យោធាថៃបានដកកងទ័ព និងសព្វាវុធធុនធ្ងន់មួយចំនួន ចេញពីតំបន់ព្រំដែនកម្ពុជា។ នេះបើតាមការផ្សព្វផ្សាយនៅលើបណ្ដាញសង្គម របស់ក្រុមទាហានថៃដែលកំពុងឈរជើងក្នុងតំបន់ព្រំដែនកម្ពុជា-ថៃ នៅពេលថ្មីៗនេះ។ អ្នកឃ្លាំមើលយល់ថា ការដកកម្លាំងទ័ពរបស់យោធាថៃ អាចជាការកាត់បន្ថយការចំណាយ ឬផ្លាស់ប្ដូរកម្លាំងថ្មី និងមិនបណ្ដាលឱ្យមានការប្រែប្រួលស្ថានការណ៍នៅតាមព្រំដែននោះឡើយ។
ទាហានថៃ ដែលឈរជើងនៅតាមតំបន់កម្ពុជា-ថៃ នៅពេលថ្មីៗនេះ បានបង្ហាញពីសកម្មភាពដកកម្លាំង និងប្រមូលសព្វាវុធធុនធ្ងន់មួយចំនួនចេញពីតំបន់សមរភូមិ ដែលដណ្ដើមបានពីកម្ពុជា។ នៅលើបណ្ដាញសង្គម ដែលក្រុមទាហានបានបង្ហោះជាបន្តបន្ទាប់ ដោយលាគ្នា ដើម្បីត្រឡប់ទៅផ្ទះវិញ។ ទោះជាយ៉ាងណា ពួកគេបានប្រកាសថា នឹងត្រឡប់មកវិញ ប្រសិនបើមានសង្គ្រាមផ្ទុះឡើងសាជាថ្មី។
ក្នុងនោះ ទាហានថៃបានបង្ហាញពីសកម្មភាពប្រមូលគ្រាប់កាំភ្លើងចេញពីក្នុងរថក្រោះ ដោយមានទាំងគ្រាប់បំពាក់ក្បាលចុះទម្លុះក្រោះដែក និងគ្រាប់ផ្ទុះកម្រិតខ្លាំងយកមកតម្រៀបទុក ខណៈរថក្រោះប្រភេទ Stingray និង Scorpion ជាច្រើនគ្រឿង ត្រូវបានដឹកតាមរថយន្តចេញពីតំបន់ព្រំដែនខេត្តស៊ីសាកេត ដែលជាប់តំបន់មុំបី និងតំបន់ប្រាសាទតាក្របី របស់កម្ពុជា។
ពាក់ព័ន្ធនឹងការដកកម្លាំងទ័ព និងសព្វាវុធចេញពីតំបន់ព្រំដែននេះ ស្ថាប័នយោធាថៃមិនទាន់ចេញមកបញ្ជាក់ជាផ្លូវការនៅឡើយ។ ទោះជាយ៉ាងណា កន្លងមក រដ្ឋមន្ត្រីក្រសួងការពារជាតិថៃ លោក ណាត់តាផន ណាក់ផានិច (Nattapon Nakpanich) ធ្លាប់បានលើកឡើងពីផែនការកាត់បន្ថយចំនួនកងទ័ព ដែលឈរជើងនៅតាមបណ្ដោយព្រំដែនកម្ពុជា ដើម្បីកាត់បន្ថយការចំណាយក្នុងវិស័យការពារជាតិថៃ។
ទោះជាបែបនេះក្ដី ទាហានថៃមួយចំនួន បានលើកឡើងនៅក្នុងបណ្ដាញសង្គមថា សព្វាវុធដែលដឹកចេញពីតំបន់ព្រំដែន នឹងត្រូវគេបញ្ជូនដើម្បីយកទៅជួសជុល និងធ្វើទំនើបកម្ម ឱ្យកាន់តែខ្លាំង ខណៈនៅតំបន់ព្រំដែន ទាហានថៃបានរក្សាទុកអាវុធធុនធ្ងន់ដែលចាំបាច់នៅដដែល។
ស្របគ្នានេះដែរ ទាហានខ្មែរ ដែលកំពុងឈរជើងនៅតំបន់ជាំតែ ក្នុងខេត្តព្រះវិហារ បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញអត្តសញ្ញាណថា ទាហានថៃនៅតែឈរជើងការពារនៅតំបន់រាយបន្លាលួស និងកាយប្រឡាយ ដោយពួកគេបានបណ្ដេញ និងគំរាមមកលើទាហានខ្មែរ មិនឱ្យចូលទៅក្បែរនោះឡើយ។ ទាហានខ្មែររូបនេះបន្តថា មកដល់ពេលនេះ ទាហានថៃ នៅតែមានប្រៀបជាងទាហានខ្មែរ ទាំងទីតាំងភូមិសាស្ត្រ កម្លាំងប្រយុទ្ធ និងអាវុធ ហើយនេះមិនទាន់រាប់បញ្ចូលទ័ពអាកាសរបស់ថៃនៅឡើយ។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត យល់ឃើញថា ការដកកម្លាំងទ័ពរបស់យោធាថៃ អាចជាកាកែសម្រួលយុទ្ធសាស្ត្រ និងដើម្បីរក្សាស្ថិរភាពនយោបាយ ក្នុងអន្តរកាលនៃការបង្កើតរដ្ឋាភិបាលថ្មីនៅក្នុងប្រទេសថៃ។ ទោះជាយ៉ាងណា លោកបន្តថា ការដកកម្លាំងទ័ពមួយចំនួន របស់យោធាថៃនេះ មិនបានធ្វើឱ្យមានការប្រែប្រួលចំពោះស្ថានការណ៍នៅតាមព្រំដែននោះឡើយ ដោយយោធាថៃ នៅតែបន្តកាន់កាប់ទឹកដីកម្ពុជា នៅតាមព្រំដែន ខណៈរដ្ឋាភិបាលកម្ពុជា នៅតែបង្ហាញគោលជំហរទន់ជ្រាយ ក្នុងការប្ដឹងថៃតាមយន្តការច្បាប់អន្តរជាតិ។
លោក ម៉ែន ណាត៖ «ថៃគេអាចប្រែប្រួលយុទ្ធសាស្ត្រពេលណាក៏បាន តាមស្ថានភាពជាក់ស្ដែង។ ម្ល៉ោះហើយកម្ពុជាត្រូវត្រៀមខ្លួន ទាំងផ្នែកការទូតនៅលើឆាកអន្តរជាតិ ទាំងការរៀបចំឯកសារដើម្បីប្ដឹងថៃ និងប្រើប្រាស់សិទ្ធិការពារខ្លួន រួមទាំងកែសម្រួលបញ្ហាផ្ទៃក្នុងដែរ ដូចជាការធ្វើទំនើបកម្មផ្នែកយោធា និងការបោសសម្អាតអំពើពុករលួយ»។
ទោះបីជាយោធាថៃបានដកកម្លាំងទ័ពមួយចំនួនក្ដី ក៏យោធាថៃបានរក្សាទុក និងពង្រឹងកម្លាំងយោធាដែលឈរជើងនៅក្នុងតំបន់សំខាន់ៗ តាមបណ្ដោយព្រំដែនដដែល។ ការដកកម្លាំងទ័ពរបស់យោធាថៃនេះ ធ្វើឡើងស្របពេលដែលយោធាថៃ បានធ្វើសមយុទ្ធជាលក្ខណៈទ្រង់ទ្រាយធំទាំងលើគោក ដែនអាកាស និងនៅលើដែនសមុទ្រ ដោយមានការចូលរួម និងបណ្ដុះបណ្ដាលពីសំណាក់ប្រទេសសម្ព័ន្ធមិត្តរបស់ថៃ មានដូចជាសហរដ្ឋអាមេរិក និងសិង្ហបុរីជាដើម។
ជាមួយគ្នានេះ មេបញ្ជាការកងទ័ពអាកាសថៃធ្លាប់បានអះអាងថា យោធាថៃមិនបារម្ភពីការផ្ទុះឡើងនៃសង្គ្រាមតាមព្រំដែនជាមួយកម្ពុជា ជាលើកទីបីនោះឡើយ ដោយសារទ័ពអាកាសថៃ អាចគ្រប់គ្រងស្ថានការណ៍របស់កងទ័ពខ្មែរបានទាំងស្រុង និងអាចបើកការវាយប្រហារដោយឆាប់រហ័សបានភ្លាមៗ នៅពេលមានសង្គ្រាមផ្ទុះឡើង៕
