ពលរដ្ឋរស់នៅក្រុងបាវិត ចោទអាជ្ញាធរខេត្តស្វាយរៀងថា ឃុបឃិតគ្នាលក់ដីព្រៃសហគមន៍ជាង៤ពាន់ហិកតារ ឲ្យទៅក្រុមឈ្មួញឯកជនធ្វើជាកម្មសិទ្ធិ។ ពលរដ្ឋថា ទីតាំងដីព្រៃសហគមន៍ដែលអាជ្ញាធរលក់នោះ ក្រុមឈ្មួញនឹងសាងសង់អគារ ឬខុនដូសម្រាប់ជួលឲ្យជនបរទេសស្នាក់នៅ។
ពលរដ្ឋរស់នៅភូមិត្រពាំងថ្លុង សង្កាត់បាទី ក្រុងបាវិត ខេត្តស្វាយរៀង អះអាងថា អាជ្ញាធរខេត្តស្វាយរៀង បានឃុបឃិតគ្នាលក់ដីព្រៃសហគមន៍សង្កាត់បាទី ជាង៤ពាន់ហិកតារ ឲ្យទៅក្រុមឈ្មួញឯកជនធ្វើជាកម្មសិទ្ធិ ដោយក្នុងមួយហិកតារ អាជ្ញាធរលក់ក្នុងតម្លៃ១០ម៉ឺនដុល្លារ។ លើសពីនោះ អាជ្ញាធរមូលដ្ឋានត្រូវបានគេផ្ដល់ដីព្រៃសហគមន៍ឲ្យចំនួន២ហិកតារ ដើម្បីជាថ្នូរបិទមាត់ និងឲ្យដើរគំរាមពលរដ្ឋមិនឲ្យផ្សព្វផ្សាយ និងចេញតវ៉ាបញ្ហានេះ។
តំណាងពលរដ្ឋនៅក្រុងបាវិត សុំមិនបញ្ចេញឈ្មោះ ដោយបារម្ភពីសុវត្ថិភាព អះអាងប្រាប់ទូរទស្សន៍អាស៊ីសេរី នៅថ្ងៃទី២៨ ខែមេសាថា អាជ្ញាធរក្រុងបាវិត និងអាជ្ញាធរខេត្តស្វាយរៀង បានឃុបឃិតគ្នាជាប្រព័ន្ធ ពុះជ្រៀកដីព្រៃសហគមន៍សង្កាត់បាទី លក់ឲ្យទៅក្រុមឈ្មួញឯកជន និងចែកទៅឲ្យអ្នកមានតួនាទី និងបុណ្យស័ក្តិ ចាប់តាំងពីថ្នាក់មូលដ្ឋានរហូតដល់ថ្នាក់ខេត្ត។ លើសពីនោះ អាជ្ញាធរមូលដ្ឋានបានគំរាមកំហែងពលរដ្ឋ មិនឲ្យធ្វើដឹងធ្វើឮអំពីបញ្ហាលក់ដីព្រៃសហគមន៍នេះនោះទេ ហើយប្រសិនបើពលរដ្ឋណា ហ៊ានចេញតវ៉ា ឬផ្សព្វផ្សាយ អាជ្ញាធរគំរាមនឹងចាប់ដាក់ពន្ធនាគារ។
តំណាងពលរដ្ឋនៅក្រុងបាវិត សុំមិនបញ្ចេញឈ្មោះ៖ «គេថាដោះដូរសាលាក្រុងមកកន្លែងថ្មី តែធាតុពិតសាលាក្រុងនៅកន្លែងដដែល គ្រាន់តែដូរអធិការដ្ឋានក្រុងមកតែមួយទេ ហើយឥឡូវជាដីប្រភេទជន គេឈូសឆាយដីព្រៃអស់ជាង៦០ភាគរយហើយ អ្វីដែលពួកខ្ញុំនៅក្នុងសហគមន៍ចង់បានគឺចង់ឲ្យព្រៃនេះនៅឋិតថេរ ដើម្បីកាត់បន្ថយគ្រោះរាំងស្ងួត បើដោះដូរសាលាក្រុងយកទៅធ្វើកន្លែងនោះត្រឹម ៣ ទៅ ៤ហិកតារ វាមិនច្រើនទេ ប៉ុណ្ណឹង វានៅសល់ព្រៃច្រើនដែរ» ។
លោកអះអាងទៀតថា មុនដំបូងអាជ្ញាធរបានយកលេសថា នឹងយកដីព្រៃសហគមន៍សង្កាត់បាទី ធ្វើជាទីតាំងសាលាក្រុងថ្មី ប៉ុន្តែក្រោយមកអាជ្ញាធរប្រាប់ពលរដ្ឋថា នឹងសាងសង់អគារខុនដូ និងអគាររោងចក្រសម្រាប់ជួលឲ្យជនបរទេសវិញ។ លោកថា ពលរដ្ឋនៅតំបន់នោះ មិនហ៊ានផ្សព្វផ្សាយ និងតវ៉ានោះទេ ដោយម្នាក់ៗបារម្ភពីសុវត្ថិភាព ខ្លាចជាប់ពន្ធនាគារ គ្មានអ្នករកស៊ីចិញ្ចឹមគ្រួសារ។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងអភិបាលខេត្តស្វាយរៀង លោក ប៉េង ពោធិ៍សា ដើម្បីសុំការបកស្រាយបានទេ នៅថ្ងៃទី២៨ ខែមេសា។ ចំណែកចៅសង្កាត់បាទី លោក ឯក សារាត បានចុចបិទទូរស័ព្ទពេលឮថា អ្នកយកព័ត៌មានទូរទស្សន៍អាស៊ីសេរីចង់សាកសួរ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា អាជ្ញាធរត្រូវតែបកស្រាយឲ្យបានច្បាស់លាស់ ប្រសិនបើមានការលក់ដីព្រៃ ឬដោះដូរ ដើម្បីកុំឲ្យពលរដ្ឋមានមន្ទិលសង្ស័យ។ លើសពីនោះ លោកថា អាជ្ញាធរមិនត្រូវគំរាមកំហែងពលរដ្ឋ ដែលបញ្ចេញមតិ ឬឈឺឆ្អាលពីបញ្ហាសហគមន៍របស់ពួកគាត់នោះឡើយ។
លោក យិន ម៉េងលី៖ «ដូច្នេះការនិយាយ ការតវ៉ាអំពីបញ្ហានេះ អត់ខុសច្បាប់ទេ អ្វីដែលខុសច្បាប់គឺអ្នកដែលទៅគំរាមកំហែងប្រជាពលរដ្ឋវិញទេ មិនឲ្យគាត់និយាយមិនឲ្យគាត់ធ្វើការតវ៉ា ពីការលក់ការដោះដូរទ្រព្យសម្បត្តិសាធារណៈនេះវាត្រូវធ្វើឡើងឲ្យវាមានតម្លាភាព»។
ដីព្រៃសហគមន៍សង្កាត់បាទី មានទំហំជាង៤ពាន់ហិកតារ ដែលមានប្រជាពលរដ្ឋរាប់សិបគ្រួសារធ្លាប់អាស្រ័យផលតាំងពីសម័យបារាំងមក ដូចជា រកត្រី ដកផ្សិត និងរកបន្លែផ្សេងៗទៀត។ ព្រៃសហគមន៍មួយនេះ មានឈើ ដូចជា ដើមគគីរ ដើមឈើទាល់ និងស្មាច់ជាដើម។
ពលរដ្ឋមិនទាន់បង្ហាញឈ្មោះក្រុមអាជ្ញាធរដែលលក់ដីព្រៃសហគមន៍សង្កាត់បាទីនោះទេ ប៉ុន្តែពលរដ្ឋថា អ្នកដែលទទួលបានផលប្រយោជន៍ពីការលក់ដីព្រៃនេះ មានចាប់ពីអាជ្ញាធរមូលដ្ឋាន រហូតដល់អាជ្ញាធរថ្នាក់ខេត្ត រួមទាំងតំណាងរាស្ត្រប្រចាំមណ្ឌលខេត្តស្វាយរៀង មកពីគណបក្សប្រជាជនកម្ពុជាផងដែរ៕
