ជនរងគ្រោះក្រុមហ៊ុន ហួយវ័ន ផេ (Houione Pay) បន្តប្រមូលផ្ដុំគ្នាតវ៉ានៅខាងមុខស្ថានទូតចិន ដោយស្រែកទាមទារឱ្យក្មួយប្រុសបង្កើតប្រធានព្រឹទ្ធសភាលោក ហ៊ុន សែន គឺលោក ហ៊ុន តូ ចេញមុខទទួលខុសត្រូវ និងសងលុយកម្លាំងញើសឈាមពួកគាត់វិញ។ ជនរងគ្រោះលើកឡើងថា កេរ្តិ៍ឈ្មោះកម្ពុជារងភាពអាម៉ាស់ និងអាប់ឱនកិត្តិយស រួមទាំងធ្វើឱ្យអ្នកវិនិយោគអន្តរជាតិបាត់បង់ទំនុកចិត្តដោយសារតែក្រុមហ៊ុន លោក ហ៊ុន តូ លួចយកលុយអតិថិជនដោយស្រស់ៗ និងគ្មានអាជ្ញាធរអើពើដោះស្រាយ។
ក្រុមអតិថិជនបាត់បង់លុយនៅក្រុមហ៊ុន ហួយវ័ន ផេ របស់លោក ហ៊ុន តូ ប្រមាណ ៣០នាក់នៅថ្ងៃទី៥ ខែសីហា បាននាំគ្នាចេញតវ៉ានៅខាងមុខស្ថានទូតចិនសាជាថ្មី ដើម្បីឱ្យជួយអន្តរាគមន៍ និងដាក់សម្ពាធឱ្យរដ្ឋាភិបាលចេញមុខជួយដោះស្រាយ។
ក្រុមបាតុករភាគច្រើនគឺជាជនជាតិចិន។ ពួកគាត់បាននាំគ្នាលើករូបថតលោក ហ៊ុន តូ និងស្រែកតវ៉ាដោយលើកបដាសរសេរថា «ហួយវ័ន ផេ សងលុយញើសឈាមខ្ញុំវិញ»។ ការតវ៉ារបស់ក្រុមអតិថិជនក៏ត្រូវបានក្រុមសមត្ថកិច្ចជាច្រើននាក់តាមឃ្លាំមើលដូចសព្វមួយដង ប៉ុន្តែពុំមានការប៉ះទង្គិចគ្នាដូចជាពេលកន្លងទៅឡើយ។
អតិថិជនជនជាតិចិនម្នាក់សរសេរជាសំណេរប្រាប់ទូរទស្សន៍អាស៊ីសេរីតាមបណ្ដាញសង្គមថា មកដល់ពេលនេះជនរងគ្រោះជាច្រើនមិនត្រឹមតែមិនទទួលបានលុយរបស់ខ្លួនមកវិញទេ ថែមទាំងត្រូវបានអាជ្ញាធរតាមដានជាប្រចាំ និងគំរាមកំហែងឱ្យបញ្ឈប់ប្រមូលផ្ដុំគ្នាចេញតវ៉ាតាមដងផ្លូវ។ ប្រភពដដែលបញ្ជាក់ថា ជនរងគ្រោះដែលនាំគ្នាបន្តចេញតវ៉ាជាប្រចាំគឺដោយសារតែគ្មានជម្រើស ហើយពួកគាត់ក៏មិនខ្លាចញញើតនឹងការចាប់ចងដាក់គុកទៀតឡើយ ព្រោះពួកគាត់អះអាងថា លុយដែលក្រុមហ៊ុន ហួយវ័ន ប្លន់យកគឺជាលុយស្របច្បាប់ និងបានមកពីការខិតខំប្រឹងប្រែងដោយកម្លាំងញើសឈាម។
អតិថិជនដដែលបញ្ជាក់ទៀតថា ការជ្រើសរើសទីតាំងស្ថានទូតចិនធ្វើជាទីលានតវ៉ា គឺដោយសារតែជនរងគ្រោះគ្មានជំនឿចិត្តលើប្រព័ន្ធដឹកនាំរដ្ឋាភិបាល និងស្ថាប័នពាក់ព័ន្ធ ក្នុងការផ្ដល់យុត្តិធម៌ និងជួយទាមទាមលុយរបស់ជនរងគ្រោះមកវិញ។
អតិថិជនហួយវ័ន ផេ លើកឡើងថា បើរដ្ឋាភិបាលនៅតែព្រងើយកន្តើយ និងមិនខ្វល់ពីទុក្ខលំបាកជនរងគ្រោះដែលជាប់គាំងលុយនៅ ក្រុមហ៊ុន ហួយវ័ន ផេ នោះគ្មានអ្នកវិនិយោគបរទេសណាហ៊ានមករកស៊ីនៅកម្ពុជាបន្តទៀតឡើយ ហើយកេរ្តិ៍ឈ្មោះកម្ពុជានឹងកាន់តែរងភាពអាម៉ាស់លើឆាកអន្តរជាតិបន្ថែមទៀត។
ទូរទស្សន៍អាស៊ីសេរីមិនអាចទាក់ទងទេសាភិបាលធនាគារជាតិនៃកម្ពុជា អ្នកស្រី ជា សិរី ដើម្បីអត្ថាធិប្បាយជុំវិញរឿងនេះបានទេនៅថ្ងៃទី៥ ខែសីហា។
ទន្ទឹមនឹងក្រុមជនរងគ្រោះរបស់ក្រុមហ៊ុន ហួយវ័ន ផេ បន្តនាំគ្នាតវ៉ាទាមទារឱ្យដោះស្រាយលុយដែលជាប់គាំង សញ្ញានៃវិបត្តិក្ស័យធនក្នុងវិស័យធនាគារនៅកម្ពុជាក៏កាន់តែលេចចេញជាបន្តបន្ទាប់ និងធ្វើឱ្យអតិថិជនដែលមានប្រាក់បញ្ញើព្រួយបារម្ភមិនអាចទទួលបានលុយរបស់ខ្លួនមកត្រឡប់វិញ។ កាលពីថ្ងៃទី៣ ខែសីហា ធនាគារជាតិនៃកម្ពុជាបានដកហូតអាជ្ញាប័ណ្ណធនាគារចំនួន៣ គឺ ធនាគារ ស៊ីស៊ីយូ (CCU Bank) ធនាគារ ហេង ហ្វឹង (Heng Feng Bank) និងធនាគារ អេចអេច ឬ ហេង ហ៊ី (HH Bank) ក្រោយសហរដ្ឋអាមេរិកដាក់ទណ្ឌកម្មលើស្ថាប័នទាំងនេះ ពាក់ព័ន្ធនឹងការលាងលុយកខ្វក់ និងអំពើឆបោកតាមអនឡាញ។ ជាមួយគ្នានេះ ធនាគារ អេភីឌី (APD Bank) ដែលមានកូនប្រុសរបស់អតីតសមាជិកព្រឹទ្ធសភាបក្សកាន់អំណាចលោក ឡាវ ម៉េងឃីន ជាសហប្រធានមួយ ក៏បានប្រកាសបង្កកលុយអតិថិជនថ្មីៗនេះដែរ។
ជុំវិញរឿងនេះ អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ លើកឡើងថា ការចងកម្លាំងជាធ្លុងមួយរបស់ក្រុមជនរងគ្រោះបន្តចេញតវ៉ាដោយសន្តិវិធីគឺជាមធ្យោបាយដ៏សំខាន់ ដើម្បីដាក់សម្ពាធឱ្យរដ្ឋាភិបាលត្រកូល ហ៊ុន ចេញមុខដោះស្រាយ។ លោកបន្ថែមទៀតថា ការបិទទ្វារធនាគារ និងគ្រឹះស្ថានហិរញ្ញវត្ថុដែលពាក់ព័ន្ធនឹងការលាងលុយកខ្វក់ក៏កំពុងបង្ហាញសញ្ញាថា សេដ្ឋកិច្ចរបស់រដ្ឋាភិបាលត្រកូល ហ៊ុន កំពុងប្រឈមដួលរលំហើយ។ «»
អតិថិជនក្រុមហ៊ុន ហួយវ័ន ផេ (Huione Pay) ជនជាតិចិនលើកឡើងថា នៅពេលខ្លួនក្លាយជាជនរងគ្រោះដោយផ្ទាល់ ទើបយល់កាន់តែច្បាស់អំពីការឈឺចាប់ និងទុក្ខវេទនាដែលប្រជាពលរដ្ឋខ្មែរជាច្រើនបានជួបប្រទះក្រោមការដឹកនាំរបស់រដ្ឋាភិបាលនៃក្រុមគ្រួសារត្រកូល ហ៊ុន។ យ៉ាងណាក៏ដោយ ក្រុមជនរងគ្រោះប្ដេជ្ញាថា នៅបន្តនាំគ្នាចេញតវ៉ាគ្មានទីបញ្ចប់ និងរហូតទល់តែទទួលបានលុយត្រឡប់មកវិញ ទោះបីជាប្រឈមនឹងការចាប់ចងដាក់គុក និងវាយដំធ្វើបាបពីសំណាក់កម្លាំងសមត្ថកិច្ចក៏ដោយ។
ក្រុមអតិថិជនជនជាតិចិនរិះគន់ថា ពួកគាត់ពុំដែលឃើញមានមេដឹកនាំប្រទេសដូចជាមេដឹកនាំកម្ពុជាឡើយដោយសុខចិត្តទទួលយកភាពអាម៉ាស់ និងការថ្កោលទោសជុំទិស ដើម្បីបណ្ដែតបណ្ដោយឱ្យក្រុមហ៊ុនសាច់ញាតិសមាជិកក្រុមគ្រួសារប្លន់យកលុយប្រជាពលរដ្ឋខ្លួនឯង និងជនជាតិចិន៕
