លោក ហ៊ុន ម៉ាណែត បញ្ជាឲ្យស្ថាប័នពាក់ព័ន្ធជាពិសេសយោធភូមិភាគទី៣ នៃតំបន់ប្រតិបត្តិការសឹករងខេត្តកំពង់ស្ពឹ ផ្អាកការរុះរើទីតាំងផ្ទះគ្រូនៅសាលាដូងលើភ្នំគិរីរម្យ ក្រោយរងការរិះគន់ពីប្រជាពលរដ្ឋតាមបណ្ដាញសង្គម។ អ្នកឃ្លាំមើលយល់ថា រដ្ឋាភិបាលគួរកាត់ឆ្វាលដីតំបន់នោះ ជារបស់សាលាដូងដោយបញ្ចូលនៅក្នុងស្ថាប័នអប់រំមួយ ដើម្បីមិនឲ្យមានបញ្ហាណាមួយនាពេលខាងមុខ។
នាយករដ្ឋមន្ត្រីកម្ពុជា លោក ហ៊ុន ម៉ាណែត បញ្ជាមិនឱ្យយោធភូមិភាគទី៣នៃតំបន់ប្រតិបត្តិការសឹករងកំពង់ស្ពឺ រុះរើផ្ទះគ្រូៗស្ម័គ្រចិត្តនៅសាលាដូងលើភ្នំគិរីរម្យ ដែលមានលោក អ៊ុក វណ្ណដេ ជាស្ថាបនិកឡើយ។ លោកថ្លែងបែបនេះ នៅក្នុងពិធីសំណេះសំណាលជាមួយអាចារ្យ អាចារ្យរិនីទូទាំង ប្រទេសលើកទី១១ នៅវិទ្យាស្ថានជាតិអប់រំ នៅព្រឹកថ្ងៃទី១៩ ខែសីហា។
លោក ហ៊ុន ម៉ាណែត បានបញ្ជារដ្ឋមន្ត្រីក្រសូងបរិស្ថាន លោក អ៊ាង សុផល្លែត និងអភិបាលខេត្តកំពង់ស្ពឺ លោក ជាម ច័ន្ទសោភ័ណ្ឌ ចុះពិនិត្យ និងដោះស្រាយជាបន្ទាន់ ដើម្បីធានាថា សាលាដូងអាចបន្តដំណើរការបណ្ដុះបណ្ដាលទៅមុខធម្មតា ដើម្បីឲ្យក្មេងនៅតំបន់នោះបានរៀនសូត្រ។
លោក ហ៊ុន ម៉ាណែត បានកោតសរសើរចំពោះការខិតខំប្រឹងប្រែងរបស់លោក អ៊ុក វណ្ណដេ ដែលបានប្រកាន់ខ្ជាប់នូវសីលធម៌ គុណធម៌ ភាពស្មោះត្រង់ មានឆន្ទៈជួយមនុស្ស ហើយបានពុះពារ ដើម្បីជួយក្មេងៗ។ លោកក៏បានឧបត្ថម្ភប្រាក់ ៥លានរៀល និងអង្ករ១តោន ក្នុង១ខែ ដើម្បីជួយទ្រទ្រង់សាលាដូងផងដែរ។
លោកបញ្ជាក់ថា ដីនៅលើភ្នំគិរីរម្យនោះ ជាដីរបស់រដ្ឋ ដែលលោក អ៊ុក វណ្ណដេ បានខ្ចីពីក្រសួងបរិស្ថាន កាលពីឆ្នាំ២០១៧ និងបានសាងសង់ជាន់លើដីតំបន់ប្រវត្តិសាស្ត្រយោធា។
លោក ហ៊ុន ម៉ាណែត៖ «អញ្ចឹងជាដំណោះស្រាយ អាកន្លែងផ្ទះគ្រូស្អីគេ ទុកឱ្យគេដំណើរការរៀនសូត្រ។ តែគ្រូអត់ផ្ទះនៅ ពីណាបង្រៀន? ទៅសិនទៅ ព្រោះអត់ទាន់ប្រញាប់ទៅណាទេ គោលដៅគឺថា រកដំណោះស្រាយយ៉ាងណាដើម្បីឱ្យមានចីរភាព ភាពនឹងនរយូរអង្វែងឱ្យសាលានេះបន្តបង្រៀន ដើម្បីឱ្យសិស្ស ជាង ១៥០ នាក់ អាចកើតទៀត ឆ្នាំក្រោយៗឡើង ២-៣០០ នាក់ហើយ ដើម្បីបានផលពីការចូលរួមរបស់សាលាដូនតទៅទៀត អត់មានឱ្យបិទទៅណាទេ ហើយគ្រូក៏ដូចគ្នាដែរ យើងនឹងរៀបចំឱ្យបានស្រួលបួល ដើម្បីកុំឱ្យមានបញ្ហា»។
ទោះជាយ៉ាងណា លោក ហ៊ុន ម៉ាណែត ក៏បានអះអាងថា ដីនៅសាលាដូងលើភ្នំគិរីរម្យ មិនជាប់ពាក់ព័ន្ធនឹងអ្នកស្រី ជឹង សុភាព ហៅយាយភូ ដែលមានកេរ្តិ៍ឈ្មោះល្បីថា ពាក់ព័ន្ធនឹងការរំលោភសិទ្ធិដីធ្លីពលរដ្ឋ និងបំផ្លាញធនធានធម្មជាតិទេ។ យាយភូ ត្រូវបានគេស្គាល់ថា ជាបុគ្គលស្និទ្ធនឹងគ្រួសារលោក ហ៊ុន សែន តែងតែទទួលបានដីសម្បទានឥត ឈប់ឈរពីរដ្ឋាភិបាល។ ចំណែក កូនស្រីយាយភូ វិញ លោកស្រី ជឹង សុគន្ធារី ក៏ទទួលបានដីសម្បទាននៅឧទ្យានជាតិគិរីរម្យជាង ២រយហិកតារ កាលពីឆ្នាំ២០២២កន្លងទៅ។
ក្រោយការថ្លែងរបស់លោក ហ៊ុន ម៉ាណែត នៅថ្ងៃដដែល រដ្ឋមន្ត្រីក្រសួងបរិស្ថានលោក អ៊ាង សុផល្លែត និងអភិបាលនៃគណៈអភិបាលខេត្តកំពង់ស្ពឺលោក ជាម ច័ន្ទសោភ័ណ្ឌ ថ្នាក់ដឹកនាំ មន្ត្រីរាជការ រួមទាំងអាជ្ញាធរមូលដ្ឋាន ក៏បានចុះទៅពិនិត្យ និងជួបសំណេះសំណាលជាមួយលោកគ្រូអ្នកគ្រូស្ម័គ្រចិត្ត និងសិស្សានុសិស្សនៃសាលាដូង នៅលើភ្នំគិរីរម្យ ខេត្តកំពង់ស្ពឺ ដើម្បីពិនិត្យស្ថានភាពនៃដំណើរការរៀននិងបង្រៀនរបស់សាលារៀននៅក្នុងតំបន់នោះ។
ស្ថាបនិកសាលាដូង លោក អ៊ុក វណ្ណដេ បង្ហោះវីដេអូលើបណ្តាញសង្គមរបស់លោកដោយទទួលស្គាល់ថា លោកពិតជាបានសាងសង់ផ្ទះជូនគ្រូស្ម័គ្រចិត្ត លើដីគិរីរម្យដែលជាដីរបស់យោធាពិតមែន។ លោកបន្តថា លោកបានជួបសំណេះសំណាលជាមួយលោក ហ៊ុន ម៉ាណែត និងមន្ត្រីចំនួនទៀត ដោយបានរៀបរាប់ពីទុក្ខលំបាករបស់ពលរដ្ឋសិស្សានុសិស្ស ដែលរស់នៅលើភ្នំគិរីរម្យ និងបានស្នើសុំឲ្យលោកជួយដោះស្រាយផងដែរ។ លោកថា លោក ហ៊ុន ម៉ាណែត បានចាត់ឲ្យមន្ត្រីពាក់ព័ន្ធស្រង់ស្ថិតិពីចំនួនពលរដ្ឋ ដើម្បីរៀបចំធ្វើមណ្ឌលសុខភាព និងកន្លែងលក់ដូរជូនពលរដ្ឋនៅតំបន់នោះ និងចេញលិខិតការពារបញ្ឈប់ការទន្ទ្រានព្រៃទាំងស្រុង ដោយទន្ទ្រានជាបុគ្គល ឬចាប់ជាសម្បត្តិបុគ្គលជាដើម។ លោក អ៊ុក វណ្ណដេ ថា លោកជាអ្នកឃ្លាំមើលចំណាត់ការនេះ និងជាអ្នកធ្វើរបាយការណ៍ដាក់ជូនទៅលោក ហ៊ុន ម៉ាណែត ដោយផ្ទាល់ ប្រសិនមានករណីទន្ទ្រានណាមួយកើតឡើង។
លោក អ៊ុក វណ្ណដេ៖ «ខ្ញុំនៅតែបន្តតស៊ូធ្វើកិច្ចការបង្រៀន ធ្វើកិច្ចការអប់រំរបស់ខ្ញុំអញ្ចឹង។ ១០ឆ្នាំខ្ញុំនៅភ្នំគីរីរម្យ អស់លោក បងប្អូន អ្នកសារព័ត៌មានទាំងអស់ សូមជម្រាបថា ខ្ញុំមិនមានជាទ្រព្យសម្បត្តិអី ឬក៏ពាក់ព័ន្ធអំពើយង់ឃ្នង ពុករលួយ បញ្ហាកុមារទាំងអស់ ខ្ញុំជាមនុស្សស្រឡះណាស់។ ទ្រព្យសម្បត្តិខ្ញុំពិតជាមានដើម្បីម៉ារស់ តែខ្ញុំមិនឱ្យមានហួសច្រើនពេកដល់ថ្នាក់វង្វេងទេ។ ខ្ញុំមានដើម្បីម៉ារស់ របស់ខ្ញុំ គ្រួសារខ្ញុំ ខ្ញុំមានកូន មានប្រពន្ធ ប៉ុន្តែទ្រព្យសម្បត្តិទាំងអស់ហ្នឹងជារឿងសៅហ្មងដែលអាចនឹងបាត់បង់»។
កាលពីថ្ងៃទី១៣ សីហា មន្ទីរបរិស្ថានខេត្តកំពង់ស្ពឺការិយាល័យឧទ្យានជាតិគិរីរម្យ បានចេញសេចក្តីជូនដំណឹង ជូនចំពោះម្ចាស់ទីតាំងដែលបានបោះបង្គោលរបងហ៊ុមព័ទ្ធដីព្រៃដែលជាសម្បត្តិរដ្ឋ និងសំណង់អណាធិបតេយ្យបំណងយកធ្វើកម្មសិទ្ធិ នៅភូមិសាស្ត្រឃុំចំបក់ ស្រុកភ្នំស្រួច ឲ្យរុះរើក្នុងរយៈពេល១៤ថ្ងៃ គិតចាប់ពីថ្ងៃជូនដំណឹង ក្នុងនោះក៏មានផ្ទះលោក អ៊ុក វណ្ណដេ ដែលជាគ្រូបង្រៀននៅសាលាដូងផងដែរ ដែលបានសាងសង់លើដីប្រវត្តិសាស្ត្រយោធាតេជោ។ ក្នុងលិខិតក៏បានបញ្ជាក់ថា ទីតាំងនោះមិនប៉ះពាល់ដល់សាលាដូងនោះទេ។
ក្រោយការប្រកាសឲ្យរុះរើ លោក អ៊ុក វណ្ណដេ បានស្វះស្វែងរកកិច្ចអន្តរាគមន៍ទៅអាជ្ញាធរមូលដ្ឋាននានាដែលពាក់ព័ន្ធ ប៉ុន្តែពុំមានចំណាត់ការណាមួយជូនលោកឡើយ ទើបលោកស្នើសុំកិច្ចអន្តរាគមន៍ពីលោក ហ៊ុន ម៉ាណែត។
អ្នកប្រឹក្សាយោបល់ផ្នែកផ្នត់គំនិត និងការស្រាវជ្រាវ លោក សេក សុជាតិ ថ្លែងថា ចំណាត់ការរបស់រដ្ឋាភិបាលហាក់នៅមានភាពមិនច្បាស់លាស់ចំពោះទីតាំងសាលាដូង ដែលបញ្ហានេះ នឹងអាចកើតមាននៅថ្ងៃក្រោយទៀត។ លោកថា រដ្ឋាភិបាលគួរកំណត់ឲ្យបានច្បាស់ និងបញ្ចូលសាលាដូងជាទីតាំងរបស់រដ្ឋ មិនមែនជាការជួលឯកជន ដើម្បីធានាថា នឹងមិនមានការទន្ទ្រានណាមួយ ឬធ្វើសម្បទានដីទៅឲ្យក្រុមហ៊ុន ដទៃអភិវឌ្ឍន៍នៅតំបន់នោះនាពេលខាងមុខ។
លោក សេក សុជាតិ៖ «អឺនៅក្នុងកុងត្រាទោះបីជាយ៉ាងណាក៏ដោយ តែពាក្យថា “ជួល” គឺគេអាចយកមកវិញបាន។ ហើយជាទូទៅ វាគួរតែមានច្បាប់ទម្លាប់មួយច្បាស់លាស់ចំពោះបញ្ហាទាំងអស់ហ្នឹង។ យើងកុំឱ្យទាល់តែមានបញ្ហាធ្ងន់ធ្ងរ ហើយលេចឮតាមរយៈបណ្ដាញសង្គម ឬក៏បណ្តាញសារព័ត៌មានអី បានទៅដល់ថ្នាក់លើ ហើយបានអាចដោះស្រាយបាន។ វាគឺជាវប្បធម៌មួយដែលខ្ញុំយល់ថាវាមិនទាន់បង្ហាញពីភាពច្បាស់លាស់នៅក្នុងសង្គមខ្មែរនៅឡើយ ហើយគ្រប់ភាគីពាក់ព័ន្ធទាំងអស់ហ្នឹង ក៏គួរតែពិចារណាដែរ»។
សាលាដូងលើភ្នំគិរីរម្យមានសិស្សសិក្សា ចំនួនជាង ១៥០នាក់ជាកូនចៅរបស់គ្រួសារដែលមានជីវភាពក្រីក្រ និងមានបុគ្គលិក៧នាក់ ដែលបើកបង្រៀន២ពេល គឺវេនព្រឹកនិងល្ងាច។ ស្ថាបនិក លោក អ៊ុក វណ្ណដេ បានកៀរគរសុំជំនួយពីគ្រប់ទិសទី ដើម្បីបង្កើតសាលារៀនឯកជននេះ ក្នុងគោលបំណង ដើម្បីឲ្យក្មេង នៅក្នុងឧទ្យានជាតិគិរីរម្យមានឱកាសទទួលបានការសិក្សាដូចក្មេងដទៃ ក្រៅពីការលក់ផ្កា។ លោក ក៏ប្តេជ្ញាបន្តសកម្មភាពជួយសង្គម និងក្មេងៗដែលខ្វះលទ្ធភាព ក្រីក្រឲ្យទទួលបានការអប់រំបន្តផងដែរ៕
