ការប្រឡងបាក់ឌុបឆ្នាំ ២០២៦ បានចាប់ផ្ដើមនៅព្រឹកថ្ងៃទី១០ សីហា ដោយមានបេក្ខជនជាង ១៥ម៉ឺននាក់ (១៥១.២៣៨)នាក់ ក្នុងនោះថ្នាក់វិទ្យាសាស្ត្រាមានជាង ៣ម៉ឺន៧ពាន់នាក់ និងថ្នាក់វិទ្យាសាស្ត្រសង្គមជាង ១៣ម៉ឺននាក់។
ទោះជាយ៉ាងណា ក្រសួងអប់រំ យុវជន និងកីឡា បញ្ជាក់ថា ក្នុងចំណោមបេក្ខជនជាង១៥ម៉ឺននាក់នោះ មានបេក្ខជនអវត្តមានចំនួន ១.៣១៤នាក់ និងមានបេក្ខជនចំនួន១២១នាក់ មានបញ្ហាសុខភាព ហើយក្នុងនោះ១២នាក់ បានបោះបង់ការប្រឡង និងមានបេក្ខជនមានជំងឺគ្រុនឈាម ចំនួន៤១នាក់ ព្រមទាំងមានបេក្ខជនជួបគ្រោះថ្នាក់ចរាចរណ៍បណ្តាលឲ្យរងរបួសចំនួន៧នាក់។ ក្រៅពីនេះ គណៈមេប្រយោគចំនួន ២៨នាក់ ក៏មានបញ្ហាសុខភាពដែរ។ ទោះបីជាបេក្ខជនខ្លះ មានបញ្ហាសុខភាពក៏ដោយ ក្រសួងអប់រំ នៅតែបន្តឲ្យពួកគេប្រឡងដដែល ប៉ុន្តែក្រោមការតាមដានមើលថែពីក្រុមគ្រូពេទ្យ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានថ្លែងនៅក្នុងពិធីបើកការប្រឡងនៅរាជធានីភ្នំពេញ ថា ការប្រឡងបាក់ឌុបឆ្នាំនេះមានសភាពល្អប្រសើរជាងឆ្នាំមុន ក្រោមហេតុផលថា សង្គ្រាមតាមព្រំដែន បានស្ងប់ស្ងាត់ ។ ប៉ុន្តែលោក បញ្ជាក់ថា មកទល់បច្ចុប្បន្ននេះ មានសាលាចំនួន ២៥ នៅខេត្តជាប់ព្រំដែននៅតែបន្តបិទទ្វារ ដែលសិស្សមិនទាន់អាចត្រឡប់ទៅរៀនវិញបាន ដោយសារសង្គ្រាមឈ្លានពានរបស់ថៃ។ លោក ហង់ ជួនណារ៉ុន អះអាងថា រដ្ឋាភិបាល នៅតែបន្តទាមទារឲ្យសិស្សនៃសាលាទាំងអស់អាចត្រឡប់ទៅរៀនវិញបាន។ បន្ថែមពីនេះ រដ្ឋមន្ត្រីក្រសួងអប់រំ បញ្ជាក់ថា ការប្រឡង់បាក់ឌុបនេះ នឹងមិនអនុញ្ញាតឲ្យមានអំពើពុករលួយកើតឡើងនោះទេ ព្រោះមានការរៀបចំត្រឹមត្រូវ ការរឹតបន្តឹង និងមានការចូលរួមឃ្លាំមើលពីភាគីពាក់ព័ន្ធ ជាពិសេសអង្គភាពប្រឆាំងអំពើពុករលួយបានដាក់ពង្រាយភ្នាក់ងារត្រួតពិនិត្យជាង ៤ពាន់នាក់។
ការប្រឡងបាក់ឌុបនេះ នឹងប្រព្រឹត្តទៅរយៈពេលមួយថ្ងៃទៀត គឺនៅថ្ងៃទី១១ ខែសីហា។ ក្រោយការប្រឡងរួច ក្រសួងអប់រំ នឹងប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស៕
