ស្នងការរងខេត្តបន្ទាយមានជ័យម្នាក់ស្នើក្រសួងមហាផ្ទៃ ឱ្យផ្ដល់យុត្តិធម៌ដល់ខ្លួន និងកងកម្លាំងជួរមុខ ២០នាក់ទៀត ដែលត្រូវស្នងការចោទប្រកាន់ និងគំរាមដាក់ទោសថា បានរត់ចោលសមរភូមិប្រយុទ្ធ ដែលពួកគេថា ជាការបំបាក់ទឹកចិត្តយ៉ាងខ្លាំងដល់អ្នកប្រឈមស្លាប់រស់នៅសមរភូមិមុខ ពីការពារការឈ្លានពានរបស់ថៃ។
ស្នងការរងនៃស្នងការដ្ឋាននគរបាលខេត្តបន្ទាយមានជ័យលោកវរសេនីយ៍ទោ សាន សុវណ្ណរី បានសរសេររៀបរាប់លើហ្វេសប៊ុករបស់ខ្លួនកាលពីថ្ងៃទី២១ មករា ថា លោកបានរងការចោទប្រកាន់មួលបង្កាច់លាបពណ៌ញុះញង់ឱ្យមានការរើសអើង គំរាមកំហែងវាយខ្នោះទាំងអស់គ្នា ពីសំណាក់ស្នងការខេត្តបន្ទាយមានជ័យ លោក សិទ្ធិ ឡោះ ថា លោកនឹងមន្ត្រីក្រោមបង្គាប់រត់ចោលសមរភូមិ។
លោក សាន សុវណ្ណរី អះអាងថា ការចោទប្រកាន់នេះ មិនទាំងដែលបានសួរនាំរកការពិត ឬខុសត្រូវអ្វីឡើយ និងធ្វើរបាយការណ៍ទៅថ្នាក់លើឱ្យបញ្ឈរជើង និងបញ្ចប់មុខតំណែង ពួកលោកថែមទៀត។ លើសពីនេះលោកថា ស្នងការរូបនេះបានបញ្ជាមន្ត្រីក្រោមឱវាទ មិនឱ្យមកសួរសុខទុក្ខ ពួកលោកពេលដែលកំពុងពិនិត្យ និងសម្រាកព្យាបាលដោយរងរបួសរាងកាយ និងពុលផ្សែងពុល នៅតាមបណ្តាមន្ទីរពេទ្យជាច្រើនថ្ងៃទៀត។
លោក សាន សុវណ្ណរី អះអាងថា លោកជាមេបញ្ជាការដឹកនាំកម្លាំងចំនួន ២០នាក់ទៅសមរភូមិមុខ នៅភូមិជោគជ័យ រយៈពេល៦យប់ ៧ថ្ងៃ តាំងថ្ងៃទី២១ ដល់២៧ខែធ្នូ ឆ្នាំ២០២៥។
ក្នុងសំណេរនោះលោកបានស្នើរដ្ឋមន្ត្រីក្រសួងមហាផ្ទៃ លោក ស សុខា ឱ្យជួយអន្តរាគមន៍ និងរកយុត្តិធម៌ ជូនលោក និងមិត្តរួមអាវុធ ចំនួន ២០នាក់ទៀត ដែលជាកម្លាំងកងអនុសេនាតូចទី១ នៃផែនការងារធនធានមនុស្ស។
លោកបន្តរៀបរាប់ថា ការគំរាមរបស់ស្នងការបានធ្វើឱ្យពួកគេទាំងអស់គ្នា មានការភ័យខ្លាច ប៉ះពាល់សតិអារម្មណ៍ជាខ្លាំង។
លោក សាន សុវណ្ណរី៖ «ខ្ញុំបាទ និងបងប្អូនរួមអាវុធទាំង២០នាក់ កើតទុក្ខមិនសុខចិត្តនូវទង្វើមិនគប្បីរបស់លោកស្នងការ សិទ្ធិ ឡោះ មកលើពួកខ្ញុំ។ សូមគោរពបញ្ជាក់ ខ្ញុំបាទ និង កងកម្លាំងក្នុងកងអនុសេនាតូចទី១ ចុះទៅសមរភូមិថ្ងៃទី២១-២៧ ខែធ្នូ ឆ្នាំ ២០២៥ ខ្ញុំបាទ និងកំលាំងក្រោមឱវាទ មិនទទួលបានការពន្យល់ ណែនាំ ពីថ្នាក់ដឹកនាំណាម្នាក់បង្ហាត់បង្ហាញយើងខ្ញុំទាំងអស់គ្នាបានស្គាល់ពីទីតាំងភូមិសាស្ត្រ និងយុទ្ធសាស្ត្រសំខាន់ៗ ក្នុងការប្រយុទ្ធ (ប្រព័ន្ធទំនាក់ទំនងឱ្យបានទូលំទូលាយ ត្រូវបង្ហាញឈ្នាន់ទី១ ទី២ ទី៣.. នៅពេលដែលកំលាំងយើងទប់ទល់នឹងសត្រូវឈ្លានពានមិនបាន»។
លោក សាន សុវណ្ណរី បន្តថា ការដឹកនាំរបៀបនេះវាជាការរុញកម្លាំងនគរបាលឱ្យទៅជួបគ្រោះថ្នាក់ដល់ជីវិត សបញ្ជាក់ពីការដឹកនាំដោយមិនមានការទទួលខុសត្រូវ និងយកចិត្តទុកដាក់ដល់អាយុជីវិត សុខទុក្ខកំលាំងក្រោមឱវាទ ហើយថែមទាំង ដាក់កំហុស មូលបង្កាច់ ធ្វើឱ្យកំលាំងបាក់ទឹកចិត្ត និងឈឺចាប់រកអ្វីប្រៀបពុំបាន។
លោក សាន សុវណ្ណរី៖ «ខ្ញុំបាទសូមគោរពជូនឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មេត្តាជួយអន្តរាគមន៍ និងរកយុត្តិធម៌អោយពួកខ្ញុំទាំងអស់គ្នាផង (បើមិនមានយុត្តិធម៌ជូនដល់បងប្អូនរួមអាវុធទាំង២០នាក់ទៀតទេ ក្នុងនាមខ្ញុំជាមេបញ្ជាសមរភូមិទល់មុខ ភូមិជោគជ័យ ខ្ញុំបាទសុំលាលេងពីតំណែងស្នងការរង»។
ករណីនៅខេត្តបន្ទាយមានជ័យនេះដែរ មន្ត្រីស្នងការខេត្តនេះបានលាក់បាំងព័ត៌មានទាក់ទងទៅនឹងកងទ័ពកម្ពុជាដែលបាត់ខ្លួន រហូតក្រុមគ្រួសារគិតថា បានពលី និងបានធ្វើបុណ្យសពតាមប្រពៃណីរួចហើយទៀត។ លុះកាលពីថ្ងៃទី២០ មករា យោធាថៃបានបញ្ជូនលោកអនុសេនីយ៍ត្រី គៀត ស៊ីម៉ាក់ នាយរងប៉ុស្តិ៍នគរបាលរដ្ឋបាលគោកកឋិន នៃអធិការដ្ឋាននគរបាលស្រុកថ្មពួក ខេត្តបន្ទាយមានជ័យ មកមាតុភូមិវិញ។ តាមពិតលោក គៀត ស៊ីម៉ាក់ ត្រូវបានទាហានថៃចាប់បានពេលរងរបួសក្នុងសមរភូមិ កាលពីថ្ងៃទី២៤ ខែធ្នូ ឆ្នាំ២០២៥។ ដំណឹងនេះមិនត្រូវបានគេដឹងនោះទេ រហូតនាយរងប៉ុស្តិ៍រូបនេះត្រូវបានដោះលែងមកវិញ និងកំពុងសម្រាកព្យាបាលជំងឺនៅមន្ទីរពេទ្យមិត្តភាពកម្ពុជា-ជប៉ុន៕
