យោធាថៃបានចោទប្រកាន់មកលើទាហានខ្មែរថា បានបង្កជម្លោះ និងញុះញង់នៅទីតាំងដែលយោធាថៃរាយបន្លាលួស ក្នុងតំបន់ជាំតែ ខេត្តព្រះវិហារ រហូតទាហានថៃ បានបាញ់កាំភ្លើងព្រមាន។ ក៏ប៉ុន្តែ ទាហានខ្មែរអះអាងថា គឺភាគីថៃទៅវិញទេ ដែលតែងតែលួចធ្វើសកម្មភាពឈ្លានពានទឹកដីកម្ពុជា គ្រប់រូបភាព ដែលតម្រូវឱ្យទាហានខ្មែរធ្វើការរារាំងជាច្រើនលើក រហូតត្រូវទាហានថៃគំរាមបាញ់សម្លាប់ទៀតផង។
បន្ទាប់ពីធ្វើសកម្មភាពចូលឈ្លានពានក្នុងទឹកដីកម្ពុជា ជាច្រើនទីតាំងរួចមក ទាហានថៃបានចោទប្រកាន់មកលើទាហានខ្មែរ ថាបានបង្ករឿង និងគំរាមមិនឱ្យទាហានខ្មែរមករារាំងសកម្មភាពឈ្លានពានរបស់ពួកគេនោះឡើយ។
អ្នកនាំពាក្យកងទ័ពជើងគោកថៃ លោក វីនថៃ ស៊ូវារី (Winthai Suvaree) បានចេញសេចក្ដីថ្លែងការណ៍ កាលពីថ្ងៃទី១០ ខែមីនា ដោយចោទថា ទាហានខ្មែរដែលកំពុងឈរជើងនៅតំបន់ជាំតែ ក្នុងខេត្តព្រះវិហារ ជាប់ខេត្តស៊ីសាកេត របស់ថៃ បានធ្វើសកម្មភាពរំខាន និងថតវីដេអូ ញុះញង់បង្កជម្លោះជាច្រើនលើក នៅទីតាំងដែលទាហានថៃបានរាយបន្លាលួស និងជីកប្រឡាយ។ លោកអះអាងថា ករណីនេះ បានធ្វើឱ្យទាហានថៃ ធ្វើការសម្របសម្រួល និងណែនាំជាច្រើនដង រហូតមានការបាញ់កាំភ្លើងទៅលើមេឃ ដើម្បីព្រមានទៀតផង។
អ្នកនាំពាក្យកងទ័ពជើងគោកថៃរូបនេះចោទទៀតថា ទាហានខ្មែរ ដែលឈរជើងនៅតំបន់ជាំតែ ភាគច្រើនគឺជាទាហានថ្មី ដែលខ្វះបទពិសោធន៍ និងគ្មានវិន័យ នៅក្នុងការបដិបត្តិភារកិច្ច។
ទោះជាបែបនេះក្ដី ទាហានខ្មែរម្នាក់ ដែលកំពុងឈរជើងនៅខេត្តព្រះវិហារ បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញឈ្មោះថា ការលើកឡើងរបស់យោធាថៃ គឺជាការមួលបង្កាច់ និងចោទប្រកាន់មកលើទាហានខ្មែរ ដែលខុសពីការពិត និងយោងទៅលើប្រភពតែម្ខាង។ លោកអះអាងថា គឺទាហានថៃទៅវិញទេ ដែលមិនគោរពច្បាប់អន្តរជាតិ និងកិច្ចព្រមព្រៀង ដោយលួចធ្វើសកម្មភាពឈ្លានពានទឹកដីកម្ពុជា ទាំងយប់ទាំងថ្ងៃ តាមរយៈការរាយបន្លាលួស និងជីកប្រឡាយកាត់ផ្ដាច់ផ្លូវ។
ទាហានខ្មែរ៖ «វាគ្រាន់តែជាការចោទប្រកាន់ទេ ធម្មតាទាហានថៃមានប្រៀបជាងយើង គេចង់បានដីយើងបន្ត គេចេះតែចោទប្រកាន់ ហើយកងទ័ពយើងមានវិន័យជាងថៃ កងទ័ពថៃគ្មានវិន័យទេ ហើយកងទ័ពយើងស្ដាប់បទបញ្ជាថ្នាក់លើណាស់»។
ទាហានខ្មែរផ្សេងទៀត បានលើកឡើងដូចគ្នានេះថា កាលពីពាក់កណ្ដាលខែកុម្ភៈ ទាហានថៃបានជីកប្រឡាយ ដាក់តាំងកាមេរ៉ាសុវត្ថិភាព និងរាយបន្លាលួសបីជាន់ ដោយផ្ដាច់ផ្លូវទៅកាន់ផ្ទះតាម៉ុក នៅតំបន់ជាំតែ ដើម្បីធ្វើជាខ្សែបន្ទាត់ព្រំដែនថ្មី និងសម្រាប់ប្រឆាំងរថក្រោះ បន្ទាប់ពីតំបន់នេះ ត្រូវយោធាថៃឈូស និងផុតបំផ្លាញចោលគ្មានសល់។ ប្រភពបានអះអាងទៀតថា នៅពេលទាហានខ្មែរ ចូលទៅរារាំងសកម្មភាពឈ្លានពានទាំងនេះ ទាហានថៃបានបណ្ដេញទាហានខ្មែរ ដោយប្រមាថមើលងាយ និងគំរាមបាញ់សម្លាប់ទាហានខ្មែរជាច្រើនលើក ដោយទាហានថៃអះអាងថា ទីតាំងទាំងនោះគឺជាទឹកដីថៃ និងមិនឱ្យទាហានខ្មែរចូលមកដើរល្បាតទៀតនោះឡើយ។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១០ ខែមីនា។
ជុំវិញរឿងនេះ ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន យល់ឃើញថា យោធាថៃកំពុងប្រើយុទ្ធសាស្ត្រឈ្លានពាន និងប្រើប្រាស់កម្លាំងយោធា ដើម្បីកាត់ផ្ដាច់ចរន្តទាមទាររបស់កម្ពុជា ដើម្បីបន្តគ្រប់គ្រងតំបន់ទាំងនោះជាអចិន្ត្រៃយ៍។ ទោះជាយ៉ាងណា លោកបន្តថា ករណីនេះ គឺជារឿងដ៏អាម៉ាស់មួយនៅក្នុងប្រវត្តិសាស្ត្រ សម្រាប់រដ្ឋាភិបាលកម្ពុជា ដែលមិនអាចការពារទឹកដី ហើយថែមទាំងត្រូវភាគីឈ្លានពានធ្វើការចោទប្រកាន់តាមអំពើចិត្តថែមទៀត។
លោក អ៊ុំ សំអាន៖ «បើតាមការអះអាងរបស់មន្ត្រីយោធាជាន់ខ្ពស់របស់កម្ពុជា ដែលឈរជើងនៅតាមព្រំដែន បានបញ្ជាក់ថា ទឹកដីខ្មែរចំនួន ៤៥ទីតាំង ដែលថៃកំពុងគ្រប់គ្រង មានទំហំធំប៉ុនខេត្តតាកែវមួយ។ ហើយនៅពេលកម្ពុជាបណ្ដោយឱ្យថៃឈ្លានពានស្រេចតែចិត្ត នឹងបាត់ច្រើនជាងហ្នឹងទៀត នៅថ្ងៃមុខ»។
ពាក់ព័ន្ធនឹងវិវាទព្រំដែននៅតំបន់ជាំតែនេះដែរ ក្រុមអ្នកជាតិនិយមថៃ បានប្រកាសដំឡើងទូកុងតឺន័រ នៅតំបន់ជាំតែ ក្នុងទឹកដីកម្ពុជា ដែលថៃកំពុងកាន់កាប់ ដើម្បីបិទផ្លូវទាហានខ្មែរ ដែលតែងតែរារាំងសកម្មភាពកសាងសំណង់ និងហេដ្ឋារចនាសម្ព័ន្ធនៅលើទីតាំងទាំងនោះ។ ក៏ប៉ុន្តែ យោធាថៃ មិនទាន់ប្រកាសពីការសម្រេចចំពោះសំណើនេះនៅឡើយ។
ទោះជាយ៉ាងណា យោធាថៃបានវាយតម្លៃថា ផ្អែកទៅលើការវិភាគចំពោះកម្លាំងយោធារបស់កម្ពុជាបច្ចុប្បន្ន គឺគ្មានសមត្ថភាពបើកការវាយប្រហារមកលើយោធាថៃ ដើម្បីដណ្ដើមយកទីតាំងនៅតាមបណ្ដោយព្រំដែនមកវិញនោះឡើយ ដោយភាគីកម្ពុជា អាចត្រឹមតែប្រើប្រាស់យន្តការ ការទូត និងការចរចាទ្វេភាគី ដើម្បីទាមទារទឹកដីមកវិញប៉ុណ្ណោះ៕
