ប្រទេសថៃបានបន្តសាងសង់របងព្រំដែនអចិន្ត្រៃយ៍ជាឯកតោភាគីនៅចន្លោះបង្គោលព្រំដែនលេខ ៥៤ ដល់លេខ៥៩ ដែលស្ថិតនៅព្រំដែនខេត្តចន្ទបុរី ជាប់នឹងខេត្តបាត់ដំបង របស់កម្ពុជា ជាមួយនឹងការដាក់ពង្រាយកម្លាំងប្រយុទ្ធនៅក្នុងតំបន់នេះ។ ទន្ទឹមគ្នានេះ យោធាថៃបានប្រកាសពីគម្រោងចែកដីឱ្យប្រជាពលរដ្ឋរបស់ខ្លួន មករស់នៅតំបន់ព្រំដែនក្នុងខេត្តចំនួន៥ ដែលស្ថិតនៅជាប់ព្រំដែនកម្ពុជា ដើម្បីកាន់កាប់ជាអចិន្ត្រៃយ៍ ក្នុងទីតាំងមួយចំនួនដែលយោធាថៃបានឈ្លានពានពីកម្ពុជា និងទីតាំងដែលកំពុងមានជម្លោះ។
បន្ទាប់ពីទទួលបានជំនួយពីមូលនិធិរបស់រាជវង្ស ពេលនេះយោធាថៃបានបង្កើនការសាងសង់របងព្រំដែនអចិន្ត្រៃយ៍នៅតាមព្រំដែនកម្ពុជា បានជាច្រើនគីឡូម៉ែត្រ។
តាមរយៈវីដេអូ ដែលយោធាថៃបានចែករំលែកនៅលើបណ្ដាញសង្គម បានបង្ហាញពីសកម្មភាពរបស់ក្រុមសាងសង់របស់ភាគីថៃកំពុងតម្រៀបគ្រឹះ និងប្រើប្រាស់ដងស្ទូចដំឡើងផ្ទាំងជញ្ជាំងធំៗ នៅតាមបណ្ដោយបង្គោលព្រំដែនលេខ ៥៤ ដល់៥៩ ដែលមានប្រវែងសរុបជាង៧គីឡូម៉ែត្រ ស្ថិតនៅស្រុកពោងណាំរ៉ន (Pongnamron) ខេត្តចន្ទបុរី (Chanthaburi) ជាប់នឹងស្រុកកំរៀង ខេត្តបាត់ដំបង របស់កម្ពុជា។ ក្នុងអំឡុងនៃការសាងសង់របងព្រំដែននេះ យោធាថៃបានសាងសង់ផ្លូវនៅតាមបណ្ដោយទីតាំងបន្លាលួស ដែលយោធាថៃបានដាក់ពង្រាយ ដើម្បីដឹកជញ្ជូនសម្ភារៈសម្រាប់សាងសង់ និងលេណដ្ឋានធំៗជាច្រើនទីតាំង ត្រូវបានយោធាថៃសាងសង់ទន្ទឹមគ្នានេះដែរ។
តាមការអះអាងរបស់យោធាថៃ បច្ចុប្បន្នរបងព្រំដែនអចិន្ត្រៃយ៍ដែលយោធាថៃកំពុងសាងសង់ក្នុងដំណាក់ទី២ មានប្រវែងសរុបជាង ៧គីឡូម៉ែត្រនេះ បានសម្រេចជិតពាក់កណ្ដាលហើយ។ ចំណែករបងព្រំដែន ដែលស្ថិតនៅទីតាំងចន្លោះបង្គោលលេខ៥២ ដល់៥៤ ប្រវែងជាង ១គីឡូម៉ែត្រ ដែលយោធាថៃទើបសាងសង់រួចនោះ យោធាថៃកំពុងសិក្សាគម្រោងដំឡើងប្រព័ន្ធឃ្លាំមើលដោយស្វ័យប្រវត្តិ ដើម្បីត្រួតពិនិត្យសកម្មភាពនៅក្នុងទឹកដីកម្ពុជា។
ក្រៅពីសាងសង់របងថ្មជាឯកតោភាគី ដោយបំពានកិច្ចព្រមព្រៀងនៃអនុស្សរណៈយោគយល់គ្នាឆ្នាំ២០០០ ឬ MOU៤៣ ជាមួយកម្ពុជាហើយនោះ ថ្មីៗនេះយោធាថៃបានប្រកាសកៀរគរប្រជាពលរដ្ឋ និងទាហានរបស់ខ្លួនឱ្យចូលមករស់នៅតាមតំបន់ព្រំដែនដែលស្ថិតនៅជាប់ប្រទេសកម្ពុជា ជាអចិន្ត្រៃយ៍ ដោយយោធាថៃបានសន្យាផ្ដល់ដីធ្លី និងអភិវឌ្ឍប្រព័ន្ធសាធារណសុខនៅក្នុងតំបន់ថែមទៀត។
ខេត្តតាមព្រំដែនទាំង៥ ដែលយោធាថៃគ្រោងនឹងនាំប្រជាពលរដ្ឋទៅរស់នៅនេះ រួមមានខេត្តសុរិន្ទ (Surin) ស៊ីសាកេត (Sisaket) បុរីរ៉ាំ (Buriram) ឧប៊ុនរ៉ាចាថានី (Ubon Ratchathani) និងខេត្តស្រះកែវ (Sakaeo)។ ចំណែកទីតាំងនៅតំបន់ព្រំដែនកម្ពុជា ដែលយោធាថៃគ្រោងនឹងចែកឱ្យពលរដ្ឋថៃមករស់នៅនោះ មានតំបន់មួយចំនួន ត្រូវយោធាថៃបានឈ្លានពានពីកម្ពុជា និងបានពីការឈូសឆាយលំនៅឋានរបស់ពលរដ្ឋខ្មែរ ក្នុងអំឡុងផ្ទុះសង្គ្រាមតាមព្រំដែន ខណៈទីតាំងខ្លះទៀត នៅមិនទាន់កំណត់ខ្សែបន្ទាត់ព្រំដែនឱ្យបានច្បាស់លាស់នៅឡើយ។
រដ្ឋមន្ត្រីក្រសួងការពារជាតិថៃ លោក អាឌុល ប៊ុនថាំចារើន (Adul Boonthamcharoen) បានបញ្ជាក់ថា គម្រោងកៀរគរពលរដ្ឋឱ្យមករស់នៅតំបន់ព្រំដែន ដែលគេឱ្យឈ្មោះថា «របងមនុស្សរស់នេះ» នឹងត្រូវអនុវត្តមានរយៈពេល ៥ឆ្នាំ ដោយចាប់ផ្ដើមពីឆ្នាំ២០២៧ រហូតដល់ឆ្នាំ២០៣១ ក្រោយពេលដែលគម្រោងនេះទទួលបានការឯកភាពពីគណៈរដ្ឋមន្ត្រីរបស់ថៃ។
ទូរទស្សន៍អាស៊ីសេរី មិនអាចទាក់ទងរដ្ឋមន្ត្រីទទួលបន្ទុក រដ្ឋលេខាធិការដ្ឋានកិច្ចការព្រំដែន លោក ឡាំ ជា និងអភិបាលខេត្តបាត់ដំបង លោក សុខ លូ ដើម្បីសុំការបកស្រាយជុំវិញរឿងនេះបានទេ នៅថ្ងៃទី២១ ខែកញ្ញា។ ចំណែកក្រសួង និងស្ថាប័នពាក់ព័ន្ធ ក៏មិនបានចេញសេចក្ដីថ្លែងការណ៍អំពីបញ្ហានេះនោះដែរ។
ជុំវិញរឿងនេះ ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន យល់ឃើញថា យោធាថៃកំពុងប្រើប្រាស់យុទ្ធសាស្ត្រ «របងប្រជាសាស្ត្រ» ដើម្បីកាន់កាប់ទឹកដីកម្ពុជា ជាអចិន្ត្រៃយ៍ តាមរយៈការបណ្ដេញពលរដ្ឋខ្មែរ ដើម្បីយកដីឱ្យពលរដ្ឋថៃរស់នៅ។ លោកបន្តថា យោធាថៃបានប្រើប្រាស់យុទ្ធសាស្ត្រនេះ គឺដើម្បីបំភាន់ភ្នែកអន្តរជាតិ តាមរយៈការកែប្រែភូមិសាស្ត្រនៅលើដីជាក់ស្ដែង និងតាំងរដ្ឋបាល ដើម្បីបង្កើតឱ្យមានរូបភាពការគ្រប់គ្រងជាក់ស្ដែង។
លោក អ៊ុំ សំអាន៖ «យុទ្ធសាស្ត្ររៀបចំពេលនេះគឺថៃបានប្រើរហ័សហើយនៅលើកោះកុដ។ ថៃគេដាក់ប្រជាពលរដ្ឋរបស់គេនៅលើកោះគជ់។ អញ្ចឹងធ្វើឱ្យកម្ពុជាពិបាកទាមទារកោះគជ់មកវិញ។ វៀតណាមវិញគេធ្វើអញ្ចឹងដែរ។ គេដាក់ជនជាតិរបស់គេរស់នៅលើកោះត្រល់។ អញ្ចឹងយើងពិបាកទាមទារកោះត្រល់មកវិញ។ ដូច្នេះនៅពេលអនាគតគេថាយោងទៅតាមការកាន់កាប់ជាក់ស្ដែង។ តាមច្បាប់អន្តរជាតិគឺមិនអាចប្រមូលទឹកដីហ្នឹងមកឱ្យខ្មែរវិញបាននោះទេ។ អាហ្នឹងគេប្រើយុទ្ធសាស្ត្រហ្នឹងហើយ»។
ពាក់ព័ន្ធនឹងរឿងជម្លោះព្រំដែននេះដែរ ទាហានខ្មែរម្នាក់ ដែលកំពុងឈរជើងនៅព្រំដែនខេត្តឧត្តរមានជ័យ បានអះអាងប្រាប់ទូរទស្សន៍អាស៊ីសេរីក្នុងលក្ខខណ្ឌមិនបញ្ចេញអត្តសញ្ញាណថា នៅថ្ងៃទី២១ ខែកញ្ញា នេះ យោធាថៃបានបញ្ជូនគ្រឿងចក្រមកលុបបំពេញលេណដ្ឋានរបស់ទាហានខ្មែរ នៅតំបន់ភ្នំបេង រាបស្មើដីទៅហើយ បន្ទាប់ពីភាគីថៃបានតវ៉ានិងចោទថា ទាហានខ្មែរបានកាយលេណដ្ឋាននេះ ចូលទៅក្នុងតំបន់ភ្នំ៤៥០ ដែលយោធាថៃកំពុងកាន់កាប់។
ទោះជាបែបនេះក្ដី ទាហានខ្មែររូបនេះបានអះអាងថាខណៈភាគីថៃបានចូលមកលុបបំពេញលេណដ្ឋានរបស់ទាហានខ្មែរនោះ នៅខាងភាគីថៃឯណោះវិញ យោធាថៃបានបន្តធ្វើសកម្មភាពឈូសឆាយសាងសង់ផ្លូវ និងលេណដ្ឋាន ដោយរំលោភចូលក្នុងទឹកដីកម្ពុជា ស្ថិតនៅក្នុងភូមិសាស្ត្រទំនប់តាទុំ ភ្នំបេង និងភ្នំ៤២៩ ជាដើម។ លោកបន្តថា ហេតុការណ៍នេះ បានធ្វើឱ្យទាហានខ្មែរមួយចំនួន ដកថយទាំងទឹកភ្នែក ដោយសារសោកស្ដាយការបាត់បង់ទីតាំងឈរជើង ដែលខ្លួនបានដើរល្បាតដោយគ្មានការផ្ទុះអាវុធសូម្បីមួយគ្រាប់នោះឡើយ៕
