តុលាការកំពូលសម្រេចមិនដោះលែងសកម្មជនសង្គមលោក ធី ថន ឱ្យមានសេរីភាពឡើងវិញនោះទេ។ សង្គមស៊ីវិលខកចិត្ត និងចាត់ទុកការបន្តឃុំខ្លួនសកម្មជនសង្គមលោក ធី ថន ថានឹងធ្វើឲ្យរដ្ឋាភិបាលរងការរិះគន់ ពីមជ្ឈដ្ឋានជាតិ និងអន្តរជាតិកាន់តែខ្លាំង។
តុលាការកំពូលនៅថ្ងៃទី១១ ខែឧសភា បានបដិសេធ ដោះលែងសកម្មជន សង្គមលោក ធី ថន ដោយតម្កល់សាលដីការបស់សាលាឧទ្ធរណ៍ភ្នំពេញទុកជាបានការដដែល។
សាលាឧទ្ធរណ៍ភ្នំពេញ កាលពីដើមខែមីនា ឆ្នាំ២០២៦ បានបដិសេធសំណើ សុំដោះលែងរបស់លោក ធី ថន ដោយលើកហេតុផលថា ការដោះលែង លោកពីពន្ធនាគារអាចបង្កឬធ្វើឲ្យប៉ះពាល់ដល់ជនពាក់ព័ន្ធឬសាក្សី និងរក្សាទុកលោក ធី ថន សម្រាប់សវនាការតុលាការ ខណៈបញ្ហាសុខភាព របស់លោក ធី ថន វិញ តុលាការ អះអាងថា មិនមានលិខិតបញ្ជាក់ពីគ្រូពេទ្យត្រឹមត្រូវ។
លោក ធី ថន គឺជាប្រធានស្ដីទី នៃសមាគមសម្ពន្ធនិស្សិតបញ្ញវន្តខ្មែរ។ លោកត្រូវបានសមត្ថកិច្ចក្រុងភ្នំពេញចាប់ខ្លួន កាលពីខែសីហា ឆ្នាំ២០២៤ និងត្រូវបានចោទ ប្រកាន់ពីបទ«រួមគំនិតក្បត់»តាមមាត្រា៤៥៣ នៃក្រម ព្រហ្មទណ្ឌ ដែលអាចធ្វើឲ្យលោកជាប់ពន្ធនាគាររហូតដល់ ១០ឆ្នាំ ប្រសិនបើ តុលាការផ្ដន្ទាទោសលើរូបលោកនោះ។ លោក កើត សារ៉ាយ ដែលជាប្រធាននៃសមាគមនេះ ក៏កំពុងតែ អនុវត្តទោសក្នុងពន្ធនាគារ រយៈពេល ៤ឆ្នាំ បន្ទាប់ពីការចាប់ខ្លួនកាលពីខែមេសា ឆ្នាំ២០២៤ ពីបទ «ញុះញង់ឱ្យ ប្រព្រឹត្ត បទឧក្រិដ្ឋជាអាទិ៍»និងបទ «មិនរាងចាលក្នុងបទមជ្ឈិម បន្ទាប់ពីការ ផ្ដន្ទាទោសបទមជ្ឈិម»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់ទូរទស្សន៍អាស៊ីសេរីនៅថ្ងៃទី១១ ខែឧសភាថា លោក ធី ថន គឺជាអ្នកការពារសិទ្ធិមនុស្សដ៏សកម្ម ដែលតែងតែឈឺឆ្អាល និងជួយការពារ សិទ្ធិអ្នកដទៃ ការពារបរិស្ថាន ពលរដ្ឋ រងគ្រោះដីធ្លី ព្រមទាំងបញ្ហាសង្គម ជាដើម។ លោកសោកស្ដាយ ដែលតុលាការសម្រេចបន្តឃុំខ្លួនសកម្មជន សង្គមលោក ធី ថន ទៀត ដោយថា ការឃុំខ្លួននេះ មិនបានផ្ដល់ផលចំណេញនោះទេ ផ្ទុយទៅវិញ នឹងធ្វើឲ្យ រដ្ឋាភិបាលរងការរិះគន់បន្ថែមទៀត។
លោក អំ សំអាត៖ «យើងសោកស្ដាយ ដែលលោក ធី ថន បន្តនៅការឃុំខ្លួន នៅក្នុងពន្ធនាគារ ដែលធ្វើឲ្យប៉ះពាល់ទៅដល់ការសិក្សាបន្តរបស់គាត់ ក៏ដូចជា ជីវភាព ក្រុមគ្រួសាររបស់គាត់ ដែលពឹងពាក់លើកគាត់។ បើយើងមើលទៅអ្នកដែលធ្វើ ការការពារលើកកម្ពស់សិទ្ធិមនុស្ស និងបរិស្ថាន មិនមែនជាបទល្មើសនោះទេ វាគួរតែត្រូវមានការដោះលែងសម្រាប់ពួកគាត់»។
សកម្មជនលោក ធី ថន គឺជាអ្នកជាប់ឃុំម្នាក់ ក្នុងចំណោមអ្នកជាប់ ឃុំជាង ១០០នាក់ ដែលប្រើសិទ្ធិបញ្ចេញមតិ និងភាពសកម្មនិយមរបស់លោកនៅក្នុងសង្គម។
អ្នកឃ្លាំមើល ព្រមានថាវិធានការរបស់រដ្ឋាភិបាលគ្រួសារត្រកូលហ៊ុន ដែលបន្តធ្វើបាបសកម្មជនប្រឆាំង ឬសកម្មជនសង្គមគឺជាការបង្កើតវិបត្តិធ្វើឲ្យជាតិ បែកបាក់ធ្ងន់ធ្ងរ ហើយបន្សល់ទុកតែការឈឺចាប់ ពិបាកផ្សះផ្សាគ្នាក្នុងសង្គមនៅថ្ងៃអនាគត៕
