រដ្ឋាភិបាលចក្រភពអង់គ្លេស (UK) បានប្រកាសដាក់ទណ្ឌកម្មថ្មីមួយទៀតដោយបង្កកទ្រព្យលើក្រុមហ៊ុន លេជេន អ៊ិននូវេសិន (Legend Innovation) និងតំណាងក្រុមហ៊ុននេះឈ្មោះ អៀង សុខលីម រួមទាំងបណ្ដាញជាច្រើនទៀតរបស់ឧក្រិដ្ឋជន ចេន ហ្ស៊ី (Chen Zhi) ចូលក្នុងបញ្ជីខ្មៅដោយសារតែពាក់ព័ន្ធនឹងការបង្កើតមជ្ឈមណ្ឌលឆបោកតាមអនឡាញដ៏ធំនៅកម្ពុជា។ មេខ្លោងធំ និងជាម្ចាស់ក្រុមហ៊ុន លេជេន ត្រូវបានគេស្គាល់ថា គឺជាលោក ហ៊ុន តូ និងឧក្រិដ្ឋជន ចេន ហ្ស៊ី ដែលបានបង្កើតឧទ្យានមួយកន្លែងនៅខេត្តព្រៃវែង ដើម្បីសាងសង់អគារសម្រាប់បង្ខាំងមនុស្សសម្រាប់ប្រតិបត្តិការឆបោកតាមអនឡាញ។
រដ្ឋាភិបាលចក្រភពអង់គ្លេសហៅ ឧទ្យានលេខ ៨ (Park 8) ស្ថិតក្នុងខេត្តព្រៃវែងនៃប្រទេសកម្ពុជាដែលបង្កើតឡើងដោយក្រុមហ៊ុន លេជេន អ៊ិននូវេសិន (Legend Innovation) ថា ជាមជ្ឈមណ្ឌលបោកប្រាស់តាមអនឡាញដ៏អាក្រក់ និងបានបង្កើនចំណាត់ការរបស់ខ្លួនក្នុងការទណ្ឌកម្មប្រឆាំងលើក្រុមហ៊ុននេះ និងអ្នកដែលពាក់ព័ន្ធដែលកំពុងបើកដំណើរការមជ្ឈមណ្ឌលឆបោកតាមអនឡាញលើជនរងគ្រោះទូទាំងពិភពលោក។
បុគ្គល និងអង្គភាពដែលត្រូវបានអង់គ្លេសកំណត់គោលដៅដាក់ទណ្ឌកម្មរួមមាន ក្រុមហ៊ុន លេជេន និងតំណាងក្រុមហ៊ុននេះឈ្មោះ អៀង សុខលីម។ ទន្ទឹមគ្នានេះ ក៏មានក្រុមហ៊ុន ស៊ីនប៊ី (Xinbi) ដែលមានវេទិកាដូរលុយតាមអនឡាញ និងជួយលាងលុយកខ្វក់ឱ្យឧក្រិដ្ឋជន រួមទាំងបុគ្គលិកមួយចំនួនទៀតដែលមានទំនាក់ទំនងស្និទ្ធជាមួយឧក្រិដ្ឋជន ចេន ហ្ស៊ី។ ក្រៅពីនេះ អង់គ្លេសក៏បានដាក់ទណ្ឌកម្មលើជនជាតិចិន ២រូបផ្សេងទៀតដែលមានឈ្មោះថា ថេត លី (Thet Li) ជាអ្នកគ្រប់គ្រងបណ្ដាញហិរញ្ញវត្ថុអន្តរជាតិរបស់លោក ចេន ហ្ស៊ី និងឈ្មោះ ហ៊ូ ស៊ាវវៃ (Hu Xiaowei) ជាមនុស្សជំនិតរបស់លោក ចេន ហ្ស៊ី ដូចគ្នា។ អង់គ្លេសរកឃើញថា ក្រុមហ៊ុន លេជេន គឺជាក្រុមហ៊ុនដ៏ធំក្នុងនៅកម្ពុជាដែលបានបង្កើតមជ្ឈមណ្ឌលឆបោកតាមអនឡាញ ដែលមានបណ្ដាញ និងទំនាក់ទំនងយ៉ាងជិតស្និទ្ធជាមួយក្រុមហ៊ុន ព្រីនស៍ គ្រុប (Prince Group) របស់ឧក្រិដ្ឋជន ចេន ហ្ស៊ី។
សេចក្ដីប្រកាសដាក់ទណ្ឌកម្មរបស់រដ្ឋាភិបាលអង់គ្លេសកាលពីថ្ងៃទី២៦ ខែមីនា បញ្ជាក់ថា ការបង្កើនចំណាត់ការរបស់ខ្លួនដាក់ទណ្ឌកម្មបង្កកទ្រព្យសម្បត្តិក្រុមហ៊ុន និងបុគ្គលិកដែលពាក់ព័ន្ធបង្កើតមជ្ឈមណ្ឌលឆបោកតាមអនឡាញនៅកម្ពុជានេះគឺដើម្បីការពារដល់ជនជាតិអង់គ្លេស និងជនរងគ្រោះជុំវិញពិភពលោកពីការរងគ្រោះឆបោកតាមអនតាមអនឡាញ និងការក្លែងបន្លំតាមរយៈរូបិយប័ណ្ណគ្រីបតូ (Crypto)។ អង់គ្លេសសង្កត់ធ្ងន់ថា ចំណាត់ការទណ្ឌកម្មចុងក្រោយនេះ នឹងមានប្រសិទ្ធភាពភ្លាមៗក្នុងការទប់ស្កាត់ប្រព័ន្ធហិរញ្ញវត្ថុនៃក្រុមបណ្ដាញឆបោកដែលបានមកពីការកេងប្រវ័ញ្ចជនរងគ្រោះមិនមានឱ្យចរន្តបន្ថែមទៀត។
ប្រធានចលនាខ្មែរ ដើម្បីប្រជាធិបតេយ្យ (KMD) អ្នកស្រី មូរ សុខហួរ លើកឡើងថា មជ្ឈមណ្ឌលឆបោកតាមអនឡាញដែលអង់គ្លេស និងអាមេរិកបន្តលាតត្រដាងជាបន្តបន្ទាប់នៅកម្ពុជា គឺសុទ្ធតែមានការដឹកនាំដោយបណ្ដាញម៉ាហ្វីយ៉ាចិនដែលចូលរួមសហការ និងកាងការពារដោយសមាជិកគ្រួសារ និងរដ្ឋាភិបាលត្រកូល ហ៊ុន។
អ្នកស្រី មូរ សុខហួរ៖ «យើងត្រូវតែថ្លែងអំណរគុណដល់ចក្រភពអង់គ្លេសដែលបានធ្វើកិច្ចការដ៏មានសារសំខាន់ការពារសន្តិសុខតំបន់ និងទូទាំងសកលលោក ពីព្រោះការឆបោកអនឡាញនេះ ប៉ះពាល់ទៅដល់សន្តិសុខទូទាំងសកលលោក។ យើងសូមអំពាវនាវឱ្យសហគមន៍អន្តរជាតិថ្កោលទោសដាក់ទម្ងន់ឱ្យធ្ងន់ទៅលើរដ្ឋាភិបាលនៃប្រទេសកម្ពុជាដែលអនុញ្ញាតឱ្យប្រទេសកម្ពុជាក្លាយទៅជា (Scam-bodia) មានន័យថា ប្រទេសកម្ពុជាដែលក្លាយទៅជាប្រភពនៃបោកបញ្ឆោតអនឡាញ។ នេះធ្វើឱ្យប៉ះពាល់ដល់កិត្តិយសនៃប្រទេសកម្ពុជាដ៏ធ្ងន់ធ្ងរណាស់ ហើយប្រទេសកម្ពុជានឹងមានវិបត្តិធ្ងន់ធ្ងរនៅក្នុងការប្រមូលយកវិនិយោគទុនមកប្រទេសកម្ពុជា»។
ឧទ្យានលេជេន ឬឧទ្យានលេខ ៨ (Park 8) របស់ក្រុមហ៊ុន លេជេន អ៊ិននូវេសិន ស្ថិតនៅភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង។ ក្រុមហ៊ុននេះបានចាប់ផ្ដើមសាងសង់អាជីវកម្មលំនៅឋានឯកជន ផ្ទះល្វែងរាប់រយខ្នង ផ្សារទំនើប និងក្លឹបកម្សាន្តជាដើមចាប់តាំងពីឆ្នាំ២០២៣ ក្នុងទំហំផ្ទៃដីជិត ៣៤ហិកតារបន្ទាប់ពីសុំការអនុញ្ញាតសាងសង់ពីក្រសួងដែនដីដោយតំណាងក្រុមហ៊ុនឈ្មោះ អៀង សុខលីម។
បរិវេណនៃអគារជាច្រើនក្នុងក្រុមហ៊ុននេះក៏ត្រូវបានយាមកាមពីក្រុមឆ្មាំសន្តិសុខយាមកាមគ្រប់ច្រកល្ហកព័ទ្ធចម្រឹងដែកនៅតាមអគារនីមួយៗ និងហ៊ុមព័ទ្ធលួសបន្លានៅជុំវិញរបង។ ក្រៅពីនេះ ជាញឹកញយជនរងគ្រោះដែលរងការបង្ខាំងក្នុងអគារក៏ត្រូវបានរាយការណ៍ពីការវាយដុំធ្វើទារុណកម្ម និងមានករណីមនុស្សស្លាប់នៅក្នុងបរិវេណអគារត្រូវបានសង្ស័យពាក់ព័ន្ធនឹងអំពើឃាតកម្ម។ ជនរងគ្រោះជាច្រើនមកពីជុំវិញប្រទេសផ្សេងៗគ្នាដែលរងការបង្ខាំងក្នុងអគារក៏បាននាំគ្នាសម្រុកចេញពីអគារ ក្នុងពេលសមត្ថកិច្ចចុះបង្ក្រាបមជ្ឈមណ្ឌលឆបោកតាមអនឡាញកាលពីខែកុម្ភៈ។
មេខ្លោងធំនៅពីក្រោយដែលរងការចោទប្រកាន់ថា ជាម្ចាស់ឧទ្យានឆបោកតាមអនឡាញនៃក្រុមហ៊ុន លេជេន នោះគឺ ប្រធានក្រុមហ៊ុន ហួយវ័ន ផេ លោក ហ៊ុ តូ និងក្រុមហ៊ុន ព្រីនស៍គ្រុបរបស់ឧក្រិដ្ឋជន ចេន ហ្ស៊ី។
របាយការណ៍ស៊ើបអង្កេតរបស់ក្រុមហ៊ុនវិភាគទិន្នន័យប្រតិបត្តិការកុំព្យូទ័រតាមប្រព័ន្ធបច្ចេកវិទ្យា Blockchain ឈ្មោះ «អេលីបទីក» (Elliptic) និងគម្រោងតាមដានការបោកប្រាស់តាមអ៊ីនធឺណិត (Cyber Scam Monitor) បង្ហាញថា ក្រុមហ៊ុន លេជេន បានរៀបចំ និងចុះបញ្ជីសម្រាប់ដំណើរអាជីវកម្មស្ថិតក្នុងអាសយដ្ឋាននៃទីស្នាក់ការក្រុមហ៊ុន ហួយវ័ន ផេ លោក ហ៊ុ តូ នៅរាជធានីភ្នំពេញ។ របាយការណ៍ស៊ើបអង្កេតដដែលបញ្ជាក់ថា ក្រុមហ៊ុន ហួយវ័ន ផេ លោក ហ៊ុន តូ បានព្យាយាមរក្សាការបែកធ្លាយចំពោះចំណងទាក់ទងក្រុមហ៊ុនរបស់ខ្លួនដែលនៅពីក្រោយការបង្កើតឧទ្យានឆបោកតាមអនឡាញនៅខេត្តព្រៃវែងនេះ។
ក្រុមហ៊ុនវិភាគទិន្នន័យប្រតិបត្តិការកុំព្យូទ័រតាមប្រព័ន្ធបច្ចេកវិទ្យា «អេលីបទីក» (Elliptic) រកឃើញថា ចាប់តាំងពីឆ្នាំ២០២១ មកក្រុមហ៊ុន ហួយវ័ន ផេ លោក ហ៊ុន តូ បានទទួលផលចំណេញយ៉ាងហោច ១១ពាន់លានដុល្លារដែលមកពីអំពើឆបោកតាមអនឡាញ និងការជួយលាងលុយកខ្វក់ឱ្យក្រុមឧក្រិដ្ឋជន។
សហរដ្ឋអាមេរិក និងចក្រភពអង់គ្លេសបានសហការចាត់វិធានការរួមដាក់ទណ្ឌកម្មលើក្រុមហ៊ុន ហួយវ័ន គ្រុប (Huione Group) កាលពីចុងឆ្នាំ២០២៥ ដោយសារតែរកឃើញថា គឺជាក្រុមហ៊ុនធំពាក់ព័ន្ធនឹងអំពើឧក្រិដ្ឋកម្ម និងបានជួយលាងកខ្វក់ឱ្យក្រុមឧក្រិដ្ឋជនឆបោកតាមអនឡាញ និងក្រុមចោរព័ត៌មានវិទ្យាកូរ៉េខាងជើងយ៉ាងហោចណាស់ ៤ពាន់លានដុល្លារ៕
