លោកនាយករដ្ឋមន្ត្រី ហ៊ុន ម៉ាណែត បន្តវាយប្រហារលើបក្សប្រឆាំងដែលរិះគន់រដ្ឋាភិបាលថា បាន ធ្វើឱ្យបាត់ទឹកដីទៅថៃ នៅចន្លោះបង្គោលព្រំដែនលេខ៥២ ដល់៥៩ ក្នុងភូមិសាស្ត្រខេត្តបាត់ដំបង។ ការបន្តវាយប្រហាររបស់លោក ហ៊ុន ម៉ាណែត នេះ ដោយសំអាងលើអ្នកប្រើប្រាស់ បណ្ដាញសង្គមថៃខ្លះអះអាង ដោយគ្មានមូលដ្ឋានថា ពលរដ្ឋថៃបានបាត់ដីស្រែជាង ១០០ហិកតារ ទៅខាងខ្មែរ ក្រោយពីថៃធ្វើរបងបេតុងតាមព្រំដែន។ មន្ត្រីបក្សប្រឆាំងថា ការយកព័ត៌មានថៃ ដែលគ្មានមូលដ្ឋាន ដើម្បីវាយប្រហារអ្នករិះគន់ គឺជាគ្រោះថ្នាក់សម្រាប់ជាតិ ព្រោះជាការការពារសត្រូវឈ្លានពានទឹកដីកាន់តែស្របច្បាប់។
លោកនាយករដ្ឋមន្ត្រី ហ៊ុន ម៉ាណែត នៅតែប្រកាន់ជំហរ និងរកអំណះអំណាង ដើម្បីបញ្ជាក់ថា រដ្ឋាភិបាលរបស់លោក មិនបានធ្វើឱ្យបាត់បង់ទឹកដី ទៅប្រទេសថៃនោះឡើយ។ នៅថ្ងៃទី២៨ ខែតុលានេះ លោកបានបង្ហោះសារជាថ្មី នៅលើគណនីហ្វេសប៊ុក ថា អ្នកនយោបាយខ្មែរនៅក្រៅប្រទេសមួយក្រុម តែងតែចោទរាជរដ្ឋាភិបាលដោយគ្មានភស្តុតាងឬឯកសារ ថាបានធ្វើឱ្យបាត់ដី នៅចន្លោះបង្គោលព្រំដែនលេខ៥២-៥៩ តាមបណ្ដោយព្រំដែនកម្ពុជា-ថៃ តាមរយៈការបោះបង្គោលព្រំដែនបណ្ដោះអាសន្ន និងធ្វើបេតុង ដោយឯកតោភាគីរបស់ថៃ។
លោកបន្តថាអ្នកនយោបាយបក្សប្រឆាំងទាំងនោះតែងតែយកព័ត៌មានពីប្រភពដែលផ្សព្វផ្សាយដោយបណ្ដាញព័ត៌មានថៃ ប៉ុន្តែ លោកថានៅពេលដែលព័ត៌មានថៃបានចុះផ្សាយជាសាធារណៈថា ការធ្វើរបងបេតុង ជាឯកតោភាគីរបស់ថៃនេះ បានធ្វើឲ្យពលរដ្ឋថៃចំនួន ៦៦គ្រួសារ បាត់ដីចម្ការជាង១០០(១៣៨) ហិកតារ ចូលខាងកម្ពុជា ប៉ុន្តែបែរជាក្រុមអ្នកនយោបាយខ្មែរក្រៅប្រទេសទាំងនោះរក្សាភាពស្ងៀមស្ងាត់។
លោក ហ៊ុន ម៉ាណែត បានចោទជាសំណួរថាតើ ខួរក្បាលរបស់ក្រុមអ្នកនយោបាយខ្មែរនេះ មានតែមួយគត់ គឺចោទថារដ្ឋាភិបាលខ្មែរធ្វើឱ្យបាត់ដីឬក៏យ៉ាងណា។ លោក ហ៊ុន ម៉ាណែត សន្និដ្ឋានថា កាលដែលអ្នកប្រឆាំងមិនហ៊ាននិយាយពាក់ព័ន្ធនឹងការផ្សាយរបស់សារព័ត៌មានថៃដែលថា ប្រជាជនថៃបានបាត់ដីនោះ ខ្លាចទទួលស្គាល់ព័ត៌មាននោះជាព័ត៌មានពិត និង បដិសេធថាអ្វីដែលសារព័ត៌មានថៃចុះផ្សាយនោះជាព័ត៌មានមិនពិត។ លោក ហ៊ុន ម៉ាណែត អះអាងថា ជម្រើសទាំងនេះ ទោះជាជម្រើសមួយណាក៏មិនល្អសម្រាប់អ្នកប្រឆាំងនោះដែរ ដូច្នេះហើយ ទើបអ្នកប្រឆាំងមិនហ៊ានធ្វើអត្ថាធិប្បាយ។
បើទោះបីជា លោក ហ៊ុន ម៉ាណែត បានយកព័ត៌មានថៃមកសំអាងថា ថៃពិតជាបាត់ដីដើម្បីវាយបកអ្នករិះគន់នៅក្រៅប្រទេសក្ដី ព័ត៌មានដែលលោក ហ៊ុន ម៉ាណែត យកមកសំអាងនោះ ប្រហែល ជាមិនមែនជាស្ថាប័នព័ត៌មានប្រកបដោយវិជ្ជាជីវៈត្រឹមត្រូវនោះទេ ព្រោះសារព័ត៌មានធំៗរបស់ថៃជាច្រើនគ្មានស្ថាប័នណាមួយចុះផ្សាយដូចការអះអាងរបស់លោក ហ៊ុន ម៉ាណែត នោះឡើយ។ ក៏ប៉ុន្តែ ឃើញមានគណនីហ្វេសប៊ុកមួយឈ្មោះជាភាសាថៃថា «ចមយុទ្ធ» ដែលប្រែជាខ្មែរថា អ្នកប្រយុទ្ធ។
គណនីហ្វេសប៊ុកនេះបានរៀបរាប់ ដូចអ្វីដែល លោក ហ៊ុន ម៉ាណែត យកមកសំអាង ដែលថា មានប្រជាជនថៃចំនួន៦៦គ្រួសារ ដែលមានដីចម្ការជាង១០០ហិកតារបានបាត់ ក្រោយពីថៃបានធ្វើរបងបេតុងដោយឯកតោភាគីនៅតាមព្រំដែនកម្ពុជា-ថៃ។ ប៉ុន្តែអត្ថបទ និងរូបភាព ដែលអ្នកប្រើប្រាស់បណ្ដាញសង្គមថៃរូបនេះ យកមកបង្ហោះនោះ គឺជារូបបង្កើតពីកម្មវិធីបញ្ញាសិប្បនិមិត្ត AI ប៉ុណ្ណោះ។ អ្នកឃ្លាំមើលព្រមានថា ការប្រើប្រាស់ព័ត៌មានមិនពិតរបស់ លោក ហ៊ុន ម៉ាណែត ដើម្បីបិទបាំងទោសកំហុសខ្លួន ពុំផ្ដល់ផលចំណេញដល់ប្រទេសជាតិនោះទេ ផ្ទុយទៅវិញ វាក្លាយជាភស្តុតាងស្របច្បាប់ដល់ភាគីថៃ ដើម្បីអះអាងថា ថៃមិនបានធ្វើរបងបេតុងរំលោភដីខ្មែរ។
ពាក់ព័ន្ធនឹងបញ្ហាបង្គោលព្រំដែនលេខ៥២ ដល់៥៩នេះដែរ កន្លងទៅនេះ មានសារឆ្លើយឆ្លងគ្នាជាច្រើន រវាងលោក ហ៊ុន ម៉ាណែត និង លោក អ៊ុំ សំអាន ដោយលោក ហ៊ុន ម៉ាណែត បានអញ្ជើញឱ្យលោក អ៊ុំ សំអាន ចូលមកជជែក ដេញដោលគ្នានៅលើទឹកដីខ្មែរដោយផ្ទាល់ ដើម្បីបញ្ជាក់ថា កម្ពុជាពិតជា បានបាត់បង់ទឹកដី ឬមិនបាត់បង់។ ប៉ុន្តែ លោក អ៊ុំ សំអាន ស្នើឱ្យលោក ហ៊ុន ម៉ាណែត ស្នើទៅព្រះមហាក្សត្រឱ្យលើកលែងទោសលោក ជាមុនសិន ប៉ុន្តែ លោកហ៊ុន ម៉ាណែត បានបដិសេធ ដោយគ្រាន់តែធានាសុវត្ថិភាព។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣ តុលា លោក អ៊ុំ សំអាន លើកឡើងថា លោក ហ៊ុន ម៉ាណែត មិនគួរយកព័ត៌មានថៃដែលគ្មានមូលដ្ឋានត្រឹមត្រូវ ដើម្បីវាយប្រហារអ្នករិះគន់នោះទេ ព្រោះការធ្វើបែបនេះគ្រាន់តែដើម្បីស្អំចិត្តពលរដ្ឋប៉ុណ្ណោះ។ លោក អ៊ុំ សំអាន នៅតែរក្សាជំហរថា កម្ពុជាបានបាត់ទឹកដីជាច្រើននៅចន្លោះបង្គោលលេខ៥២ ដល់៥៩ ជាពិសេសនៅក្នុងភូមិព្រះពុទ្ធ និងភូមិស្វាយស ស្រុកកំរៀង ខេត្តបាត់ដំបង។
លោក អ៊ុំ សំអាន៖ «ក្ដីបារម្ភរបស់ខ្ញុំ នៅពេលដែលមេដឹកនាំដូចជា លោក ហ៊ុន ម៉ាណែតនេះ ចេញការពារផលប្រយោជន៍ឱ្យថៃ ខ្ញុំយល់ថា ទឹកដីរបស់យើងនឹងបន្តបាត់បង់ថែមទៀតហើយ នៅ តាមព្រំដែនដែលថាកំពុងតែឈ្លានពានតាមរយៈការរាយលួសបន្លាដាក់ទូកុងតឺន័រ ជីកប្រឡាយ ធ្វើរបងបេតុងស្រេចតែអ៊ីចឹង អត់មានការរារាំងពីសំណាក់ លោក ហ៊ុន ម៉ាណែត»។
ជុំវិញរឿងនេះដែរ អ្នកតាមដានភូមិសាស្ត្រនយោបាយ លោក សេង វណ្ណលី យល់ថា ការយកព័ត៌មានដែលចេញផ្សាយដោយភាគីថៃមកប្រើប្រាស់ជាទឡ្ហីករណ៍ឆ្លើយតបនឹងការរិះគន់ របស់លោក ហ៊ុន ម៉ាណែត មិនទាន់គ្រប់គ្រាន់ក្នុងការឆ្លើយតបទៅនឹងមន្ទិលសង្ស័យផ្នែកច្បាប់ និងបច្ចេកទេសនៅឡើយទេ។ លោកអះអាងថា បញ្ហាសំខាន់មិនមែនស្ថិតនៅលើប្រភពព័ត៌មានថៃ ឬកម្ពុជានោះទេ ប៉ុន្តែស្ថិតនៅលើកម្រិតនៃភស្តុតាងដើម្បីបញ្ជាក់ថា មិនមានការបាត់បង់ទឹកដី។
លោកមើលឃើញថា ចំណុចខ្សោយដ៏សំខាន់ក្នុងវិធីសាស្ត្រតស៊ូមតិរបស់លោក ហ៊ុន ម៉ាណែត គឺការទាញសេចក្ដីសន្និដ្ឋានជាទូទៅចេញពីករណីដាច់ដោយឡែក មកគ្របដណ្ដប់លើបញ្ហាព្រំដែនទាំងមូល។ លោកបន្តថា ការដែលអ្នកធ្វើចម្ការថៃលែងអាចចូលប្រើប្រាស់ដីប្រមាណ ១៣៨ហិកតារ នៅទីតាំងមួយ មិនបានបញ្ជាក់ដោយស្វ័យប្រវត្តិថា តំបន់ផ្សេងទៀត ជាពិសេសចន្លោះបង្គោលលេខ ៥២–៥៩ គ្មានបញ្ហាប្រឈម ឬគ្មានការទន្ទ្រាននោះទេ។ ដូច្នេះលោកថា ការដោះស្រាយវិវាទព្រំដែនតម្រូវឱ្យមានការបង្ហាញផែនទីផ្លូវការ កូអរដោនេ ជាក់លាក់ និងកំណត់ហេតុបច្ចេកទេសឱ្យបានច្បាស់លាស់។
ជាមួយគ្នានេះដែរ លោកថាភាគីអ្នករិះគន់ក៏ត្រូវមានកាតព្វកិច្ចបង្ហាញភស្តុតាងជាក់លាក់ដូចគ្នាថា តើដីបាត់បង់នៅត្រង់ណា ទំហំប៉ុន្មាន និងយោងលើឯកសារច្បាប់អ្វី ដោយមិនត្រូវចោទប្រកាន់ដោយគ្មានមូលដ្ឋានច្បាស់លាស់នោះទេ។ បន្ថែមពីនេះលោកថា ការដាក់សម្ពាធឱ្យសាធារណជន ឬអ្នករិះគន់ជ្រើសរើស រវាងការទទួលស្គាល់ ឬ ការបដិសេធ លើព័ត៌មានថៃ គឺជាការបង្កើតជម្រើសចង្អៀត និងខ្វះភាពបត់បែនផ្នែកចរិតលក្ខណៈនយោបាយ។
លោកអះអាងថា ក្នុងសង្គមប្រជាធិបតេយ្យ អ្នករិះគន់អាចទទួលស្គាល់ថា មានសេចក្ដីរាយការណ៍នោះ ប៉ុន្តែគេនៅតែមានសិទ្ធិស្នើសុំពិនិត្យឯកសារដើម ឬបន្តសាកសួរអំពីស្ថានភាពនៅទីតាំងផ្សេងៗទៀត។ លោកបន្តថា ការដែលលោក ហ៊ុន ម៉ាណែត ចោទអ្នកប្រឆាំងថា គិតតែពីរិះគន់ ដល់ពលរដ្ឋថៃបាត់ទឹកដីមិនហ៊ានធ្វើអត្ថាធិប្បាយ មិនមែនជាភស្តុតាងបញ្ជាក់ថា ពួកគេទទួលស្គាល់កំហុស ឬមានចេតនាទុច្ចរិត ដូចលោក ហ៊ុន ម៉ាណែត អះអាងនោះទេ។
លោក សេង វណ្ណលី លើកឡើងថា ក្នុងនាមជានាយករដ្ឋមន្ត្រី និងជាអ្នកដឹកនាំប្រទេស ការឆ្លើយតបដែលមានទម្ងន់ និងទទួលបានការទុកចិត្តពីពលរដ្ឋ មិនមែនជាការវាយប្រហារលើបុគ្គល ឬចេតនារបស់អ្នករិះគន់នោះទេ ប៉ុន្តែជាការបង្ហាញមូលដ្ឋានបច្ចេកទេស និងឯកសារច្បាប់ឱ្យបានត្រឹមត្រូវ ដើម្បីឱ្យសាធារណជនអាចពិនិត្យបានដោយតម្លាភាព។ ទន្ទឹមគ្នានោះលោក ហ៊ុន ម៉ាណែត គួរតែចុះទៅពិនិត្យមើល ហើយធ្វើការវាស់វែង និងផ្ទៀងផ្ទាត់តាមឯកសារច្បាប់ច្បាស់លាស់ និងឯករាជ្យ គឺជាកិច្ចការដែលត្រូវធ្វើមិនមែន យកព័ត៌មានលើបណ្ដាញសង្គមមកធ្វើសេចក្ដីសន្តិដ្ឋាននោះទេ៕
