កម្មករ កម្មការិនីរោងចក្រឈាន ស៊ីង ហ្សី ឈ័ន លេហ្សឺរ ប្រដាក់ (ខេមបូឌា) (Quan Xing ZhiChuang Leisure) ប្រមាណជិត៦០នាក់ ធ្វើដំណើរតាមម៉ូតូ និងរ៉ឺម៉កកង់បី ពីខេត្តកំពង់ស្ពឺឡើងមកប្រមូលផ្តុំគ្នានៅមុខក្រសួងការងារ ដើម្បីដាក់ញត្តិទាមទារលក្ខខណ្ឌការងារ និងឲ្យក្រសួងជំរុញឲ្យក្រុមហ៊ុនទទួលយកថ្នាក់ដឹកនាំសហជីព៣រូប ចូលធ្វើការវិញ។ មន្ត្រីផ្នែកសិទ្ធិកម្មករ និងការងារ ទទូចឲ្យក្រសួង គួរដោះស្រាយបញ្ហានេះឲ្យបានឆាប់រហ័ស ដើម្បីឲ្យកម្មករ អាចចូលធ្វើការវិញបានឆាប់រហ័ស និងមិនមានភាពភ័យខ្លាចនៅកន្លែងការងារ។
កម្មករជាច្រើនប្រមូលផ្តុំគ្នានៅមុខក្រសួងការងារ និងបណ្តុះបណ្តាលវិជ្ជាជីវៈ ធ្វើកូដកម្ម ទាមទារឲ្យក្រសួងជួយរកដំណោះស្រាយករណីរោងចក្រឈាន ស៊ីង ហ្សី ឈ័ន លេហ្សឺរ ស្ថិតនៅឃុំមហាសាំង ស្រុកភ្នំស្រួច ខេត្តកំពង់ស្ពឺ បានបញ្ឈប់សហជីពមូលដ្ឋាន៣រូប និងរំលោភលើសិទ្ធិរបស់កម្មករ។ ក្រុមកម្មករ បានទាមទារឲ្យភាគីរោងចក្រផ្តល់លក្ខខណ្ឌការងារ៨ចំណុច។ ក្រុមហ៊ុននេះ ជារោងចក្រផលិតតុក្កតាសម្រាប់នាំចេញទៅកាន់សហរដ្ឋអាមេរិក។
លក្ខខណ្ឌការងារទាំង៨ចំណុចនោះ រួមមាន ក្រុមហ៊ុនត្រូវទទួលយកថ្នាក់ដឹកនាំសហជីព៣រូបចូលធ្វើការវិញ ស្នើសុំឲ្យបញ្ឈប់រដ្ឋបាលចេញពីការងារ ដោយសារការប្រើពាក្យសម្ដី កាយវិការមិនសមរម្យលើកម្មករ ការធ្វើការបន្ថែមម៉ោងត្រូវស្ថិតលើគោលការណ៍ស្ម័គ្រចិត្ត ក្រុមហ៊ុនត្រូវរៀបចំឲ្យមានពេទ្យប្រចាំការក្នុងរោងចក្រ ក្រុមហ៊ុនត្រូវសម្រួលចំពោះការសុំច្បាប់របស់កម្មករ អនុវត្តគោលការណ៍រដ្ឋបាលលើសោហ៊ុយធ្វើដំណើរចំនួន ២.៥ដុល្លារ និងត្រូវសងរំលឹកចំពោះការមិនបានអនុវត្តជូនកម្មករវិញជាដើម។
តំណាងក្រសួងការងារ លោក រិន វណ្ណៈ បានចេញមកទទួលញត្តិរបស់សហជីព និងកម្មករ ហើយអនុញ្ញាតឲ្យពួកគាត់ចូលជួបដើម្បីសួរនាំពីដំណើររឿងផងដែរ។ លោកបានអះអាងប្រាប់កម្មករ និងសហជីពថា ក្រសួងនឹងដោះស្រាយករណីនេះ ឲ្យបានឆាប់រហ័ស មិនឲ្យកម្មកររង់ចាំយូរនោះទេ។
កម្មការិនីនៅក្នុងរោងចក្រលោកស្រី ឃីម សុខរ៉េន ប្រាប់ទូរទស្សន៍អាស៊ីសេរីថា កន្លងមក កម្មករជួបការលំបាកជាច្រើន ដូចជាពេលឈឺថ្កាត់ពុំមានពេទ្យសង្គ្រោះបឋម រដ្ឋបាលក្រុមហ៊ុនបង្កការលំបាកក្នុងការដាក់ច្បាប់ឈប់សម្រាកដោយត្រូវស្នើសុំឯកសារច្រើនកន្លែង រងការប្រមាថមើលងាយមិនឲ្យតម្លៃពីសំណាក់រដ្ឋបាល ការកាត់ប្រាក់ថ្លៃធ្វើកាតសម្គាល់មិនសមរម្យ និងរងសម្ពាធនៅកន្លែងការងារជាដើម។ លោកស្រីថា លោកស្រី និងកម្មករផ្សេងទៀតរងការគំរាមកំហែងឥតឈប់ឈរពីខាងរដ្ឋបាលក្រុមហ៊ុន ហើយថា រដ្ឋបាលធ្វើតាមទំនើងចិត្តរបស់ខ្លួនគាបសង្កត់កម្មករដោយមិនខ្វល់ពីអារម្មណ៍របស់កម្មករឡើយ។ លោកស្រីអះអាងថា រដ្ឋបាលក្រុមហ៊ុន បានភូតភរ បំភ្លៃការពិតចំពោះកម្មករក្នុងក្រុមហ៊ុនផ្សេងទៀត មិនឲ្យដឹងការពិតពីការតវ៉ានេះ និងយកកម្មករក្រៅជំនួសកម្មករដែលកំពុងតវ៉ាជាដើម។
លោកស្រី ឃីម សុខរ៉េន៖ «បើសិនជាបងៗខាងសហជីពគាត់ចេញបាត់ពួកខ្ញុំក៏រងនូវការគេបញ្ឈប់ពីការងារដូចគ្នា រងភាពអយុត្តិធម៌ដូចដើមព្រោះវាប្រវត្តិសាស្ត្រច្រំដែលហាស៎ មិនមែនម្តងទេបង គាត់តែងតែបញ្ឈប់ថ្នាក់ដឹកនាំដូចជា Sup ដូចជាប្រធានហើយគាត់ប្រើវិធានការដដែលៗថា ម្នាក់ហ្នឹង បុគ្គលហ្នឹងនាំបះបោរនាំកូដកម្ម គាត់តែងតែប្រើពាក្យដដែលៗជារឿយៗពេលដែលគាត់ចង់បញ្ឈប់នរណាម្នាក់»។
កាលពីថ្ងៃទី២៧ កក្កដា រោងចក្រឈាន ស៊ីង ហ្សី ឈ័ន លេហ្សឺរ ដែលមាននាយកក្រុមហ៊ុន ឈ្មោះ រួយ លីន (RUI LIN) ជាជនជាតិចិន បានព្យួរការងារតំណាងសហជីពមូលដ្ឋាន ៣រូប រួមមាន អ្នកស្រី អ៊ុក ស្រីនាង ប្រធានសហជីពអំណាចយុវជនកម្ពុជា លោក ខុន សុខចាន់ អនុប្រធានសហជីព និងលោក ឆៃ ថិត គណៈកម្មការសហជីព។ ក្រុមហ៊ុន បានលើកឡើងថា កម្មករជាច្រើនបានប្តឹងពួកគាត់ និងចោទថា ពួកគាត់បានដើរញុះញង់ និងរារាំងកម្មករមិនឲ្យធ្វើការបន្ថែមម៉ោង ហើយបានដឹកនាំកម្មករធ្វើកូដកម្មខុសនីតិវិធី ដែលធ្វើឲ្យខូចប្រយោជន៍ដល់កម្មករដទៃ។
ប្រធានសហជីពមូលដ្ឋាន និងជាកម្មការិនីនៅក្នុងរោងចក្រ អ្នកស្រី អ៊ុក ស្រីនាង រៀបរាប់ទាំងអួលដើមកថា អ្នកស្រីយល់ថា នេះជារឿងអយុត្តិធម៌ជាខ្លាំង ហើយថាកម្មករមិនបានពេញចិត្ត និងគាំទ្រទង្វើនេះឡើយ។ អ្នកស្រីថា រដ្ឋបាលក្រុមហ៊ុន បានបោកបញ្ឆោតកម្មករ ដោយប្រមូលស្នាមមេដៃ និងអត្ថលេខពីកម្មករម្តងម្នាក់ហើយកុហកពួកគាត់ថា ថៅកែជាជនជាតិចិនឲ្យផ្ដិត ដើម្បីបើកប្រាក់ខែ ឬប្រាក់រង្វាន់នៅចុងខែជាដើម។ អ្នកស្រីថា រដ្ឋបាលបានយកស្នាមមេដៃនោះ ដើម្បីទម្លាក់អ្នកស្រី និងសមាជិកពីររូបទៀត ដែលបានឈរឈ្មោះជាសហជីព។
មិនតែប៉ុណ្ណោះ អ្នកស្រី អ៊ុក ស្រីនាង ថា ខាងក្រុមហ៊ុនបានដាក់មនុស្សឲ្យមកឃ្លាំមើល និងសួរនាំអ្នកស្រីនិងកម្មករផ្សេងទៀត បំណងមិនឲ្យឡើងមកដាក់ញត្តិនៅក្រសួងការងារ ប៉ុន្តែអ្នកស្រីបានកុហកពួកគេ ទើបលោកស្រីអាចឡើងមកក្រសួងការងារបានដោយជោគជ័យ។ អ្នកស្រីរៀបរាប់ទៀតថា ក្រោយកម្មករត្រឡប់ទៅផ្ទះវិញ ខាងក្រុមហ៊ុន បានទូរស័ព្ទទៅគំរាមកម្មករ ដោយបញ្ឈប់ពីការងារ ក្រោយពួកគាត់ដាក់ញត្តិនៅក្រសួងរួច។
អ្នកស្រី អ៊ុក ស្រីនាង៖ «សារមុនកម្មករដួលសន្លប់ ខ្ញុំយកទៅពេទ្យឯកជន ហើយខុសខ្ញុំទៀតផ្នែករដ្ឋបាលហ្នឹងគាត់ជេរខ្ញុំ គាត់ថា ឲ្យខ្ញុំសុទ្ធតែអត់ខួរគិតម៉េចក៏ត្រូវយកទាំងគាត់នៅខាងក្រៅ គាត់អត់ដឹងថា កម្មករនៅលើដៃខ្ញុំហ្នឹងនិយាយទៅគាត់សន្លប់ទេ។ តែខាងក្រុមហ៊ុនក៏តេមកកម្មករដែរថា បើសិនជាកម្មករមិនចូលធ្វើការស្អែកត្រូវតែបញ្ឈប់ចោលដែលកម្មករទាំងអស់ហ្នឹងហាស៎ អញ្ចឹងពួកខ្ញុំរឹតតែរងាទៀតហ្មងដោយសារអត់ដោះស្រាយរឿងហើយតេមកគំរាមកំហែងពួកខ្ញុំទៀត»។
ទូរទស្សន៍អាស៊ីសេរី មិនអាចទាក់ទងរដ្ឋបាលក្រុមហ៊ុនឈាន ស៊ីង ដើម្បីឆ្លើយបំភ្លឺពីករណីនេះបានឡើយ នៅថ្ងៃទី៣០ កក្កដានេះ ដោយទូរស័ព្ទចុចមិនចូល។
ចំណែក អនុប្រធានសហព័ន្ធសហជីពអំណាចយុវជន លោក ប៉ៃ បូរ៉ា ថ្លែងថា ក្រុមហ៊ុន បានបញ្ឈប់ពួកគាត់ គឺក្រោយពេលដែលពួកគាត់ទាំងបីបានចូលជាសហជីពមូលដ្ឋានកាលពីថ្ងៃទី២២ កក្កដា ដែលលោកយល់ថា នេះ គឺជាការរើសអើងសម្រាប់សហជីពទាំងបី។ លោកថា ក្រុមហ៊ុន មិនបានផ្តល់ថ្លៃធ្វើដំណើរ ២.៥ដុល្លារ តាមអនុសាសន៍របស់រាជរដ្ឋាភិបាលដែលបានកំណត់ឲ្យក្រុមហ៊ុនត្រូវផ្តល់ឲ្យកម្មករនោះឡើយ ចាប់តាំងពីខែមេសាមក ដែលធ្វើឲ្យកម្មករខាតបង់អត្ថប្រយោជន៍នេះទាំងអស់។ លោកបន្តថា ភាគីក្រុមហ៊ុនបានប្រកាន់ជំហរមិនផ្តល់ប្រាក់ថ្លៃធ្វើដំណើរនេះជូនកម្មករឡើយ ហើយមិនទទួលយកសហជីពទាំង៣ចូលធ្វើការវិញដែលជាហេតុនាំឲ្យកម្មករធ្វើកូដកម្មនៅមុខរោងចក្រនិងក្រសួងការងារ។
លោកទទូចឲ្យក្រសួងជំរុញទៅខាងក្រុមហ៊ុន ឲ្យបញ្ឈប់ការរើសអើង និងដោះស្រាយជូនកម្មករឲ្យបានឆាប់រហ័សដើម្បីកុំឲ្យកម្មករខាតបង់អត្ថប្រយោជន៍ច្រើន ក្រោយកូដកម្មនេះ។
លោក ប៉ៃ បូរ៉ា៖ «ខ្ញុំមានតែពឹងផ្អែកលើស្មារតីច្បាប់ពឹងខាងក្រសួងការងារឲ្យគាត់មានការអន្តរាគមន៍មួយទៅលើខាងនិយោជកឲ្យគាត់គោរពច្បាប់។ បងប្អូនកម្មករគាត់កើតទុកមិនសុខចិត្តគាត់មករកខាងក្រសួងការងារឲ្យជួយរកដំណោះស្រាយឲ្យពួកគាត់»។
កម្មកររោងចក្រឈាន ស៊ីង ហ្សី ឈ័ន លេហ្សឺរ បានធ្វើកូដកម្មនៅមុខរោងចក្រចំនួន២ថ្ងៃមកហើយ គឺនៅថ្ងៃទី២៨ និងទី២៩ កក្កដា ដើម្បីទាមទារឲ្យក្រុមហ៊ុន ទទួលយកសហជីពទាំង៣ចូលធ្វើការវិញ។ មន្ត្រីក្រសួងការងារ និងបណ្តុះបណ្តាលវិជ្ជាជីវៈ ខេត្តកំពង់ស្ពឺបានចុះទៅសម្របសម្រួលជាមួយកម្មករនិងភាគីក្រុមហ៊ុនដែរ ប៉ុន្តែភាគីទាំងពីរនៅតែប្រកាន់ជំហររៀងខ្លួននិងដាច់ខាតដោយភាគីកម្មករចង់ឲ្យភាគីរោងចក្រទទួលយកថ្នាក់ដឹកនាំសហជីពទាំង៣នាក់ ចូលធ្វើការងារវិញ ទើបព្រមចរចា ខណៈភាគីរោងចក្រមានជំហរថា មិនទទួលយកថ្នាក់ដឹកនាំសហជីពនោះចូលធ្វើការងារវិញទេ ទើបក្រុមកម្មករសម្រេចចិត្តមកដាក់ញត្តិនៅក្រសួងការងាររាជធានីភ្នំពេញ។
ក្រុមកម្មករប្ដេជ្ញាថា មិនទាន់ចូលធ្វើការវិញឡើយ ដរាបណាលក្ខខណ្ឌទាំងនោះមិនត្រូវបានដោះស្រាយ ហើយពួកគាត់នឹងបន្តស្វែងរកនីតិវិធីច្បាប់ទៅមុខទៀតផងដែរ៕
