ក្នុងសុន្ទរកថានៅថ្ងៃទី៩ ខែមិថុនា ឆ្នាំ២០២៦ លោក ហ៊ុន សែន បានទទួលស្គាល់ថា ការមិនបានរៀបចំ និងពង្រឹងវិស័យការពារជាតិឱ្យបានគ្រប់គ្រាន់ គឺជាកំហុសរបស់លោកផ្ទាល់ ក្នុងអំឡុងពេលដែលលោកកាន់អំណាចជានាយករដ្ឋមន្ត្រីអស់រយៈពេលជាច្រើនទសវត្សរ៍។
ការទទួលស្គាល់នេះបានបង្កឱ្យមានសំណួរថ្មីពីសំណាក់អ្នកសង្កេតការណ៍ និងអ្នករិះគន់ថា ប្រសិនបើលោកដឹងថា កម្ពុជាមិនមានការត្រៀមខ្លួនផ្នែកយោធាគ្រប់គ្រាន់ មិនមានសព្វាវុធទំនើបគ្រប់គ្រាន់ និងមិនមានសមត្ថភាពការពារជាតិរឹងមាំទេ ហេតុអ្វីបានជាថ្នាក់ដឹកនាំបន្តប្រើវោហាសាស្ត្រ និងសកម្មភាពនយោបាយដែលអាចបង្កើនភាពតានតឹង និងជំរុញឱ្យស្ថានការណ៍ព្រំដែនឈានទៅរកការប្រឈមមុខដាក់គ្នាកាន់តែខ្លាំង?
អ្នកវិភាគខ្លះលើកឡើងថា ការទទួលស្គាល់ថា ប្រទេសមិនបានត្រៀមខ្លួនសម្រាប់សង្គ្រាម គួរតែនាំទៅរកគោលនយោបាយប្រុងប្រយ័ត្នខ្ពស់ក្នុងការគ្រប់គ្រងវិបត្តិ និងការបញ្ចៀសជម្លោះ។ ប៉ុន្តែផ្ទុយទៅវិញ មេដឹកនាំជាន់ខ្ពស់បានបន្តប្រើសុន្ទរកថាជាតិនិយមខ្លាំងៗ និងការគំរាមឆ្លើយតប ដែលអ្នករិះគន់មួយចំនួនយល់ថា បានរួមចំណែកធ្វើឱ្យបរិយាកាសនយោបាយ និងសន្តិសុខកាន់តែតានតឹង។
អ្នករិះគន់ខ្លះក៏ចោទសួរផងដែរថា បើលោក ហ៊ុន សែន ពិតជាដឹងថា កម្ពុជាខ្វះសមត្ថភាពយោធា និងទទួលស្គាល់ថា នេះជាកំហុសរបស់ខ្លួន ហេតុអ្វីបានជាលោកប្រើប្រាស់សុន្ទរកថា និងសកម្មភាពនយោបាយដែលអាចជំរុញឱ្យមានការប្រឈមមុខជាមួយប្រទេសជិតខាង? តើនេះជាការសម្រេចចិត្តប្រកបដោយទំនួលខុសត្រូវដែរឬទេ?
លោក សម រង្ស៊ី មេដឹកនាំគណបក្សប្រឆាំង និងជាប្រមុខរដ្ឋាភិបាលនិរទេស បានប្រាប់ទូរទស្សន៍អាស៊ីសេរីថា ទោះបីជាលោក ហ៊ុន សែន សារភាពថា ខកខានមិនបានពង្រឹងវិស័យការពារជាតិឱ្យបានគ្រប់គ្រាន់ក្នុងអំឡុងពេលដែលលោកកាន់អំណាចក៏ដោយ ក៏ការលើកឡើងបែបនេះគ្រាន់តែជាការដោះសាដើម្បីគេចវេះពីការទទួលខុសត្រូវប៉ុណ្ណោះ។ «»
លោក សម រង្ស៊ី ថែមទាំងអះអាងថា ការទទួលស្គាល់ថាបានបរាជ័យក្នុងការពង្រឹងវិស័យការពារជាតិ មិនអាចក្លាយជាលេសដើម្បីគេចផុតពីការទទួលខុសត្រូវបានទេ ពីព្រោះលោក ហ៊ុន សែន គឺជាអ្នកដែលបានកាន់អំណាច និងកំណត់គោលនយោបាយសន្តិសុខជាតិអស់រយៈពេលជាងបីទសវត្សរ៍កន្លងមក។
ការទទួលស្គាល់កំហុសនៅថ្ងៃនេះរបស់លោក ហ៊ុន សែន ក៏បង្កសំណួរអំពីការទទួលខុសត្រូវផងដែរ ដ្បិតលោកបានដឹកនាំប្រទេសអស់រយៈពេលជាង ៣៨ ឆ្នាំ និងមានការគ្រប់គ្រងដោយផ្ទាល់លើការរៀបចំថវិកាជាតិ ក៏ដូចជាគោលនយោបាយសន្តិសុខជាតិ។
ទន្ទឹមនឹងការសារភាពកំហុសរបស់ខ្លួន ទាំងលោក ហ៊ុន សែន និងលោក ហ៊ុន ម៉ាណែត នៅតែបន្តវាយប្រហារលើអ្នករិះគន់ និងអ្នកបញ្ចេញមតិផ្ទុយពីរដ្ឋាភិបាល។ ក្នុងសុន្ទរកថាដដែល លោក ហ៊ុន សែន បានព្រមានអ្នកប្រឆាំង និងអ្នកប្រើប្រាស់បណ្ដាញសង្គមថា រដ្ឋាភិបាលនឹងមិនអត់ឱនចំពោះអ្វីដែលលោកហៅថា «ការបង្កអស្ថិរភាព» នោះទេ។
ទោះជាយ៉ាងណា អង្គការសិទ្ធិមនុស្សជាតិ និងអន្តរជាតិបានរាយការណ៍ថា អ្នករិះគន់ជាច្រើនត្រូវបានចាប់ខ្លួន ឬប្រឈមមុខនឹងការគំរាមកំហែង ដោយសារការបញ្ចេញមតិពាក់ព័ន្ធនឹងជម្លោះព្រំដែន និងការរិះគន់អំពីសមត្ថភាពរបស់រដ្ឋាភិបាលក្នុងការដោះស្រាយវិបត្តិជាមួយប្រទេសថៃ៕
