យោធាថៃបានបង្ហាញពីបច្ចុប្បន្នភាពការសាងសង់របងតាមព្រំដែនក្នុងខេត្តចន្ទបុរី ជាប់ប្រទេសកម្ពុជា ប្រវែងជាង ១គីឡូម៉ែត្រ បន្ទាប់ពីប្រកាសគម្រោងជាសាធារណៈរួច។ ទន្ទឹមគ្នានេះ យោធាថៃនៅតែបន្តហ្វឹកហាត់ និងធ្វើសមយុទ្ធយោធាទ្រង់ទ្រាយធំ ក្រោយពេលយោធាថៃ បានចូលកាន់កាប់ទឹកដីរបស់កម្ពុជា ជាច្រើនទីតាំងនៅតាមបណ្ដោយព្រំដែន។
យោធាថៃអះអាងថា គម្រោងសាងសង់ជញ្ជាំងរបងនៅតាមព្រំដែនកម្ពុជា ក្នុងខេត្តចន្ទបុរី កំពុងតែដំណើរការ បន្ទាប់ពីកម្លាំងជំនាញរបស់ថៃ បានដោះមីន និងឈូសឆាយព្រៃរួច ហើយរបងជញ្ជាំងនេះ នឹងត្រូវសាងសង់រួចជាស្ថាពរក្នុងរយៈពេល ៤៥ថ្ងៃ។
អ្នកនាំពាក្យទីបញ្ជាការកងទ័ពថៃ លោក វិថៃ ឡៃថមយ៉ា (Witai Laithomya) បានប្រកាសកាលពីថ្ងៃទី ១៧ ខែមីនា ថា ការសាងសង់ជញ្ជាំងរបងតាមព្រំដែនជាប់នឹងកម្ពុជានេះ គឺធ្វើឡើងតែនៅលើទីតាំងដែលគ្មានជម្លោះប៉ុណ្ណោះ ដោយភាគីថៃបានអះអាងទៀតថា ការសាងសង់នេះ មានការឯកភាពពីភាគីកម្ពុជា រួចរាល់ហើយ។ ទោះជាយ៉ាងណា មកដល់ពេលនេះ មិនទាន់មានការប្រកាសជាសាធារណៈ និងផ្លូវការណាមួយ ពីសំណាក់រដ្ឋាភិបាលកម្ពុជា អំពីរឿងនេះ នោះឡើយ។
លោក វិថៃ អះអាងទៀតថា ការសាងសង់របងតាមព្រំដែនជាអចិន្ត្រៃយ៍នេះ គឺដើម្បីពង្រឹងសន្តិសុខជាតិរបស់ថៃ និងការពារឧក្រិដ្ឋកម្មឆ្លងដែនគ្រប់ប្រភេទ ដោយរួមបញ្ចូលទាំងការលួចឆ្លងដែនខុសច្បាប់ផង។ លោកបន្តថា នៅពេលខាងមុខ ប្រទេសថៃនឹងសាងសង់របងបែបនេះ នៅតាមបណ្ដោយព្រំដែនជាប់ប្រទេសកម្ពុជា បន្ថែមទៀត ដោយបំពាក់ជាមួយកាមេរ៉ាសុវត្ថិភាព ដែលមានបច្ចេកវិទ្យាតាមដាន និងចាប់អត្តសញ្ញាណ។
ក្រៅពីសង់របងខណ្ឌព្រំប្រទល់គ្នាជាមួយកម្ពុជាហើយនោះ យោធាថៃក៏បានពង្រឹងកម្លាំងយោធាគ្រប់ផ្នែកផងដែរ។
នៅថ្ងៃទី១៨ ខែមីនា នេះ កងទ័ពជើងទឹកថៃ បានបើកយុទ្ធនាការធ្វើសមយុទ្ធប្រចាំឆ្នាំ ជាលក្ខណៈទ្រង់ទ្រាយធំ ដោយមានការហ្វឹកហាត់បាញ់គ្រាប់ពិត ចេញពីនាវានៅលើដែនសមុទ្រ ដោយប្រើប្រាស់ប្រព័ន្ធរ៉ាដាបញ្ជូនសញ្ញា ការចល័តសព្វាវុធនៅលើដែនគោក និងការប្រើប្រាស់ដ្រូនពិឃាដជាដើម។
មេបញ្ជាការកងទ័ពជើងទឹកថៃ លោក ផៃរ៉ូត ហ្វឿងចន្ទ្រ (Pairoj Fuangchan) បានលើកឡើងថា ការធ្វើសមយុទ្ធប្រចាំឆ្នាំនេះ ក្នុងគោលបំណងដើម្បីពង្រឹងសមត្ថភាពរបស់កងទ័ពជើងទឹក ដើម្បីត្រៀមខ្លួនការពារ និងវាយប្រហារ នៅពេលមានស្ថានការណ៍គំរាមកំហែងចំពោះប្រទេសថៃ។
ចំណែកខាងផ្លូវអាកាសវិញ កងទ័ពអាកាសថៃ សិង្ហបុរី និងសហរដ្ឋអាមេរិក កំពុងចូលរួមក្នុងសមយុទ្ធ ដែលគេឱ្យឈ្មោះថា Cope Tiger លើកទី៣២។ កងទ័ពអាកាសថៃ អះអាងថា សមយុទ្ធរួមគ្នានេះ ធ្វើឡើងដើម្បីហាត់សមសមត្ថភាពប្រយុទ្ធ ការវាយប្រហារ និងប្រតិបត្តិការយន្តហោះគ្មានមនុស្សបើក នៅលើដែនអាកាស និងដើម្បីពង្រឹងទំនាក់ទំនងវិស័យការពារជាតិរវាងប្រទេសដែលចូលរួម។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត យល់ថា សកម្មភាពរបស់យោធាថៃ គឺជាការគំរាមកំហែងដោយប្រយោលចំពោះកម្ពុជា ដែលមានគោលជំហរទាមទារទឹកដីដែលយោធាថៃកំពុងគ្រប់គ្រងត្រឡប់មកវិញ។ លោកបន្តថា ក្នុងកាលៈទេសៈនេះ កម្ពុជាមិនអាចប៉ះទង្គិចផ្នែកយោធាជាមួយថៃនោះឡើយ ដោយកម្ពុជា គួរតែប្រើប្រាស់យន្តការ ការទូត និងច្បាប់អន្តរជាតិ ដើម្បីប្រឆាំងនឹងសកម្មភាពឈ្លានពានរបស់យោធាថៃ។
លោក ម៉ែន ណាត៖ «នៅពេលប្រើសិទ្ធិការពារខ្លួន ប្រាកដជាប្រើអាវុធការពារខ្លួនហើយ។ បើមានឱកាសផ្ទុះសង្គ្រាមទៀត ថៃនឹងវាយចូលកាន់កាប់ក្នុងតំបន់មួយចំនួនបន្ថែមទៀត។ ដូច្នេះ ក្នុងដំណាក់កាលនេះ រដ្ឋាភិបាលកម្ពុជាត្រូវតែធ្វើនយោបាយ និងមានយុទ្ធសាស្ត្រដែលឆ្លាតវៃជាងមុន»។
យ៉ាងណាមិញ សកម្មភាពសាងសង់របងជញ្ជាំងអចិន្ត្រៃយ៍ និងធ្វើសមយុទ្ធរបស់យោធាថៃនេះ ធ្វើឡើងបន្ទាប់ពីប្រជាពលរដ្ឋ និងអ្នកនយោបាយថៃ បង្ហាញក្ដីបារម្ភពីការផ្ទុះឡើងនៃសង្គ្រាមនៅតាមព្រំដែនជាលើកទី៣ បន្ទាប់ពីតំណាងកម្ពុជា បានដាក់លិខិតតវ៉ា ចំពោះករណីអ្នកលេងបណ្ដាញសង្គមថៃ បានយករូបថតរបស់លោក ហ៊ុន សែន ទៅកាត់តដាក់ក្នុងប្រហោងគល់ឈើ។
មហាជនថៃយល់ថា ករណីនេះទំនងជាធ្វើឱ្យលោក ហ៊ុន សែន ខឹងសម្បារជាងការដែលបាត់បង់ទឹកដីតាមព្រំដែនជាច្រើនទីតាំង ដែលអាចបង្កឱ្យផ្ទុះសង្គ្រាមសាជាថ្មី ដូចករណីលោក ហ៊ុន សែន ធ្លាប់ប្រតិកម្មចំពោះជនជាតិថៃ ដែលយករូបលោក ដាក់បាញ់យករង្វាន់កន្លងទៅនោះដែរ។
ទោះជាបែបនេះក្ដី ទីបញ្ជាការកងទ័ពអាកាសថៃ បានប្រកាសថា កងទ័ពថៃមានសមត្ថភាពគ្រប់គ្រងស្ថានការណ៍ និងសកម្មភាពរបស់ទាហានខ្មែរបានទាំងស្រុង ដោយកងទ័ពថៃ មានលទ្ធភាពគ្រប់គ្រាន់ ដើម្បីរាំងខ្ទប់កម្លាំងយោធាខ្មែរ។ បន្ថែមពីលើនេះ កងទ័ពអាកាសថៃ បានអះអាងថា កម្ពុជាគ្មានសមត្ថភាពដើម្បីប្រឆាំងនឹងប្រតិបត្តិការតាមផ្លូវអាកាស របស់កងទ័ពថៃនោះឡើយ។
ពាក់ព័ន្ធនឹងរឿងវិវាទព្រំដែននេះដែរ កាលពីថ្ងៃទី ១៧ ខែមីនា ក្រសួងការបរទេសកម្ពុជា បានចេញតវ៉ាជាផ្លូវការម្ដងទៀត ប្រឆាំងនឹងសកម្មភាពឈ្លានពាន និងកាន់កាប់ដីខុសច្បាប់ជាបន្តបន្ទាប់របស់យោធាថៃ ដែលបានសង់ផ្លូវ រូបសំណាកព្រះពុទ្ធ លេណដ្ឋាន លើដីខ្មែរក្នុងតំបន់មួយចំនួន ដូចជា ប្រាសាទតាមាន់ធំ ភូមិថ្មដូន ស្រុកបន្ទាយអំពិល តំបន់អូរស្មាច់ ប្រាសាទខ្នារ ក្នុងខេត្តឧត្តរមានជ័យ និងនៅតំបន់មុំបី ភ្នំ៤៦៩ ច្រកទ្វារព្រំដែនអន្តរជាតិអានសេះ អូរផ្កាស្នេហ៍ ភ្នំ៦៧៧ ភ្នំ៥០០ តាថាវ ភ្នំទ្រព្យ តាសឹម ចាក់ច្រែង ក្នុងខេត្តព្រះវិហារ។
ក្រសួងការបរទេសកម្ពុជា ទាមទារឱ្យប្រទេសថៃបញ្ឈប់សកម្មភាពនេះជាបន្ទាន់៕
