អ្នកដាក់ពាក្យប្តឹងពីបញ្ហាមីក្រូហិរញ្ញវត្ថុស្ទើរតែទាំងអស់ បដិសេធមិនចូលរួមដោះស្រាយក្រៅផ្លូវការជាមួយសាជីវកម្មហិរញ្ញវត្ថុអន្តរជាតិ (IFC) បន្ទាប់ពីស្ថាប័នហិរញ្ញវត្ថុអន្តរជាតិមួយនេះច្រានចោលការរកឃើញរបស់យន្តការគណនេយ្យភាពឯករាជ្យ (CAO) របស់ខ្លួន ដែលបានលាតត្រដាងពីបញ្ហារំលោភសិទ្ធិមនុស្ស និងការគាបសង្កត់កូនបំណុលដែលបានខ្ចីប្រាក់ពីគ្រឹះស្ថានមីក្រូហិរញ្ញវត្ថុនៅកម្ពុជា។ អង្គការសិទ្ធិមនុស្សលីកាដូ (LICADHO) និងអង្គការសមធម៌ (Equitable) ដែលជាតំណាងដើមបណ្ដឹងរបស់ប្រជាពលរដ្ឋចាត់ទុកការសម្រេចរបស់សាជីវកម្មហិរញ្ញវត្ថុអន្តរជាតិ (IFC) ថា មិនបានផ្ដល់យុត្តិធម៌ និងដំណោះស្រាយសមស្របដល់ប្រជាពលរដ្ឋដែលកំពុងរងផលប៉ះពាល់។
អង្គការសិទ្ធិមនុស្សលីកាដូ (LICADHO) រិះគន់ការសម្រេចរបស់សាជីវកម្មហិរញ្ញវត្ថុអន្តរជាតិ (IFC) ដែលជាសមាជិកធនាគារពិភពលោកក្នុងសំណុំរឿងផលប៉ះពាល់ក្នុងវិស័យមីក្រូហិរញ្ញវត្ថុកម្ពុជាថា បានធ្វើឱ្យអ្នកដាក់ពាក្យបណ្ដឹងភាគច្រើនបាត់បង់ទំនុកចិត្ត និងបដិសេធមិនចូលរួមយន្តការដោះស្រាយក្រៅផ្លូវការក្នុងស្រុកដែលមានស្រាប់ដែលស្នើឡើងដោយសាជីវកម្មហិរញ្ញវត្ថុអន្តរជាតិ។ អ្នកដែលបដិសេធចូលរូមភាគច្រើនគឺជាជនជាតិភាគតិចដែលជាម្ចាស់បណ្ដឹង ហើយពួកគាត់បានហៅការសម្រេចរបស់សាជីវកម្មហិរញ្ញវត្ថុអន្តរជាតិគឺជាការរត់ចោលការទទួលខុសត្រូវ។
ក្នុងសេចក្ដីថ្លែងការណ៍រួមរបស់អង្គការលីកាដូនៅថ្ងៃទី២៦ ខែសីហា ឱ្យដឹងថា ក្នុងចំណោមអ្នកដាក់ពាក្យបណ្ដឹង ១៨នាក់ មានតែ ២នាក់ ប៉ុណ្ណោះដែលយល់ព្រមបន្តចូលរួមយន្តការដោះស្រាយក្រៅផ្លូវការដែលសាជីវកម្មហិរញ្ញវត្ថុអន្តរជាតិស្នើឡើង។ ចំណែកអ្នកដាក់ពាក្យបណ្ដឹង ១៦នាក់ ទៀតបានបដិសេធ គ្មានទំនុកចិត្ត និងសុចរិតភាពរបស់សាជីវកម្មហិរញ្ញវត្ថុអន្តរជាតិ បន្ទាប់ពីស្ថាប័នហិរញ្ញវត្ថុអន្តរជាតិមួយនេះ មិនទទួលស្គាល់ការរកឃើញរបស់យន្តការគណនេយ្យភាពឯករាជ្យ (CAO) របស់ខ្លួន។
សេចក្ដីថ្លែងការណ៍របស់អង្គការលីកាដូធ្វើឡើងបន្ទាប់ពី ក្រុមប្រឹក្សាភិបាលរបស់ធនាគារពិភពលោក កាលពីខែមិថុនា បានច្រានចោលការរកឃើញរបស់ស្ថាប័នទទួលពាក្យបណ្តឹងឯករាជ្យរបស់ខ្លួនគឺការិយាល័យភាពអនុលោមទីប្រឹក្សាដោះស្រាយវិវាទ (CAO) ដែលចេញផ្សាយរបាយការណ៍ស៊ើបអង្កេតកម្រាស់ ១៨៨ទំព័រដែលរៀបរាប់ពីផលប៉ះពាល់ជាប្រព័ន្ធ និងទូលំទូលាយក្នុងវិស័យមីក្រូហិរញ្ញវត្ថុកម្ពុជា ពាក់ព័ន្ធនឹងការខកខានរបស់សាជីវកម្មហិរញ្ញវត្ថុអន្តរជាតិ (IFC) ដែលមិនបានអនុវត្តតាមគោលនយោបាយរបស់ខ្លួន។
យន្តការគណនេយ្យភាពឯករាជ្យ (CAO) សាជីវកម្មហិរញ្ញវត្ថុអន្តរជាតិ (IFC) បានចាត់វិធានការស៊ើបអង្កេតជាច្រើនឆ្នាំរហូតដល់ចុងឆ្នាំ២០២៥ បន្ទាប់ពីបានទទួលពាក្យបណ្តឹងពីអង្គការលីកាដូ និងអង្គការសមធម៌កាលពីឆ្នាំ២០២២ ដែលតំណាងឱ្យជនរងគ្រោះ ១៨នាក់រងផលប៉ះពាល់បន្ទាប់ពីខ្ចីប្រាក់ពីគ្រឹះស្ថានមីក្រូហិរញ្ញវត្ថុនៅកម្ពុជា។
របាយការណ៍ស៊ើបអង្កេតរបស់យន្តការគណនេយ្យភាពឯករាជ្យ (CAO) របស់សាជីវកម្មហិរញ្ញវត្ថុអន្តរជាតិ (IFC) រកឃើញថា ការផ្តល់ និងប្រមូលបំណុលក្នុងវិស័យមីក្រូហិរញ្ញវត្ថុកម្ពុជាបានបង្កផលប៉ះពាល់ជាច្រើនដល់អ្នកខ្ចីប្រាក់ដែលងាយរងគ្រោះ រួមមានការបាត់បង់ដីធ្លី និងទ្រព្យសម្បត្តិ ការធ្លាក់ចុះជីវភាពក្នុងគ្រួសារ កង្វះស្បៀងអាហារ បញ្ហាសុខភាព ការរំខានដល់ការសិក្សារបស់កុមារ និងការគំរាមកំហែង ឬការសងសឹកពាក់ព័ន្ធនឹងការទារបំណុល។ លើសពីនេះ ផលប៉ះពាល់ខ្លះក៏ធ្ងន់ធ្ងរជាពិសេសចំពោះជនជាតិដើមភាគតិច ដែលពាក់ព័ន្ធនឹងការបាត់បង់ដីសហគមន៍ អត្តសញ្ញាណ និងបូរណភាពវប្បធម៌។
គ្រឹះស្ថានមីក្រូហិរញ្ញវត្ថុ និងធនាគារចំនួន ៦ដែលយន្តការគណនេយ្យភាពឯករាជ្យបានស៊ើបអង្កេត និងរកឃើញថា បានរំលោភបំពានសិទ្ធិមនុស្ស និងបទដ្ឋានអនុវត្តស្តង់ដារលើប្រាក់កម្ចីឥណទាននៅកម្ពុជារួមមាន ធនាគារ អេស៊ីលីដា ធនាគារហត្ថា ធនាគារស្ថាបនា គ្រឹះស្ថាន មីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុ អិលអូអិល ស៊ី និងគ្រឹះស្ថានមីក្រូហិរញ្ញវត្ថុ ប្រាសាក់ ។ ស្ថាប័នទាំង ៦នេះ បានរួមគ្នាកាន់កាប់ប្រាក់កម្ចីខ្នាតតូចទូទាំងប្រទេសច្រើនជាង ៧៥ភាគរយ។
អង្គការលីកាដូលើកឡើងថា តាមគោលនយោបាយរបស់សាជីវកម្មហិរញ្ញវត្ថុអន្តរជាតិនៅពេលយន្តការគណនេយ្យភាពឯករាជ្យរបស់ខ្លួន រកឃើញការមិនអនុលោមតាមគោលការណ៍ សាជីវកម្មហិរញ្ញវត្ថុអន្តរជាតិគួរតែរៀបចំផែនការសកម្មភាពគ្រប់គ្រង ដើម្បីដោះស្រាយ និងផ្ដល់សំណងចំពោះផលប៉ះពាល់ដែលកើតឡើង។ ប៉ុន្តែក្នុងករណីនេះសាជីវកម្មហិរញ្ញវត្ថុអន្តរជាតិបែរជាច្រានចោល និងអនុវត្តផ្ទុយពីគោលការណ៍ស្នូលរបស់ខ្លួនទៅវិញ។
នាយិកាទទួលបន្ទុកកិច្ចការក្រៅតំបន់នៃអង្គការលីកាដូ អ្នកនាង ណាលី ពីឡូក មានប្រសាសន៍ក្នុងសេចក្ដីថ្លែងការណ៍រួមថា ការបាត់បង់ទំនុកចិត្តរបស់អ្នកដាក់ពាក្យបណ្ដឹងគឺមិនមែនជារឿងគួរឱ្យភ្ញាក់ផ្អើលឡើយ ព្រោះសាជីវកម្មហិរញ្ញវត្ថុអន្តរជាតិ IFC បានបង្ហាញជាសាធារណៈថា ខ្លួនមិនយកចិត្តទុកដាក់ចំពោះយន្តការត្រួតពិនិត្យ និងគណនេយ្យភាពឯករាជ្យរបស់ខ្លួន។ អ្នកស្រីថា ការសម្រេចចិត្តនេះគឺជាភាពអាម៉ាស់របស់ធនាគារពិភពលោក។
អង្គការលីកាដូក៏អះអាងថា ការសម្រេចចិត្តរបស់សាជីវកម្មហិរញ្ញវត្ថុអន្តរជាតិបានធ្វើឱ្យអ្នកដាក់ពាក្យបណ្ដឹងភាគច្រើន មិនទទួលបានការដោះស្រាយក្នុងទម្រង់ណាមួយឡើយ និងចាត់ទុកថា នេះជាលទ្ធផលដ៏ក្រៀមក្រំ នៃដំណើរការបណ្ដឹងដែលបានអូសបន្លាយអស់រយៈពេលជាច្រើនឆ្នាំ។ ការសម្រេចរបស់សាជីវកម្មហិរញ្ញវត្ថុអន្តរជាតិ (IFC) ក៏បានបង្កឱ្យមានការរិះគន់ និងថ្កោលទោសពីក្រុមសិទ្ធិមនុស្ស អង្គការមិនមែនរដ្ឋាភិបាល និងអ្នកស្រាវជ្រាវផ្នែកមីក្រូហិរញ្ញវត្ថុជាង ១០០ស្ថាប័ន។
ជុំវិញរឿងនេះដែរ នាយកទទួលបន្ទុកកិច្ចការទទួលនៃអង្គការសិទ្ធិមនុស្សលីកាដូ (LICADHO) លោក អំ សំអាត ប្រាប់ទូរទស្សន៍អាស៊ីសេរីថា ការសម្រេចរបស់សាជីវកម្មហិរញ្ញវត្ថុអន្តរជាតិ (IFC) ច្រានចោលរបាយការណ៍ស៊ើបអង្កេតរបស់យន្តការគណនេយ្យភាពឯករាជ្យ (CAO) របស់ខ្លួនគឺជា ជាគេចវេះទទួលខុសត្រូវ និងមិនបានផ្ដល់ដំណោះស្រាយសម្រាប់ជនជាតិភាគតិចដែលរងផលប៉ះពាល់ និងកូនបំណុលដែលរងគ្រោះពីគ្រឹះស្ថានហិរញ្ញវត្ថុនៅកម្ពុជាឡើយ។ «»
គិតត្រឹមចុងឆ្នាំ២០២៥ មានពលរដ្ឋខ្មែរជាង ៥លាននាក់ខ្ចីបំណុលធនាគារ និងគ្រឹះស្ថានហិរញ្ញវត្ថុក្នុងទំហំទឹកប្រាក់ជាង ៦២ពាន់លានដុល្លារ។ នេះបើយោងតាមទិន្នន័យការិយាល័យព័ត៌មានឥណទានកម្ពុជា (CBC)។
អង្គការលីកាដូ ធ្លាប់រកឃើញថា វិស័យមីក្រូហិរញ្ញវត្ថុនៅកម្ពុជាកំពុងធ្វើឱ្យមានការរំលោភសិទ្ធិមនុស្សជាប្រព័ន្ធនៅក្នុងភូមិជាច្រើន។ អង្គការលីកាដូឱ្យដឹងទៀតថា ពលរដ្ឋដែលជាកូនបំណុលបានបង្ខំចិត្ត ខ្ចីលុយពីអ្នកចងការឯកជន កាត់បន្ថយអាហារបរិភោគ លក់ទ្រព្យសម្បត្តិ ដីធ្លីផ្ទះសម្បែង ហើយបំណុលនេះក៏បង្កឱ្យមានពលកម្មកុមារ កុមារបោះបង់ការសិក្សា ភាពតានតឹងនៅក្នុងគ្រួសារ បញ្ហាដំណេក និងការធ្វើចំណាកស្រុកជាដើម៕
