សាលាឧទ្ធរណ៍ភ្នំពេញ សម្រេចតម្កល់ការផ្តន្ទាទោសលើសកម្មជននយោបាយ២រូប និងយុវជនសង្គម២រូបដោយសារការប្រើប្រាស់សិទ្ធិបញ្ចេញមតិលើបណ្តាញសង្គម នៅព្រឹកថ្ងៃទី២១ ខែកក្កដានេះ។ មេធាវី និងមន្ត្រីសិទ្ធិមនុស្ស យល់ឃើញដូចគ្នាថា សាលក្រមរបស់តុលាការកាត់ទោសពួកកាត់ទាំង៤រូប មិនសមហេតុផល និងផ្ទុយពីច្បាប់រដ្ឋធម្មនុញ្ញ។
សាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញដែលបានផ្ដន្ទាទោសសកម្មជននយោបាយ២រូប និងយុវជនបណ្ដាញសង្គម ២រូប ទុកជាបានការដដែល។ សកម្មជនទាំង៤រូបនោះ រួមមាន សកម្មជននយោបាយ លោក ផង់ ប្រុស និង លោក ឆាន់ បញ្ញា ព្រមទាំងអ្នកប្រើប្រាស់បណ្ដាញសង្គមពីររូបគឺ លោក សឿន ចាន់ដែន និងកញ្ញា អយ ឌីណា ជាយុវជនបណ្ដាញសង្គម។
មេធាវីការពារក្តីឲ្យលោក ផង់ ប្រុស និងលោក ឆាន់ បញ្ញា គឺលោក ឡោ ជុនធី មានប្រសាសន៍ថា កូនក្តីរបស់លោកមិនមានចេតនាញុះញង់ដូចការចោទប្រកាន់របស់តុលាការឡើយ ហើយកូនក្តីរបស់លោកប្រើប្រាស់សិទ្ធិបញ្ចេញមតិលើបណ្ដាញសង្គមដែលមានចែងនៅក្នុងច្បាប់ក្នុងន័យ ដើម្បីកែលម្អ និងចូលរួមអភិវឌ្ឍន៍សង្គមឲ្យមានការរីកចម្រើនតែប៉ុណ្ណោះ។
លោក ឡោ ជុនធី៖ «រឿងហ្នឹងមានតែកូនក្តីមិនសុខចិត្តយ៉ាងណាអីយ៉ាងណីហ្នឹង គឺអាចប្តឹងសាទុក្ខតទៅទៀតបាន។ ដូចថា គាត់បានស៊ែរ បានបង្ហោះហ្វេសប៊ុកបង្ហោះអីហ្នឹងគេៗអត់ជឿថា នេះជាការបញ្ចេញមតិរបស់ពួកគាត់ៗអឺចង់កែលំអសង្គម ចង់ធ្វើម៉េចឲ្យវាបានល្អក្នុងសង្គមអីអញ្ចឹងទេ។ គាត់អត់មានគំនិតញុះញង់ឲ្យប្រព្រឹត្តបទឧក្រឹដ្ឋឬមួយញុះញង់ធ្វើឲ្យប៉ះពាល់ដល់សន្តិសុខសង្គមអីនុងទេ»។
សាលាដំបូងរាជធានីភ្នំពេញ បានផ្ដន្ទាទោសអ្នកទាំង៤ឲ្យជាប់ពន្ធនាគារ១៨ខែ ដូចៗគ្នា និងពិន័យជាប្រាក់ក្នុងម្នាក់ចំនួន ពីរលានរៀល ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ពាក់ព័ន្ធការបង្ហោះ និងចែករំលែកសារលើបណ្ដាញសង្គម។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ថ្លែងថា អង្គការជាតិ និងអន្តរជាតិមានការព្រួយបារម្ភចំពោះការបន្តចាប់ខ្លួន និងការប្រើប្រាស់ប្រព័ន្ធតុលាការផ្ដន្ទាទោសលើសកម្មជននយោបាយ និងពលរដ្ឋស្លូតត្រង់ជាច្រើនទៀតដែលប៉ះពាល់ដល់សិទ្ធិ សេរីភាពជាមូលដ្ឋានរបស់ពលរដ្ឋ។ លោកបន្តថា តុលាការគួរពិចារណាឲ្យបានច្បាស់លាស់មុនចាប់ខ្លួន និងឃុំខ្លួនពលរដ្ឋស្លូតត្រង់ ដើម្បីបញ្ឈប់ការរិះគន់ពីសហគមន៍ជាតិ និងអន្តរជាតិ។
លោក អំ សំអាត៖ «នៅមានការលើកឡើងនូវការខ្វែងគំនិតគ្នាដោយអង្គការសិទ្ធិមនុស្សជាតិ អន្តរជាតិ និងក្រុមប្រឹក្សាសិទ្ធិមនុស្សអង្គការសហប្រជាជាតិលើកឡើងថា ការចាប់ខ្លួន ការឃុំខ្លួន ការចោទប្រកាន់និងផ្ដន្ទាទោសទៅលើមនុស្សមួយចំនួនគឺប៉ះពាល់ទៅដល់អឺសេរីភាពក្នុងការបញ្ចេញមតិ ឬក៏សេរីភាពជាមូលដ្ឋានរបស់ពលរដ្ឋ»។
របាយការណ៍អង្គការលីកាដូបង្ហាញថា អ្នកនយោបាយ អ្នកការពារសិទ្ធិមនុស្ស សកម្មជនដីធ្លី សហជីព អ្នកសារព័ត៌មាន និងអ្នកប្រើប្រាស់បណ្ដាញសង្គមចំនួន១២៥នាក់ហើយដែលត្រូវបានជាប់ឃុំ ដោយសារតែភាពសកម្មនិយម ឬការបញ្ចេញមតិលើបណ្ដាញសង្គម។
ក្រុមអង្គការសង្គមស៊ីវិលក៏នឹងលើកយកករណីទាំងនេះស្នើឱ្យអ្នករាយការណ៍ពិសេសអង្គការសហប្រជាជាតិស្ដីពីស្ថានភាពសិទ្ធិមនុស្សនៅកម្ពុជា លោក ថម អេនឌ្រូ (Tom Andrews) ដែលកំពុងធ្វើទស្សនកិច្ចផ្លូវការនៅកម្ពុជា ចាប់ពីថ្ងៃទី២០ ដល់ថ្ងៃទី៣១ ខែកក្កដា ដើម្បីឲ្យលោក ជំរុញឲ្យរដ្ឋាភិបាលបើកលំហសេរីភាពនយោបាយ សេរីភាពសារព័ត៌មាន និងសិទ្ធិបញ្ចេញមតិនៅក្នុងប្រទេសកម្ពុជាឡើងវិញ៕
