អ្នកចាញ់បោកអតីតឧកញ៉ាហ៊ី គឹមហុង ទទូចឲ្យតុលាការប្រកាសសាលក្រម ឲ្យបានឆាប់ ដោយថា ការអូសបន្លាយយូរ នឹងធ្វើឲ្យពួកគាត់ជួបវិបត្តិផ្លូវចិត្តធ្ងន់ធ្ងរ ព្រោះតែគ្មានប្រាក់សងបំណុល ខណៈកូនៗក៏បោះបង់ការសិក្សា។ សង្គមស៊ីវិល សង្ឃឹមថា តុលាការនឹងពន្លឿននីតិវិធី ដោយថា ការពន្យារពេលយូរ នឹងធ្វើឲ្យពលរដ្ឋ រងគ្រោះផ្ទួនៗគ្នា។
ពលរដ្ឋដែលដាក់ប្រាក់វិនិយោគជាមួយក្រុមហ៊ុនលោក ហ៊ី គឹមហុង លើកឡើងថា ការពន្យារពេលប្រកាសសាលក្រមសំណុំរឿងលោក ហ៊ី គឹមហុង នេះ ធ្វើឲ្យពួកគាត់មានវិបត្តិផ្លូវចិត្ត និងរងសម្ពាធកាន់តែខ្លាំងដោយសារគ្មានប្រាក់សងបំណុលធនាគារ។
ការលើកឡើងនេះ បន្ទាប់ពីសាលាដំបូងរាជធានីភ្នំពេញកាលពីថ្ងៃទី០៨ ខែមេសា បានលើកពេលប្រកាសសាលក្រមសំណុំរឿងបោកប្រាក់ពលរដ្ឋ ពីសំណាក់អតីតឧកញ៉ា ហ៊ី គឹមហុង និងបក្ខពួក ទៅថ្ងៃក្រោយវិញ ដោយគ្មានកំណត់ថ្ងៃជាក់លាក់ ដោយអះអាងថា ដើម្បីកុំឱ្យប៉ះពាល់ដល់សវនាការសំណុំរឿងរបស់លោក កឹម សុខា។
ពលរដ្ឋរងគ្រោះនៅខេត្តបាត់ដំបង លោក សោម ឆេង ប្រាប់ទូរទស្សន៍អាស៊ីសេរីថា ការពន្យារពេលរបស់តុលាការ ក្នុងការដោះស្រាយឲ្យពួកគាត់នេះ ធ្វើឲ្យជនឆបោកមួយចំនួនទៀតមិនខ្លាចច្បាប់។ លោកថា ពួកគាត់ត្រូវរងគ្រោះដោយក្រុមហ៊ុនលោក ហ៊ី គឹមហុង ហើយមករងគ្រោះ ដោយសារតុលាការយឺតយ៉ាវ ក្នុងការដោះស្រាយមួយជាន់ទៀត ដែលធ្វើឲ្យពួកគាត់ជួបវិបត្តិផ្លូវចិត្តធ្ងន់ធ្ងរ ខណៈបំណុលធនាគារកាន់តែកើនឡើង ពីព្រោះមិនមានលុយសងត្រឡប់។
លោក សោម ឆេង៖ «ឲ្យរាជរដ្ឋាភិបាល ឬមួយតុលាការក្នុងរាជរដ្ឋាភិបាលដោះស្រាយ រកយុត្តិធម៌ ដើម្បីទាមទារលុយកាកដែលបង់ខាត ហើយហ្នឹងដើមទុនយកមកវិញទេ អត់មានពាក់ព័ន្ធទៅនឹងនយោបាយ ឬចង់បំផុសបំផុល ឬក៏ប្រឆាំងអីទេ អត់ទេ។ ខ្ញុំចង់ថា ឲ្យតុលាការពន្លឿនយ៉ាងណា ពីព្រោះអីជម្រើសចុងក្រោយហើយ វាច្រើនឆ្នាំហើយ បើសិនតុលាការនៅពន្យារពេលប្រជាពលរដ្ឋខ្លះគាត់កើតជាទុរភិក៌ បានន័យថា សតិមិនប្រក្រតី ហើយជីវភាពកូនចៅបាត់បង់ការសិក្សានិយាយរួមបាត់ទាំងអស់បណ្ដោយ ទីលំនៅ ដីកេរ្តិ៍ម៉ែឪ អ្នកខ្លះអាចនឹងហ៊ានធ្វើឃាតខ្លួនឯងទៀត»។
លោក សោម ឆេង បន្តថា ប្រសិនបើតុលាការនៅតែមិនកំណត់ពេលវេលាឲ្យជាក់ លាក់ ក្នុងការប្រកាសសាលក្រម និងពន្លឿនដំណោះស្រាយជូនពួកគាត់នោះទេ ពលរដ្ឋនឹងបាត់បង់ជំនឿលើប្រព័ន្ធតុលាការ។
ពលរដ្ឋចាញ់បោកក្រុមហ៊ុនលោក ហ៊ី គឹមហុង ម្នាក់ទៀត សុំមិនបញ្ចេញឈ្មោះ លើកឡើងថា ពួកគាត់រង់ចាំដំណោះស្រាយ និងយុត្តិធម៌ជាច្រើនឆ្នាំហើយ ដូច្នេះ បើសិនតុលាការនៅតែពន្យារពេល និងមិនមានចំណាត់ការលើអ្នកឆបោកប្រាក់ទេ ពួកគាត់នឹងនាំគ្នាឡើងទៅតវ៉ាទ្រង់ទ្រាយធំនៅភ្នំពេញជាថ្មីទៀត។
លោក សោម ឆេង៖ «ខ្ញុំឡើងទៅបិទទីក្រុងភ្នំពេញដូចរាល់ដងអ៊ីចឹង លើកហ្នឹង គឺខ្ញុំធ្វើ ខ្លាំងជាងមុន ពួកខ្ញុំអត់ខ្លាចទេ។ ខ្ញុំជារាស្ត្រធម្មតាទេ តូចតាចទេ ចៅហ្វាយក្រុងអី សម្ដេចអី ខ្ញុំទៅអស់ហើយ ខុទ្ទកាល័យអីខ្ញុំទៅដាក់អស់ហើយ ដាក់គ្រប់កន្លែងអស់ ហើយទៅណាក៏ខ្ញុំទៅដែរ។ បើសិនតុលាការមិនមានចំណាត់ការទៅលើបុគ្គល ដែលបោកប្រាស់យើង បុគ្គល ហ៊ី គឹមហុង ហ្នឹង គឺខ្ញុំទៅទៀត ខ្ញុំនឹងនាំគ្នាទៅទៀត ទាំង ២៥ ខេត្ត-ក្រុងដែលចាញ់បោក អ្នកដែលបានដាក់ពាក្យប្ដឹង គឺទៅទៀត ប៉ុន្តែ ខ្ញុំបញ្ជាក់ហើយបញ្ជាក់ទៀតប្រាប់ទៅខាងតុលាការថា ពួកខ្ញុំមិនមែនជាអ្នកនយោបាយ ឬក៏ជាអ្នកបោះបោលសង្គមអីទេ ពួកខ្ញុំជាជនរងគ្រោះ»។
ទូរទស្សន៍អាស៊ីសេរី មិនអាចសុំការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បានទេ នៅថ្ងៃទី២១ ខែមេសា។
ជុំវិញរឿងនេះ នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ថា ដើម្បីកុំឲ្យសំណុំរឿងនេះ អូសបន្លាយកាន់តែយូរនោះ តុលាការគួរប្រកាសសាលក្រមឲ្យបានឆាប់ ពីព្រោះដំណើរការនៅតុលាការ គឺមិនមែនបញ្ចប់ត្រឹមសាលាដំបូងនោះទេ បើសិនភាគីណាមួយមិនសុខចិត្ត ពួកគេអាចប្ដឹងបន្តទៅតុលាការជាន់ខ្ពស់ទៀត។
លោកកត់សម្គាល់ថា ពលរដ្ឋតែងតែដាក់ក្ដីសង្ឃឹម លើតុលាការក្នុងការផ្ដល់យុត្តិធម៌ និងទទួលបានសំណងខ្លះជូនពួកគាត់ ដើម្បីយកទៅដោះបំណុល ប៉ុន្តែបើសិនមិនទទួលបានដំណោះស្រាយឆាប់នោះទេ លោកថា នឹងធ្វើឲ្យជីវភាពរបស់ពលរដ្ឋកាន់តែលំបាក ហើយអាចនឹងប៉ះពាល់ផ្លូវចិត្តធ្ងន់ធ្ងរថែមទៀត។
លោក អំ សំអាត៖ «វាបង្កើតភាពអយុត្តិធម៌សម្រាប់ពួកគាត់មួយទៀតហើយ នៅក្នុងដំណើរការនីតិវិធី។ អ៊ីចឹងគាត់ក្លាយជាជនរងគ្រោះផង ហើយទទួលនៅភាពអយុត្តិធម៌ ហើយអ្វីដែលរង់ចាំអន្ទះសាហ្នឹង ចាំមើលដំណោះស្រាយ ឬក៏សាលក្រម ឬសាលដីកាហ្នឹង ដើម្បីទទួលបាននៅភាពយុត្តិធម៌សម្រាប់ពួកគាត់ជាពិសេស ពួកគាត់ដែលជំពាក់ បំណុលគេ វ័ណ្ឌក ដូចជា បំណុលមីក្រូហិរញ្ញវត្ថុ ធនាគារ ឬក៏ឯកជនបន្ថែមទៀត។ ពួកគាតដាក់ក្ដីសង្ឃឹមថា នឹងទទួលបានសំណងខ្លះឬក៏សំណងដើម្បីសងត្រឡប់ ទៅម្ចាស់បំណុលទាំងអស់នោះវិញ»។
អតីតឧកញ៉ា ហ៊ី គីមហុង ត្រូវបានសមត្ថកិច្ចចាប់ខ្លួន កាលពីខែ សីហា ឆ្នាំ២០២៣ ពាក់ព័ន្ធនឹងបទចោទឆបោកមានស្ថានទម្ងន់ទោស បន្ទាប់ពីក្រុមប្រជាពលរដ្ឋ បាន ដាក់ពាក្យបណ្ដឹងប្ដឹងឧកញ៉ារូបនេះ។ ប៉ុន្តែកាលពីដើមខែវិច្ឆិកាឆ្នាំ២០២៣ ម្ចាស់ ក្រុមហ៊ុនពិភពដីមាសអតីតឧកញ៉ា ហ៊ី គឹមហុង ត្រូវបានសាលាឧទ្ធរណ៍ភ្នំពេញ ដោះលែងឱ្យនៅក្រៅឃុំបណ្ដោះអាសន្ន បន្ទាប់ពីជាប់ពន្ធនាគារប្រមាណ ៣ខែ៕
