អ្នកឃ្លាំមើលស្នើរដ្ឋាភិបាលប្រើប្រាស់ថវិកាទ្រទ្រង់លំនឹងជីវភាពពលរដ្ឋឱ្យមានប្រសិទ្ធភាព និងតម្លាភាព ព្រោះបារម្ភខ្លាចមានអំពើពុករលួយ និងបក្ខពួកនិយម។ ការលើកឡើងនេះ ធ្វើឡើងបន្ទាប់ពីក្រសួងសេដ្ឋកិច្ច និងហិរញ្ញវត្ថុ ត្រៀមកញ្ចប់ថវិកាជាង១ពាន់លានដុល្លារ។ ដើម្បីរក្សាលំនឹងសេដ្ឋកិច្ចជាតិ ដែលកម្ពុជាកំពុងជួបវិបត្តិធ្ងន់ធ្ងរ។
អ្នកឃ្លាំមើល បារម្ភខ្លាច ការបញ្ចេញកញ្ចប់ថវិកាជាតិ ដើម្បីលំនឹងសេដ្ឋកិច្ច និងជីវភាពពលរដ្ឋ មិនមានប្រសិទ្ធភាព និងតម្លាភាព ដោយសារអំពើពុករលួយ និងបក្ខពួកនិយមនៅកម្ពុជា កើតឡើងស្ទើរគ្រប់ស្ថាប័នរបស់រដ្ឋ។ ពួកគេថា ដើម្បីឲ្យមានលំនឹងសេដ្ឋកិច្ច និងទ្រទ្រង់ជីវភាពរបស់ប្រជាពលរដ្ឋមានប្រសិទ្ធភាព រដ្ឋាភិបាលត្រូវលុបបំបាត់អំពើពុករលួយ ហើយចំណាយទៅលើវិស័យចំនួន៣ ជាចម្បង ដូចជា វិស័យធុរកិច្ចធនតូច និងមធ្យម វិស័យអប់រំ ផ្ដោតទៅបង្ហាត់បង្រៀនជំនាញទៅដល់ពលរដ្ឋ និងវិស័យសុខាភិបាល។
អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា ប្រាប់ទូរទស្សន៍អាស៊ីសេរី នៅថ្ងៃទី៩ ខែកក្កដា ថា លោកសាទរចំពោះបញ្ចេញកញ្ចប់ថវិកាជាតិដើម្បីលំនឹងសេដ្ឋកិច្ចជាតិ និងជីវភាពរបស់ពលរដ្ឋ ប៉ុន្តែទន្ទឹមគ្នានោះ រដ្ឋត្រូវលុបបំបាត់អំពើពុករលួយ និងបក្ខពួកនិយមជាមុនសិន ពីព្រោះលោកបារម្ភខ្លាចថវិកាមិនបានទៅដល់ប្រជាពលរដ្ឋ។ លើសពីនោះ លោកថា វិស័យចំនួន៣ ដែលរដ្ឋត្រូវពង្រឹងជាអាទិភាព មានដូចជាវិស័យធុរកិច្ចធនតូច និងមធ្យម វិស័យអប់រំផ្ដោតលើបង្ហាត់បង្រៀនជំនាញដល់ពលរដ្ឋ និងវិស័យសុខាភិបាល ដើម្បីកាត់បន្ថយការចំណាយរបស់ពលរដ្ឋទៅលើបញ្ហាសុខភាព។
លោក ប៉ោ មករា៖ «ខ្ញុំគិតថាថវិកាដែលចាក់ចូល ឬក៏បម្រុងសម្រាប់ស្តារសេដ្ឋកិច្ច ឬទុកសម្រាប់ប្រជាជនក៏ដូចជាស្ថានភាពសេដ្ឋកិច្ច ពលរដ្ឋទាំងអស់ដែលមានស្ថានភាពណឹង ដែលអាចមានប្រសិទ្ធភាពទៅបានទាល់តែពិនិត្យអំពីបញ្ហាពុករលុយបក្សពួកនិយម មិនចឹងទេគួរតែ មានការឆែកអីន បាលែន (Check in balance) មានន័យថា ធ្វើម៉េចកុំឲ្យមានបញ្ហាអំពើពុករលុយស្ថិតនៅក្នុងការចាយវាយ ស្ថិតក្នុងការអនុវត្តគម្រោងដែលយកទៅចាយក្នុងគម្រោងស្តាសេដ្ឋកិច្ចទ្បើងវិញ»។
ជុំវិញបញ្ហានេះទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ដើម្បីសុំការឆ្លើយតបបានទេ នៅថ្ងៃទី៩ ខែកក្កដា។
ទោះជាយ៉ាងណា កាលពីថ្ងៃទី០៧ ខែកក្កដាកន្លងទៅ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន ថ្លែងនៅក្នុងជំនួបមូលនិធិរូបិយវត្ថុអន្តជាតិថា រដ្ឋាភិបាលកម្ពុជា ត្រៀមបញ្ចេញកញ្ចប់អន្តរាគមន៍ដែលមានទំហំទឹកប្រាក់ដល់ ១ ២៤៤លានដុល្លារអាមេរិក ដើម្បីរក្សាលំនឹងជីវភាពប្រជាពលរដ្ឋក្នុងស្ថានភាពសេដ្ឋកិច្ចកម្ពុជាកំពុងជួបវិបត្តិ។ ក្នុងនោះ កញ្ចប់វិធានការ ទី១ គឺផ្តោតលើការរក្សាលំនឹងជីវភាព ដោយផ្សារភ្ជាប់នឹងការបង្កើតការងារ។ កញ្ចប់វិធានការទី២ ផ្តោតលើការផ្តល់ការបណ្តុះបណ្តាល ជំនាញបច្ចេកទេស និងវិជ្ជាជីវៈ ដោយផ្សារភ្ជាប់នឹងការបង្កើតមុខរបរ។ និង កញ្ចប់អន្តរាគមន៍ទី ៣ ផ្តោតលើការគ្រប់គ្រង ការធ្វើអន្តរកម្ម និងការបំប្លែងថាមពល ។ នេះបើតាមសេចក្ដីថ្លែងការណ៍របស់ ក្រសួងសេដ្ឋកិច្ច និងហិរញ្ញវត្ថុ។
បើទោះជាបែបនេះក្ដី មូលនិធិរូបិយវត្ថុអន្តរជាតិ (IMF) បានវាយតម្លៃនៃកំណើនសេដ្ឋកិច្ចកម្ពុជានៅឆ្នាំ ២០២៦ បានប៉ាន់ស្មានថា កម្ពុជាមានកំណើនសេដ្ឋកិច្ចទាបក្នុងរង្វង់៣ភាគរយ។ កំណើននេះ បានឆ្លុះបញ្ចាំងអំពី ភាពមិនប្រកដប្រជា និងបរិការណ៍ដែលកម្ពុជាទទួលរងនូវផលប៉ះពាល់ពហុវិបត្តិផ្ទួនៗ រួមមានដូចជា សង្គ្រាមនៅមជ្ឈិមបូព៌ាបង្កឱ្យមានការឡើងថ្លៃប្រេងឥន្ធនៈ បញ្ហាជម្លោះព្រំដែនកម្ពុជា-ថៃ ការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា និងភាពមិនប្រាកដប្រជា នៃសេដ្ឋកិច្ចសកល។
អ្នកឃ្លាំមើលជំរុញឲ្យរដ្ឋាភិបាល កសាងទំនុកចិត្តពីអ្នកវិនិយោគបរទេសឡើងវិញនិងការអនុគ្រោះពន្ធពីប្រទេសបញ្ជាទិញ តាមរយៈការបង្ក្រាបក្រុមឧក្រិដ្ឋជនឆបោកតាមអនឡាញឲ្យចំគោលដៅ ស្ដារសិទ្ធិមនុស្ស និងលទ្ធិប្រជាធិបតេយ្យ ធ្វើយ៉ាងណាឲ្យប្រទេសលោកសេរីទុកចិត្ត ដើម្បីកំណើនសេដ្ឋកិច្ចកម្ពុជា និងដោះស្រាយវិបត្តិជីវភាពរបស់ពលរដ្ឋ៕
