ពលរដ្ឋខ្មែរចំនួន៤ស្លាប់ និង៩នាក់ទៀតរងរបួសដោយសារការបាញ់ប្រហារឈ្លានពានរបស់ទាហានថៃមកលើកម្ពុជា នៅថ្ងៃទី៨ ខែធ្នូ ខណ:ពលរដ្ឋខ្មែរនៅជាប់ព្រំដែនរាប់ម៉ឺននាក់ទៀត កំពុងរត់ភៀសខ្លួនទៅកន្លែងមានសុវត្ថិភាព។
នេះបើតាមតួលេខបឋមដែលចេញផ្សាយដោយរដ្ឋមន្ត្រីក្រសួងព័ត៌មាន លោក នេត្រ ភក្ត្រា ។ ទោះជាយ៉ាងណា រដ្ឋមន្ត្រីក្រសួងព័ត៌មាន និងអ្នកនាំពាក្យក្រសួងការពារជាតិ នៅមិនទាន់បញ្ជាក់អំពីកងទ័ពកម្ពុជា ដែលបានពលីនៅសមរភូមិនោះទេ។ ប៉ុន្តែនៅលើបណ្តាញសង្គមមួយចំនួនវិញ អ្នកប្រើប្រាស់ហ្វេសប៊ុកខ្លះ បានបង្ហោះចែកចាយរូបភាពកងទ័ពកម្ពុជា បានពលីជីវិតជាបន្តបន្ទាប់ ដោយសារកងទ័ពថៃ បានបើកការវាយសន្ធប់ចូលឈ្លានពានកម្ពុជា។
