យោធាថៃបានពង្រីកការសាងសង់រូបសំណាក និងស្តូបអនុស្សាវរីយ៍ជាច្រើនទីតាំងនៅតំបន់ប្រាសាទតាក្របី ដោយបំភ្លៃព្រឹត្តិការឈ្លានពានមកលើកម្ពុជា ឱ្យទៅជាការបង្កើនចរន្តជាតិនិយមខ្លួនឯង។ ក្នុងនោះ យោធាថៃបានឃោសនាឱ្យពលរដ្ឋថៃចូលរួមកម្មវិធីរត់ប្រណាំងនៅតំបន់ប្រាសាទតាក្របី ដើម្បីអូសទាញអ្នកទស្សនា និងប្រមូលមូលនិធិអភិវឌ្ឍក្នុងតំបន់ប្រាសាទបុរាណខ្មែរមួយនេះ។
ភ្លើងសង្គ្រាមបានរលត់ទៅមិនបានមួយឆ្នាំផង យោធាថៃបានអភិវឌ្ឍយ៉ាងឆាប់រហ័សក្នុងតំបន់ប្រាសាទបុរាណខ្មែរ និងទីតាំងនៅតាមព្រំដែនដែលយោធាថៃបានឈ្លានពានយកពីកម្ពុជា ដោយយោធាថៃមិនគោរពតាមកិច្ចព្រមព្រៀងបទឈប់បាញ់នោះឡើយ។
នៅតំបន់ប្រាសាទតាក្របី និងភ្នំ៣៥០ យោធាថៃបានពង្រីកការសាងសង់រូបសំណាក ស្តូបរម្លឹកអនុស្សាវរីយ៍ និងសួនច្បារ ដែលធ្វើឱ្យទីតាំងសមរភូមិមួយនេះ ប្រែក្លាយទៅជាទីតាំងទេសចរណ៍ប្រវត្តិសាស្ត្រ និងធម្មជាតិ ដ៏ទាក់ទាញមួយ។ តាមរយៈវីដេអូរបស់យោធាថៃ ដែលចែករំលែកនៅលើបណ្ដាញសង្គម បានបង្ហាញថា សព្វថ្ងៃនេះមានប្រជាពលរដ្ឋថៃបានបន្តមកទស្សនាតំបន់ប្រាសាទតាក្របី និងភ្នំ៣៥០ ដោយពួកគេបានមកថតរូបនៅពីមុខរូបសំណាកអនុស្សាវរីយ៍របស់យោធាថៃ និងប្រាង្គប្រាសាទដែលមានសភាពបែកបាក់ ដោយសារកាណុងកាំភ្លើងធំរបស់យោធាថៃ។
ក្រុមពលរដ្ឋថៃដែលមកទស្សនានៅតំបន់ប្រាសាទតាក្របី ទាំងនោះ ត្រូវបានមគ្គុទ្ទេសក៍ដែលជាកងទ័ពថៃ រៀបរាប់ប្រាប់អំពីប្រវត្តិនៃការវាយប្រហារដណ្ដើមយកតំបន់ប្រាសាទតាក្របី និងភ្នំ៣៥០ ពីកងទ័ពខ្មែរ ដើម្បីយកមកកាន់កាប់ផ្ដាច់មុខ។ ក្នុងនោះ យោធាថៃបាននិយាយប្រាប់ទៅពលរដ្ឋថៃ ដោយបណ្ដុះគំនិតជាតិនិយម កែព្រឹត្តិការថា តំបន់ប្រាសាទតាក្របី និងប្រាសាទបុរាណខ្មែរមួយចំនួនទៀត ត្រូវបានកម្ពុជាកាន់កាប់អស់រយៈពេលជាច្រើនឆ្នាំ ហើយយោធាថៃគឺជាអ្នកវាយដណ្ដើមយកមកដាក់បញ្ចូលក្នុងផែនទីរបស់ប្រទេសថៃមកវិញ។
លើសពីនេះ ថៃដែលជាភាគីឈ្លានពានមកលើកម្ពុជា តែងតែធ្វើការអត្ថាធិប្បាយ និងបិទស្លាកប្រកាសនៅតាមផ្លូវឡើងទៅកាន់ប្រាសាទ ដោយបំភ្លៃប្រវត្តិសាស្ត្រថា ប្រាសាទតាក្របី និងប្រាសាទខ្មែរបុរាណផ្សេងទៀត ដែលនៅ លើខ្នងភ្នំដងរែក ដូចជាប្រាសាទតាមាន់ធំ ប្រាសាទខ្នារ និងប្រាសាទស្តុកកក់ធំជាដើម គឺជាមរតកវប្បធម៌របស់ខមបុរាណ និងបដិសេធនូវអ្វីដែលជាអរិយធម៌របស់ខ្មែរបុរាណ។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងវប្បធម៌ លោក ស៊ុំ ម៉ាប់ និងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ដើម្បីសុំការបកស្រាយជុំវិញរឿងនេះបានទេ នៅថ្ងៃទី១០ ខែសីហា។
កន្លងមកក្រសួងវប្បធម៌ និងស្ថាប័នពាក់ព័ន្ធរបស់កម្ពុជា បានចេញលិខិតតវ៉ាជាច្រើនលើក ប្រឆាំងនឹងសកម្មភាព និងការប្រារព្ធពិធីជួបជុំរបស់ភាគីថៃ។ ក្រសួងវប្បធម៌របស់កម្ពុជា បានចាត់ទុកសកម្មភាពទាំងនេះ គឺជាការឈ្លានពាន និងកាន់កាប់ដោយខុសច្បាប់លើតំបន់បេតិកភណ្ឌវប្បធម៌របស់កម្ពុជា បន្ថែមពីលើការរំលោភបំពានបទឈប់បាញ់ ដែលភាគីកម្ពុជា និងថៃបានព្រមព្រៀងគ្នា មិនឱ្យធ្វើសកម្មភាពនៅក្នុងទីតាំង ដែលកងទ័ពប្រទេសទាំងពីរកំពុងឈរជើងបណ្ដោះអាសន្ននោះឡើយ។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ឃើញថា សកម្មភាពរបស់យោធាថៃ គឺជាការឈ្លានពានយកទាំងទឹកដី សម្បត្តិវប្បធម៌ និងប្រវត្តិសាស្ត្ររបស់កម្ពុជា។ លោកបន្តថា ការបណ្ដោយឱ្យយោធាថៃបន្តកាន់កាប់ និងសាងសង់នៅលើទឹកដីកម្ពុជានៅតាមព្រំដែនបែបនេះ គឺបណ្ដាលមកពីភាពទន់ជ្រាយរបស់មេដឹកនាំកម្ពុជា ក្នុងការប្រឆាំងនឹងសកម្មភាពឈ្លានពានរបស់យោធាថៃ ខណៈកម្ពុជាមានភស្តុតាង និងឯកសាររឹងមាំ ដែលអាចប្ដឹងថៃទៅកាន់តុលាការយុត្តិធម៌អន្តរជាតិបាន។
លោក ម៉ែន ណាត៖«រដ្ឋាភិបាលកម្ពុជាខ្លួនឯងមិនទុកចិត្តខ្លួន ឯង មិនច្បាស់លាស់ ខ្លួនឯង ម្ដង ថ្កោលទោស ថៃ ម្ដងបបួលថៃ ចូលតុចរចាទ្វេភាគី ម្ដងអញ្ចេះម្ដងអញ្ចោះ អត់មានជំហរច្បាស់លាស់។ អញ្ចឹង រដ្ឋាភិបាលលោក ហ៊ុន ម៉ាណែត លោក ហ៊ុន សែន អត់ច្បាស់លាស់ខ្លួនឯងទេ គិតតែប្រយោជន៍ផ្ទាល់ខ្លួន គិតតែអំណាចប៉ុន្មានគ្រួសារហ្នឹង ហើយបណ្ដែតបណ្ដោយឱ្យជាតិទឹកដីហ្នឹងលិចលង់ ធ្លាក់ក្នុងគ្រោះមហន្តរាយជាបន្តបន្ទាប់»។
ទាក់ទងនឹងសកម្មភាពឈ្លានពានរបស់យោធាថៃ នៅតំបន់ប្រាសាទតាក្របីនេះដែរ កងទ័ពភូមិភាគទី២របស់ថៃ បានឃោសនាឱ្យពលរដ្ឋថៃចូលរួមក្នុងកម្មវិធីរត់ប្រណាំង នៅតំបន់ប្រាសាទតាក្របី ដែលនឹងប្រព្រឹត្តិទៅនៅចុងឆ្នាំ២០២៦ ដើម្បីផ្សព្វផ្សាយពីប្រាសាទបុរាណខ្មែរមួយនេះ និងរម្លឹកដល់អ្នកចូលរួមឱ្យដឹងគុណយោធាថៃ។
ក្នុងនោះ យោធាថៃបានអនុម័តគម្រោងសាងសង់ផ្លូវ ជីប្រព័ន្ធទឹក និងតភ្ជាប់បណ្ដាញអគ្គិសនីនៅតំបន់ប្រាសាទតាក្របី និងភ្នំ៣៥០ ក្នុងរដូវវស្សានេះ ដើម្បីប្រែក្លាយអតីតសមរភូមិមួយនេះ ក្លាយទៅជាតំបន់ទេសចរណ៍ប្រវត្តិសាស្ត្រ និងធម្មជាតិ និងធ្វើជាខ្សែក្រវាត់ការពារព្រំដែនអចិន្ត្រយ៍៕
