាត់ការផ្លូវច្បាប់ ព្រោះលោក ឡេង ណាវ៉ាត្រា បានប្រកាសថា ខ្លួនអស់លទ្ធភាពបន្តគម្រោងផ្ទះ ដីរបស់លោកហើយ ខណៈអតិថិជនជាច្រើននៅមិនទាន់ទទួលបានផ្ទះ ឬដីនៅឡើយ។លោកថា ការប្រកាស «ក្ស័យធន» របស់ឧកញ្ញារូបនេះ មិនមែនមានន័យថា អាចរួចខ្លួនពីការទទួលខុសត្រូវទេ ពោល ប្រសិនបើក្រុមហ៊ុនពិតជាមិនអាចបង់បំណុល ត្រូវមាននីតិវិធីតុលាការ ដោយត្រូវបង្ហាញទ្រព្យ បំណុល និងម្ចាស់បំណុលឱ្យច្បាស់។ រដ្ឋត្រូវស៊ើបអង្កេតឲ្យបានស៊ីជំរៅ មិនមែនទុកឱ្យម្ចាស់ក្រុមហ៊ុនប្រកាសដោយខ្លួនឯងហើយបញ្ចប់រឿងនោះទេ។
លោក សេង វណ្ណលី អះអាងថា ចំណុចដែលគួរតែស៊ើបខ្លាំងជាងគេ គឺប្រភពលុយ បើសិនគម្រោងបានទទួលប្រាក់រាប់រយលានដុល្លារ ត្រូវស្រាវជ្រាវពីប្រភពលំហូរសាច់ប្រាក់ ចំណូល និងចំណាយ មកពីខាងណាខ្លះ ហើយនឹងទឹកប្រាក់ដែលនៅសល់ថា នៅកន្លែងណាខ្លះ។ លោកថា អាជ្ញាធរ និងតុលាការ ត្រូវពិនិត្យគណនីធនាគារ ការទិញលក់ដី កម្ចី ការបង់ពន្ធ និងការផ្ទេរទ្រព្យជាដើម។ រដ្ឋត្រូវធ្វើសវនកម្មហិរញ្ញវត្ថុឱ្យបានច្បាស់ និងបើកព័ត៌មានសំខាន់ៗឱ្យពលរដ្ឋដឹង។ បើរដ្ឋមិនបង្ហាញទិន្នន័យទាំងនេះ ការសង្ស័យថា មានការការពារ ឬការអនុវត្តច្បាប់មិនស្មើគ្នា នឹងកើតមានកាន់តែខ្លាំង។
លោក សេង វណ្ណលី៖ «ដូច្នេះខ្ញុំគិតថារដ្ឋាភិបាលគួរបើកការស៊ើបអង្កេតដោយចំហ និងឯករាជ្យ បើរកឃើញភស្តុតាងថា មានការឆបោក អឺលាក់បាំងទ្រព្យ គេចពន្ធ ឬក៏លាងលុយកខ្វក់ អឺត្រូវបញ្ជូនទៅតុលាការ និងផ្ដន្ទាទោសតាមច្បាប់ អឺមិនថា បុគ្គលនោះមានទ្រព្យច្រើន មានគោរមងារ ជាឧកញ៉ា ឬក៏មានទំនាក់ទំនងជាមួយអ្នកមានអំណាចក៏ដោយ។ អ្វីដែលប្រជាពលរដ្ឋត្រូវការមិនមែនការបកស្រាយតាម Facebook ទេ ប៉ុន្តែគឺការពិត អឺអ្នកទទួលខុសត្រូវ និងដំណោះស្រាយសម្រាប់ជនរងគ្រោះបាទ»។
កាលពីថ្ងៃទី៨ ខែកញ្ញា ម្ចាស់ក្រុមហ៊ុន ហ្គាឡាក់ស៊ី ណាវ៉ាត្រា (Galaxy Navatra Group Co., Ltd) លោក ឡេង ណាវ៉ាត្រា បានប្រកាសផ្ដល់សិទ្ធិឱ្យរដ្ឋាភិបាលចាត់ចែងទ្រព្យសម្បត្តិរបស់លោក និងព្រមទទួលទោសតាមច្បាប់ ក្រោយពីគម្រោង ៦ A របស់លោកបានបរាជ័យ និងធ្លាក់ខ្លួនជំពាក់បំណុលគេរាប់លានដុល្លារ។ លោក ថែមទាំងអះអាងថា លោកព្រមទទួលទោសតាមច្បាប់ ទោះប្រឈមនឹងការ ដាក់ទោសលោកមួយជីវិតក៏ដោយ។ បន្ថែមលើនេះ បងប្អូនរបស់លោក ចំនួន ៤នាក់ទៀត ដែលបានឡើងឧកញ៉ាងាយៗ ដូចជា លោក ឡេង ប្រុស អ្នកស្រី ឡេង និមល អ្នកស្រី ឡេង បញ្ចាពណ៌ និងលោក សុន តារ៉ាវុធ ក៏ត្រូវទទួលខុសត្រូវ ចំពោះបរាជ័យ នៃគម្រោង ៦អា ដែរ។ ទោះជាយ៉ាងណា លោក ស្នើសុំឲ្យរដ្ឋាភិបាលរបស់លោកហ៊ុន ម៉ាណែត កុំដាក់ទោសប្រពន្ធនិងកូនៗរបស់លោក ហើយទុកឲ្យកូនៗរបស់លោក រៀនបានចប់ចុងចប់ដើម។ ការប្រកាសដ៏គួរឱ្យភ្ញាក់ផ្អើលនេះ បានផ្ទុះឡើង បន្ទាប់ពីក្រសួងរៀបចំដែនដី គ្រោងបង្កកទ្រព្យសម្បត្តិរបស់ឧកញ៉ារូបនេះទាំងអស់ ដើម្បីដោះស្រាយបញ្ហាជូនពលរដ្ឋ។
ប៉ុន្តែមកទល់ពេលនេះ ក្រសួងស្ថាប័នពាក់ព័ន្ធ ហាក់មិនបានបង្ហាញចំណាត់ការផ្លូវច្បាប់ និងមិនបានបង្ហាញព័ត៌មានច្បាស់លាស់អំពីចំនួនពលរដ្ឋរងគ្រោះ ព្រមទាំងប្រភពទ្រព្យសម្បត្តិរបស់លោក ឡេង ណាវ៉ាត្រា នៅឡើយ។
ក្រសួងដែនដី នគរូបនីយកម្ម និង សំណង់ កាលពីថ្ងៃទី១០ ខែកញ្ញា បានបញ្ចេញ ទិន្នន័យ ឱ្យឃើញថា ក្រុមហ៊ុន ឡេង ណាវ៉ាត្រា ទើបតែបានផ្ដល់ឱ្យអតិថិជន ជិត ៦០០ផ្ទះប៉ុណ្ណោះ ហើយនៅជំពាក់អតិថិជន ជាង ៣៨ ០០០ គ្រួសារទៀត។ប៉ុន្តែអ្នកឧកញ៉ា ឡេង ណាវ៉ាត្រា បានចេញមុខបដិសេធរបាយការណ៍របស់ ក្រសួងរៀបចំដែនដីនេះ។
យ៉ាងណាក៏ដោយរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក សាយ សំអាល់ លើកឡើងក្នុងពិធីមួយក្នុងខេត្តសៀមរាប កាលពីថ្ងៃទី១៣ ខែកញ្ញា ថា លោកមិនចង់ឆ្លើយតបវែងឆ្ងាយជាមួយក្រុមហ៊ុន អ្នកឧកញ៉ា ឡេង ណាវ៉ាត្រា ទេ។ លោក សាយ សំអាល់ បន្តថា ចំណុចសំខាន់ គឺអ្នកឧកញ៉ា ឡេង ណាវ៉ាត្រា ត្រូវបញ្ជាក់ឱ្យច្បាស់ថា តើអ្នកឧកញ៉ាមានប្រភពហិរញ្ញវត្ថុ គ្រប់គ្រាន់ សម្រាប់បញ្ចប់ការសាងសង់ ឬនៅ ព្រោះការងារនេះ ត្រូវការថវិការហូត ដល់រាប់លានដុល្លារ។ ក្រសួងដែនដី ថែមទាំងចាត់ទុកថា សកម្មភាពរបស់លោក ឡេង ណាវ៉ាត្រា និងក្រុមរបស់លោកកន្លងមក កំពុងបំពុលសង្គម និងបំភ្លៃការពិតជាដើម។ ប៉ុន្តែមកទល់ពេលនេះ លោក ឡេង ណាវ៉ាត្រា នៅតែមានសេរីភាពដដែល និងថែមទាំងប្រកាសបន្តលក់ដីតាមបណ្តាញសង្គមទៀតផង។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត មានប្រសាសន៍ថា លោកគ្មានជំនឿថា អាជ្ញាធរមានសមត្ថកិច្ច អាចចាត់វិធានការលើឧកញ៉ា ឡេង ណាវ៉ាត្រា បាននោះទេ ដោយសារឧកញ៉ារូបនេះ ជាអ្នកលាងលុយ និងបោកប្រាស់លុយប្រជាពលរដ្ឋទៅឲ្យលោក ហ៊ុន សែន និងក្រុមគ្រួសារផ្ទាល់។ លោកថា អាជ្ញាធរ អាចចាប់ខ្លួនឧកញ៉ារូបនេះបាន នៅពេលដែលលោក ហ៊ុន សែន បញ្ជាឲ្យចាប់តែប៉ុណ្ណោះ។ លោកថា តាមរបាយការណ៍របស់ក្រសួងដែលបង្ហាញថា មានពលរដ្ឋរងគ្រោះ ៣៨.០០០គ្រួសារ ដែលរងគ្រោះ នោះឧកញ៉ារូបនេះ បានបោកប្រាស់លុយពលរដ្ឋរាប់ពាន់លានដុល្លារឲ្យគ្រួសារត្រកូលហ៊ុន។ លោកថា ប្រសិនបើអាជ្ញាធរចងចាត់វិធានការនោះត្រូវបង្ហាញពីទិន្នន័យទឹកប្រាក់ក្នុងធនាគាររបស់លោកថា បានផ្ទេរទៅកន្លែងណាខ្លះ ឲ្យអ្នកណាខ្លះ ហើយស្រាវជ្រាវចំណូលរបស់លោកតាំងពីដំបូងមកគឺស្អាតស្អំដែរឬទេ ហើយត្រូវបង្ហាញប្រកាសឲ្យពលរដ្ឋបានដឹង។ មិនតែប៉ុណ្ណោះ អាជ្ញាធរត្រូវស៊ើបអង្កេតទាំងក្រុមគ្រួសាររបស់លោក និងអ្នកជិតដិតនឹងលោកជាដើម ថា មានពាក់ព័ន្ធនឹងករណីបោកប្រាស់នេះ ដែរឬទេ។
លោក ម៉ែន ណាត អះអាងថា គ្មាននរណាម្នាក់អាចយកច្បាប់មកអនុវត្តលើបុគ្គលបោកប្រាស់ទាំងនេះ បាននោះទេ ដោយសារបុគ្គលទាំងអស់នោះជាអ្នករកលុយឲ្យមេដឹកនាំកំពូល។ លោកថា ករណីនៅលោកសេរី ប្រសិនមានករណីជាប់ពាក់ព័ន្ធនឹងការបោកប្រាស់បែបនេះ អាជ្ញាធរ នឹងចាប់ឃុំខ្លួនជាមុន និងបើកការស៊ើបអង្កេតជាបន្តបន្ទាប់ទៀតនៅតាមក្រោយ ហើយប្រសិនបើរកឃើញថា ប្រព្រឹត្តកំហុស នោះនឹងត្រូវទទួលទោសធ្ងន់ធ្ងរ។
លោក ម៉ែន ណាត៖ «សម្រាប់ស្ថានភាពកម្ពុជាសព្វថ្ងៃក្រោមការដឹកនាំរបស់លោក ហ៊ុន ម៉ាណែត នេះ ខ្ញុំវាអត់ជឿ… អត់ជឿថា រដ្ឋាភិបាល ហ៊ុន ម៉ាណែត ហ្នឹង អាចស៊ើបអង្កេតត្រឹមត្រូវ សងយុត្តិធម៌ដល់ពលរដ្ឋរងគ្រោះបានទេ។ បើសិនជា ហ៊ុន ម៉ាណែត ចេះសងយុត្តិធម៌ដល់ពលរដ្ឋរងគ្រោះ ប្រហែលជា ណក៎… ពួកដែលជំពាក់អតិថិជនដូចតាមរយៈក្រុមហ៊ុន ឡេង ចាន់ណា តាមរយៈក្រុមហ៊ុន CIC Partner អីចឹង… ដូចជាក្រុមហ៊ុន CIC Partner មានអ្នកខ្លះហ្នឹងដែលទៅបោកគេហើយ ចុងក្រោយ ចុះចូលគណបក្សកាន់អំណាច តែងតាំងឱ្យធ្វើជាមន្ត្រីជាន់ខ្ពស់ ឬក៏ទីប្រឹក្សារដ្ឋាភិបាលថែមទៀត វាអញ្ចឹងហាស៎។ អញ្ចឹង អាចបញ្ជាក់បានថារដ្ឋាភិបាលហ្នឹងគឺលើកបន្តុប លើកស្ទួយតែពួកមនុស្សខិលខូច វាអត់លើកស្ទួយយុត្តិធម៌ជូនជនរងគ្រោះទេ អញ្ចឹងហាស៎»។
ករណីស្រដៀងគ្នានេះមួយនៅឯប្រទេសចិន ថ្មីៗនេះ តុលាការចិន បានកាត់ទោសស្ថាបនិកក្រុមហ៊ុនអចលនទ្រព្យដ៏ធំមួយរបស់ចិន ឈ្មោះ Evergrande Group របស់លោក Hui Ka Yan ដែលបានដួលរលំឲ្យជាប់ពន្ធនាគារ អស់មួយជីវិត និងរឹបអូសទ្រព្យសម្បត្តិរបស់លោកទាំងអស់ ព្រមទាំងពិន័យប្រាក់បុគ្គលរូវបនេះ រាប់ពាន់លានដុល្លារ ពីបទកេងប្រវ័ញ្ចទ្រព្យសម្បត្តិ និងអំពើពុករលួយក្នុងគម្រោងអចលនទ្រព្យរបស់លោក។ មិនតែប៉ុណ្ណោះកូនៗរបស់ម្ចាស់ក្រុមហ៊ុនដ៍ធំមួយនេះក៍ត្រូវជាប់ពន្ធធានាគារចន្លោះពី២២ខែ ទៅ១៨ឆ្នាំផងដែរ ពាក់ព័ន្ធរឿងនេះ។
ពលរដ្ឋ និងអ្នកវិភាគចង់ឃើញរដ្ឋាភិបាលកម្ពុជាដាក់ទោស ឧកញ៉ា ឡេង ណាវ៉ាត្រា ឲ្យបានធ្ងន់ធ្ងរ ដូចករណីនេះដែរ ចំពោះទង្វើបោកប្រាស់របស់លោក ដើម្បីជាមេរៀន មិនឲ្យឧកញ៉ារូបនេះ និងឧកញ៉ាដទៃបោកប្រាស់ពលរដ្ឋស្លូតត្រង់បានទៀត។
ក្រោមការដឹកនាំរបស់ ក្រុមគ្រួសារត្រកូលហ៊ុន មានក្រុមហ៊ុន ឆបោកជាច្រើនទៀត ដែលតុលាការ និងរដ្ឋាភិបាល មិនទាន់ដោះស្រាយនៅឡើយ ហើយទុកឱ្យពលរដ្ឋរាប់ម៉ឺនគ្រួសាររងគ្រោះ យូរឆ្នាំ ដូចជា ក្រុមហ៊ុន ពិភពដីមាស របស់អតីតឧកញ៉ា ហ៊ី គឹមហុង ក្រុមហ៊ុនអតីតឧកញ៉ា ជា សារ៉ន និង ក្រុមហ៊ុនស៊ីអាយស៊ី (CIC) របស់លោក គុយ វ៉ាត ជាដើម។
ជាក់ស្តែង ប្រជាពលរដ្ឋរាប់ពាន់គ្រួសារនៅទូទាំងប្រទេសដែលបានចាញ់បោកឧកញ៉ា ហ៊ី គឹមហុង តែងតែត្អូញត្អែរ អំពីទុក្ខសោក និងការរង់ចាំយុត្តិធម៌របស់ពួកគេ ជិត៣ឆ្នាំមកហើយចាប់តាំងពីឆ្នាំ២០២៣មក ប៉ុន្តែមិនទាន់មានពន្លឺទាល់តែសោះ។ មកដល់ពេលនេះ មានពលរដ្ឋរងគ្រោះជិត ៤០នាក់ បានបាត់បង់ជីវិត ដោយសារតែការបាក់ទឹកចិត្តធ្ងន់ធ្ងរ បន្ទាប់ពីបានដឹងនូវការចាញ់បោកលោក ហ៊ី គឹមហុង។
ក្រៅពីនោះ ក៏មានក្រុមហ៊ុនមួយចំនួនទៀត ជាប់ក្នុងបញ្ជីឆបោក និង លាងលុយកខ្វក់ដែរ រួមមាន ក្រុមហ៊ុនហួយវ័ន ផេ (Huione Pay) របស់ឧកញ៉ា ហ៊ុន តូ ដែលជាបងជីដូនមួយ របស់លោកនាយករដ្ឋមន្ត្រី ហ៊ុន ម៉ាណែត។ ក្រុមហ៊ុនភូមិខ្មែរគ្រុប របស់សាច់ញាតិ លោក ដួង ដារា ដែលជាអតីតជំនួយការរបស់លោក ហ៊ុន សែន និង ក្រុមហ៊ុន ប្រ៊ីលានស៊ីធី របស់អតីតឧកញ៉ា ឡេង ចាន់ណា។ ចំណែកពលរដ្ឋដែលរងគ្រោះខ្លះជួបវិបត្តិផ្លូវចិត្តជាច្រើន និងខ្លះទៀតសម្លាប់ខ្លួន និងធ្លាក់ខ្លួនឈឺ ដោយសារទិញផ្ទះមិនបានផ្ទះ ទិញដីមិនបានដី និងត្រូវជំពាក់បំណុលធនាគារវ័ណ្ឌក វិបត្តិគ្រួសារ គ្រួសារព្រាត់ប្រាស់ ហើយកូនៗត្រូវបោះបង់ការសិក្សាដោយសារពុំមានលទ្ធភាពផ្គត់ផ្គង់។
ទោះជាយ៉ាងណាអ្នកវិភាគ ជំរុញឲ្យប្រជាពលរដ្ឋ ប្រើប្រាស់សិទ្ធិរបស់ខ្លួនក្នុងការទាមទារឲ្យរដ្ឋាភិបាល ពន្លឿនការដោះស្រាយជូនពួកគាត់ឲ្យបានឆាប់។ អ្នកឃ្លាំមើលយល់ថា ការរក្សាភាពស្ងៀមស្ងាត់របស់ជនរងគ្រោះ នឹងមិនអាចជួយឲ្យមានដំណោះស្រាយនោះឡើយ៕
