អ្នកឃ្លាំមើលរំពឹងថា ឯកអគ្គរដ្ឋទូតសហរដ្ឋអាមេរិកថ្មីប្រចាំកម្ពុជា នឹងបន្តដាក់សម្ពាធលើរដ្ឋាភិបាលលោក ហ៊ុន ម៉ាណែត កាន់តែខ្លាំងជាងមុនឱ្យបង្ក្រាបមេខ្លោងធំៗដែលពាក់ព័ន្ធនឹងឧក្រិដ្ឋកម្មឆបោកតាមអនឡាញ។ ទោះជាយ៉ាងណា ពួកគាត់លើកឡើងថា ឧក្រិដ្ឋកម្មនេះបានចាក់ឫសយ៉ាងជ្រៅនៅកម្ពុជា ហើយការបង្ក្រាបមេខ្លោងធំៗទាំងនោះគឺអាស្រ័យលើឆន្ទៈនយោបាយរបស់លោក ហ៊ុន ម៉ាណែត ដោយសារតែពួកគេជាឥស្សរជននយោបាយក្នុងជួរបក្សកាន់អំណាច។ ការលើកឡើងនេះ ធ្វើឡើងបន្ទាប់ពីបេក្ខភាពឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក គ្រីស្តូហ្វ័រ អាន់ដឺសុន (Christopher Anderson) ដែលត្រូវបានប្រធានាធិបតី ដូណាល់ ត្រាំ (Donald Trump) តែងតាំងប្ដេជ្ញាថា ប្រសិនបើព្រឹទ្ធសភាអាមេរិកអនុម័តការតែងតាំងលោកពេញសិទ្ធិ យុទ្ធសាស្ត្រអាទិភាពចម្បងទីមួយរបស់លោកគឺការប្រយុទ្ធប្រឆាំងនឹងឧស្សាហកម្មឆបោកតាមអនឡាញ ដែលបានបោកយកប្រាក់ពីពលរដ្ឋអាមេរិកអស់រាប់សិបពាន់លានដុល្លារជារៀងរាល់ឆ្នាំ។
អ្នកជំនាញផ្នែកភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី ប្រាប់ទូរទស្សន៍អាស៊ីសេរីនៅថ្ងៃទី២០ ខែកក្កដាថា ការបង្ហាញជំហររបស់បេក្ខភាពឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក គ្រីស្តូហ្វ័រ អាន់ដឺសុន (Christopher Anderson) ប្រឆាំងនឹងឧក្រិដ្ឋកម្មឆបោកអនឡាញ និងឥទ្ធិពលចិននៅកម្ពុជាគឺជាសារប្រាប់រដ្ឋាភិបាលលោក ហ៊ុន ម៉ាណែតថា អាមេរិកនឹងមិនសម្លឹងមើល កម្ពុជាត្រឹមតែកង្វល់បញ្ហាលទ្ធិប្រជាធិបតេយ្យ និងបញ្ហាសិទ្ធិមនុស្សដាច់ដោយឡែកដូចមុនទៀតឡើយ។ លោកបន្តថា សហរដ្ឋអាមេរិកកំពុងប្រើយុទ្ធសាស្ត្រភ្ជាប់បញ្ហាភូមិសាស្ត្រនយោបាយ ឧក្រិដ្ឋកម្ម និងការពង្រឹងកិច្ចសហប្រតិបត្តិការសេដ្ឋកិច្ច និងសន្តិសុខ ជាកញ្ចប់តែមួយ។
លោក សេង វណ្ណលី មើលឃើញថា វត្តមានបេក្ខភាពឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក គ្រីស្តូហ្វ័រ អាន់ដឺសុន នឹងបង្កើនសម្ពាធនយោបាយ និងពង្រឹងកិច្ចសហប្រតិបត្តិការកាន់តែខ្លាំងជាងមុន ដើម្បីជំរុញឱ្យរដ្ឋាភិបាលក្រុងភ្នំពេញបង្ក្រាប និងជំរុញឱ្យចាប់មេខ្លោងសំខាន់ដែលពាក់ព័ន្ធនឹងឧក្រិដ្ឋកម្មឆបោកអនឡាញ។ ទោះជាយ៉ាងណា លោកវាយតម្លៃថា ការឈានទៅដល់ការបញ្ចប់ ឬលុបបំបាត់ឧក្រិដ្ឋកម្មដែលកំពុងចាក់ឫសយ៉ាងជ្រៅនៅកម្ពុជានេះគឺជាអាស្រ័យលើឆន្ទៈនយោបាយរបស់រដ្ឋាភិបាលលោក ហ៊ុន ម៉ាណែត ខ្លួនឯង។
លោក សេង វណ្ណលី៖ «សារដែល លោក គ្រីស្តូហ្វ័រ អាន់ដឺសុន ផ្ញើទៅកាន់រដ្ឋាភិបាលលោក ហ៊ុន ម៉ាណែត គឺច្បាស់ណាស់ថា បញ្ហាឧក្រិដ្ឋកម្ម (Cyber) និងការជួញដូរមនុស្ស មិនមែនជាបញ្ហាក្នុងស្រុករបស់កម្ពុជាទៀតទេ។ វាបានក្លាយជាបញ្ហាសន្តិសុខជាតិរបស់អាមេរិក និងជាលក្ខខណ្ឌស្នូលនៅក្នុងការកំណត់អនាគតនៃទំនាក់ទំនងទ្វេភាគី ព្រមទាំងឱកាសសេដ្ឋកិច្ចនានាជាមួយអាមេរិកផងដែរ។ ខ្ញុំយល់ថា បញ្ហាប្រឈមធំបំផុតនៅក្នុងការបង្ក្រាបពិតប្រាកដគឺបណ្ដាញឧក្រិដ្ឋកម្មនៃឧស្សាហកម្មទាំងនេះមានលក្ខណៈស្មុគស្មាញ និងមានទំនាក់ទំនងសេដ្ឋកិច្ចស៊ីជម្រៅជាមួយខ្សែបណ្ដាញដែលមានអំណាចនៅក្នុងជួរគណបក្សកាន់អំណាចដែលតែងតែរងការចោទប្រកាន់ពីរដ្ឋបរទេស ក៏ប៉ុន្តែតែរហូតដល់ពេលនេះយើងឃើញថា គ្មានចំណាត់ការណាមួយទៅលើបុគ្គលដែលត្រូវបានរកឃើញថា ជាប់ពាក់ព័ន្ធនឹងឧស្សាហកម្មឆបោក និងគាំទ្រពួកឧក្រិដ្ឋជនឆបោកទាំងនោះទេ»។
ប្រធានាធិបតីលោក ដូណាល់ ត្រាំ (Donald Trump) បានតែងតាំងលោក គ្រីស្តូហ្វ័រ អាន់ដឺសុន (Christopher Anderson) ជាបេក្ខភាពឯកអគ្គរដ្ឋទូតសហរដ្ឋអាមេរិកប្រចាំកម្ពុជា បន្ទាប់ពីអាមេរិកមិនបានបញ្ជូនឯកអគ្គរដ្ឋទូតមកកម្ពុជាក្នុងរយៈពេលពេល ជាង ២ឆ្នាំមកនេះ ក្រោយលោក ប៉ាទ្រីក ម័រហ្វី (Patrick Murphy) បញ្ចប់អាណត្តិជាឯកអគ្គរដ្ឋទូតអាមេរិកប្រចាំកម្ពុជាកាលពីខែសីហា ឆ្នាំ២០២៤។
ថ្លែងក្នុងនៅមុខសមាជិកព្រឹទ្ធសភាអាមេរិកក្នុងសវនាការគណៈកម្មការកិច្ចការបរទេសកាលពីថ្ងៃទី១៦ ខែកក្កដា បេក្ខភាពឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក គ្រីស្តូហ្វ័រ អាន់ដឺសុន (Christopher Anderson) បញ្ជាក់ជំហរថា ប្រសិនបើព្រឹទ្ធសភាអាមេរិកអនុម័តការតែងតាំងលោកជាឯកអគ្គរដ្ឋទូតកម្ពុជាពេញសិទ្ធិ យុទ្ធសាស្ត្រអាទិភាពចម្បងទីមួយរបស់លោកគឺការប្រយុទ្ធប្រឆាំងនឹងឧស្សាហកម្មឆបោកតាមអនឡាញដែលបានបោកយកលុយពីពលរដ្ឋអាមេរិកអស់រាប់សិបពាន់លានដុល្លារជារៀងរាល់ឆ្នាំ។ ក្រៅពីនេះ លោកថា នឹងពង្រឹងកិច្ចសន្ទនាជាក់ស្ដែងជាមួយលោក ហ៊ុន ម៉ាណែត ទៅលើការពង្រឹងកិច្ចសហប្រតិបត្តិការរវាងកម្ពុជា និងអាមេរិក កិច្ចសហប្រតិបត្តិការសន្តិសុខក្នុងតំបន់ និងការយកចិត្តទុកដាក់នៃបញ្ហាការពង្រីកឥទ្ធិពលចិន។
លោក គ្រីស្តូហ្វ័រ អាន់ដឺសុន លើកឡើងថា ទោះបីជាមិនអាចលុបបំបាត់ឧក្រិដ្ឋកម្មឆបោកតាមអនឡាញបានទាំងស្រុងក៏ដោយ ប៉ុន្តែលោកជឿថា ការកាត់ផ្ដាច់បណ្ដាញ និងចាប់ខ្លួនមេខ្លោងសំខាន់ៗ អាចរួមចំណែកកាត់បន្ថយការឆបោកជនរងគ្រោះតាមអនឡាញ ព្រមទាំងការជួញដូរមនុស្ស និងការកេងប្រវ័ញ្ចកម្លាំងពលកម្មនៅតាមមជ្ឈមណ្ឌលឆបោកទាំងនោះបានមួយកម្រិត។
ជុំវិញរឿងនេះដែរ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ស្វាគមន៍ដែលសហរដ្ឋអាមេរិកសម្រេចតាំងឯកអគ្គរដ្ឋទូតថ្មីប្រចាំកម្ពុជា។ លោកចង់ឃើញវត្តមានឯកអគ្គរដ្ឋទូតអាមេរិកថ្មីប្រចាំកម្ពុជា បន្តដាក់សម្ពាធឱ្យកាន់តែខ្លាំងក្លាលើរដ្ឋាភិបាលកម្ពុជា ដើម្បីឱ្យដឹកនាំប្រទេសតាមគន្លងប្រជាធិបតេយ្យ និងការគោរពសិទ្ធិមនុស្ស។
លោក ស៊ឹង សែនករុណា យល់ឃើញថា ចំណាត់ការដាក់ទណ្ឌកម្មរបស់អាមេរិកលើមន្ត្រីបុគ្គលពាក់ព័ន្ធ និងរដ្ឋាភិបាលក្រុងភ្នំពេញកន្លងមកនេះ មិនទាន់មានប្រសិទ្ធភាពគ្រប់គ្រាន់នៅឡើយ ដែលធ្វើឱ្យរដ្ឋាភិបាលក្រុងភ្នំពេញដឹកនាំប្រទេសបែបជិះសេះលែងដៃ ផ្ដេកផ្ដួលលើប្រទេសចិន និងអនុញ្ញាតឱ្យកើតមានអំពើឧក្រិដ្ឋកម្មឆបោកអនឡាញរីករាលដាលពាសពេញប្រទេស។
លោក ស៊ឹង សែនករុណា៖ «វាគឺជាឫសគល់មួយដែលធ្វើឱ្យប្រទេសកម្ពុជាធ្លាក់ទៅរកការដឹកនាំមួយតាមបែបផ្ដាច់ការ ឬកុម្មុយនិស្ត។ ក្នុងកាលៈទេសៈនោះយើងឃើញថា មានការចាត់វិធានការខ្លះដែរពីសហរដ្ឋអាមេរិកដូចជារឿងការដកនូវជា (GSP) ខាងអឺរ៉ុបដក (EBA) ក៏ប៉ុន្តែវិធានការនេះដូចជាអត់ឆ្លើយតបជាវិជ្ជមានទេ ផ្ទុយទៅវិញរដ្ឋាភិបាលបច្ចុប្បន្នរឹតតែផ្គើនទៅទៀត នៅតែបន្តរំលោភបំពានទៅលើសិទ្ធិមនុស្ស ទៅលើសិទ្ធិកម្មករ ទៅលើសេរីភាពសារព័ត៌មាន បណ្ដែតបណ្ដោយឱ្យប្រទេសធ្លាក់នៅក្នុងអំពើពុករលួយ អយុត្តិធម៌សង្គម ហើយបណ្ដែតបណ្ដោយឱ្យជនបរទេសមករកស៊ីប្រព្រឹត្តនូវបទឧក្រិដ្ឋកម្មឆ្លងដែន ការជួញដូរមនុស្ស លាងលុយកខ្វក់ ការឆបោកអនឡាញដ៏ល្បីល្បាញនេះដែលប៉ះពាល់ទៅដល់កេរ្តិ៍ឈ្មោះ និងកិត្តិយសប្រទេសមែនទែន»។
អ្នកជំនាញផ្នែកភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី លើកឡើងថា ការតែងតែឯកអគ្គរដ្ឋទូតថ្មីប្រចាំកម្ពុជាក្រោមរដ្ឋបាលលោក ដូណាល់ ត្រាំ នឹងធ្វើឱ្យទំនាក់ទំនងកម្ពុជា និងអាមេរិកមានរូបភាពជាក់ស្ដែងជាងមុន។ លោកថា ក្នុងនោះកិច្ចសហប្រតិបត្តិការសន្តិសុខ និងការអនុវត្តច្បាប់នឹងក្លាយជាយុទ្ធសាស្ត្រស្ទាបស្ទង់ដ៏សំខាន់របស់អាមេរិក ដើម្បីបើកឱកាសឱ្យកម្ពុជាទទួលបានប្រយោជន៍ពាណិជ្ជកម្ម។ ផ្ទុយទៅវិញលោកថា បើរដ្ឋាភិបាល លោក ហ៊ុន ម៉ាណែត នៅតែមិនបង្ហាញឆន្ទៈ ឬចាប់មេខ្លោងដែលជាឥស្សរជននៅពីក្រោយអំពើឧក្រិដ្ឋកម្មនោះទំនាក់ទំនងរវាងកម្ពុជា និងអាមេរិក នឹងបន្តរកាំរកូសកាន់តែខ្លាំងជាងមុនបន្ថែមទៀត៕
