មន្ត្រីយោធាជាន់ខ្ពស់ពាក់ផ្កាយ១ ម្នាក់រងការចោទប្រកាន់ថា បានជួលវីឡាដ៏ស្កឹមស្កៃរបស់ខ្លួននៅខេត្តបាត់ដំបងឱ្យបណ្ដាញឧក្រិដ្ឋជនប្រើប្រាស់ជាទីតាំងប្រតិបត្តិការឆបោកតាមអនឡាញ។ មន្ត្រីសិទ្ធិមនុស្សទាមទារឱ្យអាជ្ញាធរបើកការស៊ើបអង្កេតដោយឯករាជ្យ និងចាត់វិធានការឱ្យបានម៉ឺងម៉ាត់លើមន្ត្រី និងអ្នកមានអំណាចដែលឃុបឃិត ឬផ្ដល់ទីតាំងឱ្យបណ្ដាញឧក្រិដ្ឋជនឆបោកតាមអនឡាញប្រើប្រាស់។
នាយសេនាធិការរងយោធភូមិភាគទី៥ ទទួលបន្ទុកការងារព្រំដែនឧត្ដមសេនីយ៍ អូន សុខសិលា រងការចោទប្រកាន់ថា បានជួលវីឡាដ៏ស្កឹមស្កៃរបស់ខ្លួនស្ថិតនៅខេត្តបាត់ដំបងក្នុងតម្លៃខ្ពស់ទៅឱ្យបណ្ដាញឧក្រិដ្ឋជនឆបោកតាមអនឡាញ ដើម្បីប្រើប្រាស់ជាទីតាំងប្រតិបត្តិការឆបោកតាមអនឡាញ។
ការបែកធ្លាយរឿងរ៉ាវនេះ កើតឡើងក្រោយកម្លាំងសមត្ថកិច្ចចុះឡោមព័ទ្ធបង្ក្រាបទីតាំងវីឡារបស់លោកស្ថិតក្នុងសង្កាត់រតនៈ ក្រុងបាត់ដំបង កាលពីថ្ងៃទី១ ខែមិថុនា ដោយរកឃើញវត្ថុតាង និងឃាត់ខ្លួនជនបរទេសមួយចំនួនដែលលួចសម្ងំធ្វើសកម្មភាពឆបោកតាមអនឡាញ។
មកដល់ពេលនេះ ប្រជាពលរដ្ឋជាច្រើននៅតាមបណ្ដាញសង្គមបានបញ្ចេញប្រតិកម្មដោយទាមទារឱ្យអាជ្ញាធរបើកការស៊ើបអង្កេតដោយឯករាជ្យលើករណីនេះ ខណៈលោក អូន សុខសិលា ដែលរងការចោទប្រកាន់ថា ជាម្ចាស់វីឡាដែលត្រូវបានប្រើប្រាស់ជាទីតាំងឆបោកតាមអនឡាញនោះមិនទាន់ត្រូវបានសមត្ថកិច្ចឃាត់ខ្លួន ឬកោះហៅមកបំភ្លឺនៅឡើយ។
ទូរទស្សន៍អាស៊ីសេរីបានព្យាយាមទាក់ទងស្នងការនគរបាលខេត្តបាត់ដំបងលោក ដាញ់ អេងប៊ុនចាន់ ដើម្បីសាកសួរជុំវិញរឿងនេះបន្ថែម ប៉ុន្តែទូរស័ព្ទហៅចូលត្រូវបានចុចបិទនៅថ្ងៃទី២ ខែមិថុនា។ ចំណែក នាយសេនាធិការរងយោធភូមិភាគទី៥ ទទួលបន្ទុកការងារព្រំដែន ឧត្ដមសេនីយ៍ អូន សុខសិលា ក៏មិនអាចទាក់ទងបានដែរនៅថ្ងៃដដែលនេះ។
ជុំវិញរឿងនេះ អ្នកគ្រប់គ្រងការិយាល័យអង្គការលីកាដូ (LICADHO) ប្រចាំខេត្តបន្ទាយមានជ័យ លោក អ៊ិន គង់ជិត ទទូចឱ្យអាជ្ញាធរបើកការស៊ើបអង្កេតដោយឯករាជ្យលើម្ចាស់វីឡាដែលរងការចោទប្រកាន់ថា បានផ្ដល់ទីតាំងឱ្យបណ្ដាញឧក្រិដ្ឋជនប្រើប្រាស់សម្រាប់ប្រតិបត្តិការឆបោកតាមអនឡាញ និងត្រូវធានាការអនុវត្តច្បាប់ឱ្យបានស្មើភាពគ្នាចំពោះអ្នកពាក់ព័ន្ធទាំងអស់។ លោកបន្តថា បណ្ដាញឧក្រិដ្ឋជនឆបោកតាមអនឡាញតែងព្យាយាមបង្កើតទំនាក់ទំនង និងស្វែងរកការគាំទ្រពីមន្ត្រីមានអំណាច ដើម្បីធ្វើជាខ្នងបង្អែកការពារសកម្មភាពខុសច្បាប់របស់ពួកគេ។ លោកបារម្ភថា ប្រសិនបើអាជ្ញាធរមិនចាត់វិធានការតឹងរ៉ឹងលើមន្ត្រីខិលខូចមួយចំនួន ឬអ្នកមានអំណាចដែលឃុបឃិតជាមួយបណ្ដាញឧក្រិដ្ឋជនតាមរយៈការផ្ដល់ទីតាំង ឬការជួយសម្របសម្រួលផ្សេងៗទេនោះការបង្ក្រាបអំពើឆបោកតាមអនឡាញនឹងពិបាកទទួលបានប្រសិទ្ធភាពពិតប្រាកដ។
លោក អ៊ិន គង់ជិត៖ «ដើម្បីបង្ក្រាបឱ្យមានប្រសិទ្ធភាពខ្ពស់មានតែសមត្ថកិច្ច និងតុលាការត្រូវតែអនុវត្តច្បាប់ឱ្យបានម៉ឺងម៉ាត់ ដោយមិនយោគយល់ទៅលើអ្នកពាក់ព័ន្ធដែលជាមន្ត្រីទាំងយោធា ឬក៏ប៉ូលិសដែលមានបុណ្យស័ក្ដិ មានតួនាទីធំ។ យើងនៅតែជឿជាក់ និងសង្ឃឹមថា តុលាការនឹងធ្វើការស្រាវជ្រាវអ្នកពាក់ព័ន្ធទាំងអស់ជនប្រព្រឹត្តទាំងអស់ ទាំងមេខ្លោង អ្នកសមគំនិត ទាំងម្ចាស់ទីតាំងហ្នឹងយកទៅផ្ដន្ទាទោសតាមច្បាប់។ បើមិនអនុវត្តឱ្យបានម៉ឺងម៉ាត់ទេប្រជាពលរដ្ឋ ឬក៏សាធារណជននឹងអស់ជំនឿអំពីការអនុវត្តច្បាប់នេះ»។
បន្ទាប់ពីអាជ្ញាធរបង្កើនការបង្ក្រាបបណ្ដាញឆបោកតាមអនឡាញនៅទូទាំងប្រទេស មន្ត្រីមួយចំនួនដែលរងការចោទប្រកាន់ថា ធ្លាប់ឃុបឃិត កាងការពារ និងទទួលផលប្រយោជន៍ពីឧក្រិដ្ឋកម្មនេះ ត្រូវបានចាប់ខ្លួនបញ្ជូនទៅតុលាការ និងបាត់បង់តំណែងជាបន្តបន្ទាប់។ ប្រធានបក្សកាន់អំណាច លោក ហ៊ុន សែន ធ្លាប់អះអាងថា នឹងមិនមានការលើកលែងចំពោះមន្ត្រីណាដែលជាប់ពាក់ព័ន្ធ ឬព្រងើយកន្តើយក្នុងការបង្ក្រាបអំពើឆបោកតាមអនឡាញនោះឡើយ។ ទោះជាយ៉ាងណា រហូតមកដល់ពេលនេះ គេនៅមិនទាន់ឃើញរដ្ឋាភិបាលរបស់លោក ហ៊ុន ម៉ាណែត ចាត់វិធានការច្បាប់ទៅលើឧកញ៉ាដែលមានទំនាក់ទំនងជិតស្និទ្ធជាមួយលោក ហ៊ុន សែន ដូចជាលោក កុក អាន លោក លី យ៉ុងផាត់ និងលោក ហ៊ុន តូ ជាដើម បើទោះជាអ្នកទាំងនេះត្រូវបានអាមេរិករកឃើញថា ជាប់ពាក់ព័ន្ធនឹងឧក្រិដ្ឋកម្មឆបោកតាមអនឡាញក្តី។
របាយការណ៍ និងប្រតិបត្តិការបង្ក្រាបរបស់សមត្ថកិច្ចដែលបានរកឃើញមន្ត្រី និងអ្នកមានអំណាចមួយចំនួនជាប់ពាក់ព័ន្ធនឹងអំពើឆបោកតាមអនឡាញ គឺស៊ីសង្វាក់គ្នាទៅនឹងការរកឃើញរបស់ក្រុមអ្នកជំនាញឧក្រិដ្ឋកម្មអន្តរជាតិដែលបានលាតត្រដាងថា កម្ពុជាបានក្លាយជាមជ្ឈមណ្ឌលដ៏ធំមួយនៃឧស្សាហកម្មឆបោកតាមអនឡាញ និងជាប្រភពបង្កគ្រោះថ្នាក់ដល់ជនរងគ្រោះនៅជុំវិញពិភពលោក។ អ្នកជំនាញវាយតម្លៃថា ឧស្សាហកម្មឆបោកតាមអនឡាញនៅកម្ពុជាមិនអាចចាក់ឫសយ៉ាងជ្រៅ និងរីកសាយភាយយ៉ាងទូលំទូលាយដូចសព្វថ្ងៃបានឡើយ ប្រសិនបើគ្មានការឃុបឃិតប្រព្រឹត្តអំពើពុករលួយ និងការការពារពីមន្ត្រីមានអំណាច ចាប់ពីថ្នាក់មូលដ្ឋានរហូតដល់ថ្នាក់ដឹកនាំជាតិ៕
