អាជ្ញាធរថៃបន្តប្រតិបត្តិការចាប់ខ្លួនជនជាតិថៃ និងជនជាតិបរទេសមួយចំនួនជាបន្តបន្ទាប់ដែលរត់ចេញពីកម្ពុជា ចូលទៅប្រទេសថៃ។ អាជ្ញាធរអះអាងថា ពួកគេគឺជាប្រតិបត្តិករល្បែងអនឡាញខុសច្បាប់។ អ្នកឃ្លាំមើលអះអាងថា ករណីមានប្រតិបត្តិករល្បែងអនឡាញលបលួចឆ្លងដែនបាន ដោយសារមន្ត្រីរដ្ឋាភិបាលគ្មានឆន្ទៈក្នុងការបង្ក្រាបក្រុមល្បែងអនឡាញនៅកម្ពុជាពិតប្រាកដ និងដោយសារជំងឺពុករលួយចាក់ស្រេះនៅកម្ពុជា។
ទាហានល្បាតព្រំដែនថៃបានចាប់ខ្លួនជនជាតិថៃ និងចិន ជាប់ពាក់ព័ន្ធល្បែងអនឡាញនៅកម្ពុជា បានលួចឆ្លងដែនពីកម្ពុជាចូលមកប្រទេសថៃ ដើម្បីស្វែងរកការងារធ្វើបន្ត និងមួយចំនួនចង់បន្តលួចឆ្លងដែនទៅប្រទេសចិនវិញ។ នេះបើតាមសារព័ត៌មានថៃបានចុះផ្សាយ។
ជាក់ស្តែង កាលពីថ្ងៃទី៧ ខែកក្កដា ទាហានថៃបានចាប់ខ្លួនមនុស្ស៣នាក់ សញ្ជាតិថៃ ក្នុងនោះមានប្រុស២នាក់ ស្ត្រីម្នាក់ លួចឆ្លងដែនដើរថ្មើរជើង លូនក្រោមរបងលួសដែលថៃបានរាយ តាមច្រកធម្មតា ក្នុងក្រុងប៉ោយប៉ែត ខេត្តបន្ទាយមានជ័យ ដើម្បីចូលប្រទេសខ្លួនវិញ។ ក្នុងចំណោម៣នាក់នោះ មានម្នាក់មានដីកាចាប់ខ្លួនពីតុលាការ ពាក់ព័ន្ធសំណុំរឿងក្តី៥ករណីផងដែរ។
មនុស្សទាំង៣នាក់នោះបានសារភាពប្រាប់អាជ្ញាធរថៃថា ពួកគាត់បានធ្វើការខុសច្បាប់ជាអ្នកគ្រប់គ្រងគេហទំព័រល្បែងស៊ីសងអនឡាញ ២ប្រភេទ ដែលមានឈ្មោះថា វ៉ោវស្លូត ១៦៨៨(Wowslot1688) និងមួយទៀតឈ្មោះថា ៧៨៩ ប៊ែតថ៍ (789Bet) នៅក្រុងប៉ោយប៉ែត ប្រទេសកម្ពុជា ចាប់តាំងពីខែកក្កដា ឆ្នាំ២០១៥។ ប៉ុន្តែនៅដើមឆ្នាំ២០២៦ អាជ្ញាធរកម្ពុជាបានបើកប្រតិបត្តិការបង្ក្រាបលើជនបរទេស និងអាជីវកម្មខុសច្បាប់ ដែលបណ្តាលឱ្យពួកគាត់បាត់បង់ប្រាក់ចំណូល ហើយគេហទំព័រល្បែងស៊ីសងទាំងនោះដួលរលំ និងបិទទ្វារ ធ្វើឱ្យពួកគាត់គ្មានការងារធ្វើ និងសម្រេចលួចឆ្លងដែនចូលប្រទេសថៃវិញ។
ទាហានល្បាត បានចាប់ខ្លួនពួកគាត់ និងបញ្ជូនទៅឲ្យមន្ត្រីនគរបាលស្រុកខ្លងលឹក ដើម្បីស៊ើបអង្កេតនិងចាក់ការតាមនីតិវិធីច្បាប់។
ចំណែកកកាលពីថ្ងៃទី៥ ខែកក្កដា កងទ័ពជើងទឹកថៃ បានចាប់ខ្លួនជនជាតិចិន កម្ពុជា និងបង់ក្លាដេស ចំនួន៨នាក់ បានលួចឆ្លងដែនចូលប្រទេសថៃ ហើយលាក់ខ្លួនក្នុងចម្ការមៀនមួយកន្លែង ក្នុងស្រុកពង់ណាំរ៉ុន ខេត្តចន្ទបុរី។ ក្នុងចំណោមពួកគេទាំង៨នាក់ មាន៣នាក់ ធ្វើការនៅក្នុងកាស៊ីណូមួយកន្លែង ក្នុងរាជធានីភ្នំពេញ ហើយចង់វិលត្រឡប់ទៅប្រទេសចិនវិញ តាមរយៈមេខ្យល់ ដែលនាំឆ្លងដែនតាមច្រកធម្មតា ក្រុងប៉ោយប៉ែត ខេត្តបន្ទាយមានជ័យ។ អាជ្ញាធរថៃបានឃាត់ខ្លួន ហើយប្រគល់ពួកគាត់ទៅឱ្យមន្ត្រីស៊ើបអង្កេត និងមន្ត្រីអន្តោប្រវេសន៍ថៃ ដើម្បីបន្តនីតិវិធីផ្លូវច្បាប់។
រីឯកាលពីថ្ងៃទី២ ខែកក្កដា កងកម្លាំងម៉ារីនការពារព្រំដែនរបស់ប្រទេសថៃ បានចាប់ខ្លួនជនជាតិថៃ៤នាក់ ក្នុងនោះមានប្រុសពីរនាក់ និងស្ត្រីពីរនាក់ បានលួចឆ្លងដែនចូលតាមស្រុកពង់ណាំរ៉ុន ខេត្តចន្ទបុរី។
ក្នុងចំណោមមនុស្សទាំង៤នាក់មាន ៣នាក់ ធ្វើការជាអ្នកគ្រប់គ្រងគេហទំព័របនល្បែងស៊ីសងតាមអ៊ីនធឺណិត ខណៈដែលអ្នកទីបួនធ្វើការជាកម្មករទូទៅ។
ពួកគាត់បានសារភាពប្រាប់អាជ្ញាធរថៃថា អាជ្ញាធរកម្ពុជាបានរឹតបន្តឹង និងបើកប្រតិបត្តិការបង្ក្រាបលើជនបរទេស និងអាជីវកម្មខុសច្បាប់ ដែលបណ្តាលឱ្យពួកគាត់ត្រូវរស់លាក់ខ្លួន ធ្វើឱ្យពួកគាត់ជួបការលំបាក គ្មានការងារធ្វើ ហើយសម្រេចលួចឆ្លងដែនចូលប្រទេសថៃវិញ។
អ្នកទាំង៤បានជួលមេខ្យល់ ដោយក្នុងម្នាក់ត្រូវចំណាយប្រាក់៦០០០បាត ឬស្មើនឹងប្រមាណ២០០ដុល្លារសហរដ្ឋអាមេរិកដើម្បីឲ្យជូនឆ្លងដែនចូលក្នុងប្រទេសថៃ។
អ្នកឃ្លាំមើលសង្គមលោក ម៉ែន ណាត យល់ឃើញថា ការលបលួចឆ្លងដែនរបស់ក្រុមអ្នកពាក់ព័ន្ធល្បែងអនឡាញទាំងនេះ ដោយសារមន្ត្រីនៅកម្ពុជាចាប់តាំងពីថ្នាក់ធំដល់ថ្នាក់តូច មិនអាចលុបបំបាត់អំពើពុករលួយបាន។ លោកបន្តថា លោក ហ៊ុន សែន ជាមេក្លោងធំនៃអំពើពុករលួយទាំងនេះដែលបានបើកដៃឲ្យអ្នកប្រព្រឹត្តបទល្មើសល្បែងអនឡាញទាំងនោះរត់គេច ឆ្លងដែនទៅថៃបាន។ លោកលើកឡើងទៀតថា ការបង្ក្រាបបទល្មើសល្បែងអនឡាញរបស់អាជ្ញាធរកម្ពុជា គ្រាន់ជារូបភាពបំភ័ន្តភ្នែកប្រជាពលរដ្ឋ ដើម្បីបិទបាំងអំពើអាក្រក់របស់ខ្លួនប៉ុណ្ណោះ។
លោក ម៉ែន ណាត៖ «ហែងចង់បង្ក្រាបឲ្យបានពិតប្រាកដមែនវាទាល់តែបង្ក្រាប ហ៊ុន សែន ឯជាយដែនវាៗពាក់ព័ន្ធជាមួយមន្ត្រីធំហ្នឹង បើមន្ត្រីធំវាឲ្យភ្លើងខៀវហើយមន្ត្រីតូចម៉េចហ៊ាន វាអញ្ចឹងហ្នឹងណា ដកយ៉ាងច្រើនគេដកហូតដកតួនាទីពួកប៉ូលិសពួកទាហានហ្នឹងម្នាក់ពីរនាក់ហ្នឹង ហើយបន្ទាប់មកពួកហ្នឹងវានៅតែដដែលដូចតែពីមុនអញ្ចឹង»។
ចាប់តាំងពីកម្ពុជាមានជម្លោះព្រំដែនជាមួយប្រទេសថៃមក រហូតឈានដល់ការបិទព្រំដែន ថៃតែងតែចោទកម្ពុជាថា ជាជង្រុកនៃឧក្រិដ្ឋកម្មអនឡាញ ហើយយកលេសធ្វើសង្គ្រាមរហូតបានគ្រប់គ្រងទឹកដីជាច្រើនទីតាំងរបស់កម្ពុជា។ ហើយករណីជាតិសាសន៍ជាច្រើន បានលួចឆ្លងដែននេះ មិនមែនជាលើកទីមួយឡើយ គឺថៃចោទថា ពួកគេ គឺជាក្រុមឧក្រឹដ្ឋកម្មអនឡាញ ដោយបានធ្វើឲ្យកេរ្តិ៍ឈ្មោះកម្ពុជាអាប់អោននៅលើឆាកអន្តរជាតិ។
