មន្ត្រីរដ្ឋាភិបាលក្រៅប្រទេស និងអ្នកឃ្លាំមើលលើកឡើងថា អំពើពុករលួយនៅកម្ពុជា មិនត្រឹមតែប៉ះពាល់សេដ្ឋកិច្ចជាតិ និងសម្អុយកេរ្តិ៍កម្ពុជាលើឆាកអន្តរជាតិប៉ុណ្ណោះទេ ថែមទាំងជាផ្នែកមួយនៃប្រព័ន្ធគ្រប់គ្រងដែលក្រុមគ្រួសារត្រកូល ហ៊ុន បង្កើតឡើងប្រើប្រាស់ដើម្បីពង្រឹងអំណាច។ ការលើកឡើងនេះស្របពេលក្រសួងពាណិជ្ជកម្មអះអាងថា កំពុងបើកការស៊ើបអង្កេតផ្ទៃក្នុងលើមន្ត្រីដែលទទួលសំណូកពីក្រុមហ៊ុនសំណង់ជប៉ុន ហ្វូជីផាស (Fujipass) ជាថ្នូរនឹងការពន្លឿននីតិវិធីលក់បុត្រសម្ពន្ធរបស់ក្រុមហ៊ុននៅកម្ពុជា។
អ្នកនាំពាក្យរដ្ឋាភិបាលឯករាជ្យ ២៣តុលា លោក គឹម សុខ ប្រាប់ទូរទស្សន៍អាស៊ីសេរីនៅថ្ងៃទី១០ ខែកក្កដាថា នៅប្រទេសជប៉ុនអំពើពុករលួយជាបទល្មើសឧក្រិដ្ឋ ដែលរដ្ឋាភិបាលនៃប្រទេសនេះតែងតែចាត់វិធានការប្រឆាំងយ៉ាងម៉ឺងម៉ាត់។ លោកយល់ថា ដោយសារតែជប៉ុនប្ដេជ្ញាចិត្តខ្ពស់ក្នុងការប្រឆាំងនឹងអំពើពុករលួយនេះ ទើបជប៉ុនមានសេដ្ឋកិច្ចរីកចម្រើន និងការអភិវឌ្ឍដល់កំពូល។
ចំណែក នៅកម្ពុជាវិញ លោក គឹម សុខ លើកឡើងថា អំពើពុករលួយបានក្លាយជាវប្បធម៌ និងជាទម្លាប់ពង្រឹងអំណាចរបស់ក្រុមថ្នាក់ដឹកនាំដែលជាហេតុទាញឱ្យកម្ពុជាបានក្លាយជាប្រទេសមានប្រជាជនក្រីក្រវេទនា និងសម្បូរទៅដោយក្រុមឧក្រិដ្ឋជន។ លោកបន្ថែមថា ការកម្ចាត់អំពើពុករលួយ និងគ្រួសារបក្ខពួកនិយមមិនអាចបញ្ចប់បានតាមរយៈការស៊ើបអង្កេត ឬចាប់ខ្លួនមន្ត្រីតូចតាចបានឡើយ ព្រោះប្រព័ន្ធនេះបង្កើតឡើងដោយរដ្ឋាភិបាលនៃក្រុមគ្រួសារត្រកូល ហ៊ុន។
លោក គឹម សុខ៖ «នៅប្រទេសជប៉ុន គេបង្កើតទម្លាប់កម្ចាត់អំពើពុករលួយដាច់ខាត។ អ៊ីចឹងហើយ បានជាធ្វើឱ្យអ្នកវិនិយោគល្អៗនៅជុំវិញពិភពលោក ចូលចិត្តរកស៊ីជាមួយជប៉ុន ក៏ប៉ុន្តែនៅកម្ពុជាយើង ពោរពេញទៅដោយអំពើពុករលួយ បក្ខពួកនិយម និងការបំពានច្បាប់ ហេតុដូច្នេះហើយ ទើបកម្ពុជារបស់យើង ធ្លាក់ទៅក្នុងស្ថានភាពវិបត្តិសេដ្ឋកិច្ច ប្រជាពលរដ្ឋក្រីក្រ និងវ័ណ្ឌកដោយបំណុល វេទនាដូចយើងឃើញបច្ចុប្បន្ន»។
ការលើកឡើងនេះ ស្របពេលដែលក្រសួងពាណិជ្ជកម្មកម្ពុជាចេញសេចក្ដីជូនដំណឹងនៅថ្ងៃទី៨ ខែកក្កដា ថា កំពុងសហការជាមួយអង្គភាពប្រឆាំងអំពើពុករលួយ (ACU) ដើម្បីបើកការស៊ើបអង្កេត និងចាត់វិធានការតាមផ្លូវច្បាប់លើមន្ត្រីរបស់ខ្លួន ដែលត្រូវបានចោទប្រកាន់ថា បានទទួលសំណូកពីក្រុមហ៊ុនឯកជនជប៉ុននៅកម្ពុជា កាលពីឆ្នាំ២០២១។
ចំណាត់ការរបស់ក្រសួងនេះ ធ្វើឡើងបន្ទាប់ពីកាសែត ឌឹ ជប៉ុន ថាមស៍ (The Japan Times) បានរាយការណ៍កាលពីថ្ងៃទី៧ ខែកក្កដា ថា អយ្យការក្រុងតូក្យូ (Tokyo) ប្រទេសជប៉ុន បានចោទប្រកាន់ក្រុមហ៊ុន ហ្វូជីផាស (Fujipass) និងមនុស្សពាក់ព័ន្ធចំនួន ៣នាក់ ពីបទសូកប៉ាន់មន្ត្រីបរទេស ក្រោមច្បាប់ជប៉ុនស្ដីពីការប្រកួតប្រជែងមិនស្មោះត្រង់។ ក្នុងចំណោមជនសង្ស័យទាំងនោះ មានពីរនាក់ជានាយកប្រតិបត្តិក្រុមហ៊ុន ហ្វូជីផាស និងម្នាក់ទៀតជាអតីតទីប្រឹក្សារបស់ក្រុមហ៊ុនបុត្រសម្ព័ន្ធនៅកម្ពុជា។
យោងតាមការរាយការណ៍របស់កាសែត ឌឹ ជប៉ុន ថាមស៍ ឱ្យដឹងថា ប៉ូលិសក្រុងតូក្យូបានបញ្ជូនសំណុំរឿងទៅអយ្យការតាំងពីខែមិថុនា ឆ្នាំ២០២៦ បន្ទាប់ពីការស៊ើបអង្កេតបានរកឃើញថា ក្រុមហ៊ុន ហ្វូជីផាស បានផ្ដល់សំណូកប្រមាណ ១ពាន់ដុល្លារអាមេរិកដល់មន្ត្រីក្រសួងពាណិជ្ជកម្មកម្ពុជាម្នាក់ កាលពីខែកក្កដា ឆ្នាំ២០២១ ជាថ្នូរនឹងការពន្លឿននីតិវិធីលក់បុត្រសម្ព័ន្ធរបស់ក្រុមហ៊ុននៅកម្ពុជា។
ក្រុមហ៊ុន ហ្វូជីផាស (Fujipass) ជាក្រុមហ៊ុនជប៉ុនដែលប្រកបអាជីវកម្មផ្នែកសំណង់ និងបច្ចេកវិទ្យា។ បុត្រសម្ព័ន្ធរបស់ក្រុមហ៊ុននៅកម្ពុជា ក៏ធ្លាប់ប្រកបអាជីវកម្មបញ្ជូនកម្មសិក្សាការីបច្ចេកទេសកម្ពុជាទៅធ្វើការនៅប្រទេសជប៉ុនផងដែរ។ ទោះជាយ៉ាងណា ក្រុមហ៊ុនបានជួបបញ្ហាហិរញ្ញវត្ថុធ្ងន់ធ្ងរ បន្ទាប់ពីការរាតត្បាតនៃជំងឺកូវីដ-១៩។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ដើម្បីសាកសួរជុំវិញបញ្ហានេះបានទេនៅថ្ងៃទី១០ ខែកក្កដា។
ជុំវិញរឿងនេះដែរ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា បញ្ហាអំពើពុករលួយនៅកម្ពុជាបានក្លាយជាជំងឺមហារីកដែលមិនងាយព្យាបាល។ លោកបន្តថា ចំណែកប្រព័ន្ធយុត្តិធម៌វិញត្រូវបានក្រុមអ្នកមានឥទ្ធិពល និងអំណាចជាន់ឈ្លី និងបង្កើតឱ្យមានជាប្រព័ន្ធដឹកនាំបែបគ្រួសារបក្ខពួកនិយមពាសពេញក្នុងស្ថាប័នរដ្ឋ។
លោក ស៊ឹង សែនករុណា បន្តថា ក្នុងពេលកម្ពុជាបានធ្លាក់ដល់ស្ថានភាពបែបនេះក្រុមថ្នាក់ដឹកនាំ និងអ្នកមានអំណាចអាចប្រើឥទ្ធិពលកែប្រែ ឬបង្វែរការអនុវត្តច្បាប់តាមទំនើងចិត្ត ខណៈអ្នកដែលរងផលប៉ះពាល់ពិតប្រាកដគឺប្រជាពលរដ្ឋទូទៅ និងការអាប់ឱនកិត្តិយសជាតិលើឆាកអន្តរជាតិ។
លោក ស៊ឹង សែនករុណា៖ «អំពើពុករលួយនៅក្នុងសង្គមកម្ពុជាហ្នឹង អត់អាចលាងជម្រះបានទេ អ៊ីចឹងហើយ បានទាល់តែមានការដូរប្រព័ន្ធនៃការគ្រប់គ្រង ឬក៏ដូរផ្លាស់នូវរបបគ្រប់គ្រង អាហ្នឹងបានធ្វើឱ្យប្រព័ន្ធហ្នឹងមានការកែលម្អបាន បើសិនជា នៅប្រព័ន្ធដឹកនាំតាមបែបសព្វថ្ងៃ យើងមិនអាចយកមកប្រៀបធៀបអីជាមួយ និងបណ្ដាប្រទេសលោកសេរីបានទេ ពីព្រោះគេច្បាប់គឺច្បាប់ មន្ត្រីគេគឺជាអ្នកដែលមានសមត្ថភាព និងគុណភាព ហើយអនុវត្តច្បាប់វិញគឺមានការទទួលខុសត្រូវខ្ពស់»។
អ្នកឃ្លាំមើល និងមន្ត្រីរដ្ឋាភិបាលក្រៅប្រទេសលើកឡើងថា គ្មានមន្ត្រីថ្នាក់ជាតិណាដែលបានប្រព្រឹត្ត ឬបង្កើតប្រព័ន្ធដឹកនាំបែបគ្រួសារបក្ខពួកនិយម និងអំពើពុករលួយលេចធ្លោជាងរដ្ឋាភិបាលនៃក្រុមគ្រួសារត្រកូល ហ៊ុន ឡើយ។ ពួកគាត់ថា ប្រព័ន្ធដឹកនាំបែបគ្រួសារបក្ខពួកនិយម និងអំពើពុករលួយ ក្រោមការដឹកនាំដោយរដ្ឋាភិបាលឪកូនគឺលោក ហ៊ុន សែន និងលោក ហ៊ុន ម៉ាណែតនេះ ក៏បានកែប្រែឱ្យកម្ពុជាក្លាយទៅជាជម្រកអំពើឧក្រិដ្ឋកម្ម មជ្ឈមណ្ឌលឆបោកអនឡាញរបស់ឧក្រិដ្ឋជន និងអំពើខុសច្បាប់នានា ដែលធ្វើឱ្យប្រជាជាតិខ្មែររងភាពអាម៉ាស់ធ្ងន់ធ្ងរនៅលើឆាកអន្តរជាតិ៕
