រដ្ឋមន្ត្រីក្រសួងព័ត៌មាន លោក នេត្រ ភក្ក្រា ជំរុញឲ្យអ្នកសារព័ត៌មាន ផលិត និងផ្សព្វផ្សាយព័ត៌មានដែលមានផលប្រយោជន៍ដល់សង្គម ដើម្បីពង្រឹងលើក្រមសីលធម៌ ជាជាងការផ្សព្វផ្សាយព័ត៌មានទាក់ទងនឹងជម្លោះគ្រួសារ រឺការធ្វើអត្តឃាតដែលធ្វើឲ្យជះឥទ្ធិពលមិនល្អដល់សង្គម និងប៉ះពាល់លើអារម្មណ៍ ផ្លូវចិត្តរបស់ពលរដ្ឋ។ ចំណែកក្រុមអង្គការសង្គមស៊ីវិលបង្ហាញការព្រួយបារម្ភថាអ្នកសារព័ត៌មានអនឡាញមួយចំនួនកំពុងធ្វើការខុសវិជ្ជាជីវៈ ស្របពេលអ្នកសារព័ត៌មានឯករាជ្យត្រូវបានរដ្ឋាភិបាល រឹតត្បិតសេរីភាព ក្នុងការបំពេញការងារ។
ស្របពេលដែលមានការរិះគន់ទៅលើអ្នកសារព័ត៌មានអនឡាញមួយចំនួនដែលបំពេញការងារគ្មានវិជ្ជាជីវៈ តែមិនត្រូវបានរដ្ឋាភិបាលចាត់វិធានការអប់រំណែនាំនោះ រដ្ឋមន្ត្រីក្រសួងព័ត៌មាន លោក នេត្រ ភក្ក្រា បានបង្ហោះសារនៅលើបណ្តាញសង្គមហ្វេសប៊ុករបស់លោកនៅ ថ្ងៃទី៥ ខែឧសភា ថាលោកនឹងមានជំនួបថ្មីបន្ថែមទៀតជាមួយ អ្នកសារព័ត៌មានអនឡាញ ដែលបានកំពុងចុះយកព័ត៌មាន និងផ្សព្វផ្សាយព័ត៌មានទាក់ទងនឹងសន្តិសុខសង្គម និងជម្លោះនានាដែលបានកើតឡើង ដើម្បីពង្រឹងលើក្រមសីលធម៌ និងការផ្តល់ព័ត៌មានដែលមានប្រយោជន៍ដល់សង្គម និងពលរដ្ឋ។
លោក នេត្រ ភក្ត្រា ថា លោកនឹងជំរុញឱ្យមានការផ្សព្វផ្សាយខ្លឹមសារ ដែលផ្តល់ផលប្រយោជន៍ដល់សង្គម និងបណ្ដុះស្មារតីប្រិយមិត្តរបស់ខ្លួនលើខ្លឹមសារបែបផ្តល់ព័ត៌មានចំណេះដឹង ជាជាងការផ្សព្វផ្សាយព័ត៌មានទាក់ទងនឹងជម្លោះគ្រួសារ ជម្លោះស្នេហា ឬព័ត៌មានដែលបង្ហាញពីសាកសព ការធ្វើអត្តឃាត ដើម្បីតែចង់បានអ្នកមើលច្រើន ប៉ុន្តែជះឥទ្ធិពលមិនល្អលើអារម្មណ៍ និងផ្លូវចិត្តរបស់ពលរដ្ឋដែលទស្សនា និងសង្គម។
លោក នេត្រ ភក្ត្រា បានបន្ថែមថា ពេលខ្លះពលរដ្ឋដែលទស្សនា អាចមានអារម្មណ៍មិនល្អ ឈឺក្បាល ស្ត្រេស ឬអារម្មណ៍ផ្សេង គឺមិនមានជំងឺអ្វីទេ ប៉ុន្តែអាចមកពីអានព័ត៌មាន ឬទស្សនារូបភាពដែលរន្ធត់ ឬព័ត៌មានមិនល្អ។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានឲ្យដឹងថា ដើម្បីផ្សព្វផ្សាយព័ត៌មានដែលមានផលប្រយោជន៍ដល់សង្គម លោកចង់ឃើញតួនាទីអ្នកកាសែតឯករាជ្យចូលរួមកាន់តែសកម្ម នៅក្នុងការការពារកុំឲ្យមានភាពអសន្តិសុខនៅក្នុងសង្គមដើម្បីបម្រើផលប្រយោជន៍ទៅដល់សាធារណៈ។
លោក ណុប វី៖ «យើងចង់ឃើញសង្គមយើងមានការរីកចម្រើន មានភាពប្រសើរឡើង យើងចង់ឃើញតួនាទីវិស័យសារព័ត៌មានឯករាជ្យគឺថាបានចូលរួមកាន់តែសកម្មនៅក្នុងការការពារកុំឲ្យមានគេហៅថាភាពអសន្តិសុខនៅក្នុងសង្គម រឺមួយក៏អំពើល្មើសច្បាប់នៅក្នុងសង្គម កាត់បន្ថយអំពើពុករលួយ រឺសកម្មភាពផ្សេងៗទៀតដែលវាមានហានិភ័យទៅដល់ផលប្រយោជន៍សាធារណៈ»។
មែនទែនទៅ បញ្ហារបស់អ្នកសារព័ត៌មានអនឡាញដែលផ្សព្វផ្សាយព័ត៌មានគ្មានក្រមសីលធម៌វិជ្ជាជីវៈបណ្តាលឱ្យប៉ះពាល់ដល់សិទ្ធិបុគ្គលឯកជន ប្រពៃណីល្អរបស់ជាតិ និងសណ្ដាប់ធ្នាប់សង្គម បានកើតឡើងជាច្រើនឆ្នាំមកហើយ ប៉ុន្តែក្រសួងព័ត៌មានហាក់បណ្តែតបណ្តោយឱ្យអ្នកសារព័ត៌មានទាំងអស់នេះធ្វើផ្គរធ្វើភ្លៀងពាសពេញតែបណ្ដាញសង្គម ហើយមានអ្នកសារព័ត៌មានចំនួនតិចតួចណាស់ដែលត្រូវបានក្រសួងហៅទៅអប់រំណែនាំ ឬលុះត្រាតែមានការរិះគន់ខ្លាំងទើបមានការហៅណែនាំជាដើម។ ប៉ុន្តែសម្រាប់អ្នកសារព័ត៌មានឯករាជ្យដែលប្រកបការងារសារព័ត៌មានដោយវិជ្ជាជីវៈ និងរាយការណ៍ពីរឿងរ៉ាវរសើបៗ និងផ្តល់ផល់ប្រយោជន៍ធំធេងដល់សង្គមជាតិ ដូចជាការឆបោកតាមអនឡាញ បញ្ហាព្រំដែន ការរំលោភសិទ្ធិមនុស្ស និងការបំផ្លិចបំផ្លាញធនធានធម្មជាតិជាដើមនោះ អាជ្ញាធរ និងតុលាការតែងចាត់វិធានការច្បាប់ទៅលើអ្នកសារព័ត៌មានទាំងអស់នោះដោយចោទប្រកាន់ថា ផ្សព្វផ្សាយព័ត៌មានបែបញុះញង់ ជេរប្រមាថ ឬបង្កភាពវឹកវរដល់សន្តិសុខសង្គមជាដើម ហើយជាទូទៅ ក្រសួងព័ត៌មានមិនដែលចេញមុខការពារអ្នកសារព័ត៌មានដែលមានវិជ្ជាជីវៈ និងឯករាជ្យទាំងអស់នោះឡើយ ផ្ទុយទៅវិញ គឺមានតែចេញមុខនិយាយការពារចំណាត់ការរបស់អាជ្ញាធរ និងតុលាការថែមទៀត។
ទាក់ទងទៅនឹងស្ថានភាពសារព័ត៌មាននៅកម្ពុជា សមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា បានឲ្យដឹងនៅក្នុងការវាយតម្លៃប្រចាំឆ្នាំចុងក្រោយ ក្នុងឆ្នាំ២០២៥ ដោយបានកត់ត្រាករណីរំលោភបំពានចំនួន ៦១ ករណី ប្រឆាំងនឹងអ្នកសារព័ត៌មាន និងស្ថាប័នសារព័ត៌មាន។ ករណីភាគច្រើនពាក់ព័ន្ធនឹងអ្នកសារព័ត៌មានអនឡាញ ខណៈបណ្ដាញសង្គម ដូចជា Facebook ក្លាយជាវេទិកាដែលមានហានិភ័យខ្ពស់សម្រាប់ការរាយការណ៍ព័ត៌មាននៅកម្ពុជា។
CamboJA បានឱ្យដឹងថា អ្នកសារព័ត៌មានបានប្រឈមនឹងការវាយប្រហាររាងកាយ ការរំលោភបំពានផ្លូវចិត្ត ការគំរាមកំហែងតាមផ្លូវច្បាប់ បៀតបៀនផ្លូវភេទ ការរើសអើង និងការបំភិតបំភ័យ ដែលបង្កឱ្យមានបរិយាកាសនៃការភ័យខ្លាច និងការត្រួតពិនិត្យខ្លួនឯងនៅក្នុងវិជ្ជាជីវៈសារព័ត៌មាន។
ពាក់ព័ន្ធនឹងស្ថានភាពសេរីភាពសារព័ត៌មាននៅកម្ពុជា បើទោះជាក្រសួងព័ត៌មានអះអាងពីភាពល្អប្រសើរក្តី អង្គការអ្នកសារព័ត៌មានគ្មានព្រំដែន (RSF) បានចេញផ្សាយពីសន្ទស្សន៍សេរីភាពសារព័ត៌មានសម្រាប់ឆ្នាំ ២០២៦ ថា កម្ពុជាជាប់ចំណាត់ថ្នាក់លេខ ១៥១ ក្នុងចំណោមប្រទេសចំនួន១៧៨ នៅលើពិភពលោក។
សង្គមស៊ីវិល និងអ្នកសារព័ត៌មានទទូចឱ្យក្រសួងយកចិត្តទុកដាក់ចំណុចខ្វះខាត ដើម្បីពង្រឹងវិស័យព័ត៌មានឱ្យ កាន់តែល្អប្រសើរ និងត្រូវទម្លាក់បទចោទប្រកាន់ និងដោះលែងអ្នកសារព័ត៌មានទាំងអស់ដែលជាប់ពន្ធនាគារដោយសារការអនុវត្តវិជ្ជាជីវៈសារព័ត៌មានឱ្យមានសេរីភាពឡើងវិញ។ ក្រសួងព័ត៌មានក៏ត្រូវបញ្ឈប់រាល់សកម្មភាពរបស់អ្នកសារព័ត៌មានអនឡាញមួយចំនួន ដែលផ្សាយផ្ទាល់ (Live) ទាក់ទងនឹងជម្លោះគ្រួសារ ជម្លោះស្នេហា រឺការធ្វើអត្តឃាត ដើម្បីរក្សាភាពថ្លៃថ្នូរទៅដល់អ្នកសារព័ត៌មានដែលធ្វើការប្រកបដោយវិជ្ជាជីវៈ។
ក្រសួងព័ត៌មានបានឲ្យដឹងថា កម្ពុជាមានអ្នកសារព័ត៌មានប្រមាណ១ម៉ឺននាក់ ក្នុងនោះមានស្ត្រីចំនួន ៨៦១នាក់ ។ ប្រព័ន្ធផ្សព្វផ្សាយ ទាំងប្រពៃណី និងទំនើបដែលបានចុះបញ្ជីការ និងមានអាជ្ញាប័ណ្ណស្របច្បាប់មានចំនួន ១ ៦២០ស្ថាប័ន៕
