សង្គមស៊ីវិលក្នុងស្រុកជិត ៥០ ស្ថាប័ន ហៅការផ្តន្ទាទោសយុវជន ធី ថន ឱ្យជាប់ពន្ធនាគារ៧ឆ្នាំ ពីបទរួមគំនិតក្បត់ ជាទណ្ឌកម្មធ្ងន់ធ្ងរលើយុវជនសកម្មបញ្ហាសង្គម។ ពួកគេសម្តែងការសោកស្តាយជាខ្លាំងចំពោះការផ្តន្ទាទោសនេះ និងអំពាវនាវឱ្យតុលាការទម្លាក់ចោលបទចោទប្រកាន់ និងដោះលែងយុវជន ធី ថន ដោយគ្មានលក្ខខណ្ឌ។
នៅក្នុងសេចក្តីថ្លែងការណ៍រួម នៅថ្ងៃទី៧ កញ្ញា សង្គមស៊ីវិលជិត ៥០ រួមមានមជ្ឈមណ្ឌលសិទ្ធិមនុស្សកម្ពុជា អង្គការលីកាដូ សមាគមអាដហុក សហព័ន្ធសហជីព និងសហគមន៍ដីធ្លីជាដើម អះអាងថា យុវជន ធី ថន គឺជាសកម្មជនសង្គមមួយរូប ដែលបានចូលរួមក្នុងកិច្ចការងារសង្គម និងសកម្មភាពការពារបរិស្ថានជាច្រើន ដូចជាការស្នើសុំឱ្យដោះលែងថ្នាក់ដឹកនាំសហជីពលោក រ៉ុង ឈុន សកម្មជន យុវជនទាំង៥រូប នៃចលនាមាតាធម្មជាតិ ប្រធានសមាគមសម្ពន្ធនិស្សិតបញ្ញវន្តខ្មែរ (KSILA) លោក កើត សារ៉ាយ និងចូលរួមក្នុងយុទ្ធនាការរបស់ចលនាមាតាធម្មជាតិក្នុងការបញ្ឈប់ការកាប់បំផ្លាញព្រៃឈើ បញ្ឈប់ការលុបបឹងធម្មជាតិ បញ្ឈប់ការបូមខ្សាច់ យុទ្ធនាការស្នើសុំដាក់កោះកុងក្រៅជាឧទ្យានជាតិ ព្រមទាំងចូលរួមក្នុងការអប់រំ និងផ្សព្វផ្សាយអំពីសិទ្ធិពលរដ្ឋ និងលទ្ធិប្រជាធិបតេយ្យជាដើម។
ពួកគេចាត់ទុកការផ្តន្ទាទោសយុវជន ធី ថន នៅពេលនេះ គឺជាការដាក់ទោសដោយមិនត្រឹមត្រូវ និងអយុត្តិធម៌យ៉ាងខ្លាំង ទោះបីជានៅក្នុងអំឡុងពេលសវនាការសាធារណៈ តុលាការហាក់មិនមានភស្តុតាងគ្រប់គ្រាន់ក្នុងការដាក់បន្ទុកលើយុវជនរូបនេះ ពាក់ព័ន្ធនឹងបទចោទ រួមគំនិតក្បត់ ក៏ដោយ។ ពួកគេយល់ថា ការផ្តន្ទាទោសដាក់ពន្ធនាគារនេះ គឺមិនគួរធ្វើឡើងចំពោះពលរដ្ឋទាំងអស់ដែលអនុវត្តសិទ្ធិជាមូលដ្ឋាន ដែលត្រូវបានធានាដោយរដ្ឋធម្មនុញ្ញ និងច្បាប់អន្តរជាតិដែលប្រទេសកម្ពុជាទទួលស្គាល់ ក្នុងការបញ្ចេញនូវទស្សនៈ មតិ យោបល់ ចំពោះបញ្ហាដែលកើតមានឡើងនៅក្នុងសង្គមនោះឡើយ។
ពួកគេទាមទារឱ្យរដ្ឋាភិបាលគោរពសិទ្ធិរបស់ពលរដ្ឋ ហើយថាភាពសកម្មនិយមចំពោះកិច្ចការពារបរិស្ថាន និងសង្គមមិនមែនជាបទឧក្រិដ្ឋនោះទេ ប៉ុន្តែគឺជាការអនុវត្តសិទ្ធជាមូលដ្ឋាន។ ពួកគេថាគ្រប់សកម្មជនទាំងអស់មានសិទ្ធិបញ្ចេញមតិ យោបល់ ទស្សនៈ និងធ្វើសកម្មភាពជាប្រយោជន៍ដល់ប្រជាពលរដ្ឋ និងប្រទេសជាតិ។ ពួកគេអំពាវនាវដល់តុលាការឱ្យទម្លាក់ចោលបទចោទប្រកាន់ទាំងអស់ និងដោះលែងយុវជន ធី ថន និងសកម្មជនសិទ្ធិមនុស្ស បរិស្ថាន និងសង្គមដទៃទៀត ដោយឥតលក្ខខណ្ឌ បញ្ឈប់ការធ្វើទុក្ខបុកម្នេញ ហើយនិងធានាថា សកម្មជនសិទ្ធិមនុស្ស សកម្មជនបរិស្ថាន និងសង្គម សកម្មជនព្រៃឈើ និងប្រជាពលរដ្ឋ មានលំហសេរីភាពពេញលេញ ក្នុងការអនុវត្តសិទ្ធិជាមូលដ្ឋានរបស់ខ្លួន ក្នុងការបញ្ចេញមតិ ប្រមូលផ្តុំ និងជួបជុំ។
យុវជន ធី ថន អាយុ ២៥ ឆ្នាំ ដែលជាអនុប្រធាននៃសមាគមសម្ពន្ធនិស្សិតបញ្ញវន្តខ្មែរ (KSILA) ត្រូវបានអាជ្ញាធរចាប់ខ្លួន កាលពីខែសីហា ឆ្នាំ២០២៤ ពាក់ព័ន្ធព្រឹត្តិការណ៍នៃសកម្មភាពរិះគន់ និងតវ៉ាជាសាធារណៈ ជាពិសេសតាមបណ្ដាញសង្គម ជំទាស់នឹងកិច្ចព្រមព្រៀងសហប្រតិបត្តិការនៃតំបន់ត្រី កោណអភិវឌ្ឍន៍ កម្ពុជា ឡាវ និងវៀតណាម (CLV-DTA) ហើយដែលក្រោយមករដ្ឋាភិបាលកម្ពុជាសម្រេចដកខ្លួនចេញពីកិច្ចព្រមព្រៀងនេះ ដោយសារមានការតវ៉ាពីពលរដ្ឋ។ សង្គមស៊ីវិលឱ្យដឹងថា យុវជន ធី ថន ស្ថិតក្នុងចំណោមមនុស្សជាង ៦០នាក់ ដែលត្រូវបានតុលាការចោទប្រកាន់ និងឃុំខ្លួន ពាក់ព័ន្ធព្រឹត្តិការណ៍ជំទាស់នឹងកិច្ចព្រមព្រៀងមួយនេះ៕
