ទាហានខ្មែរ និងទាហានថៃ ដែលឈរជើងនៅតំបន់ព្រំដែនមុំបី នៅតែប្រឈមមុខដាក់គ្នារហូតមកដល់ពេលនេះ ដោយសារក្រុមទាហានថៃបានចូលមករាយបន្លាលួស និងដើរល្បាតចូលក្នុងទឹកដីកម្ពុជា ហើយត្រូវទាហានខ្មែរបណ្ដេញឱ្យចេញទៅវិញ។ ជម្លោះពាក្យសម្ដីរបស់កងកម្លាំងនៃប្រទេសទាំងពីរនេះ បានធ្វើឱ្យស្ថានការណ៍នៅតំបន់មុំបី កាន់តែរសើប ដោយភាគីទាំងពីរសុទ្ធតែបានត្រៀមប្រយុទ្ធរៀងៗខ្លួន។
ជម្លោះរវាងទាហានខ្មែរ និងទាហានថៃ នៅតំបន់មុំបី ក្នុងខេត្តព្រះវិហារ ជាប់នឹងខេត្តឧប៊ុនរ៉ាចាថានី របស់ប្រទេសថៃ ដែលតែងតែកើតឡើងត្រឹមពាក្យសម្ដី ពេលនេះបានវិវឌ្ឍមកជាជម្លោះប្រើកម្លាំងបាយរុញច្រាន រហូតដល់ការប្រើប្រាស់ពាក្យសម្ដីជេរប្រមាទ ដែលបង្កឱ្យមានភាពសម្អប់កាន់តែខ្លាំង។
ទាហានខ្មែរមួយរូប ដែលកំពុងឈរជើងនៅតំបន់មុំបី បានប្រាប់ទូរទស្សន៍អាស៊ីសេរីក្នុងលក្ខខណ្ឌមិនបញ្ចេញអត្តសញ្ញាណថា ស្ថានការណ៍នៅតំបន់មុំបី កំពុងមានភាពតានតឹងកាន់តែខ្លាំង ដោយសារទាហានថៃបានធ្វើសកម្មភាពចូលឈ្លានពាន ដោយពង្រីកទីតាំងឈរជើង និងរាយបន្លាលួសចូលក្នុងទីតាំងរបស់ទាហានខ្មែរកាន់តែជ្រៅ រហូតបណ្ដាលឱ្យមានការឈ្លោះប្រកែកគ្នា នៅពេលទាហានខ្មែរចូលទៅរារាំង និងធ្វើការសម្របសម្រួលដោយសន្តិវិធី។
លោកអះអាងថា ជម្លោះរវាងទាហានខ្មែរ និងទាហានថៃបានឈានដល់ការរុញច្រានគ្នាចំទ្រូង ចង្អុលមុខ និងជេរប្រមាថគ្នាខ្លាំងៗ រហូតទាល់តែមេបញ្ជាការរបស់ភាគីទាំងពីរចេញមកសម្របសម្រួល ទើបភាគីទាំងពីរយល់ព្រមបញ្ចប់ជម្លោះ ឯកភាពចាកចេញទាំងអស់គ្នា។ លោកបញ្ជាក់ថា ករណីជម្លោះទាហានខ្មែរ-ថៃ នៅតំបន់មុំបី នេះ បានឈានដល់ជាការចងគំនុំ ដោយទាហានរបស់ភាគីទាំងពីរបានចំណាំមុខគ្នាទុក និងគំរាមសងសឹកគ្នាទៀតផង។
កាលពីថ្ងៃទី២ ខែមិថុនា មានករណីឈ្លោះប្រកែកគ្នា រវាងទាហានខ្មែរ និងទាហានថៃជាក្រុមទ្រង់ទ្រាយធំនៅតំបន់ព្រំដែនមុំបី ដែលបង្កឡើងដោយក្រុមទាហានថៃ បានដាំបង្គោលរាយបន្លាលួសនៅក្នុងទឹកដីកម្ពុជា ក៏ប៉ុន្តែត្រូវក្រុមទាហានខ្មែរចេញមករារាំង។ នៅក្នុងជម្លោះជាក្រុមនេះ ភាគីទាំងពីរបានស្រែកដាក់គ្នា រហូតឈានទៅដល់ការជេរប្រមាទ និងប្រទាញប្រទង់គ្នាទៅវិញទៅមកទៀតផង។
ក្រោយការប្រឈមមុខដាក់គ្នានេះ ទាហានខ្មែរ និងទាហានថៃបានរំកិលទីតាំងឈរជើងមកនៅទល់មុខគ្នាប្រហែល៥០០ម៉ែត្រ ដោយភាគីទាំងសងខាងដែលប្រដាប់ដោយអាវុធនៅក្នុងដៃ បានសម្លឹងមើលគ្នាទៅវិញទៅមក។ ក្នុងនោះ យោធាថៃបានបញ្ជូនកងកម្លាំងទៅកាន់តំបន់មុំបីជាបន្តបន្ទាប់ និងបានកសាងផ្លូវទៅកាន់កំពូលភ្នំ៧៤៥ ព្រមទាំងសាងសង់លេណដ្ឋាន និងដាក់កម្លាំងការពារជាច្រើននាក់នៅក្នុងតំបន់នោះ។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ដើម្បីសុំការបកស្រាយជុំវិញរឿងនេះបានទេ នៅថ្ងៃទី៨ ខែមិថុនា។
ជុំវិញរឿងនេះ ប្រមុខដឹកនាំស្ថាប័នអធិបតេយ្យជាតិ ព្រំដែន និងអន្តោប្រវេសន៍នៃរដ្ឋាភិបាលកម្ពុជាឯករាជ្យ ២៣ តុលា លោក អ៊ុំ សំអាន យល់ឃើញថា សកម្មភាពរបស់យោធាថៃ នៅតំបន់មុំបី គឺមានបំណងដណ្ដើមយកទីតាំងឈរជើងដែលនៅសេសសល់ របស់ទាហានខ្មែរដែលទាហានថៃមិនទាន់ដណ្ដើមបាន ព្រោះនៅក្នុងសង្គ្រាមឈ្លានពានកម្ពុជាទាំងពីរលើក យោធាថៃដណ្ដើមបានតំបន់មួយចំនួនតូចពីកម្ពុជា។
លោក អ៊ុំ សំអាន៖ «កាលពីមុនយើងនៅលើភ្នំគេនៅជើងភ្នំ យើងវាយមិនឈ្នះគេផង ឥឡូវនេះគេធ្វើលេណដ្ឋាន ត្រង់សេនៅលើភ្នំទៀត បើយើងឡើងទៅ គឺដូចជាទៅស្លាប់អញ្ចឹង។ បញ្ហានោះ គឺនឹងធ្វើឱ្យបាត់បង់ទឹកដីខ្មែរយើងបន្ថែមទៀត ហើយក៏មិនអាចវាយដណ្តើមយកទឹកដីនោះបានមកវិញដែរ បើសិនជាស្ថានភាពនៅតែបែបហ្នឹង»។
ក្រៅពីតំបន់មុំបី យោធាថៃបានសាងសង់លេណដ្ឋានធំៗ និងរនាំងធ្វើពីបេតុងជាច្រើនទីតាំង និងជាច្រើនជាន់នៅក្នុងតំបន់ព្រំដែនប្រាសាទខ្នារ តាក្របី តាមាន់ធំ អូរស្មាច់ អានសេះ ជាំតែ និងតំបន់ភ្នំទ្រព្យជាដើម។ យោធាថៃអះអាងថា ការរៀបចំនេះ គឺជាការត្រៀមយុទ្ធសាស្ត្រប្រយុទ្ធដោយសារស្ថានភាពជម្លោះនៅតំបន់ព្រំដែនកម្ពុជា-ថៃ កាន់តែមានភាពតានតឹង ដែលអាចនឹងបង្កឱ្យមានសង្គ្រាមបានគ្រប់ពេល។
ក្រៅពីសាងសង់លេណដ្ឋាន យោធាថៃបានសាងសង់ផ្លូវយុទ្ធសាស្ត្រជាច្រើនខ្សែទៀតនៅតាមបណ្ដោយព្រំដែនកម្ពុជា និងតំបន់ខ្លះ ចូលក្នុងទឹកដីកម្ពុជាតែម្ដង ដូចជានៅតំបន់ជាំស្រងាំ ខេត្តឧត្ដរមានជ័យ តំបន់ព្រំដែនខេត្តប៉ៃលិន និងខេត្តបាត់ដំបង រហូតដល់ខេត្តព្រះវិហារ។
ចំណែកនៅលើអាកាសវិញ យោធាថៃបានបង្ហោះដ្រូនទាំងពេលថ្ងៃ និងពេលយប់ចូលក្នុងតំបន់ឈរជើងរបស់ទាហានខ្មែរ ដោយដ្រូនទាំងនេះមានបំពាក់ឧបករណ៍ចាប់ទីតាំង និងចាប់រលកកម្ដៅ ដើម្បីតាមដានពីសកម្មភាពរបស់យោធាខ្មែរ៕
