អាជ្ញាធរថៃបានចាប់ខ្លួនពលករខ្មែរ ជាបន្តបន្ទាប់នៅតាមព្រំដែនខេត្តចន្ទបុរី ស្រះកែវ និងខេត្តត្រាត បន្ទាប់ពីពួកគេបានឆ្លងដែនចូលក្នុងប្រទេសថៃ ដើម្បីរកការងារធ្វើ ក្រោយបុណ្យចូលឆ្នាំ។ បើតាមការអះអាងរបស់អាជ្ញាធរថៃ ពលរដ្ឋខ្មែរទាំងនោះ ភាគច្រើនជាអតីតពលករធ្លាប់ធ្វើការនៅប្រទេសថៃជាច្រើនឆ្នាំ និងបានត្រឡប់ទៅកម្ពុជាមុនបុណ្យចូលឆ្នាំ ក៏ប៉ុន្តែដោយសារនៅក្នុងស្រុកគ្មានការងារធ្វើ ពួកគេបានផ្សងគ្រោះថ្នាក់ លួចឆ្លងដែនមករកការងារធ្វើនៅក្នុងប្រទេសថៃវិញ។
ទោះបីជារដ្ឋាភិបាលបានប្រកាសធានាពីការត្រៀមកន្លែងការងារក្នុងស្រុកសម្រាប់ពលករខ្មែរ ដែលត្រឡប់ពីប្រទេសថៃក្ដី ក៏ពលករខ្មែរមួយចំនួន នៅតែត្រឡប់ទៅរកការងារធ្វើនៅក្នុងប្រទេសថៃវិញទាំងប្រថុយប្រថាន ក្រោយបុណ្យចូលឆ្នាំ។
កាលពីថ្ងៃទី២០ ខែមេសា ទាហានឈុតខ្មៅថៃ នៅស្រុកអារញ្ញ (Aranyaprathet) ខេត្តស្រះកែវ (SaKeo) បានចាប់ខ្លួនពលករខ្មែរចំនួន ១៦នាក់ ក្នុងនោះមានស្ត្រីចំនួន ៧នាក់ ខណៈពួកគេបានលួចឆ្លងដែនខុសច្បាប់ចូលក្នុងប្រទេសថៃ។ អាជ្ញាធរថៃបានអះអាងថា តាមរយៈការសាកសួរពលករខ្មែរបានសារភាពថា ពួកគេបានលួចឆ្លងដែនចូលប្រទេសថៃ ដើម្បីទៅធ្វើការនៅកន្លែងការងារចាស់ ដោយបង់ថ្លៃឱ្យមេខ្យល់ជាអ្នកនាំផ្លូវ ក្នុងម្នាក់ជាង ២០០ដុល្លារ។ ក្រោយការសាកសួរ អាជ្ញាធរថៃបានបញ្ជូនពលករខ្មែរទាំង ១៦នាក់យកទៅឃុំខ្លួន ដើម្បីបន្តនីតិវិធី។
ចំណែកនៅខេត្តចន្ទបុរី (Chanthaburi) វិញ កងទ័ពជើងទឹកថៃ បានចាប់ខ្លួនពលករខ្មែរប្រុសស្រីចំនួន ១៤នាក់ បន្ទាប់ពីពួកគេបានឆ្លងដែនខុសច្បាប់ចូលក្នុងប្រទេសថៃ ដោយដើរថ្មើរជើងកាត់តាមចម្ការមួយកន្លែង។ ក្រោយបញ្ចប់ការសាកសួរ អាជ្ញាធរថៃបានបញ្ជូនខ្លួនពលករខ្មែរទាំង ១៤នាក់ទៅកាន់តុលាការ ដើម្បីបន្តនីតិវិធី។
ដោយឡែកនៅខេត្តត្រាត (Trat) កងទ័ពជើងទឹកថៃ បានអះអាងពីការចាប់ខ្លួនពលករខ្មែរដែលឆ្លងដែនចូលក្នុងប្រទេសថៃដោយខុសច្បាប់ជាច្រើននាក់ នៅទីតាំងជាច្រើនកន្លែងផ្សេងៗគ្នា ក្រោយបុណ្យចូលឆ្នាំ។ ទោះជាយ៉ាងណា ភាគីថៃមិនបានបញ្ជាក់ពីចំនួនសរុបរបស់ពលករខ្មែរ ដែលត្រូវចាប់ខ្លួននោះឡើយ។
បើតាមការអះអាងរបស់ក្រុមអ្នករត់តាក់ស៊ីដឹកពលករនៅប្រទេសថៃ បានប្រាប់ទូរទស្សន៍អាស៊ីសេរី ដូចៗគ្នាថា ក្រោយចប់ពិធីបុណ្យចូលឆ្នាំ មានពលករខ្មែរជាច្រើននាក់ បានទំនាក់ទំនងជួលរថយន្តដើម្បីធ្វើដំណើរទៅប្រទេសថៃវិញ ប៉ុន្តែគ្មានម្ចាស់រថយន្តណាម្នាក់ ទទួលដឹកជញ្ជូននោះឡើយ ដោយសារយោធាថៃបានបិទច្រកព្រំដែនជាអចិន្ត្រៃយ៍ទៅហើយ។
ក្រុមអ្នករត់តាក់ស៊ី បានអះអាងទៀតថា ពលករខ្មែរបានសម្រុកធ្វើដំណើរត្រឡប់មកកម្ពុជាវិញ នៅមុនបុណ្យចូលឆ្នាំ ដោយពួកគេបានជួលរថយន្តជិះពីកន្លែងស្នាក់នៅ ទៅកាន់តំបន់ព្រំដែន។ ក្រុមអ្នករត់តាក់ស៊ីបញ្ជាក់ថា ចំពោះពលករដែលមានឯកសារស្របច្បាប់ ពួកគេបានធ្វើដំណើរចេញតាមច្រកព្រំដែនអន្តរជាតិ ខណៈពលករខុសច្បាប់ ពួកគេបានចេញតាមច្រកធម្មតា ដោយដើរកាត់វាលកាត់ព្រៃ ដើម្បីឆ្លងដែនមកកម្ពុជា មុននឹងជួលរថយន្តជិះបន្តទៅស្រុកកំណើត។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងការងារ លោក ស៊ុន មេសា ដើម្បីសុំការបកស្រាយជុំវិញរឿងនេះបានទេ នៅថ្ងៃទី២១ ខែមេសា។
ក្រសួងការងារថៃ បានប្រកាសកាលពីថ្ងៃទី៩ ខែមីនា ថា ប្រទេសថៃគ្មានគោលការណ៍ទទួលយកពលករខ្មែរថ្មីនោះទេ ប៉ុន្តែថៃបានរៀបចំគ្រប់គ្រងពលករខ្មែរដែលមានស្រាប់ ក្នុងលក្ខខណ្ឌដែលឯកសារការងាររបស់ពួកគេនៅមានសុពលភាព និងមានលិខិតធានាពីថៅកែ។
ចំណែកក្រសួងការងារកម្ពុជា បានប្រកាសថា ពលករខ្មែរដែលមានប័ណ្ណការងារអស់សុពលភាពក្នុងប្រទេសថៃ កាលពីចុងខែមីនា មានចំនួន ៨ម៉ឺននាក់ ។ ក្នុងនោះ ក្រសួងការងារបានលើកឡើងពីគម្រោងជួយពលករខ្មែរ ដែលអស់សុពលភាពប័ណ្ណការងារ ឱ្យត្រលប់មកកម្ពុជាវិញ ដោយធានាផ្ដល់កន្លែងការងារសម្រាប់ពួកគេ ខណៈពលករខ្មែរដែលផុតសុពលភាពប័ណ្ណការងារហើយចង់ធ្វើការនៅក្នុងប្រទេសថៃបន្តទៀត ក្រសួងការងារនឹងត្រៀមសម្របសម្រួលជាមួយភាគីថៃ ឱ្យជួយបន្តសុពលភាពបន្ថែមទៀត។
ទោះជាបែបនេះក្ដី មន្ត្រីគម្រោងផ្នែកការពារសិទ្ធិពលករចំណាកស្រុកប្រចាំប្រទេសថៃ នៃអង្គការសង់ត្រាល់ លោក លឹង សុផុន អះអាងថា មានពលករខ្មែរយ៉ាងតិចជាង ១៤ម៉ឺននាក់ ដែលមានប័ណ្ណការងារត្រូវផុតកំណត់កាលពីថ្ងៃទី៣១ មីនា ឆ្នាំ២០២៦។ លោកបន្តថា ពលករខ្មែរជាច្រើននាក់ បានសម្រុកវិលត្រឡប់ទៅកម្ពុជាវិញ តាំងពីខែកុម្ភៈ និងខែមីនា ពោលគឺនៅមុនពេលដែលប័ណ្ណការងាររបស់ពួកគេ ត្រូវអស់សុពលភាព។ លោក លឹង សុផុន ស្នើឱ្យពលករខ្មែរ កុំឱ្យឆ្លងដែនខុសច្បាប់ចូលមកប្រទេសថៃ ដែលនាំឱ្យប្រឈមនឹងហានិភ័យខ្ពស់។
លោក លឹង សុផុន៖ «ហានិភ័យហ្នឹងទាក់ទងទៅនឹងការរស់នៅ។ ប្រសិនបើគាត់(ពលករ)មករកការងារក៏ពិបាកដែរ ដោយសាររដ្ឋាភិបាលថៃ គេមិនអនុញ្ញាតឱ្យពលករខ្មែរស្វែងរកការងារទេ ហើយគេមិនទាន់មានការបន្ធូរបន្ថយរឿងឯកសារ ឬក៏អត់ទាន់មានគោលនយោបាយ ដើម្បីបន្តវីសា ឬប័ណ្ណការងារឱ្យត្រឹមត្រូវតាមច្បាប់ហ្នឹង ក៏មិនទាន់មានដែរ»។
ពាក់ព័ន្ធនឹងករណីពលករខ្មែរឆ្លងដែនចូលប្រទេសថៃដោយខុសច្បាប់នេះដែរ កាលពីថ្ងៃទី១៨ ខែមេសា អាជ្ញាធរថៃបានបញ្ជូនពលករខ្មែរចំនួន ១០៦នាក់ ត្រឡប់មកកម្ពុជាវិញ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។ ពលរដ្ឋខ្មែរទាំងជាង ១០០នាក់ ដែលរួមមានស្ត្រី២៥នាក់ និងកុមារចំនួន១៧នោះ ត្រូវអាជ្ញាធរថៃចោទថា បានលួចឆ្លងដែន និងរស់នៅក្នុងប្រទេសថៃដោយខុសច្បាប់៕
