កម្មករកម្មការិនីរោងចក្រឈាន ស៊ីង ហ្សី ឈ័ន លេហ្សឺរ ប្រដាក់ (ខេមបូឌា) ឯ.ក បន្តការតវ៉ានៅមុខរោងចក្រជាថ្មី ដើម្បីជំរុញឲ្យភាគីក្រុមហ៊ុនអនុវត្តតាមលក្ខខណ្ឌឲ្យបានសមរម្យ និងទទួលយកសហជីពទាំង៣នាក់ចូលធ្វើការវិញ។ ភាគីក្រុមហ៊ុន បដិសេដការលើកឡើងទាំងអស់របស់កម្មករ និងសហជីព ហើយថា ក្រុមហ៊ុនព្រមអនុវត្តតាមនីតិវិធីវិធីច្បាប់។ មន្ត្រីសិទ្ធិការងារ និងកម្មករយល់ថា ក្រសួងការងារ និងបណ្តុះបណ្តាលវិជ្ជាជីវៈ មានតួនាទីសំខាន់ក្នុងការជំរុញឲ្យក្រុមហ៊ុនអនុវត្តតាមគោលការណ៍ច្បាប់។
នៅព្រឹកថ្ងៃទី៣១ កក្កដានេះ កម្មករ កម្មការិនីរោងចក្រ ឈាន ស៊ីង ហ្សី ឈ័ន លេហ្សឺរ ប្រដាក់ (ខេមបូឌា) ឯ.ក (Qian Xing Zhi Chuang Leisure Products (Cambodia) Co., Ltd.) បន្តការតវ៉ាជាលើកទី០៤ នៅមុខរោងចក្រ ដើម្បីដាក់សម្ពាធឲ្យខាងក្រុមហ៊ុនគោរពតាមលក្ខខណ្ឌការងារឲ្យបានត្រឹមត្រូវ និងទទួលយកតំណាងរបស់ខ្លួនឲ្យចូលធ្វើការវិញ។
សហជីពមូលដ្ឋាន និងជាកម្មកររោងចក្រឈាន ស៊ីង លោក ខុន សុខចាន់ ថ្លែងថា កម្មកររោងចក្រមិនទាន់ទទួលបានដំណោះស្រាយជាក់លាក់ណាមួយពីភាគីក្រុមហ៊ុន និងក្រសួងការងារនៅឡើយហើយពួកគាត់នឹងបន្តការតវ៉ានេះរហូតបានដំណោះស្រាយ។ លោកថា កម្មករនៅតែបន្តការទាមទារឲ្យភាគីក្រុមហ៊ុនបញ្ឍប់រដ្ឋបាលក្រុមហ៊ុន ដើម្បីឲ្យពួកគាត់ធ្វើការបានដោយមិនមានភាពភ័យខ្លាច និងសម្ពាធផ្លូវចិត្តជាដើម។ លោកថា ក្រុមហ៊ុនបានយកប្រាក់ថ្លៃធ្វើកាតសម្គាល់ខ្លួនក្នុងករណីបាត់កាតសម្គាល់ពីកម្មករចំនួន ៥០០០រៀល ដែលលោកយល់ថា មិនសមហេតុផល និងខុសពីក្រុមហ៊ុនដទៃដែលមិនបានយកប្រាក់ពីកម្មករឡើយ។
លោក ខុន សុខចាន់ អះអាងថា ក្រុមហ៊ុនមិនពេញចិត្តដែលលោកបានឈរឈ្មោះជាសហជីពតំណាងឲ្យកម្មករដែលជាហេតុធ្វើឲ្យរោងចក្រមិនសប្បាយចិត្ត និងរើសអើងពួកគាត់។
លោក ខុន សុខចាន់៖ «ខ្ញុំគ្រាន់ថា សំណូមពរទៅដល់រោងចក្រកន្លែងខ្ញុំធ្វើនេះឲ្យលុបបំបាត់ទៅលើការធ្វើកាត់បង់ប្រាក់ហើយនឹងលុយថ្លៃធ្វើដំណើរសម្តេចឲ្យបណ្ដោះអាសន្នហ្នឹងចំនួន២.៥ដុល្លារ ហើយសុំកុំឲ្យប្រើពាក្យអសុរសទៅលើកម្មករឬក៏ថ្នាក់ក្រោមដែលគាត់ជាថ្នាក់ក្រោមហ្នឹងកុំប្រើពាក្យសម្ដីអសុរសទៅលើ ការជេរប្រមាថអីផ្សេងៗទៀត»។
ទោះជាយ៉ាងណាការតវ៉ានេះ កើតឡើងក្រោយពួកគាត់បានទទួលដំណឹងថា ភាគីក្រុមហ៊ុន បានទៅជួបជាមួយក្រសួងការងារនិងបណ្តុះបណ្តាលវិជ្ជាជីវៈ នៅព្រឹកថ្ងៃទី៣១កក្កដានេះ គឺក្រោយការដាក់ញត្តិរបស់ក្រុមកម្មករ១ថ្ងៃ។
ប្រធានរដ្ឋបាលក្រុមហ៊ុន រោងចក្រ ឈាន ស៊ីង ហ្សី ឈ័ន លេហ្សឺរ លោក ខៀវ ដា ប្រាប់ទូរទស្សន៍អាស៊ីសេរីខណៈពេលលោកកំពុងនៅក្នុងក្រសួងការងារថា ក្រុមហ៊ុនបានអនុវត្តតាមគោលការណ៍ និងបានបើកប្រាក់អត្ថប្រយោជន៍ផ្សេងៗជូនកម្មករស្របតាមច្បាប់ទាំងអស់ ប៉ុន្តែកម្មករនៅតែមិនសុខចិត្ត និងបន្តការតវ៉ាដដែល។ លោកបញ្ជាក់ទៀតថា ភាគីក្រុមហ៊ុន បានព្យាយាមរកដំណោះស្រាយជាមួយកម្មករជាច្រើនលើកច្រើនសា ប៉ុន្តែភាគីកម្មករមិនព្រមចូលតុចរចាឡើយ។ លោកថា ក្រុមហ៊ុន មិនបានគំរាមកំហែង និងឃ្លាំមើលកម្មករ ដូចការអះអាងរបស់ក្រុមកម្មករឡើយ។
លោក ខៀវ ដា អះអាងថា ក្រុមហ៊ុនព្រមចូលតុចរចាជាមួយភាគីកម្មករ និងអនុវត្តតាមនីតិវិធីច្បាប់ ប៉ុន្តែមិនទទួលយកសហជីពទាំង៣ចូលធ្វើការវិញឡើយ ដោយសារអ្នកទាំង៣ បានបង្កឲ្យកកស្ទះសង្វាក់ផលិតកម្មរបស់ក្រុមហ៊ុន ការនាំចេញខកខាន ធ្វើឲ្យប៉ះពាល់ដល់អត្ថប្រយោជន៍របស់កម្មករដទៃ។
លោក ខៀវ ដា៖ «ខ្ញុំអឺនឹងទៅបកស្រាយ ពីព្រោះគាត់មួលបង្កាច់បង្ខូចក្រុមហ៊ុន ហើយនឹងមួលបង្កាច់បុគ្គលទៀត ហើយមួយទៀតធ្វើឲ្យខូចប្រយោជន៍របស់ក្រុមហ៊ុននិងប្អូនដទៃទៀត។ សហជីពពួកខ្ញុំអត់មានបានរើសអើងទេ តែពួកខ្ញុំនិយាយហើយថា ជារឿងបុគ្គលៗផ្ទាល់របស់៣នាក់ហ្នឹងហ្មង។ តាមគោលជំហររបស់ថៅកែខ្ញុំគឺអត់អាចយកពួកគាត់បានទេ ព្រោះគាត់ធ្វើឲ្យកកស្ទះដល់សង្វាក់ផលិតកម្មដល់ការផលិតរបស់ក្រុមហ៊ុនយើង ហើយនឹងមួយទៀតអត់អាចបញ្ចេញទំនិញទាន់ពេលឲ្យភ្ញៀវអាហ្នឹងប៉ះពាល់ធំបំផុត។ ខាងពួកខ្ញុំបានសហការជាមួយពេទ្យជាដៃគូឈ្មោះ ហេង សុភ័ក្ត្រា ដែលមានចំងាយឃ្លាតពីរោងចក្រ២គីឡូ ពេទ្យដៃគូរប.ស.ស របស់យើង ពេទ្យឥណ្ឌាដៃគូរបស់ក្រសួងហ្នឹងហើយ»។
កម្មករ និងសហជីពយល់ថា ការលើកឡើងរបស់ភាគីក្រុមហ៊ុន ប្រាសចាកពីការពិត និងមានបំណងគេចវេសមិនទទួលខុសត្រូវចំពោះកម្មករ។ ពួកគាត់អះអាងថា ពួកគាត់មិនទាន់បានជួបពិភាក្សាអំពីលក្ខខណ្ឌការងារណាមួយជាក់លាក់ជាលាយលក្ខអក្សរ ឬការយល់ព្រមណាមួយពីភាគីទាំងសងខាង និងដឹងលឺពីអាជ្ញាធរឬក្រសួងការងារនៅឡើយ។ ពួកគាត់ខកចិត្ត ចំពោះការគេចវេះរបស់ក្រុមហ៊ុនឈាន ស៊ីង។ កម្មករលើកឡើងដូចគ្នាថា ពួកគាត់រងការគំរាមកំហែងដោយបញ្ឈប់ពីការងារចំពោះកម្មករទាំងអស់ដែលបានចេញមកតវ៉ា ប៉ុន្តែក្រុមហ៊ុន បែរជាបដិសេធចំពោះសម្ដីខ្លួនទៅវិញ។
កាលពីថ្ងៃទី៣០ កក្កដា ម្សិលមិញ កម្មកររោងចក្រឈាន ស៊ីង ហ្សី ឈ័ន លេហ្សឺរ ស្ថិតនៅឃុំមហាសាំង ស្រុកភ្នំស្រួច ខេត្តកំពង់ស្ពឺ បានឡើងមកដាក់ញត្តិនៅក្រសួងការងារ និងបណ្តុះបណ្តាលវីជ្ជាជីវៈរាជធានីភ្នំពេញ ដើម្បីទាមទារឲ្យក្រសួងជំរុញក្រុមហ៊ុននេះគោរពលក្ខខណ្ឌការងារ និងទាមទារអត្ថប្រយោជន៍៨ចំណុចផ្សេងទៀត ដែលពួកគេយល់ថា ក្រុមហ៊ុនអនុវត្តផ្ទុយពីគោលការណ៍រដ្ឋាភិបាល។ ពួកគាត់ទាមទារឲ្យក្រុមហ៊ុនត្រូវទទួលយកថ្នាក់ដឹកនាំសហជីព៣រូបចូលធ្វើការវិញ ស្នើសុំឲ្យបញ្ឈប់រដ្ឋបាលចេញពីការងារ ដោយសារការប្រើពាក្យសម្ដី កាយវិការមិនសមរម្យលើកម្មករ ក្រុមហ៊ុនត្រូវរៀបចំឲ្យមានពេទ្យប្រចាំការក្នុងរោងចក្រ ត្រូវអនុវត្តគោលការណ៍រដ្ឋាភិបាលលើសោហ៊ុយធ្វើដំណើរចំនួន ២.៥ដុល្លារ ជាដើម។
អគ្គលេខាធិការសហព័ន្ធសហជីពអំណាចយុវជនកម្ពុជាលោក រឹម ថារិទ្ធ យល់ថា ការលើកឡើងរបស់ក្រុមហ៊ុនបែបនេះ គ្រាន់ជាការលើកឡើងតែម្ខាងដោយគ្មានកំណត់ហេតុ គ្មានការឯកភាពគ្នាត្រឹមត្រូវ និងការយល់ស្របពីភាគីកម្មករឡើយ។ លោកថា ភាគីកម្មករបានដាក់លិខិតស្នើសុំ និងទាមទារទៅភាគីក្រុមហ៊ុន ប៉ុន្តែក្រុមហ៊ុនបានបដិសេធចំពោះលក្ខខណ្ឌទាំងនោះ និងមិនបានផ្តល់អត្ថប្រយោជន៍ ដូចជាថ្លៃសោហ៊ុយធ្វើដំណើរចំនួន ២.៥ដុល្លារ បញ្ឈប់ការយកប្រាក់ថ្លៃកាត់ដែលមិនសមហេតុផល និងមានពេទ្យត្រឹមត្រូវនៅក្នុងរោងចក្រនៅឡើយ។
លោក រឹម ថារិទ្ធ៖ «ចំពោះរោងចក្រយើងគួរតែរកផ្លូវពិភាក្សាមួយដោយស្មើមុខគ្នា ដោយភាពស្មោះត្រង់ ដោយយកគោលការណ៍ច្បាប់ជាគោលសម្រាប់ការចរចា ហើយបើឃើញថា ចំណុចណាដែលយើងអាចបន្ធូរបន្ថយគ្នាបាន ចំណុចណាដែលយើងអាចយោគយល់អធ្យាស្រ័យគ្នាបាន យើងអាចធ្វើកិច្ចព្រមព្រៀងបញ្ចប់សំណុំរឿងហើយពួកគាត់នឹងអាចចូលធ្វើការវិញ ព្រោះកម្មករបច្ចុប្បន្នគាត់ធ្វើការគាត់ចង់បានប្រាក់ខែប្រចាំខែដើម្បីធ្វើការដោះស្រាយជីវភាពទេ គាត់អត់ចង់ទៅធ្វើការងារអី កូដកម្ម២ ៣ថ្ងៃដាច់អត្ថប្រយោជន៍របស់គាត់ទេ ប៉ុន្តែដោយសាររោងចក្រមានបញ្ហាគាបសង្កត់សិទ្ធិសេរីភាព ការជេរប្រមាថកន្លែងការងារៗគ្មានពេទ្យគ្មានអីហ្នឹងធ្វើឲ្យគាត់ទ្រាំមិនបានទៅណា៎!»។
កាលពីខែមេសា ២០២៦ ក្រសួងការងារ បានប្រកាសផ្តល់ប្រាក់សោហ៊ុយធ្វើដំណើរបណ្ដោះអាសន្នបន្ថែម ២.៥ ដុល្លារ ក្នុងមួយខែ ជូនដល់ជូនកម្មករ និយោជិត ដើម្បីជួយបន្ថយបន្ទុកចំណាយលើការធ្វើដំណើរក្នុងគ្រាវិបត្តិប្រេងឡើងថ្លៃ។ ប៉ុន្តែកម្មកររោងចក្រឈាន ស៊ីងថា ពួកគេមិនដែលទទួលបានម្តងឡើយចាប់តាំងពីការប្រកាសនោះមក។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងការងារ លោក ស៊ុន មេសា ដើម្បីសួរនាំពីករណីនេះបានឡើយ នៅថ្ងៃទី៣១ កក្កដានេះ ដោយទូរស័ព្ទចូល ប៉ុន្តែចុចបិទ។
ប្រធានគ្រប់គ្រងកម្មវិធីការងារនៃអង្គការសង់ត្រាល់ (CENTRAL) លោក ឃុន ថារ៉ូ មានប្រសាសន៍ថា ករណីនេះគឺស្ថិតនៅក្នុងការចរចានៅឡើយ ហើយភាគីទាំងសងខាងនៅតែប្រកាន់ជំហររៀងខ្លួន។ លោកបន្តថា ការធ្វើអធិការកិច្ចការផ្សះផ្សាររបស់ក្រសួងការងារ ទៅលើភាគីទាំងសងខាង គឺជារឿងសំខាន់ ដើម្បីបញ្ឈប់វិវាទនេះ។ លោកបន្តថា ក្រសួងការងារ គួរពន្លឿនការដោះស្រាយនេះ និងធ្វើការស៊ើបអង្កេតឲ្យបានត្រឹមត្រូវ ប្រសិនបើមានករណីគំរាមកំហែង ឬការបង្ខំឲ្យធ្វើការហួសកំរិតដូចការអះអាងរបស់កម្មករពិតមែន ដើម្បីបញ្ចៀសការភាន់ច្រលំ និងអូសបន្លាយយូរដែលនាំឲ្យប៉ះពាល់ដល់ភាគីទាំងសងខាង។
លោក ឃុន ថារ៉ូ៖«រឿងដែលសំខាន់គឺក្រសួងហ្នឹងហើយដែលគាត់ត្រូវតែអនុវត្តច្បាប់ បើរកឃើញថា ថៅកែហ្នឹងប្រើនូវកម្លាំងពលកម្មដោយបង្ខំ មានការគំរាមកំហែង និងការដាក់សម្ពាធ មានការអីហ្នឹងអាហ្នឹងវាត្រូវប្រើប្រាស់នូវយន្តការច្បាប់ស្ដីពីការងារ ដើម្បីពិន័យក្រុមហ៊ុន ហើយដើម្បីបង្ខំក្រុមហ៊ុនហ្នឹងត្រូវតែធានាឲ្យមាននូវការអនុវត្តច្បាប់ណា៎។ បើសិនជាយើងបន្តឲ្យក្រុមហ៊ុននៅតែបន្តអនុវត្តនូវទំរង់បែបហ្នឹងទៀតអាហ្នឹងមានន័យថា អាហ្នឹងវាជាទំរង់នៃការប្រើប្រាស់នូវកម្លាំងពលកម្មដោយបង្ខំ។ ហើយយើងដឹងហើយថា អាទំរង់ប្រើប្រាស់ពលកម្មដោយបង្ខំហ្នឹងវាជាផ្នែកមួយនៃការតាមដានត្រួតពិនិត្យរបស់សហរដ្ឋអាមេរិក។ ចឹងអាហ្នឹងដែលខ្ញុំគិតថា ចង់មិនចង់ក្រសួងគួរតែយកចិត្តទុកដាក់ពីព្រោះថា ក្រុមហ៊ុននេះក៏វាមានការផលិតនៃការនាំចេញទៅទីផ្សារសហរដ្ឋអាមេរិកដែរណា៎!»។
កម្មកររោងចក្រឈាន ស៊ីង ហ្សី ឈ័ន បានកូដកម្មនៅមុខរោងចក្រមិនព្រមចូលធ្វើការចំនួន៤ថ្ងៃមកហើយ គឺនៅថ្ងៃទី២៨ ដល់ថ្ងៃទី៣១ កក្កដា នេះ ដើម្បីទាមទារឲ្យក្រុមហ៊ុន ទទួលយកសហជីពទាំង៣ចូលធ្វើការវិញ។ ចំណែកភាគីក្រុមហ៊ុននៅតែប្រកាន់ជំហរដដែល ដោយមិនទទួលយកថ្នាក់ដឹកនាំសហជីពទាំងនោះចូលធ្វើការងារវិញដាច់ខាត។ ចំណែកអ្នកឃ្លាំមើលទទូចឲ្យភាគីទាំងពីរចូលតុចរចា ដើម្បីលើកយកបញ្ហាដោះស្រាយរួមគ្នា៕
