រដ្ឋមន្ត្រីការបរទេសសហរដ្ឋអាមេរិកលោក ម៉ាកូ រ៉ូប៊ីអូ (Marco Rubio) បានប្រាប់រដ្ឋមន្ត្រីការបរទេសប្រទេសថៃលោក ស៊ីហាសាក់ ភួងកែតកែវ (Sihasak Phuangketkeow) តាមទូរស័ព្ទថា សហរដ្ឋអាមេរិកព្រួយបារម្ភចំពោះការបន្តកើតមានអំពើហិង្សាតាមព្រំដែនប្រទេសកម្ពុជា និងចង់ឱ្យបន្ធូរបន្ថយភាពតានតឹងជាបន្ទាន់។ នេះបើតាមសេចក្ដីប្រកាសព័ត៌មានរបស់អ្នកនាំពាក្យរងក្រសួងការបរទេសអាមេរិកលោក ថូមមី ភីហ្គត (Tommy Pigott) កាលពីថ្ងៃទី១៨ ខែធ្នូ។
អ្នកនាំពាក្យរងរូបនេះ បានបន្តថា លោក ម៉ាកូ រ៉ូប៊ីអូ ក៏បានទទូចទៅរដ្ឋាភិបាលប្រទេសថៃ ត្រូវចាត់វិធានការជាក់ស្ដែងដើម្បីបន្ធូរបន្ថយភាពតាមតឹង ហើយត្រូវត្រឡប់ទៅអនុវត្តកិច្ចព្រមព្រៀងសន្ដិភាពទីក្រុងកូឡាឡាំពួរឡើងវិញ។
ការចេញមុខទទូចឱ្យប្រទេសថៃបញ្ចប់ភាពតានតឹងនេះ បានកើតឡើងក្រោយពីនាយករដ្ឋមន្ត្រីចាំផ្ទះរបស់ថៃលោក អានុទីន ចាន់វីរៈគុល (Anutin Chanvirarkul) កាលពីថ្ងៃទី១៣ ខែធ្នូ បានទាត់ចោលការអំពាវនាវរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ដែលចង់ឱ្យកម្ពុជានិងថៃបញ្ចប់សង្គ្រាមជាលើកទី២ ហើយវិលត្រឡប់ទៅអនុវត្តតាមកិច្ចព្រមព្រៀងសន្តិភាពកាលពីខែតុលាឡើងវិញ។
ក្រៅពីទាត់ចោលសំណើបញ្ចប់សង្គ្រាម នាយករដ្ឋមន្ត្រីថៃ និងរដ្ឋមន្ត្រីការបរទេសប្រទេសថៃ ក៏សម្ដែងការខកចិត្តចំពោះការលើកឡើងរបស់លោកប្រធានាធិបតីអាមេរិក ដែលថាគ្រាប់មីនដែលក្រុមទាហានថៃដើរជាន់ផ្ទុះ ហើយរបួសជាបន្តបន្ទាប់ គឺជាឧបទ្ទវហេតុ។ ការអះអាងរបស់លោក ត្រាំ នេះ ខុសពីការលើកឡើងរបស់ក្រុមយោធាថៃ ដែលតែងចោទប្រកាន់ថា គ្រាប់មីនទាំងនោះ គឺភាគីកងទ័ពកម្ពុជាជាអ្នកដាក់ និងបានយកធ្វើជាលេសបង្កសង្គ្រាមជាថ្មី។
ស្របពេលប្រទេសថៃមិនព្រមទទួលយកការអំពាវនាវបញ្ចប់សង្គ្រាមជាមួយកម្ពុជា ប្រធានាធិបតីអាមេរិកលោក ដូណាល់ ត្រាំ បានផ្ដល់បទសម្ភាសន៍ដល់កាសែត (The Wall Street Journal ដោយព្រមានថា សហរដ្ឋអាមេរិកនឹងដំឡើងពន្ធគយលើប្រទេសទាំងពីរឡើងវិញ ប្រសិននៅតែបន្តប្រយុទ្ធគ្នានៅតាមព្រំដែន៕
