រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) បានបញ្ជាក់ពីលក្ខខណ្ឌបីយ៉ាង ឱ្យកម្ពុជាបញ្ឈប់ការបាញ់ប្រហារជាមុនឱ្យជាក់លាក់ និងចូលរួមសហការដើម្បីបោសសម្អាតមីននៅតាមព្រំដែន។
លោក ស៊ីហាសាក់ បានអះអាងនៅក្នុងកិច្ចប្រជុំរដ្ឋមន្ត្រីការបរទេសអាស៊ាន នៅប្រទេសម៉ាឡេស៊ីនៅថ្ងៃទី២២ ធ្នូ ថា ក្នុងអាណត្តិរបស់រដ្ឋាភិបាលមុនៗ ប្រទេសថៃបានព្យាយាមដោះស្រាយបញ្ហានេះ តាមរយៈមធ្យោបាយទ្វេភាគី ក៏ប៉ុន្តែភាគីកម្ពុជាបានយកបញ្ហានេះ ទៅអង្គការសហប្រជាជាតិ ជំនួសឱ្យការដោះស្រាយទ្វេភាគី។ លោករដ្ឋមន្ត្រីការបរទេសថៃរូបនេះ បានអះអាងទៀតថា ទំនុកចិត្តគឺមានសារៈសំខាន់ នៅក្នុងការដោះស្រាយបញ្ហាក្នុងជម្លោះរវាងកម្ពុជា និងថៃ ក៏ប៉ុន្តែ ភាគីកម្ពុជា ធ្លាប់បានលួចថត និងបញ្ចេញសំឡេងកិច្ចសន្ទនាជាមួយអតីតមេដឹកនាំថៃ អ្នកស្រី ផែថងថាន ស៊ីណាវ៉ាត់ ដោយលោកចោទថា គឺជាការប៉ុនប៉ងរបស់កម្ពុជា ដើម្បីធ្វើឱ្យរដ្ឋាភិបាលថៃចុះខ្សោយ។
លោក ស៊ីហាសាក់ លើកឡើងថា កិច្ចព្រមព្រៀងសន្តិភាពរវាងថៃ និងកម្ពុជា កាលពីថ្ងៃទី២៦ ខែតុលា នឹងក្លាយជាមាគ៌ាឆ្ពោះទៅរកសន្តិភាព ទាល់តែភាគីកម្ពុជារំសាយអាវុធ កាត់បន្ថយកងទ័ព បោសសម្អាតមីន និងឧក្រិដ្ឋកម្មឆ្លងដែន ជាមុនសិន ដោយក្នុងនោះ មន្ត្រីថៃរូបនេះ បានលើកយកករណីទាហានថៃដើរជាន់មីន នៅតាមព្រំដែន មកចោទប្រកាន់លើកម្ពុជាផងដែរ។
លោក ស៊ីហាសាក់ បានបញ្ជាក់ជាចុងក្រោយថា មិនមានកិច្ចព្រមព្រៀងឈប់បាញ់នោះទេ នៅថ្ងៃនេះ ហើយដំណោះស្រាយជម្លោះព្រំដែនមួយនេះ នឹងត្រូវលើកយកទៅនិយាយបន្ត នៅក្នុងការពិភាក្សាកម្រិតរដ្ឋមន្ត្រីការពារជាតិ នៅថ្ងៃទី២៤ ខែធ្នូ នៅខេត្តច័ន្ទបុរី ប្រទេសថៃ។
