អ្នកឧកញ៉ា ឡេង ណាវ៉ាត្រា ដែលទើបប្រកាសក្ស័យធន អះអាងថា របាយការណ៍របស់ក្រសួងដែនដី នគរូបនីយកម្ម និង សំណង់ ដែលអះអាង ថា ជនរងគ្រោះពីគម្រោងក្រុមហ៊ុនរបស់លោកមានរហូតដល់ ៣៨.០០០ នាក់ ជាការមិនពិត។ លើសពីនេះ លោកថា ក្រុមហ៊ុនលោកក៏ជាភាគីរងគ្រោះនៅក្នុង គម្រោងអាជីវកម្មដែរ ដោយសារអតិថិជនប្រមាណពាក់កណ្ដាល មិនបានបង់ប្រាក់ឱ្យទាន់ពេល។
រីឯសង្គមស៊ីវិល អះអាងថា ការបង្ហាញទិន្នន័យខុសគ្នារវាងក្រសួងនិងក្រុមហ៊ុន មិនមែនជាបញ្ហាសំខាន់នោះទេ តែរឿងសំខាន់បំផុត គឺការបង្ហាញឆន្ទៈដោះស្រាយ ជូនអតិថិជនរងគ្រោះទាំងអស់ដោយយុត្តិធម៌។
អ្នកឧកញ៉ា ឡេង ណាវ៉ាត្រា បានចេញមុខបដិសេធរបាយការណ៍របស់ក្រសួងរៀប ចំដែនដី នគរូបនីយកម្ម និង សំណង់ ដែលថា ក្រុមហ៊ុន បុរី ឡេង ណាវ៉ាត្រា នៅជំពាក់ផ្ទះអតិថិជនជាង ៣៨ ០០០ គ្រួសារទៀត។ ឧកញ៉ាដែលមាន ទំនាក់ទំនង ជិតស្និទ្ធនឹងក្រុមគ្រួសារត្រកូលហ៊ុនរូបនេះ ហាក់ចង់បន្ទោស គម្រោងរបស់ខ្លួន ជាប់គាំង គឺបណ្ដាលមកពីអតិថិជន ប្រមាណពាក់កណ្ដាល មិនបានបង់ប្រាក់ ឱ្យក្រុមហ៊ុនតាមកិច្ចសន្យា។
នៅលើហ្វេសប៊ុករបស់ខ្លួន នៅថ្ងៃទី១៣ ខែកញ្ញា អ្នកឧកញ៉ា ឡេង ណាវ៉ាត្រា បានបង្ហាញទិន្នន័យ ដែលលោក អះអាងថា ពិតប្រាកដ និងបានផ្ទៀងផ្ទាត់ ជាមួយ ក្រសួង ដោយលោកបញ្ជាក់ថា នៅសល់ដីចំនួន ១៦,៩២៥ ប្លង់ ឬ ជិត ២ម៉ឺនឡូតិ៍ ទៀត ដែលជាអតិថិជនបង់រំលស់ គ្មានលទ្ធភាពបង់បន្ត និងបានខកខាន បង់ប្រាក់ ចន្លោះពី ១ឆ្នាំ ទៅ ៤ឆ្នាំ មកហើយ។
ឧកញ៉ារូបនេះ បន្ថែមថា អតិថិជន នៅជំពាក់ក្រុមហ៊ុនលោក សរុប ៦១លានដុល្លារ ទៀត ដែលភាគច្រើន ជាប្រភេទដីឡូតិ៍ ក្នុងគម្រោងតាមបណ្ដាខេត្ត ដូចជា នៅ ស្រុកម៉ាឡៃ ខេត្តបន្ទាយមានជ័យ សៀមរាប និង ខេត្តផ្សេងទៀត។ យ៉ាងណា លោកថា ដីឡូតិ៍ទាំងនោះ មានប្លង់រឹង ត្រឹមត្រូវ និងបានបោះបង្គោលរួចរាល់។
ចំពោះអតិថិជន ដែលបានបង់ប្រាក់ផ្ដាច់វិញ អ្នកឧកញ៉ា ឡេង ណាវ៉ាត្រា អះអាង ថា ទិន្នន័យពិតប្រាកដ មានចំនួន ១៥ ៣៣៥ ប័ណ្ណ ក្នុងគម្រោង ដែលក្រុមហ៊ុនបានបំបែកក្បាលដីបញ្ចប់ និងប្រគល់ជូន អតិថិជន រួចរាល់ហើយ។
អ្នកឧកញ៉ា ឡេង ណាវ៉ាត្រា សរសេរថា ការលើកឡើងថា «មានប្រជាពលរដ្ឋ រងគ្រោះដល់ទៅ ៣៨,០០០ គ្រួសារ» របស់ក្រសួងរៀបចំដែនដី នគរូបនីយកម្ម និង សំណង់ គឺជារឿងមិនពិតទាំងស្រុង។ លោកថា ធាតុពិត ក្រុមហ៊ុនរបស់លោកក៏ជាអ្នករងគ្រោះបន្តដែរ និងត្រូវរ៉ាប់រងបន្ទុកបំណុល រាប់សិបលានដុល្លារ ដោយសារ អតិថិជនមិនគោរពកិច្ចសន្យាបង់ប្រាក់។
ក្រសួងដែនដី នគរូបនីយកម្ម និង សំណង់ កាលពីថ្ងៃទី១០ ខែកញ្ញា បានបញ្ចេញ ទិន្នន័យ ឱ្យឃើញថា ក្រុមហ៊ុន ឡេង ណាវ៉ាត្រា ទើបតែបានផ្ដល់ឱ្យអតិថិជន ជិត ៦០០ផ្ទះប៉ុណ្ណោះ ហើយនៅជំពាក់អតិថិជន ជាង ៣៨ ០០០ គ្រួសារទៀត។ តួលេខ នេះរបស់ក្រសួង គឺជាការឆ្លើយតបទៅនឹងក្រុមអ្នកឧកញ៉ា ឡេង ណាវ៉ាត្រា ដែល បានផ្សព្វផ្សាយលើបណ្ដាញសង្គមថា ក្រសួងរៀបចំផែនការធ្វើបាបខ្លួន។
យ៉ាងណាក៏ដោយរដ្ឋមន្ត្រីក្រសួង ដែនដី នគរូបនីយកម្ម និង សំណង់ លោក សាយ សំអាល់ លើកឡើងក្នុងពិធីមួយក្នុងខេត្តសៀមរាប កាលពីថ្ងៃទី១៣ ខែកញ្ញា ថា លោកមិនចង់ឆ្លើយតបវែងឆ្ងាយជាមួយក្រុមហ៊ុន អ្នកឧកញ៉ា ឡេង ណាវ៉ាត្រា ទេ។ សារព័តមាន The Cambodia Morning Post បានស្រង់សម្ដីរបស់លោក សាយ សំអាល់ ថា ចំណុចសំខាន់ គឺអ្នកឧកញ៉ា ឡេង ណាវ៉ាត្រា ត្រូវបញ្ជាក់ឱ្យច្បាស់ថា តើអ្នកឧកញ៉ាមានប្រភពហិរញ្ញវត្ថុ គ្រប់គ្រាន់ សម្រាប់បញ្ចប់ការសាងសង់ ឬនៅ ព្រោះការងារនេះ ត្រូវការថវិការហូត ដល់រាប់លានដុល្លារ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ប្រាប់ទូរទស្សន៍អាស៊ីសេរី នៅថ្ងៃទី១៤ ខែកញ្ញា ថា ភាគីអតិថិជន គឺជា ជនរងគ្រោះ ដែលមួយចំនួនធំបានចំណាយប្រាក់ទិញផ្ទះ និងដីឡូតិ៍ហើយ ប៉ុន្តែ មិនបានផ្ទះ និងដី តាមកិច្ចសន្យា។ លោកកត់សម្គាល់ថា សូម្បីតែអតិថិជនខ្លះ ដែលបានបង់ប្រាក់ផ្ដាច់រួចហើយ ក៏នៅតែមិនបានផ្ទះ និងដី ពីក្រុមហ៊ុនទៀត។ លោកពន្យល់ថា នេះអាចជាមូលហេតុ ដែលអតិថិជនមួយចំនួន លែងបន្តបង់ រំលស់ ដោយរង់ចាំមើលដំណោះស្រាយរួមជាមុនសិន។
លោក អំ សំអាត មានប្រសាសន៍ថា ការឆ្លើយឆ្លងទិន្នន័យខុសគ្នា រវាងក្រសួង និងក្រុមហ៊ុនអ្នកឧកញ៉ា ឡេង ណាវ៉ាត្រា មិនមែនជាចំណុចសំខាន់នោះទេ ប៉ុន្តែ លោកថា រឿងដែលសំខាន់ និងចាំបាច់បំផុត នៅពេលនេះ គឺការបង្ហាញឆន្ទៈ និងយន្តការដោះស្រាយ ក្រោមអន្តរាគមន៍របស់រដ្ឋាភិបាល។ លោកថា រដ្ឋាភិបាលត្រូវប្រកាន់នូវជំហរម៉ឺងម៉ាត់ក្នុងការផ្ដល់យុត្តិធម៌ដល់អតិថិជនដែលរងគ្រោះ។
លោក អំ សំអាត៖ «អតិថិជន ឬពលរដ្ឋ ដែលទិញគាត់មានកាតព្វកិច្ចនៅការបង់លុយ ប៉ុន្តែក្រុមហ៊ុន ត្រូវមានកាតព្វកិច្ចអនុវត្តកិច្ចសន្យា ត្រូវប្រគល់ផ្ទះ ប្រគល់ដីឱ្យ ពលរដ្ឋ បើគេបង់លុយគ្រប់រួចទៅហើយ។ ប៉ុន្តែអ្នកខ្លះអត់បានទទួល អាហ្នឹង វាជា បញ្ហា ហើយមួយទៀតការខកខាន មិនបានបង់ ដោយសារតែ ក្រុមហ៊ុនជាប់គាំង។ អ៊ីចឹងគាត់បង់ទៅខ្លាច វាអស់លុយបន្ថែមទៀត អ៊ីចឹងរង់ចាំដំណោះស្រាយទាំងអស់ហ្នឹង អាហ្នឹងគឺនៅពេលដែលដោះស្រាយ វានឹងចេញជាលទ្ធផលហើយ។ អ៊ីចឹងអ្វីដែលសំខាន់ គឺការដោះស្រាយទៅដល់អតិថិជន ឬក៏ពលរដ្ឋ ដែលរងគ្រោះ វាជារឿងសំខាន់ ហើយនេះជាមេរៀន ព្រោះមិនមែនមានតែក្រុមហ៊ុនហ្នឹង យើងឃើញមានក្រុមហ៊ុនជាច្រើន»។
ផ្ទុយពីការអះអាងរបស់អ្នកឧកញ៉ា ឡេង ណាវ៉ាត្រា ដែលថា បានផ្ដល់ផ្ទះ ជូនអតិថិជនដែលបង់ប្រាក់ផ្ដាច់នោះអតិថិជនម្នាក់ដែលបានទិញផ្ទះមួយល្វែង និង ដីមួយប្លង់ សរុបតម្លៃជិត ៤ម៉ឺន ដុល្លារ ដោយបានបង់ផ្ដាច់ទាំងអស់ ចាប់តាំង ពីឆ្នាំ២០២១ ប្រាប់ទូរទស្សន៍អាស៊ីសេរី ថា មកដល់ពេលនេះ ក្រុមហ៊ុន ឡេង ណាវ៉ាត្រា មិនទាន់សង់ផ្ទះ និង ចាក់ដីបំពេញ ឱ្យត្រឹមត្រូវ ឱ្យលោកនៅឡើយទេ។
អតិថិជនរូបនេះ ថា នៅមានពលរដ្ឋជាច្រើនគ្រួសារទៀត ដែលបានបង់ប្រាក់ផ្ដាច់ ឱ្យក្រុមហ៊ុន ដូចលោកដែរ តែនៅមិនទាន់បានផ្ទះទេ។ លោកទាមទារឱ្យក្រសួងដោះស្រាយ ឱ្យជាប្រញាប់ ដោយសារតែអតិថិជនម្នាក់ៗ រង់ចាំ៥ ទៅ៦ ឆ្នាំហើយ។
នៅប្រទេសកម្ពុជា ក្រោមការដឹកនាំរបស់ ក្រុមគ្រួសារត្រកូលហ៊ុន មានក្រុមហ៊ុន ឆបោកជាច្រើនទៀត ដែលតុលាការ និងរដ្ឋាភិបាល មិនទាន់ដោះស្រាយនៅ ឡើយហើយទុកឱ្យពលរដ្ឋរាប់ម៉ឺនគ្រួសាររងគ្រោះ យូរឆ្នាំ ដូចជា ក្រុមហ៊ុន ពិភពដីមាស របស់អតីតឧកញ៉ា ហ៊ី គឹមហុង ក្រុមហ៊ុនអតីតឧកញ៉ា ជា សារ៉ន និង ក្រុមហ៊ុនស៊ីអាយស៊ី (CIC) របស់លោក គុយ វ៉ាត ជាដើម។
ក្រុមហ៊ុនមួយចំនួនទៀត ក៏ជាប់ក្នុងបញ្ជីឆបោក និង លាងលុយកខ្វក់ដែរ រួមមាន ក្រុមហ៊ុនហ៊ួយវ័នផេ (Huione Pay) របស់ឧកញ៉ា ហ៊ុន តូ ដែលជាបងជីដូនមួយ របស់លោកនាយករដ្ឋមន្ត្រី ហ៊ុន ម៉ាណែត ក្រុមហ៊ុនភូមិខ្មែរគ្រុប របស់សាច់ញាតិ លោក ដួង ដារា ដែលជាអតីតជំនួយការរបស់លោក ហ៊ុន សែន និង ក្រុមហ៊ុន ប្រ៊ីលានស៊ីធី របស់អតីតឧកញ៉ា ឡេង ចាន់ណា៕
